Daflon (ဒက်ဖလွန်)

Daflon (ဒက်ဖလွန်) ကို ဘာအတွက်အသုံးပြုကြသလဲ

Daflonကို သွေးပြန်ကြောလည်ပတ်မှု မကောင်းတာကြောင့်ဖြစ်တဲ့ ခြေထောက်လေးတာ၊ ခြေသလုံးကြွက်သားနာတာနဲ့ ခြေထောက်အကြောဆွဲတာတွေမှာ လက္ခဏာသက်သာစေဖို့ အသုံးပြုပါတယ်။ လိပ်ခေါင်းရောဂါလက္ခဏာသက်သာစေဖို့လည်း အသုံးပြုနိုင်ပါတယ်။

Daflon(ဒက်ဖလွန်)ကို ဘယ်လိုသောက်သုံးသင့်သလဲ

အစာစားချိန်မှာ အစာနဲ့တွဲပြီး သောက်သုံးရပါမယ်။

Daflon (ဒက်ဖလွန်) ကို ဘယ်လိုသိမ်းဆည်းရမလဲ

ဆေးကို အခန်းအပူချိန်မှာ သိုလှောင်ထားနိုင်ပါတယ်။ တိုက်ရိုက်နေရောင်ခြည်မထိအောင်နဲ့ စိုစွတ်မှုမရှိအောင်ထားပါ။ ဆေးမပျက်စီးစေဖို့ ရေချိုးခန်းထဲမှာ သိမ်းဆည်းတာနဲ့ ရေခဲပြီး သိမ်းဆည်းတာတွေမပြုလုပ်ပါနဲ့။

ဆေးထုတ်လုပ်တဲ့ ကုမ္ပဏီကွဲပြားမှုပေါ်မူတည်ပြီး သိမ်းဆည်းတဲ့ပုံစံ ကွဲပြားခြားနားမှုရှိနိုင်ပါတယ်။ ဒီအတွက် ဆေးဘူးအခွံမှာပါတဲ့ သိုလှောင်သိမ်းဆည်းမှုညွှန်ကြားချက်ကို ကြည့်ရှုစစ်ဆေးတာမျိုး ဒါမှမဟုတ် ဆေးဝါးကျွမ်းကျင်ပညာရှင်ကို မေးမြန်းတာမျိုး အမြဲလုပ်ပါ။ လုံခြုံစိတ်ချရဖို့အတွက် ဆေးဝါးတွေအကုန်လုံးကို ကလေးတွေ၊ အိမ်မွေးတိရိစ္ဆာန်တွေနဲ့ ဝေးရာမှာထားပါ။

ဆေးကို အိမ်သာထဲကိုပစ်ချတာနဲ့ ရေထွက်ပေါက်တွေထဲကနေ သွန်ချတာမျိုးကို မလုပ်သင့်ပါဘူး။ ဒါ့ပြင် ဆေးဝါးတွေကို မလိုအပ်တော့တဲ့အခါ ဒါမှမဟုတ် သက်တမ်းကုန်ဆုံးသွားတဲ့အခါတွေမှာ စနစ်တကျစွန့်ပစ်ဖို့ အရေးကြီးပါတယ်။ ဆေးဝါးတွေကို စနစ်တကျဘယ်လိုစွန့်ပစ်ရမယ်ဆိုတာနဲ့ ပတ်သက်ပြီး သင့်ရဲ့ဆေးဝါးကျွမ်းကျင်ပညာရှင်နဲ့ တိုင်ပင်ပါ။

ကြိုတင်အသိပေးချက်နှင့် သတိပြုရန်အချက်များ

Daflon(ဒက်ဖလွန်) အသုံးမပြုခင် ဘာတွေသိသင့်သလဲ

မသောက်သုံးခင် အောက်ပါအခြေအနေတွေရှိရင် ဆရာဝန်ကို ပြောပြသင့်ပါတယ်။

• ကိုယ်ဝန်ရှိရင် ဒါမှမဟုတ် ကလေးနို့တိုက်နေရင်။
• တခြားစွဲသောက်နေတဲ့ ဆေးတွေရှိရင် (ဆရာဝန်ညွှန်ကြားထားတဲ့ဆေး၊ ဆေးဆိုင်ကနေ ဝယ်သောက်နေတဲ့ဆေး၊ သစ်ဥသစ်ဖု၊ အခြားဆေး)
• ဆေးရဲ့ ပါဝင်ပစ္စည်းတွေနဲ့ ဓာတ်မတည့်ရင်
• တခြားရောဂါအခံတွေ ရှိနေရင်

ကိုယ်ဝန်ဆောင်နေချိန် ဒါမှမဟုတ် ကလေးနို့တိုက်နေချိန်မှာDaflon(ဒက်ဖလွန်)ကို သုံးစွဲဖို့ စိတ်ချရပါသလား

