ပလာစတာတွေ၊ ပတ်တီးတွေက အနာပိုးမဝင်အောင်ဘယ်လိုကာကွယ်ပေးသလဲ

ကိုယ့်မှာ အသေးစားထိခိုက်ဒဏ်ရာရထားရင်ပဲဖြစ်ဖြစ် ကြီးကြီးမားမားထိခိုက်ဒဏ်ရာရထားရင်ပဲဖြစ်ဖြစ် လိုအပ်တဲ့ကုသစောင့်ရှောက်မှုကိုမြန်မြန်ဆန်ဆန်လုပ်ဆောင်နိုင်ဖို့ကအရေးကြီးပါတယ်။ အချို့ထိခိုက်မိတဲ့ဒဏ်ရာတွေကိုနေအိမ်မှာပဲကုသလို့ရပါတယ်။ အနာကနက်မယ်၊ သွေးတအားထွက်နေမယ်ဆိုရင်တော့ တတ်ကျွမ်းနားလည်တဲ့သူနဲ့ပြသပေးဖို့လိုပါမယ်။နောက်ထပ်သတိထားရမှာတစ်ခုက ထိခိုက်ဒဏ်ရာတွေရလာတဲ့အခါ အနာပိုးဝင်တာမျိုးမဖြစ်အောင် အနာကိုသေသေချာချာဂရုစိုက်ဖို့ပါ။

အနာဖြစ်တဲ့အခါ အများကြီးဂရုမစိုက်နိုင်ရင်တောင်မှ အနာကိုသန့်စင်ဆေးကြောပြီး ပလာစတာကပ်ပေးတာမျိုးလုပ်ပေးမယ်ဆိုရင် နောက်ဆက်တွဲပိုးဝင်တာမျိုးမဖြစ်အောင်ကာကွယ်ပြီးဖြစ်ပါလိမ့်မယ်။ အနာကြီးရင်တော့ ပတ်တီးစည်းပေးတာမျိုးလုပ်ရပါမယ်။ ပလာစတာတွေ၊ပတ်တီးတွေက အနာထဲကိုပိုးမဝင်အောင်အကာအကွယ်ပေးနိုင်စွမ်းရှိကြပါတယ်။

ထိခိုက်ဒဏ်ရာအမျိုးအစားတွေ

• အရေပြားပေါက်ပြဲဒဏ်ရာ – အရေပြားအတွင်းပိုင်းအထိအောင်ထိခိုက်မိတဲ့ဒဏ်ရာမျိုးပါ။ ချွန်ထက်တဲ့ အရာတွေကိုကိုင်တွယ်အသုံးပြုရင်းက ထိခိုက်မိနိုင်ပါတယ်။ ဒီလိုမျိုးထိခိုက်ဒဏ်ရာတွေရတဲ့အခါ အနာနက်ရင်နက်သလောက်သွေးထွက်များနိုင်ပါတယ်။
• ပြတ်ရှဒဏ်ရာ – ဓါးနဲ့ထိရှမိတာကြောင့်ဖြစ်နိုင်တဲ့ထိခိုက်ဒဏ်ရာမျိုးပါ။ အပေါ်ယံအရေပြားပြတ်ရှသွားတာဖြစ်တာကြောင့် အနာမရင်းစေဖို့နဲ့ အနာထဲကိုပိုးဝင်တာမျိုးမဖြစ်အောင်သေချာဂရုစိုက်ဖို့လိုပါလိမ့်မယ်။
• ပွန်းပဲ့ဒဏ်ရာ – မာကျောကြမ်းတမ်းတဲ့မျက်နှာပြင်တစ်ခုခုနဲ့ပွတ်တိုက်မိတဲ့အခါမျိုးမှာ အရေပြားပွန်းပဲ့တာမျိုးဖြစ်နိုင်ပါတယ်။ ပုံမှန်အားဖြင့်တော့ ပွန်းပဲ့ဒဏ်ရာတွေကသွေးသိပ်ထွက်လေ့မရှိကြပါဘူး။ ဒါပေမယ့် ပိုးဝင်ကူးစက်တာမျိုးမဖြစ်အောင်သေသေချာချာဂရုစိုက်ဖို့တော့ လိုပါမယ်။
• အရေပြားမှာ အပေါက်ဖြစ်စေတဲ့ထိုးစိုက်ဒဏ်ရာ – သံ၊အပ်၊ရေခဲခွဲတံလိုမျိုး ချွန်ထက်တဲ့အရာတွေနဲ့ ထိုးမိတာကြောင့်ဖြစ်တဲ့ထိခိုက်ဒဏ်ရာမျိုးပါ။သေနတ်ကျည်ဆန်မှန်တာကြောင့်လည်းဖြစ်နိုင်ပါသေးတယ်။ ဒီလိုဒဏ်ရာမျိုးကသွေးအများကြီးမထွက်ပေမယ့် ကိုယ်တွင်းအင်္ဂါတွေပျက်စီးစေနိုင်လောက်တဲ့အထိတော့ နက်တတ်ပါတယ်။ တကယ်လို့သင့်အနေနဲ့ အခုလိုထိခိုက်ဒဏ်ရာမျိုးရမယ်ဆိုရင်တော့ ဆရာဝန်ထံသွားပြတာကအကောင်းဆုံးဖြစ်ပါလိမ့်မယ်။မေးခိုင်ကာကွယ်ဆေးထိုးဖို့လည်းလိုအပ်ပါမယ်။

