ပျော်ရွှင်ကျန်းမာဖို့ တောင်တက်ကြစို့

ကျန်းမာဖို့အတွက် လုပ်လို့ရတဲ့ လေ့ကျင့်ခန်းတွေက အမျိုးမျိုးပါ။ ဒီလိုလေ့ကျင့်ခန်းတွေထဲမှာမှ တောင်တက်တဲ့လေ့ကျင့်ခန်းက စိတ်ရောကိုယ်ပါကျန်းမာလန်းဆန်းစေမှာ အသေအချာပါ။ ဒါကြောင့် အပျင်းပြေဖြစ်ဖြစ် ဒါမှမဟုတ် သူငယ်ချင်းတွေနဲ့ ပျော်ပျော်ပါးပါးတောင်တက်ရင်း အခုလိုကျန်းမာရေး အကျိုးကျေးဇူးတွေကို ရယူပါ။

တောင်တက်ရင်းနဲ့ရမယ့် ကိုယ်စိတ်ကျန်းမာရေး……….

တောင်တက်ရတာက ပင်ပန်းခက်ခဲတာမှန်ပေမယ့် ခန္ဓာကိုယ်အတွက်ရော စိတ်ကျန်းမာရေးအတွက်ပါတော်တော်လေး အထောက်အကူပြုပေးနိုင်ပါတယ်။

ပေါင်းသင်းဆက်ဆံရေးကောင်းလာစေမယ် – တောင်တက်တာက တစ်ဦးတစ်ယောက်တည်း လုပ်လို့ရတဲ့ အားကစားနည်းမဟုတ်ပါဘူး။ လေ့ကျင့်ဖို့အတွက် အချိန်ပေးရသလို တောက်တက်တဲ့အခါမှာလည်း အသင်းအဖွဲ့နဲ့တက်ရတာပါ။ ဒီလိုလေ့ကျင့်မှုလုပ်တဲ့အခါ မကြာခဏတွေ့ဆုံရမှုက သင့်ကို အပေါင်းအသင်း အသစ်တွေတိုးစေမှာပါ။ အပေါင်းအသင်းများတာကလည်း သင့်ဘဝနေထိုင်မှုပုံစံကိုပြောင်းလဲပေးနိုင်တဲ့ အကြောင်းအရင်းတွေထဲက တစ်ချက်ပါ။

တီထွင်ဖန်တီးနိုင်စွမ်းကောင်းစေမယ် – တောင်တက်တာ ဒါမှမဟုတ် လမ်းလျှောက်တာ၊ ပြေးတာလိုမျိုး ပတ်ဝန်းကျင်နဲ့ထိတွေ့ရတဲ့ အားကစားနည်းတွေလုပ်ဆောင်တာက သင့်ကိုတီထွင်ဖန်တီးနိုင်စွမ်း ၅၀ ရာခိုင်နှုန်းလောက်အထိတိုးစေနိုင်ပါတယ်။ ဒါကြောင့်တီထွင်ဖန်တီးနိုင်စွမ်းကောင်းစေဖို့အတွက် တောင်တက်ပေးလို့ရပါတယ်။

စိတ်ပျော်ရွှင်စေတယ် – အားကစားလုပ်တဲ့အခါတိုင်း ခန္ဓာကိုယ်မှာ ပျော်ရွှင်ခြင်းဟော်မုန်းတွေကထွက်လာစမြဲပါ။ တောင်တက်တာကလည်း ဒီလိုပါပဲ ကိုယ်လက်လှုပ်ရှားမှုအားကစားတစ်ရပ်ဖြစ်တာရယ်။ ပတ်ဝန်းကျင်ရဲ့ အလှအပတရားတွေနဲ့ထိတွေ့ရတာရယ်တို့က သင့်ကို ပျော်ရွှင်လန်းဆန်းစေနိုင်မှာပါ။

စိတ်ဓာတ်ကျတာကို သက်သာစေနိုင်တယ် – တောင်တက်တာက ကိုယ်လက်လှုပ်ရှားမှုကောင်းတစ်ရပ်ပါ။ ပျော်ရွှင်ခြင်းဟော်မုန်းတွေထွက်ရှိစေနိုင်တာကြောင့် စိတ်ဓာတ်ကျမှုကနေ အထိရောက်ဆုံးကာကွယ်ပေးနိုင်ပါတယ်။ စိတ်ဓာ်ကျမှုကနေ ကင်းဝေးပြီးနေ့ရက်တိုင်းကို ပျော်ရွှင်စွာဖြတ်သန်းချင်တယ်ဆိုရင်တော့ တောင်တက်လေ့ကျင့်ခန်းစဆင်းလိုက်တော့ လို့ပြောပါရစေ။

