Clopidogrel (ကလိုပီဒိုဂရဲလ်)

Clopidogrel (ကလိုပီဒိုဂရဲလ်) ဆိုတာ သွေးဥမွှားတွေ စုကပ်ပြီး သွေးခဲဖြစ်တာကို တားပေးတဲ့ ဆေးဝါးပါ။ နှလုံးရောဂါ ဒါမှမဟုတ် လေဖြတ်နိုင်ခြေရှိတဲ့သူတွေမှာ ပေးလေ့ရှိပါတယ်။ သူတို့တွေမှာ နှလုံးသွေးကြောမှာ သွေးခဲပိတ်ပြီး နှလုံးပုပ်တာ၊ ဦးနှောက်သွေးကြောမှာ သွေးခဲပြီး လေဖြတ်တာတွေ မဖြစ်အောင် ကြိုတင်ကာကွယ်ဖို့အတွက် သောက်ရတတ်ပါတယ်။

အသုံးပြုပုံများ

Clopidogrel (ကလိုပီဒိုဂရဲလ်) ကို ဘာအတွက် အသုံးပြုပါသလဲ။

Clopidogrelကို

• နှလုံးရောဂါရှိသူများ၊ လေဖြတ်ဖူးသူများနဲ့ သွေးကြောရောဂါရှိသူများတွင် နှလုံးသွေးကြောပိတ်ခြင်းကို ကာကွယ်ရန်
• အက်စပရင်နဲ့ တွဲပြီး နှလုံးသွေးကြောကျဉ်းသူများတွင် ရင်ဘတ်အောင့်ခြင်းကို သက်သာစေရန်
• နှလုံးစတန့်ထည့်ပြီး သွေးခဲခြင်းကို ကာကွယ်ဖို့ အက်စပရင်နဲ့ တွဲပြီး သုံးလေ့ရှိပါတယ်။

Clopidogrel (ကလိုပီဒိုဂရဲလ်) ကို ဘယ်လိုသောက်သုံးသင့်သလဲ။

များသောအားဖြင့် Clopidogrel ကို တစ်နေ့တစ်ကြိမ် သတ်မှတ်ထားတဲ့ ပမာဏအတိုင်း မှီဝဲရတတ်ပါတယ်။ ဆရာဝန်ညွှန်ကြားတဲ့အတိုင်း သောက်ပေးပါ။

ဆေးအာနိသင်ကောင်းမွန်စေဖို့ နေ့တိုင်း အချိန်မှန်သောက်ဖို့ လိုပါတယ်။ ခန္ဓာကိုယ်က ဆေးကို တုံ့ပြန်တဲ့အပေါ် မူတည်ပြီး ဆေးပမာဏကို ဆရာဝန်က အတိုးအလျော့ လုပ်ပေးပါလိမ့်မယ်။ ဒီဆေးကို လနဲ့ချီ၊ နှစ်နဲ့ချီ စွဲသောက်ရနိုင်ပါတယ်။ ဒါကြောင့် ဆရာဝန် ညွှန်ကြားချက် မရှိဘဲ ကိုယ့်သဘောနဲ့ကိုယ် ရပ်တာမျိုး မလုပ်ရပါ။

Clopidogrel (ကလိုပီဒိုဂရဲလ်) ကို ဘယ်လိုသိမ်းဆည်းသင့်သလဲ။

Clopidogrel ကို အခန်းအပူချိန်မှာ သိုလှောင်ထားနိုင်ပါတယ်။ တိုက်ရိုက်နေရောင်ခြည်မထိအောင်နဲ့ စိုစွတ်မှုမရှိအောင်ထားပါ။ ဆေးမပျက်စီးစေဖို့ ရေချိုးခန်းထဲမှာ သိမ်းဆည်းတာနဲ့ ရေခဲပြီး သိမ်းဆည်းတာတွေမပြုလုပ်ပါနဲ့။

