Naphcon-A ကို ဘာအတွက်အသုံးပြုကြသလဲ

Naphcon-A ကိုဓါတ်မတည့်မှုကြောင့်ဖြစ်တဲ့ မျက်စိဝေဒနာတွေကို ကုသရာမှာအဓိကအသုံးပြုပါတယ်။

Naphcon-A ဘယ်လိုသောက်သုံးသင့်သလဲ

ဒီဆေးဝါးကို သင့်ဆရာဝန်ညွှန်ကြားတဲ့အတိုင်းအတိအကျ လိုက်နာအသုံးပြုပါ။ သင့်ကိုပေးထားတဲ့ သတင်းအချက်အလက်အားလုံးကိုသေသေချာချာလေ့လာဖတ်ရှုပြီးညွှန်ကြားချက်အားလုံးကို တသဝေမတိမ်း လိုက်နာပါ။

• ဒီဆေးဝါးကို မျက်စဉ်းဆေးအဖြစ်သာအသုံးပြုပါ။
• မျက်စဉ်းမခပ်မီလက်ဆေးပါ။
• မျက်ကပ်မှန်ချွတ်ပါ။ မျက်စဉ်းခပ်ပြီးမျက်ကပ်မှန်ပြန်လည်တပ်ဆင်လို့ ရမရသင့်ဆရာဝန်ကို မေးမြန်းပါ။ မျက်လုံးကျိန်းစပ်နေရင် သို့မဟုတ် ပိုးဝင်နေရင် ပြန်မတပ်ပါနဲ့။
• ဆေးပုလင်းထိပ်ဝကို မျက်လုံး၊ မျက်ခွံ၊ အရေပြား စတာတွေအပါအဝင် အခြားဘာနဲ့မှ မထိတွေ့ပါစေနဲ့။
• မျက်စဉ်းခပ်တဲ့အခါ ခေါင်းကိုနောက်သို့လှန်ပြီးမျက်စိထဲဆေးစက်ချပါ။
• မျက်လုံးထဲဆေးရည် ကောင်းစွာစိမ့်ဝင်သွားအောင် မျက်စိမှိတ်ထားပြီးမျက်လုံးအတွင်းဘက်ထောင့်ကိုတစ်မိနစ်၊ နှစ်မိနစ်ခန့် လက်နဲ့အသာအယာဖိပေးပါ။
• အသုံးပြုပြီးတိုင်းဆေးပုလင်းကိုအဖုံးပြန်ဖုံးပါ။
• ဆေးရည်အရောင်ပြောင်းနေရင်၊ အရောင်နောက်နေရင်၊ ဆေးပုလင်းယိုစိမ့်နေရင်၊ အမှုန်အမွှားတွေ ရှိနေရင် ဆက်လက်အသုံးမပြုပါနဲ့။

Naphcon-A ဘယ်လိုသိမ်းဆည်းရမလဲ

Naphcon-Aကိုအခန်းအပူချိန်တွင် တိုက်ရိုက်နေရောင်ခြည်မထိုးအောင်နဲ့ စိုစွတ်မှုမရှိအောင်ထားတာကအကောင်းဆုံးသိုလှောင်သိမ်းဆည်းတဲ့နည်းပဲဖြစ်ပါတယ်။ ဆေးအာနိသင်ပျက်ပြယ်တာနဲ့ ဆေးအနေအထားပျက်ယွင်းမှုတွေမဖြစ်အောင်လို့ Naphcon-A ကိုရေချိုးခန်းထဲမှာသိမ်းဆည်းတာနဲ့ ရေခဲအောင် သိမ်းဆည်းတာတွေမပြုလုပ်ပါနဲ့။Naphcon-Aဆေးအမျိုးအစားနဲ့၊ ဆေးထုတ်လုပ်တဲ့ ကုမ္ပဏီကွဲပြားမှုပေါ်မူတည်ပြီးသိမ်းဆည်းတဲ့ပုံစံကွဲပြားခြားနားမှုရှိနိုင်ပါတယ်။ ဒီအတွက် ဆေးဘူးအခွံမှာပါတဲ့ သိုလှောင်သိမ်းဆည်းမှုညွှန်ကြားချက်ကို ကြည့်ရှုစစ်ဆေးတာမျိုးဒါမှမဟုတ် ဆေးဝါးကျွမ်းကျင်သူကိုမေးမြန်းတာမျိုးကိုအမြဲလုပ်ပါ။ လုံခြုံစိတ်ချရဖို့အတွက် ဆေးဝါးတွေအကုန်လုံးကို ကလေးတွေ၊ အိမ်မွေးတိရိစ္ဆာန်တွေနဲ့ ဝေးရာမှာထားပါ။

