ကာလသားတွေရဲ့ လွဲလွဲလေးများ

ဆေးပညာပိုင်းဆိုင်ရာတည်းဖြတ်သူ | ရေးသားသူ

Update Date စက်တင်ဘာ 13, 2020 . 3 mins read
Share now

ဖုန်းတွေ၊အင်တာနက်တွေကို ကျယ်ကျယ်ပြန့်ပြန့်သုံးလာနိုင်တာနဲ့အမျှ တောရောမြို့ပါမကျန် မျက်စိနားတွေ ပွင့်လာကြပါတယ်။ ဒီလို ပွင့်လာတာနဲ့အမျှ လူငယ်လူရွယ်လူလတ်တွေရဲ့ လိင်မှုရေးရာအဖြာဖြာဟာလည်း ပိုမိုပွင့်လင်းမြင်သာလို့ လာပါတယ်။ အခုဆိုရင် လက်မထပ်ခင်အတူနေကြတာ အပါအဝင် ဖိုမဆက်ဆံရေးဟာ သိပ်ထူးဆန်းတဲ့ အရာတစ်ခု မဟုတ်တော့ပါဘူး။

လူသုံးအများဆုံး လူမှုကွန်ရက်ဖြစ်တဲ့ ဖေ့စ်ဘုတ်အပါအဝင် ဝဘ်ဆိုက်တွေမှာလည်း အပြာရောင်လွှမ်းတဲ့ ပေ့ခ်ျတွေ၊ဆိုက်တွေ ပလူပျံလာပါတယ်။ အဓိကအားဖြင့် ကာလသားတွေရဲ့ စားကျက်ဖြစ်တဲ့ ဒီပေ့ခ်ျတွေ၊ ဝဘ်ဆိုက်တွေဆီကို ဆရာဝန် ကာလသားတစ်ဦးဖြစ်တဲ့ စာရေးသူလည်း ဘုရားဖူး၊လိပ်ဥတူးဆိုသလို အခါအားလျော်စွာ ဝင်ရောက်လေ့လာမိပါတယ်။

ဒီလို လေ့လာတဲ့အခါ စိတ်မကောင်းစရာပြောရမလား၊ ထိတ်လန့်စရာဆိုရမလား မဝေခွဲနိုင်တဲ့ အခြင်းအရာတွေကို တွေ့မြင်ရလေ့ရှိပါတယ်။ ဘာတွေလဲဆိုတော့ လိင်မှုရေးရာနဲ့ ပတ်သက်လို့ အတော်လေး အယူအဆ လွဲမှားနေတဲ့ အကြောင်းလေးတွေပါ။ အထူးသဖြင့် အမေးအဖြေပို့စ်လေးတွေမှာ ဒီလို အလွဲလေးတွေ၊ သာမန်ဗဟုသုတလေးတွေကိုတောင် မှားယွင်းစွာ ယူဆနားလည်ပြီး မေးနေကြတဲ့အပြင် ဖြေပေးတဲ့သူတွေကလည်း ကာလသားကြီးတွေရဲ့ အစဉ်အဆက် ‘ဂျင်း’ တွေ၊ပေါက်ကရ အယူလွဲတွေကို ဝမ်းသာအားရနဲ့ ဖောက်သည်ချမျှဝေနေတာတွေကို တွေ့ရတဲ့အတွက် ဆရာဝန်တစ်ယောက်၊ လူငယ်တစ်ယောက်အနေနဲ့ အတော်လေး မချင့်မရဲ ဖြစ်သင့်ပါတယ်။ တဆက်တည်းမှာပဲ အခြေခံကျောင်းတွေက စတင်ပြီး မျိုးဆက်ပွားကျန်းမာရေးကို စနစ်တကျ သင်ကြားပေးသင့်ပါပြီ (တကယ်ထိထိရောက်ရောက်ပေါ့)။

ဒီဆောင်းပါးလေးမှာတော့ စာရေးသူ ကွန်ပြူတာရှေ့မှာ ကမ္ဘာပတ်စဉ်က မြင်တွေ့ခဲ့ရတဲ့ လိင်မှုဆိုင်ရာ လွဲလွဲလေးတွေကို စုစည်းမျှဝေပေးထားပါတယ်။ သင်ရော လွဲလွဲလေးတွေ ဖြစ်နေသလားဆိုတာ ဆန်းစစ်ကြည့်လိုက်ပါဦး။

၁။ ပါးစပ်နဲ့ လိင်ဆက်ဆံရင် ကိုယ်ဝန်ရနိုင်သလား/သုက်ရည်ကို မျိုချရင် ကိုယ်ဝန်ရနိုင်သလား။