ဆေးထုတ်လုပ်တဲ့ ကုမ္ပဏီကွဲပြားမှုပေါ်မူတည်ပြီး သိမ်းဆည်းတဲ့ပုံစံ ကွဲပြားခြားနားမှုရှိနိုင်ပါတယ်။ ဒီအတွက် ဆေးဘူးအခွံမှာပါတဲ့ သိုလှောင်သိမ်းဆည်းမှုညွှန်ကြားချက်ကို ကြည့်ရှုစစ်ဆေးတာမျိုး ဒါမှမဟုတ် ဆေးဝါးကျွမ်းကျင်ပညာရှင်ကို မေးမြန်းတာမျိုး အမြဲလုပ်ပါ။ လုံခြုံစိတ်ချရဖို့အတွက် ဆေးဝါးတွေအကုန်လုံးကို ကလေးတွေ၊ အိမ်မွေးတိရိစ္ဆာန်တွေနဲ့ ဝေးရာမှာထားပါ။

ဆေးကို အိမ်သာထဲကိုပစ်ချတာနဲ့ ရေထွက်ပေါက်တွေထဲကနေ သွန်ချတာမျိုးကို မလုပ်သင့်ပါဘူး။ ဒါ့ပြင် ဆေးဝါးတွေကို မလိုအပ်တော့တဲ့အခါ ဒါမှမဟုတ် သက်တမ်းကုန်ဆုံးသွားတဲ့အခါတွေမှာ စနစ်တကျစွန့်ပစ်ဖို့ အရေးကြီးပါတယ်။ ဆေးဝါးတွေကို စနစ်တကျဘယ်လိုစွန့်ပစ်ရမယ်ဆိုတာနဲ့ ပတ်သက်ပြီး သင့်ရဲ့ဆေးဝါးကျွမ်းကျင်ပညာရှင်နဲ့ တိုင်ပင်ပါ။

ကြိုတင်သတိပြုရန်များနှင့် အသိပေးချက်များ

Clopidogrel (ကလိုပီဒိုဂရဲလ်) အသုံးမပြုခင် ဘာတွေသိသင့်သလဲ။

• ကိုယ်ဝန်ရှိရင် ဒါမှမဟုတ် ကလေးနို့တိုက်နေရင်
• တခြားစွဲသောက်နေတဲ့ ဆေးတွေရှိရင် (ဆရာဝန်ညွှန်ကြားထားတဲ့ဆေး၊ ဆေးဆိုင်ကနေ ဝယ်သောက်နေတဲ့ဆေး၊ သစ်ဥသစ်ဖု၊ အခြားဆေး)
• ဆေးရဲ့ ပါဝင်ပစ္စည်းတွေနဲ့ ဓာတ်မတည့်ရင်
• တခြားရောဂါအခံတွေ ရှိနေရင်

ကိုယ်ဝန်ဆောင်နေချိန် ဒါမှမဟုတ် ကလေးနို့တိုက်နေချိန်မှာ Clopidogrel (ကလိုပီဒိုဂရဲလ်) ကို သုံးစွဲဖို့ စိတ်ချရပါသလား။

ဘေးထွက်ဆိုးကျိုးများ

Clopidogrel (ကလိုပီဒိုဂရဲလ်)ကို အသုံးပြုခြင်းဖြင့် ဘယ်လိုဘေးထွက်ဆိုးကျိုးတွေဖြစ်နိုင်သလဲ။

တခြားဆေးတွေလိုပဲ သူ့မှာလည်း ဘေးထွက်ဆိုးကျိုး အနည်းငယ် ရှိနိုင်ပါတယ်။ ဖြစ်လာခဲ့ရင်တောင် များသောအားဖြင့် လက္ခဏာက ပြင်းထန်လေ့မရှိပါဘူး။ ဆေးရပ်လိုက်ရင် ဒါမှမဟုတ် ဆေးပမာဏလျှော့လိုက်ရင် သက်သာသွားပါတယ်။ တွေ့ရတတ်တဲ့ ဘေးထွက်ဆိုးကျိုးတွေကတော့

