မအိပ်မနေ အသက်ရှည် ဆိုပေသော်ငြားလည်း

မအိပ်မနေ အသက်ရှည် ဆိုပေသော်ငြားလည်း အလွန်အကျွံဆိုရင် မကောင်းပါဘူး။ ဘာကြောင့် ဒီလိုပြောရတာလဲဆိုတော့ အိပ်စက်မှုက လူတစ်ယောက်ရဲ့ စိတ်ရောကိုယ်ပါ ကျန်းမာစေရေးမှာ အရေးပါတဲ့ အခန်းကဏ္ဍကနေ ပါဝင်နေတာကြောင့်ပါ။ အိပ်ရေးမဝရင် လူတစ်ယောက်က ရေရှည်မှာ ဆန်းသစ်ဖန်တီးနိုင်စွမ်းတွေ ကျဆင်းလာမှာ ဖြစ်သလို နေ့စဉ်ဘဝမှာရော ကျန်းမာရေးကိုပါ ထိခိုက်စေလာပါလိမ့်မယ်။

ဒါကြောင့် ဒီတစ်ခေါက်တော့ နေ့ဘက်မှာ အလုပ်တွေလုပ်တယ်။ ညဘက်မှာ ဘားတွေ သွားတယ်။ ပါတီတွေတက်တယ်။ မိုးလင်းတော့ ခဏလေးမှေးပြီး အလုပ်ခွင်ဝင်လိုက်တာပဲ အဆင်ပြေပါတယ် ဆိုသူလေးတွေအတွက် ညဘက် အိပ်ရေးပျက်တာက ရက်ဆက်ဖြစ်လာတဲ့အခါ ကျန်းမာရေးကို ဘယ်လိုတွေ ထိခိုက်စေနိုင်လဲဆိုတာကို ပြောပြပေးပါတယ်။

လူငယ်ဆိုတော့ အိပ်ရေးပျက်လည်း ထိခိုက်တာမျိုး သိပ်မရှိဘူးလို့ ထင်ပါသလား

အိပ်ချိန် ပြည့်ဝဖို့ဆိုတာက လူကြီးတွေ၊ ကလေးသေးသေးလေးတွေနဲ့ပဲဆိုင်တာပါ။ ကျန်းမာဖျတ်လတ်နေတဲ့ လူငယ်တွေအတွက် မဟုတ်ပါဘူး လို့ ယူဆနေတုန်းပဲလား။ ဒါဆိုရင်တော့ ဒီယူဆချက်ကို ပြင်ဆင်လိုက်ဖို့ လိုအပ်နေပါပြီ။ ဘာလို့လဲဆိုတော့ ပြည့်ဝတဲ့ အိပ်စက်ချိန် ရရှိဖို့က လူတိုင်းအတွက် အရွယ်တိုင်းအတွက် အရေးပါပါတယ်။ သက်ရှိတိုင်း အတွက်ဆိုရင် ပိုမှန်မှာပါ။

သက်ရှိတိုင်းမှာ သင့်တင့်မျှတတဲ့ အာဟာရ၊ လုံလောက်ပြည့်ဝတဲ့ အိပ်စက်ချိန် ရှိမှ စိတ်ရောကိုယ်ပါ လန်းဆန်းမှာပါ။ ဒါကြောင့် လူကြီးဖြစ်ဖြစ် လူငယ်ဖြစ်ဖြစ် တစ်နေ့တာမှာ လိုအပ်တဲ့ စိတ်လက်ကြံ့ခိုင်မှု ပြည့်ဝစေဖို့အတွက် အိပ်ချိန်က အနည်းဆုံး ၆ နာရီ ကနေ ၈ နာရီကြား ရှိနေဖို့ လိုပါမယ်။

မအိပ်မနေ အသက်ရှည် ဆိုပေသော်ငြားလည်း

မအိပ်မနေ အသက်ရှည် ဆိုပေသော်ငြားလည်း နေ့စဉ်နဲ့အမျှ ပြည့်ဝတဲ့ အိပ်စက်ချိန် မရရှိတဲ့အခါ ရေတိုမှာရော ရေရှည်မှာပါ ကျန်းမာရေးပြဿနာတွေ ခံစားလာရနိုင်ပါတယ်။ ပြည့်ဝတဲ့ အိပ်စက်ချိန် မရှိတာက စိတ်ရောကိုယ်ပါ ကျန်းမာမှုကို ဘယ်လိုတွေတောင် ထိခိုက်စေသလဲဆိုတာကို အတူတူ ဆက်ကြည့်လိုက်ရအောင်နော်။

• နိုးကြားတက်ကြွမှု နည်းသွားမယ်

တစ်နေ့ကို ရှိသင့်တဲ့ အိပ်ချိန်ထက် ၁ နာရီ ခွဲလောက် လျော့သွားတာက နိုးကြားတက်ကြွမှု နည်းပြီး အလုပ်တွေကို ထင်သလောက် မပြီးတာမျိုး စဉ်းစားနိုင်စွမ်းကျလာတာမျိုးတွေ ခံစားရစေနိုင်ပါတယ်။

• အရမ်း အိပ်ငိုက်မယ်

ညဘက်တွေကို ကောင်းကောင်း မအိပ်ထားတော့ နေ့ခင်းဘက်ရောက်တဲ့အခါ တစ်ချိန်လုံး ငိုက်မြည်းနေတာမျိုး ခံစားရနိုင်ပါတယ်။ ဒီလိုမျိုး အိပ်ရေးပျက်တာက နေ့ခင်းဘက်တွေမှာ ငိုက်မြည်းတာအပြင် အားမရှိသလိုပါ ခံစားရစေနိုင်ပါတယ်။