Naphcon-Aကိုအိမ်သာထဲကိုပစ်ချတာနဲ့ ရေထွက်ပေါက်တွေထဲကနေဆေးချတာမျိုးကိုမလုပ်သင့်ပါဘူး။ ဆေးဝါးတွေကိုမလိုအပ်တော့တဲ့အခါ ဒါမှမဟုတ် သက်တမ်းကုန်ဆုံးသွားတဲ့အခါတွေမှာစနစ်တကျစွန့်ပစ်ဖို့ အရေးကြီးပါတယ်။ ဆေးဝါးများကို စနစ်တကျဘယ်လိုစွန့်ပစ်ရမယ်ဆိုတာနဲ့ပတ်သက်လို့ သင့်ရဲ့ဆေးဝါးကျွမ်းကျင်ပညာရှင်နဲ့တိုင်ပင်ပါ။

Naphcon-A အသုံးမပြုခင် ဘာတွေသိသင့်သလဲ

အကယ်၍ သင့်မှာအောက်ဖော်ပြပါ အခြေအနေတစ်ခုခုရှိနေခဲ့မယ်ဆိုရင် ဆေးအသုံးမပြုခင် သင့်ဆရာဝန် သို့မဟုတ် ဆေးဝါးကျွမ်းကျင်ပညာရှင်ကိုပြောပြတိုင်ပင်သင့်ပါတယ်။

• ကိုယ်ဝန်ဆောင်နေချိန် သို့မဟုတ် ကလေးနို့တိုက်နေချိန် – အကယ်၍သင်ဟာကိုယ်ဝန်ဆောင်မိခင် သို့မဟုတ် ကလေးနို့တိုက်နေတဲ့ မိခင်တစ်ဦး ဖြစ်နေမယ်ဆိုရင် ဘယ်ဆေးကိုမဆို ဆရာဝန်မညွှန်ကြားဘဲမသုံးသင့်ပါဘူး။
• အခြားဆေးဝါးများ သောက်သုံးနေချိန် – တိုင်းရင်းဆေး၊ အားဖြည့်ဆေးများ အပါအဝင် သင်လက်ရှိသောက်သုံးနေတဲ့ ဆေးအားလုံးကိုသင့်ဆရာဝန်သိအောင် ပြောပြရမှာဖြစ်ပါတယ်။
• Naphcon-Aသို့မဟုတ် အခြားဆေးဝါးများတွင်ပါဝင်သည့် ပစ္စည်းတစ်မျိုးမျိုးနှင့် ဓါတ်မတည့်ခြင်း
• ရောဂါဝေဒနာတစ်ခုခု ခံစားနေရခြင်း

Naphcon-A အသုံးပြုနေသူအားလုံး

• သင့်ဆရာဝန်၊ သူနာပြု၊ ဆေးဝါးကျွမ်းကျင်ပညာရှင်၊ သွားဆရာဝန် စတဲ့ ကျန်းမာရေးစောင့်ရှောက်သူအားလုံးကိုသင်ဒီဆေးအသုံးပြုနေကြောင်းအသိပေးထားပါ။
• ဆေးအသုံးပြုပြီးကိုယ့်အခြေအနေကိုယ် မသိရသေးသရွေ့ အမြင်အာရုံကောင်းမွန်ဖို့လိုအပ်တဲ့တာဝန်နဲ့လှုပ်ရှားမှုတွေမပြုလုပ်မိပါစေနဲ့။
• အလင်းရောင်စူးစူးတွေကသင့်ကိုဒုက္ခပေးနိုင်တဲ့အတွက် နေကာမျက်မှန်တပ်ပါ။
• ဒီဆေးဝါးကို သင့်ဆရာဝန်ညွှန်ကြားထားတဲ့ အချိန်ကာလဒါမှမဟုတ် အသုံးပြုပုံအညွှန်းမှာဖော်ပြထားတဲ့ အချိန်ကာလထက်ကျော်လွန်ပြီးစွဲမသုံးပါနဲ့။ ဒီလိုစွဲသုံးခြင်းအားဖြင့် မျက်စိပိုမိုနီရဲလာနိုင်ပါတယ်။
• ဒီဆေးဝါးကို မျိုချမိရင် အန္တရာယ်ရှိနိုင်တဲ့အတွက် အကြောင်းတစ်စုံတစ်ရာကြောင့် သောက်လိုက်မိပြီဆိုတာနဲ့ အရေးပေါ်ဌာနကိုချက်ချင်းအကြောင်းကြားပါ။
• ဆေးအသုံးပြုနေစဉ် ကိုယ်ဝန်ရလာခဲ့ရင် ဒါမှမဟုတ် ကိုယ်ဝန်ယူဖို့ အစီအစဉ်ရှိလာခဲ့ရင် သင့်ဆရာဝန်ကို အသိပေးပါ။ ဆေးကြောင့်ရလာနိုင်တဲ့ ကောင်းကျိုးဆိုးကျိုးအားလုံးကိုချိန်ဆနိုင်ဖို့ သင့်ဆရာဝန်နဲ့ တိုင်ပင်ဆွေးနွေးပါ။
• အကယ်၍သင်ဟာ နို့တိုက်မိခင်တစ်ယောက်ဖြစ်မယ်ဆိုရင်လည်းဆေးကြောင့် သင့်ကလေးငယ်မှာ အန္တရာယ်ကျရောက်နိုင်ခြင်းရှိမရှိသင့်ဆရာဝန်နဲ့ ဆွေးနွေးတိုင်ပင်ပါ။
• ဒီဆေးဝါးကို ဆရာဝန်နဲ့ဆွေးနွေးတိုင်ပင်ခြင်မရှိဘဲအသက် ၆နှစ်အောက် ကလေးငယ်တွေအတွက် အသုံးမပြုသင့်ပါ။

