Amitriptyline (အေမီထရစ်တလင်း)

တခြားဆေးတွေလိုပဲ သူ့မှာလည်း ဘေးထွက်ဆိုးကျိုး အနည်းငယ် ရှိနိုင်ပါတယ်။ ဖြစ်လာခဲ့ရင်တောင် များသောအားဖြင့် လက္ခဏာက ပြင်းထန်လေ့မရှိပါဘူး။ ဆေးရပ်လိုက်ရင် ဒါမှမဟုတ် ဆေးပမာဏလျှော့လိုက်ရင် သက်သာသွားပါတယ်။ တွေ့ရတတ်တဲ့ ဘေးထွက်ဆိုးကျိုးတွေကတော့

• ငိုက်မြည်းတာ
• ညီးစီစီဖြစ်တာ
• နှလုံးခုန် မြန်တာ
• နှုတ်ခမ်းခြောက်တာ
• ဝမ်းချုပ်တာ
• ကိုယ်အလေးချိန် တက်တာ
• ဆီးသွားရခက်တာ
• အမြင်အာရုံဝါးတာမျိုးတွေ ခံစားရနိုင်ပါတယ်။

အပေါ်မှာပြောတဲ့ ဘေးထွက်ဆိုးကျိုးတွေက ပိုဆိုးလာမယ်ဆိုရင် ဆရာဝန် ဒါမှဟုတ် ဆေးဝါးကျွမ်းကျင်ပညာရှင်တွေနဲ့ ချက်ချင်း ဆွေးနွေးပါ။

Amitriptylineကို အလွန်အကျွံ သုံစွဲမိရင် အခုလို လက္ခဏာတွေ ခံစားရနိုင်ပါတယ်။

• နှလုံးခုန်နှုန်း မမှန်တာ
• တက်တာ
• ကိုမာဝင်တာ
• အာရုံရှုပ်ထွေးတာ
• အာရုံစိုက်ရခက်တာ
• နားထဲမှာ မရှိတဲ့ အသံတွေ ကြားနေတာ
• အာရုံစိုက်ရခက်တာ
• အရမ်းအိပ်ချင်တာ
• ကြွက်သားတောင့်တင်းတာ
• အော့အန်တာ
• အဖျားတက်တာ
• ကိုယ်အပူချိန် ကျဆင်းတာတွေ ခံစားရနိုင်ပါတယ်။

အစားအသောက်တွေနဲ့ အရက်က Amitriptylineနဲ့ ဓာတ်ပြုနိုင်သလား

Amitriptyline (အေမီထရစ်တလင်း)က အစားအသောက် ဒါမှမဟုတ် အရက်သေစာနဲ့ ဓာတ်ပြုမှုတွေဖြစ်ပြီး ဆေးဝါး အာနိသင်ပြောင်းတာနဲ့ ဘေးထွက်ဆိုးကျိုးတွေ ဖြစ်လာနိုင်ပါတယ်။ ဆေးသောက်နေစဉ်မှာ အရက်သောက်တာမျိုးကို ရှောင်ပါ။ ကဖင်းပါတဲ့ သောက်စရာတွေကိုလည်း ရှောင်သင့်ပါတယ်။ မလိုလားအပ်တဲ့ ဓာတ်ပြုမှုတွေ မဖြစ်လာအောင်လို့ အစားအသောက်၊ အရက်သေစာတွေနဲ့ ဓာတ်ပြုနိုင်ခြေ ရှိ၊ မရှိကို ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်နဲ့ မေးမြန်းတိုင်ပင်ပါ။

