ရင်သားချိုင့်လို့ ဘေဘီလေးကို နို့ချိုတိုက်ဖို့ အခက်တွေ့နေပြီလား မေမေ

ရေးသားသူ ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

ရင်သွေးလေးကို နို့တိုက်ချင်တယ်၊ ဒါပေမယ့် ရင်သားက အတွင်းဘက်ကို ချိုင့်ဝင်နေလို့ ရင်သွေးလေးကို နို့တိုက်ဖို့ အခက်အခဲဖြစ်နေတယ်ဆိုရင် ဒီဆောင်းပါးလေးက နို့တိုက်မေမေကြုံနေရတဲ့ပြဿနာကို အထိရောက်ဆုံးဖြေရှင်းပေးနိုင်မှာပါ။

ရင်သားအတွင်းချိုင့်ဝင်နေတယ်၊ နို့သီးခေါင်းမပေါ်ဘူးဖြစ်နေတယ် ကလေးကို နို့တိုက်လို့ဖြစ်ပါ့မလား……….

ရင်သားအတွင်းချိုင့်ဝင်နေတယ်ဆိုတာနဲ့ဘေဘီလေးကိုနို့တိုက်လို့မရတာတော့မဟုတ်ပါဘူး။ ရင်သားကဘယ်လောက်ထိချိုင့်ဝင်နေလဲ၊နို့ရည်က ဘယ်လောက်ထိထွက်ရှိလဲ၊ ကလေးသောက်လို့ အဆင်ပြေနိုင်လားဆိုတဲ့ အချက်တွေပေါ်မှာမူတည်ပြီး ဘေဘီလေးကို နို့တိုက်လို့ရပါတယ်။ ဒီလိုအခြေအနေမှာ အခက်တွေ့နိုင်တာက ကလေးကလမစေ့ဘဲမွေးထားတာကြောင့် နို့ကို သိပ်မစို့နိုင်တဲ့ အခြေအနေမျိုးမှာပါ။

ရင်သားအတွင်းချိုင့်ဝင်နေတဲ့ပြဿနာကို ဒီလိုဖြေရှင်းပါ

ကိုယ့်ကိုကိုယ် စမ်းသပ်ပါ

ရင်သားက ဘယ်လောက်ထိချိုင့်ဝင်နေလဲဆိုတာကို သိနိုင်ဖို့က ကိုယ်တိုင် အရင်ဆုံးစမ်းသပ်ကြည့်ဖို့လိုပါမယ်။ ရင်သားရဲ့ အညိုရောင်နေရာကို လက်မနဲ့လက်ညှိုးသုံးလို့ ညှစ်ကြည့်ပါ။နောက်တစ်ဖက်ကိုလည်း လုပ်ကြည့်ပါ။ ရင်သားကို အပြင်ကို ညှစ်ထုတ်တဲ့သဘောပါ။

Breast Pump ကိုသုံးပါ

နို့ရည်ကို ညှစ်ထုတ်တဲ့ ကိရိယာကို အသုံးပြုပေးလို့ရပါတယ်။ ဒီလိုလုပ်ပေးတာက အတွင်းချိုင့်ဝင်နေတဲ့ ရင်သားကို အပြင်ထွက်လာစေဖို့ အထောက်အကူပြုပေးနိုင်ပါတယ်။

နှိပ်နယ်ပေးပါ

ရင်သားကို လက်ချောင်းလေးတွေ သုံးပြီးနှိပ်နယ်ပေးပါ။ အစပိုင်းမှာ နာကျင်နိုင်ပေမယ့်နောက်ပိုင်းတော့ အဆင်ပြေလာနိုင်ပါတယ်။ လက်တစ်ဖက်နဲ့ ရင်သားကို ခွက်ပုံစံလုပ်ပြီး အုပ်ထားပါ။နောက်လက်တစ်ဖက်ကို C ပုံစံလုပ်လို့ ရင်သားကိုခပ်ဖွဖွလေးညှစ်ပေးပါ။ ရင်သားပျော့လာတဲ့အထိ လုပ်ဆောင်ပေးပါ။နောက်ထပ်နည်းလမ်းတစ်ခုကတော့ လက်ညှိုးနဲ့လက်မကို V ပုံစံထားလို့ ရင်သားကို ခပ်ဖွဖွလေးညှစ်ပေးတာပါ။ ဒီနည်းလမ်းတွေက အတွင်းချိုင့်ဝင်နေတဲ့ ရင်သားကို ပုံမှန်အနေအထားရောက်ရှိစေဖို့ အကောင်းဆုံးထောက်ပံ့ပေးနိုင်မှာပါ။

ရင်သားကို ပုံစံမှန်အောင် လေ့ကျင့်ခန်းလုပ်ပေးပါ

ရင်သားကို ပုံစံမှန်အောင် လှုံ့ဆော်ပေးတဲ့နည်းကလည်း ရင်သားချိုင့်ဝင်နေသူတွေအတွက် အဆင်ပြေစေနိုင်မှာပါ။ ရင်သားကိုရေအေးဝတ်လေးကပ်ပေးပြီး လက်ညှိုးနဲ့လက်မကို သုံးလို့ ညှစ်ထုတ်ကြည့်ပေးပါ။ လက်မနဲ့လက်ညှိုးကို ရင်သားရဲ့ အညိုရောင်အကွက်ပေါ်မှာ ထားပေးပါ။ပြီးရင် ရင်သားကို အပြင်ဘက်ထွက်လာတဲ့အထိဖြည်းဖြည်းချင်းညှစ်ပေးပါ။ မနက်ခင်းတိုင်း ၅ ကြိမ်ခန့်ပုံမှန်လုပ်ပေးပါ။ အရမ်းအားမသုံးမိဖို့တော့ ဂရုစိုက်စေချင်ပါတယ်။

ဒီနည်းလမ်းတွေကို လုပ်ဆောင်ကြည့်ပေမယ့် အဆင်မပြေဘူးဆိုရင်တော့ ဆရာဝန်နဲ့သေချာတိုင်ပင်စေချင်ပါတယ်။ တစ်ခါတလေမှာ ရင်သားချိုင့်ဝင်မှုက ပုံမှန်ဖြစ်လေ့ဖြစ်ထရှိတဲ့အခြေအနေကိုကျော်လွန်နေမယ်ဆိုရင် ခွဲစိတ်ကုသမှုခံယူဖို့ လိုအပ်တာကြောင့်ပါ။ ဒီပြဿနာကို ယာယီဖြေရှင်းဖို့အတွက်တော့ Nipple Shield ကိုသုံးပေးလို့ရပါတယ်။

Hello Health Groupသည် ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။

Read also:

Share now :

တည်းဖြတ်သည့်နေ့ ဇူလိုင် 15, 2019 | နောက်ဆုံးတည်းဖြတ်ခြင်း စက်တင်ဘာ 12, 2019

သင်ဒါလည်း နှစ်သက်နိုင်ပါတယ်။