Omeprazole (အိုမီပရာဇော)

Omeprazole (အိုမီပရာဇော) ဆိုတာ Proton pump inhibitors အမျိုးအစားဖြစ်ပြီး အစာအိမ်အက်စစ်တွေ ထွက်မလာအောင် တားဆီးပေးနိုင်တဲ့ အာနိသင်ရှိပါတယ်။

အသုံးပြုပုံများ

Omeprazole (အိုမီပရာဇော) ကို ဘာအတွက်အသုံးပြုကြသလဲ

ဒီလိုအာနိသင်ရှိတာကြောင့် အစာအိမ်အနာနဲ့ အစာရေမျိုပြွန်ကင်ဆာကိုပါ သွယ်ဝိုက်ပြီး ကာကွယ်ပြီးသား ဖြစ်သွားပါတယ်။

Omeprazole (အိုမီပရာဇော) ဘယ်လိုသောက်သုံးသင့်သလဲ

Omeprazole (အိုမီပရာဇော)ကို မသောက်ခင်မှာ ဆေးညွှန်းကို သေချာ ဖတ်ပါ။ အခြား တိတိကျကျ သိရှိလိုတာရှိမယ်ဆိုရင် ဆရာဝန် ဒါမှမဟုတ် ဆေးဝါးကျွမ်းကျင်သူနဲ့ တိုင်ပင်ပါ။

Omeprazoleကို ဆရာဝန် ညွှန်ကြားတဲ့အတိုင်း သောက်ပေးလို့ ရပါတယ်။ များသောအားဖြင့်ကတော့ တစ်နေ့ တစ်ကြိမ်ပါ။ အစားမစားခင် သောက်ပေးရမှာပါ။ ဆေးစာမပါဘဲ ဝယ်မယ်ဆိုရင်တော့ ဆေးဘူးမှာပါတဲ့ အညွှန်းအတိုင်း သုံးပေးရပါမယ်။

ခန္ဓာကိုယ်က တုံ့ပြန်တာကို လိုက်ပြီး ဆေးပမာဏကို အတိုးအလျော့ လုပ်ပေးလို့ ရပါတယ်။ ကလေးတွေအတွက်ဆိုရင် အသက်အရွယ်နဲ့ ကိုယ်အလေးချိန်အပေါ်မှာ မူတည်ပြီး ဆေးပမာဏ ကွာခြားနိုင်ပါတယ်။

ဆရာဝန် ညွှန်ကြားချက် မရှိဘဲ ဆေးပမာဏကို တိုးတာ၊ မကြာခဏသောက်တာမျိုး မလုပ်ပါနဲ့။ အခြားသိချင်တာမျိုး ရှိမယ်ဆိုရင် ဆရာဝန် ဒါမှမဟုတ် ဆေးဝါးကျွမ်းကျင်သူတွေနဲ့ တိုင်ပင်ပါ။

ဆေးကို ဝါးစားတာ၊ ကြိတ်ခြေတာမျိုး မလုပ်ပါနဲ့။ ဆေးကို ရေနဲ့ အလုံးလိုက် မျိုချပေးပါ။

လိုအပ်မယ်ဆိုရင် Omeprazole (အိုမီပရာဇော)ကို အစာအိမ်အက်ဆစ်ပြယ်ဆေးတွေနဲ့ တွဲသောက်ပေးတာမျိုး လုပ်ရနိုင်ပါတယ်။ ဥပမာ အစောကတည်းက sucralfate ကို သောက်နေရတာမျိုး ဖြစ်မယ်ဆိုရင် Omeprazole ကို နာရီဝက်ကြိုသောက်ပေးပါ။

ဆေးကို အာနိသင် ကောင်းကောင်းရစေဖို့ မှန်မှန်လေး သောက်ပေးပါ။ ဆေးသောက်ဖို့ မမေ့အောင် နေ့စဉ် အချိန်မှန် သောက်ပေးပါ။

သက်သာလာရင်တောင်မှ ဆေးကို ရပ်လိုက်တာမျိုး မလုပ်ဘဲ ဆေးပတ်လည်အောင် သောက်ပါ။ ဆေးကို ဆရာဝန်ညွှန်တာ မဟုတ်ဘဲ သောက်မယ်ဆိုရင် ၁၄ ရက်ထက် ကျော်မသောက်ပါနဲ့။