ကိုယ်ဝန်ဆောင်နေချိန် ဒါမှမဟုတ် ကလေးနို့တိုက်နေချိန်မှာ Naphcon-A ကိုသုံးစွဲဖို့ စိတ်ချရပါသလား

ယခုဆေးဝါးကို ကိုယ်ဝန်ဆောင်နေချိန်နှင့် ကလေးနို့တိုက်နေချိန်တွင် အသုံးပြုလျှင် ဆိုးကျိုးများရှိမရှိကိုဆုံးဖြတ်နိုင်ရန်အတွက် လုံလောက်သောလေ့လာစမ်းသပ်ချက်များမရှိပါ။ ဆေးအသုံးမပြုမီတွင် ဖြစ်နိုင်ချေကောင်းကျိုးများနှင့် ဆိုးကျိုးများအားလုံးကိုချိန်ဆနိုင်ရန်အတွက် သင့်ရဲ့ဆရာဝန်နဲ့ တိုင်ပင်ဆွေးနွေးမှုပြုလုပ်ပါ။ ယခုဆေးဝါးသည် အမေရိကန်ပြည်ထောင်စုအစားအသောက်နဲ့ ဆေးဝါးကွပ်ကဲရေးအဖွဲ့၏ သတ်မှတ်ချက်အရ ကိုယ်ဝန်ဆောင်များတွင် ထိခိုက်နိုင်ချေအဆင့် Cရှိသည်ဟုသတ်မှတ်ထားသည်။

အမေရိကန်ပြည်ထောင်စုအစားအသောက်နဲ့ ဆေးဝါးကွပ်ကဲရေးအဖွဲ့၏ ကိုယ်ဝန်ဆောင်များတွင် ထိခိုက်နိုင်ချေအဆင့် သတ်မှတ်ချက်များမှာအောက်ပါအတိုင်းဖြစ်သည်။

• A=ဆိုးကျိုးမရှိပါ။
• B=လေ့လာမှုအချို့အရဆိုးကျိုးမရှိပါ။
• C=ဆိုးကျိုးအချို့ရှိနိုင်ပါသည်။
• D= ဆိုးကျိုးများရှိသည့် အထောက်အထားများရှိပါသည်။
• X=သောက်သုံး၍မရပါ (လုံးဝမတည့်ပါ)။
• N=အခြေအနေကိုမသိရသေးပါ။

Naphcon-A ကိုအသုံးပြုခြင်းဖြင့် ဘယ်လိုဘေးထွက်ဆိုးကျိုးတွေဖြစ်နိုင်သလဲ

Naphcon-A အသုံးပြုပြီးအောက်ဖော်ပြပါ ဘေးထွက်ဆိုးကျိုးလက္ခဏာတစ်စုံတစ်ရာ ဖြစ်လာခဲ့ရင်ဆေးရုံဆေးခန်းရှိရာသို့ ချက်ချင်းသွားရောက်ပြသပါ။