ကိုယ်ဝန်ဆောင်ချိန် : တိရိစ္ဆာန်တွေမှာ လေ့လာချက်အရတော့ ဗိုက်ထဲမှာ သန္ဓေသားကို ထိခိုက်စေတာ မတွေ့ရပါဘူး။ လူမှာတော့ ဒီနေ့အထိ ဆိုးကျိုးတစ်စုံတစ်ရာရှိတာမျိုး မသိရသေးပါဘူး။

နို့တိုက်ချိန် : မိခင်နို့ထဲမှာ ပါမပါ သေချာမစိရသေးပေမယ့် ဆေးသောက်နေတဲ့ ရက်တွေမှာ ကလေးကို နို့တိုက်တာ ရပ်ထားသင့်ပါတယ်။

ဘေးထွက်ဆိုးကျိုးများ

Daflon(ဒက်ဖလွန်)ကို အသုံးပြုခြင်းကြောင့် ဘယ်လိုဘေးထွက်ဆိုးကျိုးတွေဖြစ်နိုင်သလဲ

Daflonက များသောအားဖြင့် အန္တရာယ်ကင်းပြီး ဘေးထွက်ဆိုးကျိုးလည်း ရှားပါတယ်။ ဒါပေမယ့် တွေ့ရတတ်တဲ့ ဘေးထွက်ဆိုးကျိုးတွေကတော့

• ဝမ်းလျှောတာ
• ပျို့တာ
• အန်တာ
• အစာမကြေတာ
• အူမကြီးရောင်တာ
• ခေါင်းမူးတာ
• ခေါင်းကိုက်တာ
• အနီကွက် ဒါမှမဟုတ် အင်ပြင်ထွက်တာတွေပဲ ဖြစ်ပါတယ်။

ခုပြောတဲ့ ဘေးထွက်ဆိုးကျိုးတွေက လူတိုင်းမှာ ဖြစ်ချင်မှဖြစ်မှာပါ။ ဒီထဲမှာ မပါတဲ့ တခြားဘေးထွက်ဆိုးကျိုးတွေလည်း ရှိနိုင်ပါတယ်။ ဘေးထွက်ဆိုးကျိုးနဲ့ ပတ်သက်ပြီး စိုးရိမ်ပူပန်မှုများရှိနေမယ်ဆိုရင် ဆရာဝန် သို့မဟုတ် ဆေးဝါးကျွမ်းကျင်ပညာရှင်နဲ့ တိုင်ပင်ဆွေးနွေးပါ။

ဆေးဝါးဓာတ်ပြုမှုများ

ဘယ်ဆေးတွေက Daflon(ဒက်ဖလွန်) နဲ့ ဓာတ်ပြုနိုင်သလဲ

Daflonက လောလောဆယ် သောက်သုံးနေတဲ့ တခြားဆေးဝါးတွေနဲ့ ဓာတ်ပြုမှုတွေဖြစ်နိုင်ပြီး ဆေးဝါးတွေရဲ့ အာနိသင်ပြောင်းလဲတာ၊ ဘေးထွက်ဆိုးကျိုးတွေ ပိုခံစားရတာတွေ ဖြစ်နိုင်ပါတယ်။

မလိုလားအပ်တဲ့ ဆေးဝါးဓာတ်ပြုမှုတွေ ဖြစ်မလာအောင်လို့ သင်လက်ရှိသောက်သုံးနေတဲ့ ဆေးဝါးတွေ အားလုံးရဲ့ စာရင်းကို လုပ်ထားပြီး (စာရင်းလုပ်တဲ့အခါမှာ ဆရာဝန်ညွှန်ကြားထားတာတွေ၊ မညွှန်ကြားဘဲ သောက်သုံးနေတာတွေ၊ သဘာဝဆေးဘက်ဝင်ပစ္စည်းတွေ အားလုံးပါဝင်ပါတယ်) ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်ကို ပြောပြဖို့ လိုပါတယ်။ ဆရာဝန်နဲ့ မတိုင်ပင်ဘဲ ဘယ်ဆေးကိုမှ စသောက်တာ၊ ရပ်တာ၊ ဆေးအတိုးအလျှော့လုပ်တာတွေ မလုပ်ရပါဘူး။