ရောဂါအခြေအနေက သက်သာလာတာမျိုး မရှိဘဲ ပိုဆိုးလာမယ်ဆိုရင် ဆရာဝန်နဲ့ တိုင်ပင်ပါ။ ကိုယ်သဘောနဲ့ ကိုယ် သောက်နေတာ ဖြစ်မယ်ဆိုရင်လည်း ဆေးသောက်ပြီး ၁၄ ရက်ကြာတာတောင် မသက်သာရင်  ဒါမှမဟုတ် ဆေးသောက်တာကို ၄ လအတွင်းမှာ ၁ ကြိမ်ထက်ပိုသောက်နေရမယ်ဆိုရင် ဆရာဝန်နဲ့ ပြသကြည့်ပါ။

ပြင်းထန်တဲ့ ကျန်းမာရေးပြဿနာ ရှိမယ်ဆိုရင် ချက်ချင်း ဆေးကုသမှု ခံယူပေးပါ။

Omeprazole (အိုမီပရာဇော) ဘယ်လိုသိမ်းဆည်းရမလဲ

Omeprazoleကို အခန်းအပူချိန်တွင် သိုလှောင်ထားနိုင်ပါတယ်။ တိုက်ရိုက်နေရောင်ခြည်မထိအောင်နဲ့ စိုစွတ်မှုမရှိအောင်ထားပါ။ ဆေးမပျက်စီးစေဖို့ ရေချိုးခန်းထဲမှာ သိမ်းဆည်းတာနဲ့ ရေခဲပြီး သိမ်းဆည်းတာတွေမပြုလုပ်ပါနဲ့။

ဆေးထုတ်လုပ်တဲ့ ကုမ္ပဏီကွဲပြားမှုပေါ်မူတည်ပြီး သိမ်းဆည်းတဲ့ပုံစံ ကွဲပြားခြားနားမှုရှိနိုင်ပါတယ်။ ဒီအတွက် ဆေးဘူးအခွံမှာပါတဲ့ သိုလှောင်သိမ်းဆည်းမှုညွှန်ကြားချက်ကို ကြည့်ရှုစစ်ဆေးတာမျိုး ဒါမှမဟုတ် ဆေးဝါးကျွမ်းကျင်ပညာရှင်ကို မေးမြန်းတာမျိုး အမြဲလုပ်ပါ။ လုံခြုံစိတ်ချရဖို့အတွက် ဆေးဝါးတွေအကုန်လုံးကို ကလေးတွေ၊ အိမ်မွေးတိရိစ္ဆာန်တွေနဲ့ ဝေးရာမှာထားပါ။

ဆေးကို အိမ်သာထဲကိုပစ်ချတာနဲ့ ရေထွက်ပေါက်တွေထဲကနေ သွန်ချတာမျိုးကို မလုပ်သင့်ပါဘူး။ ဒါ့ပြင် ဆေးဝါးတွေကို မလိုအပ်တော့တဲ့အခါ ဒါမှမဟုတ် သက်တမ်းကုန်ဆုံးသွားတဲ့အခါတွေမှာ စနစ်တကျစွန့်ပစ်ဖို့ အရေးကြီးပါတယ်။ ဆေးဝါးတွေကို စနစ်တကျဘယ်လိုစွန့်ပစ်ရမယ်ဆိုတာနဲ့ ပတ်သက်ပြီး သင့်ရဲ့ဆေးဝါးကျွမ်းကျင်ပညာရှင်နဲ့ တိုင်ပင်ပါ။

ဘေးထွက်ဆိုးကျိုးများ

Omeprazoleက ဘယ်လိုဘေးထွက်ဆိုးကျိုးတွေ ရှိနိုင်လဲ။

တခြားဆေးတွေလိုပဲ သူ့မှာလည်း ဘေးထွက်ဆိုးကျိုး အနည်းငယ် ရှိနိုင်ပါတယ်။ ဖြစ်လာခဲ့ရင်တောင် များသောအားဖြင့် လက္ခဏာက ပြင်းထန်လေ့မရှိပါဘူး။ ဆေးရပ်လိုက်ရင် ဒါမှမဟုတ် ဆေးပမာဏလျှော့လိုက်ရင် သက်သာသွားပါတယ်။ တွေ့ရတတ်တဲ့ ဘေးထွက်ဆိုးကျိုးတွေကတော့