• ဓါတ်မတည့်တုန့်ပြန်မှုလက္ခဏာများ – ခန္ဓါကိုယ်တွင် အဖုအပိမ့်အနီကွက်များထွက်ခြင်း၊ အင်ပြင်ထခြင်း၊ ယားယံခြင်း၊ အရေပြားနီရဲခြင်း၊ ယောင်ယမ်းခြင်း၊ အရည်ကြည်ဖုထခြင်း၊ အဖျားရှိသည်ဖြစ်စေ၊ မရှိဘဲဖြစ်စေအရေခွံကွာခြင်း၊ အသက်ရှူသံရွှီရွှီမြည်ခြင်း၊ ရင်ကြပ်ခြင်း၊ လည်ချောင်းထဲတစ်ဆို့နေခြင်း၊ အသက်ရှူရခက်ခြင်း၊ စကားကောင်းကောင်းမပြောနိုင်ခြင်း၊ အသံသြခြင်း၊ ပါးစပ်၊ နှုတ်ခမ်း၊ လျှာ၊ လည်ချောင်း၊ မျက်နှာ စသည်တို့ ရောင်ရမ်းခြင်း
• အမြင်အာရုံပြောင်းလဲခြင်း၊ မျက်စိနာခြင်း၊ မျက်စိဆိုးဆိုးရွားရွားကျိန်းစပ်ခြင်း

ယခုဖော်ပြပါ ဘေးထွက်ဆိုးကျိုးများကိုခံစားရမှုမှာတစ်ဦးနှင့်တစ်ဦးကွဲပြားခြားနားမှုရှိနိုင်ပါတယ်။ အထက်ဖော်ပြပါဘေးထွက်ဆိုးကျိုးများတွင် မပါဝင်သည့် ဘေးထွက်ဆိုးကျိုးများလည်းရှိနိုင်ပါတယ်။ ဘေးထွက်ဆိုးကျိုးနှင့်ပတ်သက်၍ စိုးရိမ်ပူပန်မှုများရှိပါကသင်၏ဆရာဝန် သို့မဟုတ် ဆေးဝါးကျွမ်းကျင်ပညာရှင်နှင့် တိုင်ပင်ဆွေးနွေးမှုများပြုလုပ်ပါ။

ဘယ်ဆေးတွေက Naphcon-A နဲ့ ဓါတ်ပြုနိုင်သလဲ

Naphcon-A ဟာသင်အခုလောလောဆယ်သောက်သုံးနေတဲ့တခြားသော ဆေးဝါးတွေနဲ့ ဓါတ်ပြုမှုတွေဖြစ်နိုင်ပြီး ဆေးဝါးတွေအကျိုးသက်ရောက်မှုပုံစံနဲ့ ဘေးထွက်ဆိုးကျိုးတွေဖြစ်လာနိုင်ချေ ပြောင်းလဲမှုတွေဖြစ်နိုင်ပါတယ်။ မလိုလားအပ်တဲ့ ဆေးဝါးဓါတ်ပြုမှုတွေ မဖြစ်လာအောင်လို့ သင်လက်ရှိသောက်သုံးနေတဲ့ ဆေးဝါးတွေအားလုံးရဲ့စာရင်းကို လုပ်ထားပြီး (စာရင်းလုပ်တဲ့အခါမှာ ဆရာဝန်ညွှန်ကြားထားတာတွေ၊ မညွှန်ကြားဘဲသောက်သုံးနေတာတွေ၊ သဘာဝဆေးဘက်ဝင်ပစ္စည်းတွေအားလုံးပါဝင်ပါတယ်) ဆရာဝန် ဒါမှမဟုတ် ဆေးဝါးကျွမ်းကျင်သူကိုအမြဲပြောပြပါ။ ဆေးဝါးတွေကို ဆရာဝန်ခွင့်ပြုချက်မပါဘဲသောက်သုံးခြင်း၊ ရပ်ဆိုင်းခြင်း၊ ပမာဏကိုပြောင်းလဲခြင်းတွေမပြုလုပ်ပါနဲ့။

အစားအသောက်တွေနဲ့ အရက်က Naphcon-A နဲ့ ဓါတ်ပြုနိုင်သလား

Naphcon-Aက အစားအသောက် ဒါမှမဟုတ် အရက်သေစာနဲ့ ဓါတ်ပြုမှုတွေဖြစ်ပြီး ဆေးဝါးတွေအကျိုးသက်ရောက်မှုပုံစံနဲ့ ဘေးထွက်ဆိုးကျိုးတွေဖြစ်လာနိုင်ချေ ပြောင်းလဲမှုတွေဖြစ်နိုင်ပါတယ်။ မလိုလားအပ်တဲ့ ဓါတ်ပြုမှုတွေမဖြစ်လာအောင်လို့ အစားအသောက်၊ အရက်သေစာတွေနဲ့ ဓါတ်ပြုနိုင်ချေရှိမရှိကိုမေးမြန်းတိုင်ပင်ပါ။

