home

What are your concerns?

close
Inaccurate
Hard to understand
Other

သို့မဟုတ် လင့်ခ်ကူးယူမည်

အသက်အရွယ်အပိုင်းအခြားအလိုက် လိုအပ်တဲ့ အိပ်စက်မှု

အသက်အရွယ်အပိုင်းအခြားအလိုက် လိုအပ်တဲ့ အိပ်စက်မှု

လုံလောက်စွာ အိပ်စက်ခြင်းဟာ လူတိုင်းအတွက် အရေးကြီးပါတယ်။ အမေးများတဲ့မေးခွန်းကတော့ အသက်အရွယ် အုပ်စုတစ်ခုစီအတွက် ဘယ်လောက်အိပ်စက်ခြင်းဟာ လုံလောက်ပါသလဲ။

ဒီဆောင်းပါးမှာတော့ စာဖတ်သူတွေကို အသုံးဝင်တဲ့ အချက်အလက်တွေ ပေးမှာ ဖြစ်ပါတယ်။ အိပ်စက်ခြင်းဟာ ဘဝရဲ့ လျှို့ဝှက်တဲ့ အစိတ်အပိုင်း တစ်ခု ဖြစ်ပြီး သိပ္ပံပညာရှင်အတော်များများက လူတွေ ဘာကြောင့် အိပ်ရသလဲဆိုတာ မသိသေးပါဘူး။ ဒါပေမယ့် သူတို့ဟာ အိပ်ရေးဝခြင်းရဲ့ များပြားလှတဲ့ အကျိုးကျေးဇူးတွေကိုတော့ ဖေါ်ထုတ်နိုင်ခဲ့ပါတယ်။

အိပ်စက်ခြင်းနဲ့ ကျန်းမာရေးအခြေအနေများ

အိပ်ရေးပျက်ခြင်းဟာ သင့်ကို ဝစေပါတယ်။ အိပ်ရေးပျက်ခြင်းနဲ့ ဝခြင်းကြားမှာ ကြီးမားတဲ့ ဆက်စပ်မှု ရှိပါတယ်။ အိပ်ရေးပျက်ခြင်းဟာ အဝလွန်ခြင်းရဲ့ အဓိက ဖြစ်စေတဲ့ အကြောင်းရင်းတစ်ခု လည်းဖြစ်ပါတယ်။ လေ့လာမှုတွေက အိပ်စက်ချိန်နည်းတဲ့ ကလေးနဲ့ လူကြီးတွေဟာ အသက်ကြီးလာတဲ့အခါမှာ အဝလွန်ဖို့ ၈၉% နဲ့ ၅၅% ပိုများတယ်လို့ ဆိုကြပါတယ်။ ကောင်းစွာ အိပ်စက်နိုင်ခြင်းဟာ အာရုံစူးစိုက်မှုနဲ့ အလုပ်လုပ်နိုင်စွမ်းကို တိုးတက်စေပါတယ်။

အိပ်စက်ခြင်းဟာ မှတ်ဉာဏ်၊ အာရုံစိုက်ခြင်း၊ အလုပ်လုပ်ခြင်း အစရှိတဲ့ ဦးနှောက်လုပ်ငန်းဆောင်တာတွေအတွက် အရေးကြီးပါတယ်။ ဒါကြောင့် ကောင်းစွာအိပ်စက်ခြင်းဟာ ပြဿနာဖြေရှင်းခြင်းနဲ့ မှတ်ဉာဏ်တို့ကို ကလေးမှာရော လူကြီးမှာပါ တိုးတက်စေနိုင်ပါတယ်။

ကောင်းမွန်စွာ အိပ်စက်ခြင်းဟာ အားကစားစွမ်းရည်ကိုလည်း တိုးတက်စေနိုင်ပါတယ်။ ဘက်စကတ်ဘော သမားတွေကို လေ့လာစမ်းစစ်ကြည့်ခဲ့တဲ့ လေ့လာမှုတစ်ခုမှာ လုံလောက်စွာ အိပ်စက်ခြင်းဟာ အလျင်၊ တိကျမှု၊ တုန့်ပြန်နိုင်စွမ်းနဲ့ စိတ်အခြေအနေ ပိုမိုကောင်းမွန်တယ်လို့ ဆိုပါတယ်။ ကောင်းမွန်စွာ အိပ်စက်ခြင်းဟာ နှလုံးရောဂါနဲ့ လေဖြတ်ခြင်းတွေကိုလည်း လျှော့ချပေးနိုင်ပါတယ်။

တစ်ရက်ကို ၇-၈ နာရီထက် လျော့နည်းပြီး အိပ်သူတွေဟာ နာတာရှည်ရောဂါ ဖြစ်နိုင်ခြေများပါတယ်။ အအိပ်နည်းခြင်းဟာ စိတ်ကျခြင်းနဲ့ ဆက်စပ်မှု ရှိပါတယ်။ စိတ်ကျရောဂါရှိတဲ့ လူနာ ၉၀%ဟာ အိပ်စက်မှု မမှန်ခြင်းနဲ့ ဆက်စပ်နေပါတယ်။ ဒါ့ပြင် အအိပ်နည်းခြင်းဟာ ကိုယ့်ကိုယ်ကိုယ် သေကြောင်းကြံပြီး သေဆုံးနှုန်းကိုလည်း မြင့်တက်စေနိုင်ပါတယ်။ အိပ်စက်ခြင်းဟာ ကိုယ်ခံအားကို မြင့်တက်စေပါတယ်။