ဒါဟာ အပြာပေ့ခ်ျတွေ၊အမေးအဖြေကဏ္ဍတွေမှာ အတော်များများ တွေ့ရတဲ့ မေးခွန်းပါ။ အောက်မှာ အကောင့်တုမျိုးစုံနဲ့ ပေါက်ကရခြောက်သောင်းဖြေပေးထားသူတွေကိုလည်း တွေ့ရပါသေးတယ်။ ထားပါတော့။ လိုရင်းကို ဆက်သွားရရင် ဒီမေးခွန်းကို ဖြေဖို့အတွက် လူ့ခန္ဓာကိုယ်ရဲ့ ခန္ဓာဗေဒဖွဲ့စည်းပုံကို အကြမ်းဖြင်းနားလည်ရပါမယ်။

ကိုယ်ဝန်ရဖို့အတွက် သုက်ကောင်တက်သွားရမယ့် လမ်းကြောင်းဟာ သားအိမ်နဲ့ ဆက်စပ်နေတဲ့ အမျိုးသမီးမျိုးပွားအင်္ဂါလမ်းကြောင်း ဖြစ်ပြီး သုတ်ရည်ကို ပါးစပ်ကမျိုချရင် ဆက်လက်ရောက်ရှိမယ့် လမ်းကြောင်းကတော့ အစာခြေအဖွဲ့အစည်းဆိုင်ရာ လမ်းကြောင်းပဲ ဖြစ်ပါတယ်။ ဒီလမ်းကြောင်းနှစ်ခုဟာ ဘယ်လိုမှ ဆက်စပ်မှုမရှိတဲ့ လမ်းကြောင်းနှစ်ခုဖြစ်တဲ့အတွက် ပါးစပ်နဲ့ လိင်ဆက်ဆံခြင်း၊သုက်ရည်မျိုချခြင်းတို့ကြောင့် ကိုယ်ဝန်ရစရာအကြောင်း လုံးဝ (လုံးဝ) မရှိပါဘူး။

ဆံပင်ခဏခဏ ညှပ်ရင် အသားမည်းတတ်လားလို့ မေးသလိုပဲ ဘယ်လိုမှ မဖြစ်နိုင်၊အဓိပ္ပာယ်မရှိတဲ့ မေးခွန်းတစ်ခု ဖြစ်ပါတယ်။ ဒါပေမယ့် ပါးစပ်နဲ့ လိင်ဆက်ဆံခြင်း၊ သုက်ရည်မျိုချခြင်းတို့ကြောင့် AIDS အပါအဝင် လိင်မှတဆင့် ကူးစက်တတ်သော ရောဂါတွေ ပြန့်ပွားကူးစက်လာနိုင်တဲ့အတွက် အထူးသတိပြုရပါမယ်။

၂။ စအိုနဲ့ လိင်ဆက်ဆံရင် ကိုယ်ဝန်ရနိုင်သလား။

ဒီမေးခွန်းဟာလည်း အပေါ်က မေးခွန်းနဲ့ ခပ်ဆင်ဆင်တူပါတယ်။ ပါးစပ်ဟာ အစာချေအဖွဲ့အစည်းဆိုင်ရာလမ်းကြောင်းရဲ့ အပေါ်ဆုံးနေရာဖြစ်ပြီး စအိုကတော့ အစာချေအဖွဲ့အစည်းဆိုင်ရာလမ်းကြောင်းရဲ့ အောက်ဆုံးနေရာ ဖြစ်ပါတယ်။ ဒါကြောင့် သုက်ရည်တွေဟာ ဒီလမ်းကြောင်းထဲမှာပဲ ရှိနေမှာဖြစ်တဲ့အတွက် စအိုနဲ့ လိင်ဆက်ဆံရင်လည်း ကိုယ်ဝန်ရနိုင်စရာအကြောင်း လုံးဝ(လုံးဝ) မရှိပါဘူး။ သို့သော် …… သို့သော် သတိပြုရမှာ နှစ်ချက်ရှိနေပါတယ်။

တစ်အချက်က စအိုသည် မိန်းမကိုယ်ယောနိနဲ့ နီးကပ်စွာ ရှိနေတာကြောင့် စအိုထဲက သုတ်ရည်တွေဟာ ယောနိထဲ အနည်းငယ်ဝင်သွားပြီး ကိုယ်ဝန်ရလာတာမျိုး ဖြစ်သွားနိုင်ပါတယ်။