• မေ့တတ်လာမယ်

အိပ်ရေးပျက်တာက စဉ်းစားတွေးခေါ်နိုင်စွမ်းကို ကျဆင်းစေနိုင်သလို မှတ်မိနိုင်စွမ်းနဲ့ အချက်အလက်တွေကို နားလည်နိုင်စွမ်း လျော့ကျသွားနိုင်ပါတယ်။ ဒီလိုနဲ့ ခဏခဏ မေ့တတ်တာမျိုးကို ခံစားလာရနိုင်ပါတယ်။

• ဆက်ဆံရေး ထိခိုက်လာနိုင်တယ်

အိပ်ရေးမဝတော့ လူက ကြည်ကြည်လင်လင် မရှိဘဲ ထိုင်းထိုင်းမှိုင်းမှိုင်း ဖြစ်နေနိုင်ပါတယ်။ ဒီလို ထိုင်းမှိုင်းလေးကန်နေတာနဲ့အတူ အိပ်ရေးမဝတာကြောင့် စိတ်မကြည်လင်တာကိုပါ ခံစားရမယ်ဆိုရင် အလိုလိုနေရင်း စိတ်တိုတာမျိုး ဖြစ်လာပြီး လူမှုဆက်ဆံရေးတွေကို ထိခိုက်လာတာမျိုးတွေ ဖြစ်လာနိုင်ပါတယ်။

• နေ့စဉ်ဘဝကို ထိခိုက်လာမယ်

အိပ်ရေးပျက်တာက ကာလတိုပဲ ဖြစ်ဖြစ် ကာလရှည်ပဲ ဖြစ်ဖြစ် နေ့စဉ်ဘဝအပေါ်မှာ ထိခိုက်လာနိုင်ပါတယ်။ နေ့စဉ် လုပ်ဆောင်မှုတွေကို လုပ်ဆောင်ဖို့ အားမရှိသလို ခံစားရတာကစလို့ တီထွင်ဖန်တီးနိုင်စွမ်းတွေ စဉ်းစားဆုံးဖြတ်နိုင်စွမ်းတွေကို ထိခိုက်လာစေပြီး နေ့စဉ်ဘဝမှာ အခက်အခဲတွေ ဖြစ်လာနိုင်ပါတယ်။

• မတော်တဆမှုတွေ ဖြစ်နိုင်တယ်

အိပ်ရေးမဝဘဲ ကားတွေ ယာဉ်တွေ မောင်းနှင်တာက မတော်တဆ ဖြစ်နိုင်ခြေကို အတော်လေး များစေနိုင်ပါတယ်။ ယာဉ်မတော်တဆမှု အများစုက အိပ်ရေးပျက်တာ ပင်ပန်းတာတွေကြောင့် ဖြစ်ရတာပါ။

ဒါတွေအပြင် အိပ်ရေးပျက်တာ များလာတာက ရေရှည်မှာ အခုလို ကျန်းမာရေးပြဿနာတွေ ရှိလာနိုင်ပါတယ်။

• သွေးတိုးတာ
• ရုတ်တရက် နှလုံးရပ်တာ
• လေဖြတ်တာ
• ဝိတ်တက်တာ
• အဝလွန်တာ
• ဆီးချို
• စိတ်ဓာတ်ကျတာ
• ကိုယ်ခံအားကျတာ
• ဦးနှောက်စွမ်းဆောင်ရည် ကျဆင်းတာမျိုးတွေ ခံစားရနိုင်ပါတယ်။

အသက်အရွယ်အလိုက် ရှိသင့်တဲ့ အိပ်စက်ချိန်

အသက်အရွယ်အလိုက် ရှိသင့်တဲ့ အိပ်စက်ချိန်တွေက

• အသက် ၆၅ နှစ် အထက် ဆိုရင် ၇ နာရီ ကနေ ၈ နာရီ
• အသက် ၂၆ နှစ် ကနေ ၆၄ နှစ် အထိ ဆိုရင် ၇ နာရီ ကနေ နာရီ
• အသက် ၁၈ နှစ် ကနေ ၂၅ နှစ် ဆိုရင် ၇ နာရီ ကနေ နာရီ
• အသက် ၁၄ နှစ် ကနေ ၁၇ နှစ် ဆိုရင် ၈ နာရီ ကနေ ၁၀ နာရီ
• အသက် ၆ နှစ် ကနေ ၁၃ နှစ် ဆိုရင် 9 နာရီ ကနေ ၁၁ နာရီ
• အသက် ၃ နှစ် ကနေ ၅ နှစ် ဆိုရင် ၁၀ နာရီ ကနေ ၁၃ နာရီ
• အသက် ၁ နှစ် ကနေ ၂ နှစ် ဆိုရင် ၁၁ နာရီ ကနေ ၁၄ နာရီ
• အသက် ၄ လ ကနေ ၁၁ လ ဆိုရင် ၁၂ နာရီ ကနေ ၁၅ နာရီ
• မွေးကင်းစ ကနေ ၃ လဆိုရင် ၁၄ နာရီ ကန ၁၇ နာရီ အသီးသီး ရှိရပါမယ်။