• နှာခေါင်းသွေးယိုခြင်း၊ အခြားနေရာမှ သွေးယိုခြင်း၊ သွေးမတိတ်ခြင်း။
• သွေးဝမ်းသွားခြင်း၊ ဆီးထဲတွင် သွေးပါခြင်း။
• ချောင်းဆိုးသွေးပါခြင်း၊ ကော်ဖီရောင်အန်ခြင်း
• အသက်ရှူရခက်ခြင်း
• ရင်ဘတ်အောင့်ခြင်း၊ လက်မောင်း၊ ပခုံးတွင် အောင့်ခြင်း၊ ပျို့အန်ခြင်း၊ ချွေးစေးပြန်ခြင်း၊ နေလို့မကောင်းခြင်း။
• ရုတ်တရက် ကိုယ်တခြမ်းထုံခြင်း။
• ရုတ်တရက်ခေါင်းကိုက်ခြင်း၊ စိတ်ရှုပ်ထွေးခြင်း၊ အမြင်ဝါးခြင်း၊ စကားပြောမပီသခြင်း၊ ဟန်ချက်ပျက်ခြင်း။
• အသားအရေ ဖျော့တော့ခြင်း၊ အားနည်းခြင်း၊ ဖျားခြင်း၊ အသားဝါခြင်း။
• သွေးခြည်ဥခြင်း၊ နှာခေါင်း၊ ပါးစပ်၊ မိန်းမကိုယ်၊ စအိုမှ သွေးယိုခြင်း၊ အနီစက်များထွက်ခြင်း။

အခုပြောတဲ့ ဘေးထွက်ဆိုးကျိုးတွေက လူတိုင်းမှာ ဖြစ်ချင်မှဖြစ်မှာပါ။ တစ်ဦးနဲ့ တစ်ဦးလည်း ကွဲပြားခြားနားမှုရှိနိုင်ပါတယ်။ ဘေးထွက်ဆိုးကျိုးနဲ့ ပတ်သက်ပြီး စိုးရိမ်ပူပန်မှုများရှိနေမယ်ဆိုရင် ဆရာဝန် သို့မဟုတ် ဆေးဝါးကျွမ်းကျင်ပညာရှင်နဲ့ တိုင်ပင်ဆွေးနွေးပါ။

ဆေးဓာတ်ပြုမှုများ

ဘယ်ဆေးတွေက Clopidogrel (ကလိုပီဒိုဂရဲလ်)နဲ့ ဓာတ်ပြုနိုင်သလဲ

Clopidogrel က လောလောဆယ် သောက်သုံးနေတဲ့ တခြားဆေးဝါးတွေနဲ့ ဓာတ်ပြုမှုတွေဖြစ်နိုင်ပြီး ဆေးဝါးတွေရဲ့ အာနိသင်ပြောင်းလဲတာ၊ ဘေးထွက်ဆိုးကျိုးတွေ ပိုခံစားရတာတွေ ဖြစ်နိုင်ပါတယ်။

မလိုလားအပ်တဲ့ ဆေးဝါးဓာတ်ပြုမှုတွေ ဖြစ်မလာအောင်လို့ သင်လက်ရှိသောက်သုံးနေတဲ့ ဆေးဝါးတွေ အားလုံးရဲ့ စာရင်းကို လုပ်ထားပြီး (စာရင်းလုပ်တဲ့အခါမှာ ဆရာဝန်ညွှန်ကြားထားတာတွေ၊ မညွှန်ကြားဘဲ သောက်သုံးနေတာတွေ၊ သဘာဝဆေးဘက်ဝင်ပစ္စည်းတွေ အားလုံးပါဝင်ပါတယ်) ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်ကို ပြောပြဖို့ လိုပါတယ်။