နှစ်အချက်က စအိုသည် လိင်ဆက်ဆံဖို့ သဘာဝက ဖန်တီးပေးထားတဲ့ နေရာမဟုတ်ဘဲ အညစ်အကြေးစွန့်ပစ်ဖို့ကိုပဲ ရည်ရွယ်တာကြောင့် သဘာဝနဲ့ ဆန့်ကျင်ပြီး လိင်ဆက်ဆံခြင်းဟာ ဆိုးကျိုးတွေဆီ ဦးတည်နိုင်ပါတယ်။ မစင်အညစ်အကြေးတွေကတဆင့် ရောဂါကူးစက်ခြင်း၊တင်းကြပ်ပြီး စုတ်ပြဲလွယ်တဲ့ စအိုတစ်ရှူးတွေကြောင့် AIDS အပါအဝင် လိင်မှတဆင့် ကူးစက်တတ်သော ရောဂါတွေ အလွယ်တကူ ကူးစက်ပြန့်ပွားနိုင်ခြင်းစတဲ့ ဆိုးကျိုးတွေပါပဲ။

ဒါကြောင့် စအိုမှတဆင့် လိင်ဆက်ဆံခြင်းကို အတတ်နိုင်ဆုံး ရှောင်ကျဉ်သင့်ပြီး မရှောင်နိုင်ရင် အကာအကွယ်ပစ္စည်း (ကွန်ဒုံး) သုံးရမယ့်အပြင် သင့်တော်မှန်ကန်တဲ့ ချောဆီတွေကိုလည်း သုံးစွဲပေးရမှာ ဖြစ်ပါတယ်။

၃။ အထွတ်အထိပ်ရောက်တဲ့အထိ (ဝါ) သုက်ရည်ထွက်တဲ့အထိ မဆက်ဆံရင် ကိုယ်ဝန်မရနိုင်ဘူး။

တချို့က မေးပါတယ်။ ကျွန်တော့်ကောင်မလေးနဲ့ ဆက်ဆံပေမယ့် သုက်ရည်ထွက်တဲ့အထိ(ကိစ္စပြီးမြောက်တဲ့အထိ) မဆက်ဆံဘဲ တစ်ဝက်တစ်ပျက်နဲ့ ရပ်ထားလိုက်ပါတယ်။ ဒါဆိုရင် ကိုယ်ဝန်မရှိနိုင်ဘူးပေါ့နော် ဆိုပြီး မေးတာမျိုးပါ။

ယေဘုယျအားဖြင့် သုက်ရည်ကြောင့် ကိုယ်ဝန်ရတယ်ဆိုပေမယ့် အထွတ်အထိပ်ရောက်တဲ့အချိန်ကျမှ သုက်ရည်ထွက်တာမဟုတ်ဘဲ ကနဦးအစပျိုးချိန် (foreplay)နဲ့ ဆက်ဆံနေဆဲကာလတွေမှာလည်း ရှေ့ပြေးသုက်ရည်ကြည်လေးတွေ ထွက်တတ်ပြီး သုက်ပိုးအနည်းငယ်ပါတတ်ပါတယ်။ ဒါကြောင့် ကိုယ့်လူကံကောင်းရင် ခေါ်မလား၊ ကံဆိုးရင် ခေါ်မလား …. ကိုယ်ဝန်ရသွားတတ်ပါတယ်။

ဒါကြောင့် မပြီးဘဲနဲ့လည်း ကိစ္စပြီးသွားနိုင်တာ (ကိုယ်ဝန်ရသွားနိုင်တာ)ကို သိထားရပါမယ်။ ထုံးစံအတိုင်း ထပ်မှာချင်တဲ့အချက်ကတော့ မလိုလားအပ်တဲ့ ကိုယ်ဝန်နဲ့ လိင်မှတဆင့်ကူးစက်တတ်သော ရောဂါတွေကို ကာကွယ်နိုင်ဖို့အတွက် အကာအကွယ်ပစ္စည်း(ကွန်ဒုံး) သုံးရမယ်ဆိုတာပါပဲ။

၄။ ကောင်မလေးနဲ့ အတူနေပြီးတဲ့အခါ အရေးပေါ်ပဋိသန္ဓေတားဆေး တိုက်လိုက်ရင် အားလုံးအေးဆေးပဲမလား။