• အဖျားတက်တာ
• တုပ်ကွေး လက္ခဏာတွေလိုမျိုး နှာစေးတာ၊ နှာချေတာ၊ လည်ချောင်းနာတာ
• ဗိုက်အောင့်တာ
• မအီမသာဖြစ်တာ၊ အော့အန်တာ၊ ဝမ်းပျက်တာ
• ခေါင်းကိုက်တာမျိုးတွေ ခံစားရနိုင်ပါတယ်။

ပြင်းထန်တဲ့ ဘေးထွက်ဆိုးကျိုးများကတော့

• ဝမ်းပျက်ဝမ်းလျှောဖြစ်တာ
• ကိုယ်တွင်းမှာ မဂ္ဂနီဆီယမ် နည်းနေတာကြောင့် မူးဝေတာ၊ အာရုံရှုပ်ထွေးတာ၊ နှလုံးခုန်နှုန်း မမှန်တာ၊ ရုတ်တရက် ကြွက်သား လှုပ်ရှားမှု ဖြစ်တာ၊ အာရုံတွေ ဝေဝါးတာ၊ ကြွက်တက်တာ၊ ကြွက်သားအားနည်းတာ၊ ခေါင်းမူးတာ၊ ချောင်းဆိုးတာ၊ သီးတာ၊ တက်တာလိုမျိုးတွေ ခံစားရနိုင်ပါတယ်။

ခုပြောတဲ့ ဘေးထွက်ဆိုးကျိုးတွေက လူတိုင်းမှာ ဖြစ်ချင်မှဖြစ်မှာပါ။ တစ်ဦးနဲ့တစ်ဦးလည်း ကွဲပြားခြားနားမှုရှိနိုင်ပါတယ်။ ဘေးထွက်ဆိုးကျိုးနဲ့ ပတ်သက်ပြီး စိုးရိမ်ပူပန်မှုများရှိနေမယ်ဆိုရင် ဆရာဝန် သို့မဟုတ် ဆေးဝါးကျွမ်းကျင်ပညာရှင်နဲ့ တိုင်ပင်ဆွေးနွေးပါ။

ဆေးဝါးဓာတ်ပြုမှုများ

ဆေးဓာတ်ပြုတဲ့ လက္ခဏာတွေ ခံစားရရင် ဆရာဝန်နဲ့ တိုင်ပင်ပါ။ ဆေးပမာဏပြန်ညှိတာ၊ တခြားဆေးနဲ့ အစားထိုးတာ၊ ဆေးရပ်တာတွေ လုပ်ရနိုင်ပါတယ်။

အစားအသောက် ဒါမှမဟုတ် အရက်သေစာတွေက Omeprazole (အိုမီပရာဇော)နဲ့ ဓာတ်ပြုနိုင်ပါသလား။

Omeprazoleက အစားအသောက် ဒါမှမဟုတ် အရက်သေစာနဲ့ ဓာတ်ပြုမှုတွေဖြစ်ပြီး ဆေးဝါး အာနိသင်ပြောင်းတာနဲ့ ဘေးထွက်ဆိုးကျိုးတွေ ဖြစ်လာနိုင်ပါတယ်။ မလိုလားအပ်တဲ့ ဓာတ်ပြုမှုတွေ မဖြစ်လာအောင်လို့ အစားအသောက်၊ အရက်သေစာတွေနဲ့ ဓာတ်ပြုနိုင်ခြေ ရှိ၊ မရှိကို မေးမြန်းတိုင်ပင်ပါ။

