ဆီးချိုဝေဒနာရှင်များ မှားလေ့ရှိတဲ့ အမှားများ

ရေးသားသူ ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

မင်္ဂလာပါ ၊ Hello Sayarwon စာမျက်နှာကနေ ကြိုဆိုပါတယ် ။ ဒီတစ်ခါမှာတော့ ဆီးချိုဝေဒနာရှင်တွေ အမှတ်မှားပြီး ပြုလုပ်လေ့ရှိတဲ့ အမှားတွေကို ဖော်ပြပေးလိုက်ပါတယ်။

ဆီးချိုရောဂါဆိုတာ တစ်သက်လုံးပျောက်တဲ့ ရောဂါ မဟုတ်ပါဘူး ။ ဆီးချိုအဖြေတွေပေါ်မူတည်ပြီး ဆေးနဲ့ အစာနဲ့ ထိန်းပြီး ပေးနေရတဲ့ ရောဂါ တစ်ခုဖြစ်ပါတယ်။ တစ်သက်လုံး အနေအထိုင် ဆင်ခြင်နေရမယ့် ရောဂါတစ်ခု ဖြစ်ပါတယ် ။ ဆီးချိုဝေဒနာရှင် အများစု လုပ်မိတဲ့ အမှားတွေကတော့

ဆီးချို ပုံမှန်တိုင်းလေ့ မရှိခြင်း

ဆီးချိုဝေဒနာရှင်တွေအနေနဲ့ နေ့တိုင်း ဆီးချိုဖောက်နေရလေ့ရှိပါတယ်။ အကြောင်းအမျိုးမျိုးကြောင့် ပုံမှန်မတိုင်းဖြစ်တတ်သလို ဆီးချိုစစ်ရတဲ့ strip ပြားတွေရဲ့ ဈေးကလည်း သာမန်ပြည်သူတွေအတွက် အနည်းငယ်ဈေးကြီးနေတာကြောင့်လည်း ဖြစ်နိုင်ပါတယ် ။ ဒါပေမဲ့ အပေါ်မှာ ပြောခဲ့သလိုပဲ ဆီးချိုတိုင်းထားတဲ့ အဖြေတွေပေါ်မူတည်ပြီးတော့ ဆေးပမာဏကို ထိန်းညှိပေးရတာ ဖြစ်တာကြောင့် ဆရာဝန်ပြောတဲ့အတိုင်း ဆီးချိုရောဂါကို  ပုံမှန်တိုင်းဖို့ လိုအပ်ပါတယ် ။

အချိုဓါတ်ကဲတဲ့ အစာများ စားခြင်း

ဆီးချိုဝေဒနာရှင်တွေ အနေနဲ့ အနေအထိုင် ဆင်ခြင်သင့်ပါတယ် ။ အချိုဓါတ်ကဲတဲ့ အစားအစာတွေကို သတိထားစားသောက်သင့်သလို မြန်မာတွေစားလေ့ရှိတဲ့ ထမင်းကလည်း သကြားဓါတ်များလေ့ရှိပါတယ် ။ ဒါ့ကြောင့် အသက်ဉာဏ်စောင့်ဆိုသလို အစာအာဟာရကို သတိထားစားသုံးခြင်းက ဆီးချိုထိန်းစေနိုင်သလို ဆီးချိုရောဂါရဲ့ နောက်ဆက်တွဲတွေကိုလည်း မဖြစ်အောင် ကာကွယ်နိုင်ပါတယ် ။

ဆီးချိုဆေးများကို မသောက်ဖြစ်ခြင်းနှင့် ဆေးများကို ရွေးချယ်သောက်သုံးခြင်း

‌ဆီးချိုရောဂါရဲ့ နောက်ဆက်တွဲရောဂါတွေက များပြားသလို သောက်ရတဲ့ ဆေးတွေကလည်း တစ်ခါတစ်လေ များနေတတ်ပါတယ် ။ ဒါဟာ ဆီးချိုကို ထိန်းဖို့ ဖြစ်သလို ဆီးချို‌ရဲ့ နောက်ဆက်တွဲရောဂါတွေ မဖြစ်အောင် ကြိုတင်ကာကွယ်ထားခြင်းလည်း ဖြစ်တဲ့အတွက် ဆေးများနေရခြင်းပါ။ တချို့လူနာတွေ ပြုလုပ်လေ့ရှိတဲ့ ‘ဆီးချိုပုံမှန်ဖြစ်နေတာပဲ။ ဒီဆေးလေး လွတ်လို့ ဘာမှမဖြစ်ပါဘူး’ ဆိုပြီး ပေးတဲ့ ဆေးတွေကများလို့ ကိုယ့်သဘောနဲ့ကိုယ် ဆေးရွေးသောက်ခြင်းက အန္တရာယ်များပါတယ် ။

ဆရာဝန်ကို သင့်ရောဂါအကြောင်း အကုန်မပြောပြခြင်း

အထူးသဖြင့် ဆီးချိုပုံမှန်မတိုင်းဖြစ်သူများ ၊ ဆေးပုံမှန်မသောက်ဖြစ်တဲ့ လူတွေမှာ ပိုတွေ့ရလေ့ရှိပါတယ် ။ ဆရာဝန် ဆူမှာကြောက်လို့ ကိုယ့်ရောဂါအကြောင်းကို အစုံအလင်မပြောပြခြင်းပါ ။ ဒါဟာ သင့်အတွက် ရေရှည်မှာ အန္တရာယ်ရှိပါတယ် ။ ဆရာဝန်က သင်ဖြစ်နေတဲ့အကြောင်းတွေကို အကုန်အစင်သိမှ ဆေးပမာဏ ချိန်ညှိခြင်း ၊ ဆေးပြောင်းလဲခြင်းတွေကို လုပ်တာ ထိရောက်မှာပါ။ ဆေးပုံမှန်မသောက်လို့ ဆီးချိုမကျခြင်းကို ဆေးမတိုးဘူးထင်လို့ ပမာဏတိုးခြင်းတွေက သာမန်ထက် ဆီးချိုဓါတ်ပြုတ်ကျပြီး ရုတ်တရက် အသက်အန္တရာယ်ရှိစေနိုင်ပါတယ် ။

ရေးသားသူ – Dr.Aung Kyaw Myint

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။

မျှဝေမည်

တည်းဖြတ်သည့်နေ့ နိုဝင်ဘာ 30, 2019 | နောက်ဆုံးတည်းဖြတ်ခြင်း နိုဝင်ဘာ 30, 2019

သင်ဒါလည်း နှစ်သက်နိုင်ပါတယ်။