ဒီမေးခွန်းရဲ့ အဖြေဟာ ယေဘုယျအားဖြင့်တော့ မှန်ပါတယ်၊ ကိုယ်ဝန်မရနိုင်ပါဘူးလို့ ဖြေရမှာ ဖြစ်ပေမယ့် သူ့ရဲ့ ထိရောက်မှုဟာ ၇၅ – ၈၅ ရာခိုင်နှုန်းအကြားမှာပဲရှိတဲ့အပြင် အကာအကွယ်မပါတဲ့ လိင်ဆက်ဆံမှုပြုလုပ်အပြီး ၇၂နာရီအတွင်းမှာ သုံးစွဲမှသာလျင် အာနိသင်အထိရောက်ဆုံးဖြစ်မှာပါ။

ဒါ့အပြင် ဒီနေ့ခေတ်လူငယ်တွေဟာ ခဏခဏ အရေးပေါ်လာကြပြီး ပဲကြီးလှော်စားသလို စားလာကြတဲ့အတွက် မလိုလားအပ်တဲ့ နောက်ဆက်တွဲပြဿနာတွေ အများကြီး ဖြစ်ပေါ်လာနိုင်ပါတယ်။ ဒါကြောင့် ကိုယ့်ချစ်သူနဲ့ အတူနေမယ်ဆိုရင်လည်း အကာအကွယ်ပစ္စည်းသုံးဖို့ကိုပဲ ဦးစားပေး စဉ်းစားသင့်ပါတယ်။

၅။ ဆီလီကွန်ထိုးရင်၊ ဂေါ်လီထည့်ရင် လိင်ဆက်ဆံဖက်က ပိုစွဲသလား။

ပထမဆုံး ပြောချင်တာကတော့ သဘာဝနဲ့ ဖီဆန်တဲ့ ဘယ်အရာမှ မကောင်းပါဘူးဆိုတာကိုပါပဲ။ သာမန်ထက်ကြီးမားရှည်လျားတဲ့ အမျိုးသားအင်္ဂါဟာ ဆက်ဆံဖော်အမျိုးသမီးကို နာကျင်စေသလို ဂေါ်လီထည့်ထားတဲ့ လိင်တံဟာလည်း ဆက်ဆံဖော်အမျိုးသမီးရဲ့ ယောနိအတွင်းပိုင်းကို စုတ်ပြဲဒဏ်ရာရစေနိုင်တာကြောင့် နာကျင်စေမှာပါ။

လောကကြီးမှာ နာကျင်တဲ့ဝေဒနာကို ကြိုက်သူတော့ မရှိဘူးလို့ ထင်ပါတယ်။ ဒါကြောင့် ကာလသားကြီးတွေရဲ့ ပေါက်တတ်ကရ လမ်းညွှန်မှုတွေ၊ အပြာစာပေတွေရဲ့ တလွဲဖော်ပြမှုတွေနောက်ကို ကောက်ကောက်ပါအောင် မလိုက်ပါနဲ့။ မိမိရဲ့ အဖော်အတွက် နာကျင်စေတဲ့အပြင် မိမိကိုယ်တိုင်အတွက်လည်း ကျန်းမာရေးပြဿနာတွေကို ခံစားရစေနိုင်ပါတယ်။

ဆီလီကွန်ကြီးဆေးထိုးပြီး ရောင်ကိုင်းပုပ်ပွ မရှူနိုင်မကယ်နိုင်ဖြစ်မှ ဆေးရုံတက် ခြစ်ထုတ်ရသူတွေ၊ အင်္ဂါဖြတ်ပစ်ရသူတွေ ဒုနဲ့ဒေးပါ။ ဂေါ်လီထည့်ခြင်းဟာလည်း အရေပြားကို လှီးပြီးထည့်ရခြင်းဖြစ်တဲ့အတွက် မေးခိုင်ပိုးအပါအဝင် အခြားသော ကူးစက်ပိုးတွေကို ဖိတ်ခေါ်နေသလိုပါပဲ။ ဘယ်ဖက်ကကြည့်ကြည့် အကျိုးမရှိတဲ့ ကိစ္စမို့ ဒါမျိုးတွေကို လုံးဝမလုပ်သင့်ပါဘူး။

အထက်မှာ ဖော်ပြခဲ့တဲ့ မေးခွန်းတွေကတော့ အင်တာနက်ပေါ်မှာ အများစုမြင်တွေ့ရလေ့ရှိတဲ့ ခပ်လွဲလွဲ မေးခွန်းလေးတွေပါ။ ဉာဏ်နဲ့တိုင်းဆ ဆင်ခြင်သိနိုင်ဖို့ မျှဝေပေးလိုက်ရပါတယ်။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ဒီဆောင်းပါးက သင့်အတွက် အသုံးဝင်ပါသလား။
happy unhappy