ဘယ်လိုကျန်းမာရေးအခြေအနေတွေက Omeprazole (အိုမီပရာဇော)နဲ့ ဓာတ်ပြုမှုတွေရှိမလဲ။

Omeprazole (အိုမီပရာဇော)က သင့်ရဲ့ နဂိုကျန်းမာရေးအခြေအနေတွေအပေါ် သက်ရောက်မှုတွေ ရှိနိုင်ပါတယ်။ သင့်ရဲ့ ကျန်းမာရေးအခြေအနေကို ပိုဆိုးသွားစေတာ ဒါမှမဟုတ် ဆေးအာနိသင် ပြောင်းလဲသွားတာတွေ ဖြစ်နိုင်ပါတယ်။ ဒါ့ကြောင့် သင့်ရဲ့ ကျန်းမာရေးအခြေအနေအကုန်လုံးကို သင့်ရဲ့ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်ကို ကြိုတင်အသိပေးဖို့ အရေးကြီးပါတယ်။ အထူးသဖြင့်

• ဝမ်းပျက်ဝမ်းလျှော
• Hypomagnesemia (သွေးထဲမှာ မဂ္ဂနီဆီယမ် နည်းတာ) ဒါမှမဟုတ် သွေးထဲမှာ မဂ္ဂနီဆီယမ် နည်းဖူးမယ်ဆိုရင်
• အရိုးပွတာ (အရိုးပြဿနာ)
• အတက်ရောဂါ
• အသည်းရောဂါရှိနေရင်ပါ။

သောက်သုံးရန်အညွှန်း

အခုအချက်အလက်များမှာ ဆေးပညာအကြံပေးမှုကို အစားထိုးရန်အတွက်မဟုတ်ပါ။ ဆေးဝါးများကို အသုံးမပြုခင် ဆရာဝန် သို့မဟုတ် ဆေးဝါးပညာရှင်နဲ့ အမြဲတမ်းတိုင်ပင်ဆွေးနွေးသင့်ပါတယ်။

အရွယ်ရောက်ပြီးများအတွက် ဆေးပမာဏ

• အစာအိမ်အနာကို ကာကွယ်ဖို့

တစ်နေ့တစ်ကြိမ် အစားမစားခင် 20 mg သောက်ပေးပါ။ ၁၄ ရက် ကြာသောက်ပေးပါ။

• အူသိမ်အနာအတွက်

တစ်နေ့တစ်ကြိမ် အစားမစားခင် 20 mg သောက်ပေးပါ။ အများစုက ၄ ပတ် ကနေ ၈ ပတ်ထဲမှာ သက်သာသွားနိုင်ပါတယ်။

• အစာအိမ်အနာအတွက်

တစ်နေ့တစ်ကြိမ် အစားမစားခင် 40 mg သောက်ပေးပါ။ ၄ ပတ် ကနေ ၈ ပတ်အထိ သောက်ပေးပါ။

• Erosive esophagitis (အစာရေမျိုပြွန်ရောင်ရမ်းခြင်း) အတွက်

တစ်နေ့တစ်ကြိမ် အစားမစားခင် 20 mg သောက်ပေးပါ။ လူနာရဲ့ တုံ့ပြန်မှုကို လိုက်ပြီး တစ်နေ့ကို 40mg အထိ တိုးပေးလို့ ရပါတယ်။

• Zollinger-Ellison Syndrome အတွက်

စစသောက်ချင်းမှာ  60 mg တစ်နေ့တစ်ကြိမ် သောက်ပေးရပါမယ်။  လူနာရဲ့ လိုအပ်ချက်ကို လိုက်ပြီး ဆေးပမာဏ ကွာခြားနိုင်ပါတယ်။ စစသောက်ချင်းမှာ  တစ်နေ့ကို 120 mg အထိ သောက်နိုင်ပြီး ၃ ကြိမ် ခွဲသောက်ပေးရပါမယ်။ နေ့စဉ်သောက်သုံးမှု ပမာဏက 80 mg ထက် ကျော်နေမယ်ဆိုရင် တစ်ကြိမ်တည်း မသောက်ဘဲ ခွဲသောက်ပေးပါ။

