ကိုယ့်ရင်သွေးကို ကောင်းကောင်းမွန်မွန် ကြီးပြင်းစေချင်တာ မေမေတိုင်းရဲ့ ဆန္ဒပါ။ မမွေးခင် မျက်နှာမမြင်ခင်ကတည်းက ကျန်းမာဖို့ နေတိုင်းဆုတောင်းခဲ့မှာပါ။ ဒီလောက်ထိအာရုံစိုက်ထားတဲ့ ကိုယ့်ရဲ့ကိုယ်ပွားလေးက အခြားကလေးတွေနည်းတူ မဖွံ့ဖြိုးမကြီးထွားဘူးဆိုရင်မေမေတွေ ဘယ်လောက်တောင်စိတ်ညစ်လိုက်မလဲနော်။ ဒီပြဿနာတွေ ကင်းဝေးစေဖို့နဲ့ ကလေးကြီးထွားဖွံ့ဖြိုးမှု မနှေးစေဖို့ အခုပြောပြမယ့်နည်းလမ်းလေးတွေအတိုင်းလိုက်လုပ်ကြည့်နော်။
ကလေးတစ်ယောက်ရဲ့ ပုံမှန်ကြီးထွားဖွံ့ဖြိုးမှုဖြစ်စဉ်
ကလေးတစ်ယောက်ဟာ အသက်အရွယ်အလိုက် ပုံမှန်ကြီးထွားဖို့လိုအပ်ပါတယ်။ တကယ်လို့ ကလေးက ရွယ်တူကလေးတွေလောက် ကြီးထွားဖွံ့ဖြိုးတာမျိုး မရှိဘူးဆိုရင် အာဟာရလိုအပ်နေတာကြောင့် ဖြစ်နိုင်ပါတယ်။ ဒါမှမဟုတ် ရောဂါတစ်ခုခု ရှိနေတာကြောင့်လည်း ဖြစ်နိုင်လို့ တတ်သိနားလည်တဲ့သူတွေနဲ့ သွားရောက်ပြသဖို့ လိုအပ်မှာပါ။
- မွေးစကနေ ၁ နှစ်အတွင်း
ကလေးတွေကမွေးစကနေ ၁ နှစ်အရွယ်မှာ သာမန်အားဖြင့်က အရပ်အမြင့်က ၂၅ စင်တီမီတာ ရှိရမှာဖြစ်ပါတယ်။ ကိုယ်အလေးချိန်ကတော့ အသက် ၆ လကနေ ၁ နှစ်အတွင်းမှာ တစ်ပတ်ကို ၂အောင်စကနေ ၄အောင်စအထိတိုးလာရပါမယ်။ မိခင်နို့တစ်မျိုးတည်းသောက်ခွင့်ရတဲ့ ကလေးတွေကမွေးပြီးစအချိန်မှာ နို့မှုန့်သောက်ရတဲ့ ကလေးတွေထက်ပိုပြီး ကိုယ်အလေးချိန်တိုးတာမြန်ပါတယ်။ ဒါပေမယ့် အသက် ၆ လနောက်ပိုင်းမှာတော့ နို့မှုန့်သောက်တဲ့ကလေးတွေက အထွားပိုမြန်လာကြပါတယ်။
ကလေးဟာထွားတာ မြန်မြန်နှေးနှေး ကျန်းမာတဲ့ကလေးတစ်ယောက်ဖြစ်ဖို့ဆိုရင် အသက်တစ်နှစ်ပြည့်ချိန်မှာ ကိုယ်အလေးချိန်က မွေးစအလေးချိန်ရဲ့ ၃ ဆဖြစ်ဖို့လိုပါမယ်။ တကယ်လို့ ကလေးက ကိုယ်အလေးချိန်ရှိသင့်သလောက် ဖြစ်မလာရင်တော့ ကလေးဆရာဝန်နဲ့ပြသကြည့်ဖို့လိုပါမယ်။
- အသက် ၁ နှစ်ကနေ ၃ နှစ်အတွင်း
ဒီအရွယ်မှာ ကလေးက မိခင်နို့အပြင် အစားအစာတွေကို စစားနေပါပြီ။ လမ်းလျှောက်တတ်စ အရာရာကို စူးစမ်းစအရွယ်ပေါ့။ တော်တော်လေးလည်း ဂရုစိုက်ရတဲ့အရွယ်ပါ။ ဒီအချိန်မှာ ကလေးရဲ့ လက်မောင်းတုတ်တုတ်လေးတွေ၊ ခြေထောက်တုတ်တုတ်လေးတွေက စပြီးပြေပြစ်လာပြီ၊ ဗိုက်လေးတွေက ချပ်ရပ်လာပြီ။ အရပ်ကလည်း ၂၉ လက်မ ကနေ ၃၇ လက်မလောက်ရှိလာပြီဖြစ်ပြီး ကိုယ်အလေးချိန်ကလည်း ပေါင် ၃၀လောက် ရှိလာရပါမယ်။
- အသက် ၄ နှစ်ကနေ ၉ နှစ်အတွင်း
ကိုယ်အလေးချိန်ရော အရပ်ပါ ဖြည်းဖြည်းချင်းပဲ တိုးလာပါတော့တယ်ပါ။ ဒီအရွယ်မှာ အရပ်က မတိုးဘူးဆိုရင်တောင် ၂ လက်မ ကနေ ၃လက်မတော့တိုးရမှာပါ။ အသက် ၄ နှစ်ကနေ ၉ နှစ်အရွယ် ကလေးတစ်ယောက်က အရပ် ၃ပေ ၅ လက်မလောက်ကနေ ၄ပေ ၄ လက်မလောက်ရှိရမှာပါ။ ကိုယ်အလေးချိန်ကလည်း ဖြည်းဖြည်းပဲ တိုးလာတဲ့ အရွယ်ပေါ့။