ဓာတ်ပြုနိုင်တဲ့ ဆေးဝါးများ

• esomeprazole
• omeprazole
• fluvoxamine
• carbamazepine
• efavirenz
• paclitaxel
• morphine

ဆေးဓာတ်ပြုတဲ့ လက္ခဏာတွေ ခံစားရရင် ဆေးသောက်တာကို ရပ်လိုက်ပါ။ တစ်ချိန်တည်းမှာပဲ ဆရာဝန်နဲ့ တိုင်ပင်ပါ။ ဆေးပမာဏပြန်ညှိတာ၊ တခြားဆေးနဲ့ အစားထိုးတာ၊ ဆေးရပ်တာတွေ လုပ်ရနိုင်ပါတယ်။

အစားအသောက်တွေနဲ့ အရက်က Clopidogrel (ကလိုပီဒိုဂရဲလ်)နဲ့ ဓာတ်ပြုနိုင်သလား

Clopidogrelက အစားအသောက် ဒါမှမဟုတ် အရက်သေစာနဲ့ ဓာတ်ပြုမှုတွေဖြစ်ပြီး ဆေးဝါး အာနိသင်ပြောင်းတာနဲ့ ဘေးထွက်ဆိုးကျိုးတွေ ဖြစ်လာနိုင်ပါတယ်။ Clopidogrelကို ဂရိတ်ဖရုအသီး ဒါမှမဟုတ် ဂရိတ်ဖရုဖျော်ရည်နဲ့ အချိန်ခြားပြီးမှ သောက်ပါ။ ဂရိတ်ဖရုက ဆေးအာနိသင်ကို လျော့စေနိုင်ပါတယ်။ မလိုလားအပ်တဲ့ ဓာတ်ပြုမှုတွေ မဖြစ်လာအောင်လို့ အစားအသောက်၊ အရက်သေစာတွေနဲ့ ဓာတ်ပြုနိုင်ခြေ ရှိ၊ မရှိကို မေးမြန်းတိုင်ပင်ပါ။

ဘယ်ရောဂါအခြေအနေတွေက Clopidogrel (ကလိုပီဒိုဂရဲလ်)နဲ့ ဓာတ်ပြုနိုင်သလဲ

Clopidogrelက သင့်ရဲ့ နဂိုကျန်းမာရေးအခြေအနေတွေအပေါ် သက်ရောက်မှုတွေ ရှိနိုင်ပါတယ်။ သင့်ရဲ့ ကျန်းမာရေးအခြေအနေကို ပိုဆိုးသွားစေတာ ဒါမှမဟုတ် ဆေးအာနိသင် ပြောင်းလဲသွားတာတွေ ဖြစ်နိုင်ပါတယ်။ ဒါ့ကြောင့် သင့်ရဲ့ကျန်းမာရေးအခြေအနေအကုန်လုံးကို သင့်ရဲ့ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်ကို ကြိုတင်အသိပေးဖို့ အရေးကြီးပါတယ်။ အထူးသဖြင့်

• အရင်က ဒါမှမဟုတ် လက်ရှိမှာ အစာအိမ်နဲ့ အူလမ်းကြောင်း သွေးယိုဖူးရင်
• ဦးခေါင်းဒဏ်ရာ ရနေရင်
• သွေးမတိတ်ရောဂါ ရှိနေရင်
• လက်ရှိမှာ အစာအိမ်အနာရှိနေရင်
• ပြင်းထန်တဲ့ အသည်းရောဂါ
• ကျောက်ကပ်ရောဂါ
• သွေးတိုးရောဂါ
• နှလုံးရောဂါ
• နှလုံးညှစ်အားကျနေတာတ
• နောက်၇ရက်အတွင်းမှာ သွားနဲ့ ပတ်သက်ပြီး ခွဲစိတ်မှု ဒါမှမဟုတ် အခြားခွဲစိတ်မှု လုပ်ဖို့ စီစဉ်ထားတယ်ဆိုရင်ပါ။