ဘယ်ရောဂါအခြေအနေတွေက Naphcon-A နဲ့ ဓါတ်ပြုနိုင်သလဲ

Naphcon-Aဟာသင့်ရဲ့ နဂိုကျန်းမာရေးအခြေအနေများနဲ့ သက်ရောက်ဓါတ်ပြုမှုတွေရှိနိုင်ပါတယ်။ သင့်ရဲ့ ကျန်းမာရေးအခြေအနေကိုပိုဆိုးသွားစေတာဒါမှမဟုတ် ဆေးသက်ရောက်မှုပုံစံပြောင်းလဲသွားတာတွေဖြစ်နိုင်ပါတယ်။ ဒါ့ကြောင့် သင့်ရဲ့ကျန်းမာရေးအခြေအနေအကုန်လုံးကိုသင့်ရဲ့ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်ကိုအသိပေးဖို့ အရေးကြီးပါတယ်။

ယခုအချက်အလက်များသည် ဆေးပညာအကြံပေးမှုကို အစားထိုးရန်အတွက်မဟုတ်ပါ။ သင်သည်သင့်ဆရာဝန်နှင့် အမြဲတမ်းတိုင်ပင်ဆွေးနွေးသင့်ပါသည်

အရွယ်ရောက်ပြီးသူတွေအတွက် Naphcon-A ရဲ့ အသုံးပြုရမယ့်ပမာဏကဘယ်လောက်လဲ

အသေးစိတ်ကိုသင့်ဆရာဝန်နဲ့ ဆွေးနွေးတိုင်ပင်ပါ။

ကလေးတွေအတွက် Naphcon-A ရဲ့ အသုံးပြုရမယ့်ပမာဏကဘယ်လောက်လဲ

ကလေးလူနာများမှာဘယ်လောက်အချိုးအစားပေးရမလဲဆိုတာအတည်မပြုရသေးပါ။ သင့်ကလေးငယ်အတွက် အသုံးပြုရန် စိတ်ချရမှုရှိချင်မှရှိနိုင်ပါလိမ့်မယ်။ ဘယ်ဆေးဝါးမဆို အသုံးမပြုရသေးခင်မှာစိတ်ချရမှုအနေအထားကိုအပြည့်အဝနားလည်ဖို့ လိုအပ်ပါလိမ့်မယ်။ အချက်အလက်များထပ်မံရရှိရန်အတွက် သင့်ရဲ့ ဆရာဝန် သို့မဟုတ် ဆေးဝါးကျွမ်းကျင်သူနဲ့ တိုင်ပင်ဆွေးနွေးပါ။

Naphcon-A ကိုဘယ်လိုရရှိနိုင်သလဲ

Naphcon-A ကိုမျက်စဉ်းဆေးရည်ပုံစံဖြင့်ရရှိနိုင်ပါတယ်။

အရေးပေါ်အခြေအနေ ဒါမှမဟုတ် ဆေးပမာဏလွန်သွားချိန်မှာ ဘာလုပ်သင့်သလဲ။

အရေးပေါ်အခြေအနေသို့မဟုတ် ဆေးပမာဏလွန်သွားတဲ့အခြေအနေတွေမှာအရေးပေါ်ဆေးရုံဆေးခန်းများသို့ သွားရောက်ကုသမှုခံယူပါ

ဆေးသောက်ရမယ့်အချိန်လွတ်သွားခဲ့ရင် ဘာလုပ်ရမလဲ။

Naphcon-Aကိုအသုံးပြုဖို့လွတ်သွားခဲ့ပါက (မေ့ခဲ့ပါက) သတိရတဲ့အချိန်မှာအမြန်ဆုံးအသုံးပြုပါ။ သို့သော်လည်းနောက်တစ်ကြိမ်မျက်စဉ်းဆေးခပ်ရမယ့်အချိန်နဲ့ နီးကပ်နေပြီဆိုရင်တော့ လွတ်သွားတဲ့အကြိမ်ကိုကျော်ပြီးပုံမှန်အချိန်မှာပဲခပ်လိုက်ပါ။ ဆေးပမာဏကို နှစ်ဆတိုးခပ်တာမျိုးမလုပ်ပါနဲ့။

Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