ဘေဘီလေးနဲ့ ဗီတာမင် C

ဘေဘီလေး တစ်ယောက် ကောင်းမွန်စွာ ကြီးပြင်းလာစေဖို့ အာဟာရဓာတ်တွေ ပြည့်ဝနေဖို့ လိုပါမယ်။ ဒီ အာဟာရဓာတ်ဆိုတဲ့နေရာမှာ ဗီတာမင် နဲ့ သတ္တုဓာတ်တွေ အချိုးကျ ပါဝင်နေတာကို ဆိုလိုတာပါ။

ဗီတာမင်တွေထဲမှာ ကလေးကို ကိုယ်ခံအား ကောင်းစေဖို့ဆိုရင် မဖြစ်မနေ ဖြည့်ဆည်းပေးဖို့ လိုမယ့် ဗီတာမင်က ကိုယ်ခံအား ဗီတာမင်လို့ သိထားကြတဲ့ ဗီတာမင် C ပါ။ ဖျားနေတယ်ဆိုရင် မြန်မြန်နေကောင်းအောင်ဆိုပြီး ဖြစ်ဖြစ် ဖျားချင်သလိုလို ဖြစ်နေတယ်ဆိုရင် ကိုယ်ခံအားကောင်းအောင်ဆိုပြီး စားသုံးတတ်ကြတဲ့ ဗီတာမင် C က ဘေဘီလေးတွေ ကိုယ်ခံအားကောင်းစေဖို့အတွက်လည်း လိုအပ်ပါတယ်။

ကျန်းမာရေး အကျိုးကျေးဇူး များပြီး ကလေးကို ကျန်းမာ ဖွံ့ဖြိုးစေဖို့ထောက်ပံ့ပေးတဲ့နေရာမှာ ဗီတာမင် C က အတော်လေး အရေးပါပါတယ်။ ဒီတော့ ဘေဘီလေးကို ဗီတာမင် C လုံလောက်စေဖို့ အသက်အရွယ်အလိုက် ဘယ်လောက်ပမာဏ ဖြည့်ဆည်းပေးသင့်လဲဆိုတာကို ဆောင်းပါးလေးထဲမှာ ဖတ်ကြည့်စေချင်ပါတယ်။

ဗီတာမင် C က ဘေဘီလေးအတွက် အကျိုးရှိရဲ့လား။

ဗီတာမင် C က ascorbic acid တစ်မျိုးပါ။ ချဉ်တဲ့ အသီးအနှံတွေ၊ ပန်းသီး၊ ဘယ်ရီသီး၊ အာလူး၊ ငရုတ်ပွ စတာတွေမှာ ဗီတာမင် C ပါဝင်နေပါတယ်။

ဗီတာမင် C က ဘေဘီလေးကို အခုလို ထောက်ကူပးပါတယ်။

• သွေး​ကြောတွေ ကျန်းမာစေတယ်။
• အရိုးနုတွေ ကျန်းမာစေတယ်။
• ကြွက်သားတွေ သန်မာစေတယ်။
• တွယ်ဆက်တစ်ရှူးတွေ၊ အရေပြား တစ်ရှူးတွေကို ကျန်းမစေပြီး အသားအရေ ကောင်းမွန်စေတယ်။ အနာကျက်မြန်စေတယ်။
• အရေပြား ပြဿနာ ကင်းစေတယ်။
• အာရုံကြောစနစ်ကို ကျန်းမာစေပြီး ဉာဏ်ကောင်းစေတယ်။
• အင်အားပြည့်ဝစေတယ်။
• အရိုးနဲ့သွားတွေ သန်မာစေတယ်
• ကိုယ်ခံအား ကောင်းစေတယ်။

ဗီတာမင် C က ဓာတ်တိုးပစ္စည်းတစ်ရပ် ဖြစ်တာကြောင့် ခန္ဓာကိုယ်ကို ဓာတ်တိုးပစ္စည်းတွေ အန္တရာယ်ကနေ ကာကွယ်ပေးပြီး ကျန်းမာစေတယ်။ ကိုယ်ခံအားဆဲလ်တွေကို အားဖြည့်ပေးတယ်။ ဖွံ့ဖြိုးဆဲ ဘေဘီလေးရဲ့ ကိုယ်ခံအားကိုအကောင်းဆုံး အားဖြည့်ပေးပြီး ကျန်းမာပျော်ရွှင်စွာ ကြီးပြင်းလာစေဖို့ ထောက်ကူပေးပါတယ်။

ဘေဘီလေးတစ်ယောက် လိုအပ်မယ့် ဗီတာမင် C ပမာဏ

ကြီးထွားဖွံ့ဖြိုးဖို့ အရှိန်ယူနေတဲ့ ဘေဘီလေးရဲ့ ခန္ဓာကိုယ်က ဗီတာမင် C ကို ကိုယ်တိုင် မထုတ်နိုင်ပါဘူး။ ဒါ​ကြောင့် မိဘတွေက ဘေဘီလေးကို ဗီတာမင် C ပြည့်ဝအောင်ကျွေးမွေးဖို့လိုပါမယ်။

ဒီတော့ ဘေဘီလေးက ကိုယ်ခံအားကောင်းဖို့ဆိုရင် နေ့စဉ် ဗီတာမင် C ပြည့်ဝနေဖို့လိုပါမယ်။ ဒီတော့ ဘေဘီလေးကို အသက်အရွယ်အလိုက် ဗီတာမင် C လိုအပ်ချက်ကို ပြည့်ဝစွာ ဖြည့်ပေးဖို့ဆိုရင် ဒီပမာဏလေးတွေအတိုင်း ဖြည့်ပေးလိုက်ပါ။

• မွေးစကနေ ၆ လအထိ ၄၀ မီလီဂရမ် (mg)
• ၇ လကနေ ၁ ၂ လအထိ ၅၀ မီလီဂရမ် (mg)
• ၁ နှစ်ကနေ ၃ နှစ်အထိ ၁၅ မီလီဂရမ် (mg)
• ၄ နှစ် ကနေ ၈ နှစ်အထိ ၂၅ မီလီဂရမ် (mg)
• ၉ နှစ် ကနေ ၁၃ နှစ် အထိ ၄၅ မီလီဂရမ် (mg)
• ၁၄ နှစ် ကနေ ၁၈ သားသားလေးဆိုရင် ၇၅ မီလီဂရမ် (mg)
• ၁၄ နှစ် ကနေ ၁၈ နှစ် မီးမီးလေးဆိုရင် ၆၅ မီလီဂရမ် (mg) လိုအပ်မှာဖြစ်ပါတယ်။

မွေးစကနေ ၆ အထိမှာ မေမေ့နို့ကနေ တဆင့် လိုအပ်တဲ့ ဗီတာမင် C ကို ရယူမှာဖြစ်တာကြောင့် နို့တိုက်မေမေ အနေနဲ့ ဗီတာမင် C ကို ပြည့်ဝစွာ စားသုံးဖို့လိုပါမယ်။ ဒီလိုကနေ အရွယ်ရောက်လာပြီဆိုရင်တော့ ဘေဘီလေးကို

• စတော်ဘယ်ရီ
• သင်္ဘောသီး
• အာလူး
• ပန်းဂေါ်ဖီစိမ်း
• လိမ္မော်သီး
• ပန်းသီး
• ကီဝီသီး
• ခရမ်းချဉ်သီး စတာတွေ ပြင်ဆင်ပေးလို့ရပါတယ်။