• အစာခြေအက်ဆစ် ပြန်ဆန်တက်ခြင်းအတွက်

စစသောက်ချင်းမှာ တစ်နေ့ကို 20 mg အစားမစားခင် သောက်ပေးပါ။  ၄ ပတ် ကနေ ၈ ပတ်ကြာတဲ့အထိ သောက်ပေးပါ။ လိုအပ်မယ်ဆိုရင် တစ်နေ့ကို 40 mg အထိ တိုးသောက်ပေးလို့ ရပါတယ်။ ဆက်သောက်သုံးရမယ့် ပမာဏက ရေရှည် ကုသမှုအတွက် တစ်နေ့ကို 10-20 mg  လိုအပ်မှာဖြစ်ပြီး ဒီလောက်ကတော့ စွဲသောက်ဖို့ ဘေးကင်းပါတယ်။

• Multiple endocrine adenomas အတွက်

စစသောက်ချင်းမှာ အစားမစားခင် တစ်နေ့တစ်ကြိမ် 60 mgပါ။ တုံ့ပြန်မှု အခြေအနေကို မူတည်ပြီး ဆေးပမာဏကို ပြောင်းလဲပေးနိုင်ပါတယ်။ ဆက်လက်သောက်သုံးရမယ့် ဆေးပမာဏက 120 mg ကို တစ်နေ့ကို ၃ ကြိမ်ပါ။ နေ့စဉ်သောက်သုံးမှု ပမာဏက 80 mg ထက် ကျော်နေမယ်ဆိုရင် တစ်ကြိမ်တည်း မသောက်ဘဲ ခွဲသောက်ပေးပါ။

• Systemic mastocytosis အတွက်

စစသောက်ချင်းမှာတစ်နေ့တစ်ကြိမ် အစားမစားခင် 60 mg ပါ။ တုံ့ပြန်မှု အခြေအနေကို မူတည်ပြီး ဆေးပမာဏကို ပြောင်းလဲပေးနိုင်ပါတယ်။ ဆက်လက်သောက်သုံးရမယ့် ဆေးပမာဏက 120 mg ကို တစ်နေ့ကို ၃ ကြိမ်ပါ။ နေ့စဉ်သောက်သုံးမှု ပမာဏက 80 mg ထက် ကျော်နေမယ်ဆိုရင် တစ်ကြိမ်တည်း မသောက်ဘဲ ခွဲသောက်ပေးပါ။

Omeprazole (အိုမီပရာဇော) ကို ဘယ်လိုပုံစံမျိုး၊ အချိုးအစားမျိုးတွေနဲ့ရရှိနိုင်မလဲ။

Omeprazole (အိုမီပရာဇော)ကို အောက်ဖော်ပြပါ ဆေးဝါးပုံစံများနဲ့ အချိုးအစားများဖြင့် ရရှိနိုင်ပါတယ်။

• ဆေးတောင့် : 10 mg; 20 mg; 40 mg
• ဆေးရည် : 2.5 mg; 10 mg

အရေးပေါ်အခြေအနေတွေ၊ ဆေးပမာဏလွန်သွားတဲ့ အခြေအနေတွေမှာ ဘာလုပ်သင့်သလဲ။

အရေးပေါ်အခြေအနေ သို့မဟုတ် ဆေးပမာဏလွန်သွားတဲ့ အခြေအနေတွေမှာ အရေးပေါ်ဆေးရုံဆေးခန်းများမှာ သွားရောက်ကုသမှုခံယူပါ။

ဆေးသောက်ဖို့ လွတ်သွားခဲ့ရင် (မေ့သွားခဲ့ရင်) ဘာလုပ်ရမလဲ။

Omeprazole (အိုမီပရာဇော)ကို သောက်သုံးဖို့ လွတ်သွားခဲ့ပါက (မေ့ခဲ့ပါက) သတိရတဲ့အချိန်မှာ အမြန်ဆုံးသောက်သုံးပါ။ ဒါပေမယ့် နောက်တစ်ကြိမ်သောက်ရမယ့်အချိန်မှ သတိရတယ်ဆိုရင်တော့ လွတ်သွားတဲ့ဆေးကို ထားလိုက်ပါ။ ပုံမှန်အတိုင်းပဲ ဆက်သောက်ပါ။ ဆေးနှစ်ခါ သောက်တာမျိုး မလုပ်ပါနဲ့။