သောက်သုံးရန်အညွှန်း

အခုအချက်အလက်များမှာ ဆေးပညာအကြံပေးမှုကို အစားထိုးရန်အတွက်မဟုတ်ပါ။ ဆေးဝါးများကို အသုံးမပြုခင် ဆရာဝန် သို့မဟုတ် ဆေးဝါးပညာရှင်နဲ့ အမြဲတမ်းတိုင်ပင်ဆွေးနွေးသင့်ပါတယ်။

အရွယ်ရောက်ပြီးသူများ အသုံးပြုရမယ့်ပမာဏ

ရုတ်တရက် နှလုံးသွေးကြောပိတ်တဲ့အခါ

• အရွယ်ရောက်ပြီးသူ : စစချင်းမှာ ၃၀၀ မီလီဂရမ် နောက်ပိုင်းမှာ ၇၅ မီလီဂရမ် တစ်နေ့တစ်ကြိမ်၊ သွေးကြောပိတ်တဲ့ လက္ခဏာပေါ်ပေါ်ချင်းနဲ့ နောက်ထပ် ၄ပတ်ကြာသည်အထိ အက်စပရင်နဲ့ တွဲပေးသင့်ပါတယ်။
• အသက် ၇၅နှစ်အထက် : ကနဦး ဆေးပမာဏ မရှိဘဲ ၇၅ မီလီဂရမ် တစ်နေ့တစ်ကြိမ်၊ သွေးကြောပိတ်တဲ့ လက္ခဏာပေါ်ပေါ်ချင်းနဲ့ နောက်ထပ် ၄ပတ်ကြာသည်အထိ အက်စပရင်နဲ့ တွဲပေးသင့်ပါတယ်။

သွေးကြောပိတ်ခြင်းမှ ကာကွယ်ရန်

• အရွယ်ရောက်ပြီးသူ : ၇၅ မီလီဂရမ် တစ်နေ့တစ်ကြိမ်၊ အထူးသဖြင့် မကြာသေးမီကမှ နှလုံးသွေးကြောပိတ်ထားသူ၊ လေဖြတ်ထားသူ သို့မဟုတ် သွေးကြောရောဂါရှိသူ။

Clopidogrel (ကလိုပီဒိုဂရဲလ်) ကို ဘယ်လိုရရှိနိုင်သလဲ

Clopidogrelကို film-coated ဆေးပြား ၇၅ မီလီဂရမ်၊ ၃၀၀ မီလီဂရမ်အနေနဲ့ ရနိုင်ပါတယ်။

အရေးပေါ်အခြေအနေ ဒါမှမဟုတ် ဆေးပမာဏလွန်သွားချိန်မှာ ဘာလုပ်သင့်သလဲ။

အရေးပေါ်အခြေအနေသို့မဟုတ် ဆေးပမာဏလွန်သွားတဲ့အခြေအနေတွေမှာ အရေးပေါ်ဆေးရုံဆေးခန်းများမှာ သွားရောက်ကုသမှုခံယူပါ။

ဆေးသောက်ရမယ့်အချိန်လွတ်သွားခဲ့ရင် ဘာလုပ်ရမလဲ။

Clopidogrelကို သောက်သုံးဖို့ လွတ်သွားခဲ့ပါက (မေ့ခဲ့ပါက) သတိရတဲ့အချိန်မှာ အမြန်ဆုံးသောက်သုံးပါ။ ဒါပေမယ့် နောက်တစ်ကြိမ်သောက်ရမယ့်အချိန်မှ သတိရတယ်ဆိုရင်တော့ လွတ်သွားတဲ့ဆေးကို ထားလိုက်ပါ။ ပုံမှန်အတိုင်းပဲ ဆက်သောက်ပါ။ ဆေးနှစ်ခါ သောက်တာမျိုး မလုပ်ပါနဲ့။

ရေးသားသူ− Dr Su Sandy