အစားအသောက်တွေနဲ့ အရက်က Daflon(ဒက်ဖလွန်) နဲ့ ဓာတ်ပြုနိုင်သလား

Daflonက အစားအသောက် ဒါမှမဟုတ် အရက်သေစာနဲ့ ဓာတ်ပြုမှုတွေဖြစ်ပြီး ဆေးဝါး အာနိသင်ပြောင်းတာနဲ့ ဘေးထွက်ဆိုးကျိုးတွေ ဖြစ်လာနိုင်ပါတယ်။ မလိုလားအပ်တဲ့ ဓာတ်ပြုမှုတွေ မဖြစ်လာအောင်လို့ အစားအသောက်၊ အရက်သေစာတွေနဲ့ ဓာတ်ပြုနိုင်ခြေ ရှိ၊ မရှိကို ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်နဲ့ မေးမြန်းတိုင်ပင်ပါ။

ဘယ်ရောဂါအခြေအနေတွေက Daflon(ဒက်ဖလွန်) နဲ့ ဓာတ်ပြုနိုင်သလဲ

Daflonက သင့်ရဲ့ နဂိုကျန်းမာရေးအခြေအနေတွေအပေါ် သက်ရောက်မှုတွေ ရှိနိုင်ပါတယ်။ သင့်ရဲ့ ကျန်းမာရေးအခြေအနေကို ပိုဆိုးသွားစေတာ ဒါမှမဟုတ် ဆေးအာနိသင် ပြောင်းလဲသွားတာတွေ ဖြစ်နိုင်ပါတယ်။ ဒါ့ကြောင့် သင့်ရဲ့ကျန်းမာရေးအခြေအနေအကုန်လုံးကို သင့်ရဲ့ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်ကို ကြိုတင်အသိပေးဖို့ အရေးကြီပါတယ်

သောက်သုံးရန်အညွှန်း

အခုအချက်အလက်များမှာ ဆေးပညာအကြံပေးမှုကို အစားထိုးရန်အတွက်မဟုတ်ပါ။ ဆေးဝါးများကို အသုံးမပြုခင် ဆရာဝန် သို့မဟုတ် ဆေးဝါးပညာရှင်နဲ့ အမြဲတမ်းတိုင်ပင်ဆွေးနွေးသင့်ပါတယ်။

အရွယ်ရောက်ပြီးသူတွေအတွက်  အသုံးပြုရမယ့်ပမာဏ

• သွေးပြန်ကြောရောဂါများအတွက် : တစ်နေ့ သောက်ဆေး တစ်လုံး
• လိပ်ခေါင်းရောဂါအတွက် : ပထမ၄ရက်မှာ တစ်နေ့ ၃လုံး နောက်၃ရက်မှာ တစ်ရက် ၂လုံး (စုစုပေါင်း ၁ပတ်)

ကလေးတွေအတွက် အသုံးပြုရမယ့်ပမာဏ

ကလေးများအတွက် သတ်မှတ်ထားတဲ့ ပမာဏ မရှိပါ။ ကလေးများအတွက် စိတ်ချရမှု အားနည်းတာကြောင့် ဖြစ်ပါတယ်။ ဆေးမသောက်ခင်မှာ ဆေးက အန္တရာယ်ကင်းရဲ့လားဆိုတာကို သိထားသင့်ပါတယ်။ ပိုပြီး သိချင်တာတွေရှိရင် ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်နဲ့ တိုင်ပင်နိုင်ပါတယ်။

Daflon(ဒက်ဖလွန်)ကို ဘယ်လိုရရှိနိုင်သလဲ

အလွှာပါးအုပ်ထားသော 500mg, 1000mg ဆေးလုံးများ

အရေးပေါ်အခြေအနေတွေ၊ ဆေးပမာဏလွန်သွားတဲ့ အခြေအနေတွေမှာ ဘာလုပ်သင့်သလဲ။

အရေးပေါ်အခြေအနေ သို့မဟုတ် ဆေးပမာဏလွန်သွားတဲ့ အခြေအနေတွေမှာ အရေးပေါ်ဆေးရုံဆေးခန်းများမှာ သွားရောက်ကုသမှုခံယူပါ။

ဆေးသောက်ဖို့ လွတ်သွားခဲ့ရင် (မေ့သွားခဲ့ရင်) ဘာလုပ်ရမလဲ။

ဆေးသောက်ဖို့ လွတ်သွားခဲ့ပါက (မေ့ခဲ့ပါက) သတိရတဲ့အချိန်မှာ အမြန်ဆုံးသောက်သုံးပါ။ ဒါပေမယ့် နောက်တစ်ကြိမ်သောက်ရမယ့်အချိန်မှ သတိရတယ်ဆိုရင်တော့ လွတ်သွားတဲ့ဆေးကို ထားလိုက်ပါ။ ပုံမှန်အတိုင်းပဲ ဆက်သောက်ပါ။ ဆေးနှစ်ခါ သောက်တာမျိုး မလုပ်ပါနဲ့။

ရေးသားသူ- Dr Zin Thu Thu Win