တစ်နေ့ကို အနည်းဆုံး ၈ နာရီအိပ်စက်ခြင်းဟာ ကိုယ်ခံအား ကောင်းမွန်စေပြီး အအေးမိခြင်းကို သက်သာစေနိုင်ပါတယ်။ အိပ်စက်ခြင်းဟာ ခံစားမှုတွေနဲ့ လူမှုဆက်ဆံရေးတွေပေါ်မှာပါ အကျိုးသက်ရောက်မှုရှိပါတယ်။ အိပ်ရေးမဝခြင်းဟာ လူမှုဆက်ဆံရေးကို ပျက်စီးစေပြီး စိတ်ဖေါ်ပြမှုတွေဖြစ်တဲ့ စိတ်တိုခြင်း၊ ပျော်ရွှင်ခြင်းတွေကို သိနိုင်ခြင်း မရှိတော့ပါဘူး။

မတူညီတဲ့ အသက်အပိုင်းအခြားတွေအတွက် လုံလောက်တဲ့ အိပ်စက်ခြင်း

National Sleep Foundation ရဲ့ Sleep Health Journal ထဲမှာ major report အဖြစ်ဖေါ်ပြခဲ့တာကတော့

  • မွေးကင်းစ (အသက် သုံးလအောက်) – တစ်နေ့ကို ၁၄-၁၇ နာရီ
  • ကလေးငယ် (၄-၁၁လ) – တစ်နေ့ကို ၁၂-၁၅ နာရီ
  • လမ်းလျှောက်တတ်ကာစကလေး (၁-၂နှစ်) – တစ်နေ့ကို ၁၁-၁၄ နာရီ
  • ကျောင်းမတက်ခင် (၃-၅ နှစ်) – တစ်နေ့ကို ၁၀-၁၃ နာရီ
  • ကျောင်းတက်တဲ့ အရွယ် (၆-၁၃ နှစ်) – တစ်နေ့ကို ၉-၁၁ နာရီ
  • ဆယ်ကျော်သက် (၁၄-၁၇ နှစ်) – တစ်နေ့ကို ၈-၁၀ နာရီ
  • ငယ်ရွယ်သူ (၁၈-၂၅ နှစ်) – တစ်နေ့ကို ၇-၉ နာရီ
  • အရွယ်ရောက်ပြီးသူ (၂၅-၆၄ နှစ်) – တစ်နေ့ကို ၇-၉ နာရီ
  • အသက်ကြီးသူ (အသက် ၆၅နှစ်အထက်) – တစ်နေ့ကို ၇-၈ နာရီ

ဖြေရှင်းနည်း

နေ့စဉ် အိပ်ရာဝင်ခြင်း၊ နိုးထခြင်းတွေကို တူညီတဲ့ အချိန်တွေမှာ ပြုလုပ်ပါ။ ကလေးငယ်တွေအတွက် အိပ်စက်ချိန်ကို သတ်မှတ်ပေးပါ။ ကလေးငယ်တွေရဲ့ အိပ်ခန်းကို ဒဏ်ပေးခြင်းအတွက် မသုံးပါနဲ့။

ညဘက်တွေ၊ စနေ၊ တနင်္ဂနွေတွေမှာပါ တူညီတဲ့ အိပ်စက်မှုပုံစံကို ပြုလုပ်ပါ။

မအိပ်ခင် တိတ်ဆိတ်တဲ့ နာရီ တစ်နာရီထားပါ။ ပြင်းထန်တဲ့ လေ့ကျင့်ခန်းနဲ့ စူးရှတဲ့ အလင်းရောင်တွေကို ရှောင်ကျဉ်ပါ။

မအိပ်ခင် နာရီအနည်းငယ်အတွင်း အစာများများစားခြင်းကို ရှောင်ကျဉ်ပါ။

နီကိုတင်းတွေဖြစ်တဲ့ နီကိုတင်း၊ ကဖင်း (ချောကလက်၊ ကော်ဖီ၊ လက်ဖက်ရည်) တွေကို ရှောင်ကျဉ်ပါ။

အိပ်ခန်းကို တိတ်ဆိတ်၊ အေးချမ်း၊ မှောင်နေအောင်ထားပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ

10 reasons why good sleep is important, https://authoritynutrition.com/10-reasons-why-good-sleep-is-important/ Accessed March 20, 2017.
Surprising health benefits of sleep, http://www.health.com/health/gallery/0,,20459221,00.html Accessed March 20, 2017
Benefits of sleep, http://healthysleep.med.harvard.edu/healthy/matters/benefits-of-sleep Accessed March 20, 2017.
The ideal amount of sleep for each age group According to the expert, http://lifehacker.com/the-ideal-amount-of-sleep-for-each-age-group-according-1683344371 Accessed March 20, 2017.
How to sleep better?, https://www.helpguide.org/articles/sleep/how-to-sleep-better.htm Accessed March 20, 2017.
Strategies for getting enough sleep, https://www.nhlbi.nih.gov/health/health-topics/topics/sdd/strategies Accessed March 20, 2017.

စာရေးသူ ဓာတ်ပုံbadge
Dr . Phyu Mon Latt မှ ရေးသားသည်။ 12/05/2020 တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။