သဘာဝနဲ့ထိတွေ့ခွင့်ရတယ် -သဘာဝတရားက ရောဂါတွေကို ကုသပေးနိုင်စွမ်းရှိပါတယ်။ သဘာဝနဲ့ ထိတွေ့မှုက စိတ်ရောကိုယ်ပါကျန်းမာလန်းဆန်းစေနိုင်ပါတယ်။ ဒါကြောင့် ကျန်းမာပျော်ရွှင်ဖို့ သဘာဝနဲ့ထိတွေ့လိုက်ပါ။

ခန္ဓာကိုယ်ကြံ့ခိုင်သန်စွမ်းစေတယ် – လမ်းပုံမှန်လျှောက်တာကတောင် ခန္ဓာကိုယ်ကို ကျန်းမာစေသလို အချိုးအစားကျစေဖို့ရော ဟန်ချကfညီစေဖို့ပါ အဆင်ပြေစေနိုင်ပါတယ်။ ဒါကြောင့် စမတ်ကျကျလေးလှချင်ရင် တောင်တက်ပေးလို့ရပါတယ်။ တောင်တက်တာက အင်အားသုံးရတယ်ဆိုပေမယ့် ဒူးဆစ်တွေ၊ ခြေချင်းဝတ် တွေပေါ်ကို ဖိအားဖြစ်စေနိုင်ခြေ ထိခိုက်စေနိုင်ခြေကတော့ ပြေးတဲ့အားကစားထက် တော်တော်လေးနည်းပါတယ်။ ဒါကြောင့် အဆစ်တွေထိခိုက်မှုနည်းစေတဲ့အားကစားနည်းတစ်ခုလို့လည်း သတ်မှတ်လို့ရပါတယ်။

ဝိတ်ကျစေနိုင်တယ် – ကယ်လ်လိုရီလောင်ကျွမ်းမှုတော်တော်လေးများတဲ့ အားကစားနည်းတစ်ရပ်ဖြစ်တာကြောင့် ဝိတ်ကျချင်သူတွေ စမ်းကြည့်သင့်တဲ့အားကစားနည်းတစ်ရပ်ဆိုလည်း မမှားပါဘူး။ တစ်နာရီတောင်တက်တာက ကယ်လ်လိုရီ ၅၀၀ ကျော်လောင်ကျွမ်းစေနိုင်တာကြောင့် လေကော်းလေသန့်ရှူရင်း တောင်တက်ပေးတာက ဝိတ်လည်းကျ စိတ်လည်းကြည်၊ ကိုယ့်ကိုယ်ကိုယ်လည်း ယုံကြည်မှုတိုးစေတယ်ဆိုတော့ ဝိတ်ကျချင်သူတွေ စမ်းကြည့်ဖို့ပြောပါရစေ။

ဆီးချိုရောဂါ ကာကွယ်ပေးနိုင်တယ် – ပုံမှန်တောင်တက်ပေးတာက ဆီးချိုရောဂါကို ကာကွယ်ပေးနိုင်သလို ကုသမှုလုပ်ဖို့လည်း အကောင်းဆုံးထိရောက်တဲ့နည်းလမ်းတစ်ရပ်ပါ။ တောင်တက်တဲ့အခါ ဖြစ်ပေါ်လာတဲ့ကြွက်သားလှုပ်ရှားမှုက သွေးတွင်းသကြားဓာတ်ကို အကောင်းဆုံးလျှော့ချပေးနိုင်ပါတယ်။

သွေးတိုးကျစေနိုင်တယ် – တောင်တက်တာကို ပုံမှန်လုပ်ပေးရင် သွေးပေါင်ကျစေနိုင်သလို သွေးတွင်းကိုလက်စထရောကိုလည်း ကျစေနိုင်ပါတယ်။ သွေးပေါင်ချိန်ပုံမှန်ရှိတာနဲ့ သွေးတွင်းကိုလက်စထရော အခြေအနေအကောင်းဆုံးဖြစ်နေမှုက နှလုံးရောဂါ။ ဆီးချိုသွေးချို နဲ့ လေဖြတ်တာလိုမျိုးရောဂါတွေမဖြစ်အောင် အထိရောက်ဆုံး ကာကွယ်ပေးနိုင်တယ်။ တောင်ကုန်းပြေပြေလေးတွေကို တက်ရင်တောင်မှ ပုံမှန်လေ့ကျင့်ခန်းတွေထက် သွေးတွင်းသကြားဓာတ်ကျဆင်းနိုင်ခြေ ၂ ဆလောက်ပိုများပါတယ်။

ဒါကြောင့် ကျန်းမာပျော်ရွှင်နေစေဖို့ နဲ့ စိတ်အပန်းပြေစေဖို့ အသင်းအဖွဲ့နဲ့လေ့ကျင့်ခန်းလေးလုပ်ချင်တယ်ဆိုရင် တောင်တက်ပါလို့ အကြံပြုပါရစေ။

Hello Health Group သည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။