Clindamycin (ကလင်ဒါမိုင်စင်)

Clindamycin (ကလင်ဒါမိုင်စင်) ဆိုတာက ဘက်တီးရီးယား ပေါက်ဖွားမှုကို ရပ်တန့်ပေးတဲ့ ပဋိဇီဝ ပိုးသတ်ဆေးပါ။ Clindamycin (ကလင်ဒါမိုင်စင်)က lincosamides အမျိုးအစား ဆေးပါ။ လိမ်းဆေးအနေနဲ့ ရနိုင်သလို သောက်ဆေး၊ ထိုးဆေးပုံစံနဲ့လည်း ရရှိနိုင်ပါတယ်။

အသုံးပြုပုံများ

Clindamycin (ကလင်ဒါမိုင်စင်)ကို ဘာအတွက်အသုံးပြုကြသလဲ

Clindamycin (ကလင်ဒါမိုင်စင်)ကို

• Gram-positive ဘက်တီးရီးယားတွေကြောင့် ဖြစ်တဲ့ ပိုးဝင်ကူးစက်တာ (Anaerobic infection)
• ဝက်ခြံကြောင့် အရေပြားပိုးဝင်တာ
• မိန်းမကိုယ် ဘက်တီးရီးယားပိုးဝင်တာတွေကို သက်သာစေဖို့ အသုံးပြုကြပါတယ်။

Clindamycin (ကလင်ဒါမိုင်စင်)ကို ဘယ်လိုအသုံးပြုသင့်သလဲ။

ဆေးတောင့်တွေကို ဝါးစားတာလိုမျိုး၊ ချေတာမျိုး၊ ဆေးတောင့်ကို ဖွင့်ပြီး သောက်တာမျိုး မလုပ်ဘဲ မျိုချရပါ။ ဆေးတောင့်ကို ဖွင့်တာ၊ အရည်ထဲမှာ ဖျော်တာမျိုး မလုပ်ပါနဲ့။ ဆေးတောင့်ကို လိမ်းဆေးအနေနဲ့ အသုံးမပြုပါနဲ့။ ဆေးကို အစာနဲ့ ဖြစ်စေ အစာမပါဘဲ ဖြစ်စေ သောက်ပေးလို့ ရပါတယ်။

သောက်ဆေးမှုန့်ကိုတော့ ရေသန့်သန့်နဲ့ နှံ့အောင်ဖျော်ပါ။ ဆေးညွှန်းမှာပါတဲ့ ခွက်အတိုင်း ချိန်ဆပါ။ အိမ်သုံးဇွန်းနဲ့ သောက်တာမျိုး မလုပ်ပါနဲ့။

လိမ်းဆေးတွေကို သေချာသန့်စင်ထားတဲ့ အရေပြားပေါ်မှာ တိုက်ရိုက် လိမ်းပေးပါ။ ဆေးမလိမ်းခင်နဲ့ ဆေးလိမ်းပြီးချိန်မှာ လက်ကို သေချာ သန့်စင်အောင် ဆေးကြောပါ။

ထိုးဆေးကိုတော့ လိုင်စင်ရဆရာဝန်ရဲ့ ညွှန်ကြားချက်အတိုင်းသာ လုပ်ဆောင်ရပါမယ်။

Clindamycin (ကလင်ဒါမိုင်စင်)ကို ဘယ်လိုသိမ်းဆည်းရမလဲ

ဆေးထုတ်လုပ်တဲ့ ကုမ္ပဏီကွဲပြားမှုပေါ်မူတည်ပြီး သိမ်းဆည်းတဲ့ပုံစံ ကွဲပြားခြားနားမှုရှိနိုင်ပါတယ်။ ဒီအတွက် ဆေးဘူးအခွံမှာပါတဲ့ သိုလှောင်သိမ်းဆည်းမှုညွှန်ကြားချက်ကို ကြည့်ရှုစစ်ဆေးတာမျိုး ဒါမှမဟုတ် ဆေးဝါးကျွမ်းကျင်ပညာရှင်ကို မေးမြန်းတာမျိုး အမြဲလုပ်ပါ။ လုံခြုံစိတ်ချရဖို့အတွက် ဆေးဝါးတွေအကုန်လုံးကို ကလေးတွေ၊ အိမ်မွေးတိရိစ္ဆာန်တွေနဲ့ ဝေးရာမှာထားပါ။

ကြိုတင်သတိပြုရန်များနှင့် အသိပေးချက်များ

ဆေးသုံးရန်အညွှန်း

အခုအချက်အလက်များမှာ ဆေးပညာအကြံပေးမှုကို အစားထိုးရန်အတွက်မဟုတ်ပါ။ ဆေးဝါးများကို အသုံးမပြုခင် ဆရာဝန် သို့မဟုတ် ဆေးဝါးပညာရှင်နဲ့ အမြဲတမ်းတိုင်ပင်ဆွေးနွေးသင့်ပါတယ်။

