ခေါင်းကိုက်တာကြောင့် နေ့စဉ်လုပ်ငန်းဆောင်တာတွေမှာ ထိခိုက်မှုတွေ ဖြစ်နေသလား။ ဒီဆောင်းပါးလေးကို ဖတ်ကြည့်လိုက်နော်။ ခေါင်းကိုက်တာကို သိသိသာသာ သက်သာစေမယ့် နည်းလမ်း လေးတွေပါ။
ဒါတွေကြောင့် ခေါင်းကိုက်နိုင်ပါတယ်
ခေါင်းကိုက်ရတာ အများစုကတော့ ဒီ အကြောင်းအရင်းတွေကြောင့်ပါ။
- စိတ်ဖိစီးတာ
- ရာသီမလာခင် နဲ့ လာပြီးချိန်မှာ ကိုယ်တွင်းက ဟော်မုန်းတွေ ပြောင်းလဲမှုကြောင့်
- နောက်ကျော နဲ့ လည်ပင်းက ကြွက်သားတွေ တင်းမာနေတာကြောင့်
- ဆာလောင်တာ နဲ့ ရေဓာတ် ခမ်းခြောက်တာကြောင့်
- သောက်သုံးနေရတဲ့ ဆေးဝါးတွေကြောင့်
- အရက်၊ ကဖင်း နဲ့ သကြားတွေ စားသုံးမှု များတာကြောင့် ခေါင်းကိုက်ရတာပါ။
ခေါင်းကိုက်စေတဲ့ အခြားအကြောင်းအရင်းတွေက –
- ကာဗွန်မိုနောက်ဆိုဒ် အဆိပ်သင့်ခြင်း
- မျက်လုံး အောင့်တာ
- အတွင်းတိမ် ဖြစ်နေတာ
- အဖျား ရှိနေတာ
- သွားကိုက်နေတာ
- ဦးခေါင်းနဲ့ မျက်နှာ တဝိုက်က ကြွက်သားတွေ တောင့်တင်းနာကျင်နေတာ
ခေါင်းကိုက်တာကို သိသိသာသာသက်သာစေမယ့် နည်းလမ်း (၅) ခု
အခု ပြောပြမယ့် နည်းလမ်းလေးတွေကို အသုံးပြုပြီး ခေါင်းကိုက်တာကို သက်သာအောင် လုပ်ဆောင်လို့ ရပါတယ်။ ခေါင်းကိုက်တာကို သိသိသာသာသက်သာစေမယ့် နည်းလမ်း တွေကတော့
(၁) မျက်လုံးကို မှိတ်ပြီး အနားယူလိုက်ပါ – ဒါက ခေါင်းကိုက်တာကို သိသိသာသာ သက်သာစေမယ့် နည်းလမ်း တစ်ခုပါ။ ခေါင်းကိုက်တာကို ဖြစ်စေတဲ့ တင်းအားတွေကိုလည်း လျော့ကျသွားစေနိုင်ပါတယ်။ ခေါင်းအရမ်းကိုက်လာတဲ့အခါ တိတ်ဆိတ်ပြီး၊ အလင်းရောင် ဝင်ရောက်မှုနည်းတဲ့ အခန်းထဲမှာ ငြိမ်ငြိမ်လေး လှဲနေပြီး မျက်လုံး မှိတ်ထားပေးပါ။ တိတ်ဆိတ်မှောင်မိုက်မှုက နှစ်နှစ်ခြိုက်ခြိုက် အိပ်ပျော်အောင် အထောက်အကူ ပြုပေးပြီး ခေါင်းကိုက်တာကို လျော့ပါးသက်သာစေနိုင်ပါတယ်။
(၂) စိတ်ကို ဖြေလျော့လိုက်ပါ – အသက်ကို ခပ်ပြင်းပြင်းနဲ့ ခပ်ဝဝလေး ရှူပေးတဲ့ လေ့ကျင့်ခန်းက စိတ်ဖိစီးမှုကို လျော့ကျစေနိုင်ပြီး ခေါင်းကိုက်တာကို သက်သာစေနိုင်ပါတယ်။ အသက်ကို ဝမ်းဗိုက်ပိုင်းအထိ ရှိုက်ပြီး ရှူပေးတာကို အကြိမ်ရေ များများလုပ်ပေးလေလေ ခေါင်းကိုက်တာက သက်သာလာလေလေပါ။ မျက်လုံး မှိတ်ပြီး ဝင်သက်ထွက်သက် မှတ်ပေးလို့လည်း ရပါတယ်။
(၃) ဂုတ် နဲ့ နားထင်တွေကို နှိပ်ပေးပါ – ခေါင်းကိုက်တဲ့အခါ ဂုတ်နဲ့ နားထင်တွေကို လက်ချောင်းလေးတွေကို သုံးပြီး ခပ်ဖွဖွလေး နှိပ်ပေးပါ။ ဒီလို လုပ်ပေးတာက သွေးစီးဆင်းမှုကို ကောင်းမွန်စေပြီး ကြွက်သားတွေကို ပြေလျော့စေကာ ခေါင်းကိုက်တာကို သက်သာစေနိုင်ပါတယ်။
(၄) ရေနွေးဝတ် ကပ်ပေးပါ – ရေခပ်နွေးနွေးလေးကို ဇလုံထဲ ထည့်ပြီး တဘက်စလေး စိမ်လိုက်ပါ။ ပြီးရင် ရေကို ညှစ်ချလိုက်ပြီး ဦးခေါင်းခွံနဲ့ လည်ကုပ် ထိစပ်တဲ့ နေရာမှာ ကပ်ပေးလိုက်ပါ။ တကယ်လို့ ရေနွေး ကပ်တာက မသက်သာဘူး ဆိုရင် အချိန် ခဏ စောင့်ပြီး ရေခဲဝတ်ကပ်ပေးလိုက်ပါ။
(၅) ဆေးတစ်ခုခု သောက်ပါ – အပေါ်မှာ ပြောခဲ့တဲ့ နည်းလမ်းတွေကို လုပ်ဆောင်ပြီးပေမယ့် မသက်သာဘူးဆိုရင်တော့ ဆေးရဲ့ အကူအညီကို ရယူဖို့စဉ်းစားရပါမယ်။ အကိုက်အခဲပျောက်ဆေးတစ်ခုခုသောက်ပေးရပါမယ်။ ပါရာစီတမောတို့၊ NSAIDs အကိုက်အခဲပျောက်ဆေးတို့လိုမျိုး ဆေးကိုသောက်သုံးပေးလို့ ရပါတယ်။
[embed-health-tool-bmi]