ဘယ်လိုအချိန်မှာ ကိုယ်အလေးချိန်တိုင်းတာမလဲ
ကလေးကို နေ့တိုင်း ကိုယ်အလေးချိန်တိုင်းနေဖို့တော့မလိုပါဘူး။ ဒါပေမယ့် ပုံမှန်ကိုယ်အလေးချိန်ကို တိုင်းဖို့လိုအပ်တဲ့ အချိန်ကာလအပိုင်းအခြားလေးတွေရှိနေပါတယ်။
- မွေးပြီး တစ်ပတ် ကနေ ၂ ပတ်အတွင်မှာ တစ်ကြိမ်
- ပထမ တစ်လမှာ တစ်ကြိမ်
- ဒုတိယ တစ်လမှာ တစ်ကြိမ်
- ၄ လမြောက်မှာ တစ်ကြိမ်
- ၆ လမြောက်မှာ တစ်ကြိမ်
- ၉ လမြောက်မှာ တစ်ကြိမ်
- တစ်နှစ်အရွယ်မှာ တစ်ကြိမ်
- တစ်နှစ်ခွဲမှာ တစ်ကြိမ်
- နှစ်နှစ်အရွယ်မှာ တစ်ကြိမ် ပုံမှန်ကိုယ်အလေးချိန်တိုင်းပေးဖို့လိုအပ်ပါမယ်
- အသက် ၄ နှစ်ကနေ ၆ နှစ်အတွင်းမှာတော့ တစ်နှစ်ကို တစ်ကြိမ်လောက်ပဲ ကိုယ်အလေးချိန်တိုင်းပေးရင်ကို လုံလောက်ပါပြီ။ ကလေးက ပုံမှန်ဖွံ့ဖြိုးမှုမရှိဘူးဆိုရင်တော့ မိဘတွေအနေနဲ့ သေချာဂရုစိုက်ပေးရမှာပါ။
ကလေးကြီးထွားဖွံ့ဖြိုးမှု မနှေးစေဖို့ ဒီအချက်လေးတွေဂရုစိုက်ပေးပါ
ကလေးကြီးထွားဖွံ့ဖြိုးမှု မနှေးစေဖို့ လုပ်ဆောင်ပေးရမယ့် နည်းလမ်းလေးတွေ ရှိပါတယ်။ ကလေးကို အခြားကလေးတွေနည်းတူ ကျန်းမာဖွံ့ဖြိုးစေချင်တယ်ဆိုရင်တော့ မေမေဖေဖေတို့အနေနဲ့ ဒီအချက်လေးတွေကို ဂရုစိုက်ပေးဖို့ပြောပါရစေ။ ဒါတွေကတော့ –
အစာအာဟာရ မျှတအောင်ကျွေးမွေးပေးပါ – ကလေးကိုနေ့စဉ်ပြင်ဆင်ပေးတဲ့ အစားအစာတွေထဲမှာ အသီးအရွက်၊ အသား၊ ငါးနဲ့ အခြားအာဟာရဖြစ်စေတဲ့ အရာတွေ သင့်တင့်မျှတစွာပါဝင်အောင် ထည့်သွင်းပြင်ဆင်ပေးပါ။
ပြည့်ဝတဲ့ အိပ်စက်ချိန်ထားပေးပါ – ကလေးကို တီဗွီတွေ၊ ဖုန်းတွေ တစ်နေကုန်ပေးသုံးတာမျိုး မလုပ်ပါနဲ့။ ညဘက်မှာ အိပ်ချိန် ၈ နာရီပြည့်ပြည့်ဝဝလေးအိပ်စက်တတ်တဲ့ အလေ့အထမွေးမြူပေးပါ။
ကိုယ်လက်လှုပ်ရှားမှုရှိပါစေ – ကလေးကို ပြေးပြေးလွှားလွှားဆော့ခွင့်ပေးပါ။ ကလေးကို ကိုယ်လက်လှုပ်ရှားမှုရှိစေတာက ကိုယ်ခန္ဓာကို ကြီးထွားစေတဲ့အပြင် ကျန်းမာရေးကောင်းစေနိုင်ပါတယ်။
စိတ်ဖိစီးမှုကင်းအောင်ထားပေးပါ -ကလေးတွေမှာလည်း သူတို့ အတိုင်းအတာနဲ့ သူတို့ စိတ်ဖိစီးမှုရှိနေတတ်ပါတယ်။ ဒါကြောင့် ကလေးကို အချိန်ပေးပြီး စကားပြောပေးပါ။ သူ့ခံစားချက်လေးတွေကို နားထောင်ပေးပါ။ ကိုယ်က စိတ်ဖိစီးမှုထပ်မပေးမိအောင်လည်း သတိထားပါ။
ကလေးက ရှိသင့်တဲ့ အရပ်၊ အလေးချိန်ထက် ဆက်တိုက်နည်းနေပြီဆိုရင်တော့ ဆရာဝန်နဲ့ ပြသပြီး အကြောင်းရင်းကို ရှာဖွေဖို့ အကြံပြုချင်ပါတယ်။
[embed-health-tool-vaccination-tool]