ထိခိုက်ဒဏ်ရာရတဲ့အခါဘယ်လိုဂရုစိုက်မလဲ

ထိခိုက်ဒဏ်ရာတစ်ခုခုရလာတဲ့အခါ အရင်ဆုံးလုပ်ရမှာက အနာကိုကိုင်မယ့်လက်ကို သန့်စင်အောင်လုပ်ဖို့ပါ။ပြီးရင်တော့ အနာသွေးတိတ်အောင်လုပ်ရပါမယ်။ အနာပေါ်မှာ အဝတ်စသန့်သန့်လေးတစ်ခုနဲ့ဖိထားတာဖြစ်ဖြစ်၊ရေခဲကပ်ပေးတာဖြစ်ဖြစ်လုပ်ရပါမယ်။ရေခဲအလွယ်တကူမရှိခဲ့ရင်ရေအေးအေးလေးကို အနာပေါ်လောင်းချပြီးဆေးပေးလို့ရပါတယ်။

နောက်တစ်ဆင့်က အနာကိုသန့်စင်ရပါမယ်။ အနာကိုရေသန့်သန့်လေးနဲ့ ဆပ်ပြာကိုသုံးပြီးသန့်စင်ပေးပါ။ အနာပေါ်ကိုဆပ်ပြာတိုက်ရိုက်သုံးတာမျိုးတော့မလုပ်ပါနဲ့။ အနာစပ်ဖျဉ်းဖျဉ်းဖြစ်နိုင်တာကြောင့်ပါ။ အနာတဝိုက်ကိုပဲသန့်စင်ပေးပါ။ပြီးရင်တော့ အနာမရင်းအောင်ပိုးသတ်ဆေးတစ်ခုခုလိမ်းပေးရပါမယ်။နောက်ဆုံးအနေနဲ့ကတော့ အနာသေးရင် ပလာစတာကပ်ပြီး အနာကကြီးရင်တော့ ပတ်တီးစည်းပေးရပါမယ်။

ပလာစတာတွေ။ ပတ်တီးတွေကပ်ထားပေးတာက အနာထဲကိုပြင်ပကဖုန်မှုန့်တွေ၊အညစ်အကြေးတွေနဲ့ရောဂါပိုးတွေမဝင်ရောက်နိုင်အောင် ကာကွယ်ပြီးသားဖြစ်မှာဖြစ်ပါတယ်။

အနာကိုသေချာဂရုမစိုက်ရင်ဘာတွေဖြစ်လာနိုင်သလဲ

ထိခိုက်ဒဏ်ရာတစ်ခုခုဖြစ်လို့ အနာကိုသေချာဂရုမစိုက်တဲ့အခါ မလိုလားအပ်တဲ့နောက်ဆက်တွဲပြဿနာတွေဖြစ်လာနိုင်ပါတယ်။

• အနာပိုးဝင်နိုင်တယ်။
• အနာရင်းနိုင်တယ်။
• အနာပြည်တည်နိုင်တယ်။
• အနံ့ဆိုးတွေထွက်နိုင်တယ်။
• အဖျားတက်နိုင်တယ်။
• အနာကျက်နှေးနိုင်တယ်။
• အနာမကျက်တာမျိုးဖြစ်နိုင်ပါတယ်။