အရွယ်ရောက်ပြီးသူတွေအတွက် အသုံးပြုရမယ့်ပမာဏ

• Gram-positive ဘက်တီးရီးယားတွေကြောင့် ပိုးဝင်ကူးစက်တာ (Anaerobic infection)

သောက်ဆေး – အရမ်းမပြင်းထန်တဲ့ ကူးစက်မှုတွေအတွက် ၆ နာရီခြား တစ်ခါ 150 ကနေ 300 mg။ ပြင်းထန်တဲ့ ကူးစက်ရောဂါအတွက် ၆ နာရီခြား တစ်ခါ 300-450 mg အထိ သောက်ပေးလို့ ရပါတယ်။

ထိုးဆေး – တစ်နေ့ကို 600 ကနေ 1200 mg။ ပြင်းထန်တဲ့ ကူးစက်ရောဂါအတွက် တစ်နေ့ကို 1200 ကနေ 2700 mg၊ အများဆုံး တစ်နေ့တာကို 4800 mg အထိ ပေးလို့ ရပါတယ်။ အများဆုံးအနေနဲ့ အကြောဆေးကို တစ်မိနစ်မှာ 30 mg သွင်းနိုင်ပါတယ်။

• ဝက်ခြံကြောင့် အရေပြားပိုးဝင်တာ

ပိုးဝင်နေတဲ့ အရေပြားပေါ်မှာ တစ်နေ့ကို ၂ ကြိမ် ခပ်ပါးပါး လိမ်းပေးပါ။

• မိန်းမကိုယ် ဘက်တီးရီးယားပိုးဝင်တာ

အိပ်ရာဝင်ချိန်မှာ မိန်းမကိုယ် အတွင်းပိုင်းကို တစ်နေ့ကို (100 mg) ၁ ကြိမ်  ၃ ရက် ကနေ ၇ ရက်အထိ အသုံးပြုနိုင်ပါတယ်။ မိန်းမကိုယ်ထဲထည့်တဲ့ ဆေးတောင့်ကို အိပ်ရာဝင်ချိန် တစ်နေ့တစ်ကြိမ် 100mg ၃ ရက်အထိ အသုံးပြုပေးလို့ ရပါတယ်။

ကလေးတွေအတွက် အသုံးပြုရမယ့်ပမာဏ

• Gram-positive ဘက်တီးရီးယားတွေကြောင့် ပိုးဝင်ကူးစက်တာ (Anaerobic infection)

သောက်ဆေး – ကလေးက အသက် ၁၂ နှစ်အောက်ဆိုရင် ကိုယ်အလေးချိန်ကို လိုက်ပြီး 3-6 mg per kg ကို ၆ နာရီခြား တစ်ခါ အသုံးပြုပေးလို့ ရပါတယ်။

ထိုးဆေး – ၁ လအောက်ကလေးတွေအတွက် တစ်နေ့တာမှာ ကိုယ်အလေးချိန်ကို လိုက်ပြီး 15 to 25 mg per kg။ ပြင်းထန်တဲ့ ကူးစက်ရောဂါတွေအတွက် တစ်နေ့ကို 25 to 40 mg/kg နဲ့ တစ်နေ့တာကို အများဆုံး 300 mg။ ဆေးကို ၃ ကြိမ် ကနေ ၄ ကြိမ်အထိ ခွဲပြီး တိုက်ပေးပါ။

Clindamycinကို ဘယ်လိုရရှိနိုင်သလဲ

Clindamycin ကို အောက်ပါ ပုံစံမျိုး၊ ပြင်းအားမျိုးတို့ဖြင့် ဝယ်ယူရရှိနိုင်ပါတယ်။

• ဆေးတောင့် 75mg, 150mg, 300mg
• ဆေးမှုန့် 75mg/5ml
• ထိုးဆေး 150mg/ml (2ml, 4ml ဆေးပုလင်း)
• မိန်းမကိုယ်ထည့် ဆေးတောင့် 100mg
• လိမ်းဆေး 1%

ဆေးလိမ်းဖို့ လွတ်သွားခဲ့ရင် (မေ့သွားခဲ့ရင်) ဘာလုပ်ရမလဲ။

Clindamycinကို သုံးဖို့ လွတ်သွားခဲ့ပါက (မေ့ခဲ့ပါက) သတိရတဲ့အချိန်မှာ အမြန်ဆုံးသုံးပါ။ ဒါပေမယ့် နောက်တစ်ကြိမ်မှ သတိရတယ်ဆိုရင်တော့ လွတ်သွားတဲ့ဆေးကို ထားလိုက်ပါ။ ပုံမှန်အတိုင်းပဲ ဆက်သုံးပါ။ ဆေးနှစ်ကြိမ် သုံးတာမျိုး မလုပ်ပါနဲ့။

ရေးသားသူ – Dr. Su Sandy

[embed-health-tool-bmi]