ဘယ်ရောဂါအခြေအနေတွေက Amitriptylineနဲ့ ဓာတ်ပြုနိုင်သလဲ

Amitriptylineက သင့်ရဲ့ နဂိုကျန်းမာရေးအခြေအနေတွေအပေါ် သက်ရောက်မှုတွေ ရှိနိုင်ပါတယ်။ သင့်ရဲ့ ကျန်းမာရေးအခြေအနေကို ပိုဆိုးသွားစေတာ ဒါမှမဟုတ် ဆေးအာနိသင် ပြောင်းလဲသွားတာတွေ ဖြစ်နိုင်ပါတယ်။ ဒါ့ကြောင့် သင့်ရဲ့ကျန်းမာရေးအခြေအနေအကုန်လုံးကို သင့်ရဲ့ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်ကို ကြိုတင်အသိပေးဖို့ အရေးကြီးပါတယ်။ အထူးသဖြင့်

• နှလုံးရောဂါ
• ဆီးသွားရခက်တာ
• သိုင်းရွိုက်ဟော်မုန်းများနေတာ
• ဆီးချို
• အသည်းရောဂါ
• ရေတိမ်
• ဆီးကျိတ်ကြီးတာ
• ကျောက်ကပ်ရောဂါ
• စိတ်ကစဉ့်ကလျားဖြစ်တာ စတာတွေရှိမယ်ဆိုရင် ဆရာဝန်ကို ပြောပြပါ။

ဆေးသုံးရန်အညွှန်း

အခုအချက်အလက်များမှာ ဆေးပညာအကြံပေးမှုကို အစားထိုးရန်အတွက်မဟုတ်ပါ။ ဆေးဝါးများကို အသုံးမပြုခင် ဆရာဝန် သို့မဟုတ် ဆေးဝါးပညာရှင်နဲ့ အမြဲတမ်းတိုင်ပင်ဆွေးနွေးသင့်ပါတယ်။

အရွယ်ရောက်ပြီးသူတွေအတွက် အသုံးပြုရမယ့်ပမာဏ

• အရွယ်ရောက်ပြီးသူ : စစချင်းမှာ တစ်နေ့ကို 75 mg ဆေးပမာဏကို ခွဲပြီး သောက်ပေးပါ။ ဒါမှမဟုတ် အိပ်ရာမဝင်ခင်မှာ  50-100 mg သောက်ပါ။ ဆရာဝန်က လိုအပ်သလို ညွှန်ကြားပေးပါလိမ့်မယ်။ အချို့လူနာတွေမှာ ဆေးပမာ ပိုတိုးပေးဖို့ လိုပါမယ်။
• ဆယ်ကျော်သက်တွေနဲ့ သက်ကြီးရွယ်အိုတွေအတွက်  : 10 mg တစ်နေ့ ၃ ကြိမ် ဒါမှမဟုတ် အိပ်ရာမဝင်ခင်မှ 20 mg သောက်ပေးပါ။
• ၁၂နှစ်အောက် ကလေး : ဆရာဝန်ညွှန်ကြားတဲ့ ပမာဏပဲ တိုက်ရပါမယ်။

Amitriptylineကို ဘယ်လိုရရှိနိုင်သလဲ

Amitriptyline (အေမီထရစ်တလင်း)ကို အောက်ပါ ပုံစံ၊ ပြင်းအားတွေနဲ့ ဝယ်ယူရရှိနိုင်ပါတယ်။

သောက်ဆေးပြား ပုံစံ နဲ့ အရည်ပုံစံ– 10 mg, 25 mg and 50 mg အသီးသီး ရရှိနိုင်ပါတယ်။

ဆေးသောက်ဖို့ လွတ်သွားခဲ့ရင် (မေ့သွားခဲ့ရင်) ဘာလုပ်ရမလဲ။

Amitriptylineကို သောက်ဖို့ လွတ်သွားခဲ့ပါက (မေ့ခဲ့ပါက) သတိရတဲ့အချိန်မှာ အမြန်ဆုံးသောက်ပါ။ ဒါပေမယ့် နောက်တစ်ကြိမ်မှ သတိရတယ်ဆိုရင်တော့ လွတ်သွားတဲ့ဆေးကို ထားလိုက်ပါ။ ပုံမှန်အတိုင်းပဲ ဆက်သောက်ပါ။ ဆေးနှစ်ကြိမ် သောက်တာမျိုး မလုပ်ပါနဲ့။