ပတ်တီးတွေ၊ ပလာစတာတွေက အနာကိုဘယ်လိုကာကွယ်ပေးသလဲ

အနာကိုသေချာဂရုမစိုက်တဲ့အခါ ခံစားရနိုင်တဲ့နောက်ဆက်တွဲပြဿနာတွေကတော်တော်လေးများပါတယ်။ ဒိလိုပြဿနာတွေမဖြစ်အောင်ကာကွယ်လို့ရတဲ့ နည်းလမ်းရှိပါတယ်။ ဒါကတော့ အနာဖြစ်တဲ့သေချာဂရုစိုက်ပေးဖို့ပါ။ အနာကိုအများကြီးဂရုမစိုက်နိုင်အောင် ပလာစတာကပ်တာ၊ ပတ်တီးစည်းထားတာမျိုးလုပ်ပေးပါ။

• အနာကိုပလာစတာကပ်တာ၊ပတ်တီးစည်းထားတာတွေလုပ်ထားတဲ့အခါ ထိခိုက်မှုကြောင့် အရေပြားပေါက်ပြဲသွားတဲ့နေရာကနေ ပိုးမွှားတွေ၊ဖုန်မှုန့်တွေနဲ့အညစ်အကြေးတွေမဝင်ရောက်အောင်ကာကွယ်ပေးနိုင်ပါတယ်။ရောဂါပိုးတွေကြောင့် အရေပြားတစ်ရှုးတွေထိခိုက်တာမျိုးမဖြစ်အောင်ကာကွယ်ပေးပါတယ်။
• အနာကိုနေရောင်ကြောင့်ထိခိုက်တာမျိုးမဖြစ်အောင်ကာကွယ်ပေးနိုင်စွမ်းရှိပါတယ်။
• အနာကို ပလာစတာကပ်ထားတာ။ ပတ်တီးစည်းထားတာတွေလုပ်ထားတဲ့အခါ အနာကျက်မြန်စေနိုင်ပါတယ်။
• အနာကိုဓါတ်မတည့်တဲ့အရာတွေနဲ့ထိတွေ့မှုကနေ ကာကွယ်ပေးပါတယ်။
• အနာကြောင့်ထွက်လာတဲ့သွေးတွေကိုခဲစေပြီးသွေးတိတ်အောင်လုပ်ဆောင်ပေးပါတယ်။
• အနာကနေထွက်လာတဲ့သွေးနဲ့သားငံရည်တွေကိုစုပ်ယူပေးပြီး အနာကို သန့်စင်ခြောက်သွေ့အောင်လုပ်ဆောင်ပေးပါတယ်။ ပတ်တီးတွေ ပလာစတာတွေက ဒီနည်းနဲ့လည်း အနာကျက်အောင်လုပ်ဆောင်ပေးပါတယ်။
• အနာကြောင့်နာကျင်မှုတွေကိုလျော့ပါးသက်သာအောင်လုပ်ဆောင်ပေးပါတယ်။
• အနာကို သူတစ်ပါးရဲ့ ချွေးတွေ၊သွေးတွေနဲ့ထိတွေ့မိတာကြောင့် ပိုးဝင်ကူးစက်တာမျိုးတွေမဖြစ်စေချင်ဘူးဆိုရင်လည်း အနာကို ပတ်တီးစည်းတာ၊ ပလာစတာကပ်တာမျိုးတွေလုပ်ထားပေးလို့ရပါတယ်။
• အနာကြောင့် အမာရွတ်တွေထင်ကျန်တာမျိုးမဖြစ်အောင်လည်းကာကွယ်ပေးနိုင်ပါတယ်။
• အနာကျက်မြန်အောင်လည်း လုပ်ဆောင်ပေးပါတယ်။

အနာပေါ်မှာ ပတ်တီး ဒါမှမဟုတ် ပလာစတာကပ်ထားတဲ့အခါ အနာထဲကိုရေ၊ပြင်ပအရာဝတ္ထုတွေ၊ဖုန်မှုန့်တွေ၊အညစ်အကြေးတွေ၊ ပိုးမွှားတွေမဝင်အောင်ကာကွယ်ပေးနိုင်တာကြောင့် အနာရင်းတာ၊အနာပိုးဝင်တာမျိုးတွေမဖြစ်အာင်ကာကွယ်ပြီးသားဖြစ်သွားမှာလည်းဖြစ်ပါတယ်။ သတိထားသင့်တဲ့အချက်တစ်ခုက ပလာစတာတွေ၊ပတ်တီးတွေညစ်ပေနေခဲ့ရင် လဲလှယ်ပေးဖို့ပါ။ အနည်းဆုံးတစ်နေ့တစ်ကြိမ်တော့လဲလှယ်ပေးပါ။

Hello Health Group သည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။

[embed-health-tool-bmi]