သင်ဒါလည်း နှစ်သက်နိုင်ပါတယ်။

ကိုဗစ်ကာလမှာ တားဆေးထိုး ဖို့ အခက်အခဲရှိတယ်ဆိုရင်

တားဆေးထိုးရာကနေ သွားမထိုးနိုင်တော့ဘူးဆိုရင် သောက်ဆေးကို ခဏပြောင်းသောက်ထားနိုင်ပါတယ်။ ဆရာဝန်နဲ့ တိုင်ပင်ပြီး ပြောင်းသောက်ပါ။

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Dr. Htet Htet Zaw Win
ကျန်းမာစွာနေထိုင်ခြင်း, Corona Virus, COVID-19 အောက်တိုဘာ 15, 2020 . 2 mins read

Covid စတေးဟုမ်းကာလအတွင်း သားဆက်ခြားနည်းပြဿနာမတက်စေဖို့ ဘယ်လိုဂရုစိုက်ရမလဲ

Covid -19 ရောဂါအန္တရာယ် ကာကွယ်နိုင်ဖို့ အိမ်မှာပဲနေရတဲ့ အချိန်အတွင်း အိမ်ရှင်မတွေ ကြုံတွေ့ရတဲ့အခက်အခဲတစ်ခုက သားဆက်ခြားခြင်း(သန္ဓေတားခြင်း)ပါပဲ။

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Yun Sandi Nan Mon
ကျန်းမာစွာနေထိုင်ခြင်း, Corona Virus, COVID-19 အောက်တိုဘာ 14, 2020 . 2 mins read

လိင်အင်္ဂါရေယုန်နဲ့ ပတ်သက်ပြီး သင်ဘာတွေ သိထားသင့်သလဲ။

လိင်အင်္ဂါရေယုန် ပါးစပ်ရေယုန် လိင်ကတဆင့်ကူးစက် ရေယုန်ဗိုင်းရပ်စ် ရေယုန်အရည်ကြည်ဖုများ လိင်အင်္ဂါအနာ ကွန်ဒုံး စိတ်ဖိစီးမှုများ ကိုယ်ခံအားကျ HSV 1 HSV 2

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Dr. Htet Htet Zaw Win

ညအိပ်ညနေ လေဝင်လေထွက်ကောင်းအောင် ဘာဝတ်ကြမလဲ

ညအိပ် လေဝင်လေထွက် အိပ်စက်အနားယူ မြန်မာနိုင်ငံ အဝတ်အစား အမျိုးသား လိင်အင်္ဂါ မိန်းမကိုယ် ခြောက်သွေ့ ယားယံ အနံ့ဆိုး အတွင်းခံ ဘောင်းဘီ ရေနွေး ဘရာစီယာ

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Ye Myo Myat

သင့်အတွက် ရွေးချယ်ထားသည်

မိန်းမကိုယ် ရနံ့လေး သင်းစေဖို့ ရေမွှေးတွေ ဆွတ်ကြသတဲ့လား

မိန်းမကိုယ် ရနံ့လေး သင်းစေဖို့ ရေမွှေးတွေ ဆွတ်ကြသတဲ့လား

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Dr. Thiha Phyo Myint
ရေးသား ထုတ်ဝေခဲ့သည် နိုဝင်ဘာ 26, 2020 . 2 mins read
အပြောများတဲ့ Menstrual Cup နဲ့ ကျယ်လာမှာလား အပါအဝင် အမေးအများဆုံး မေးခွန်းများ

အပြောများတဲ့ Menstrual Cup နဲ့ ကျယ်လာမှာလား အပါအဝင် အမေးအများဆုံး မေးခွန်းများ

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Dr. Thiha Phyo Myint
ရေးသား ထုတ်ဝေခဲ့သည် နိုဝင်ဘာ 25, 2020 . 2 mins read
မိန်းမကိုယ်ပိုးဝင်ခြင်းအကြောင်း

မိန်းမကိုယ်ပိုးဝင်ခြင်းအကြောင်း

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Dr.Thant Zin
ရေးသား ထုတ်ဝေခဲ့သည် နိုဝင်ဘာ 12, 2020 . 2 mins read
ကိုဗစ်ကာလ မှာ သားဆက်ခြားပြဿနာတွေကို ဘယ်လိုဖြေရှင်းကြမလဲ။

ကိုဗစ်ကာလ မှာ သားဆက်ခြားပြဿနာတွေကို ဘယ်လိုဖြေရှင်းကြမလဲ။

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Dr. Htet Htet Zaw Win
ရေးသား ထုတ်ဝေခဲ့သည် အောက်တိုဘာ 16, 2020 . 2 mins read