နေရောင်ခြည်နုနုလေးက ကျန်းမာရေးအတွက်ကောင်းတယ်။ ခန္ဓာကိုယ်အတွက် ဗီတာမင် D ဖြည့်စွက်ပေးတယ်ဆိုပေမယ့် နေ့လယ်ခင်းမှာ ပူတဲ့ နေရောင်ကတော့ အသားအရေကို ထိခိုက်ပျက်စီးစေနိုင်ပါတယ်။ ဒါကြောင့် အသားအရေကို ထိန်းသိမ်းချင်တယ်ဆိုရင် မေ့ထားလို့ မဖြစ်တဲ့ အချက်တစ်ခုက နေလောင်ကာခရင်မ် လိမ်းတာလည်း အပါအဝင်ပါ။ ဒီတစ်ခေါက်တော့ အသားအရေနဲ့အလိုက်ဖက်ဆုံး နေလောင်ကာခရင်မ် ရွေးချယ်နည်း ကို ဖော်ပြပေးလိုက်ပါတယ်။
ဘာကြောင့် နေလောင်ကာခရင်မ် လိမ်းသင့်တာလဲ………..
နေလောင်ကာခရင်မ်လိမ်းသင့်တဲ့ အကြောင်းအရင်းက တစ်ခုမကရှိနေပါတယ်။
- အသားအရေကို နေလောင်တာကနေ ကာကွယ်ဖို့
- အသားအရေမွဲခြောက်မှု မဖြစ်အောင် ကာကွယ်ဖို့
- အသားအရောင် မညီတာမျိုး မဖြစ်အောင် ကာကွယ်ဖို့
- အရေးအကြောင်းတွေ မဖြစ်အောင် ကာကွယ်ဖို့
- အစက်အပြောက်တွေ မဖြစ်အောင် ကာကွယ်ဖို့
- အရွယ်မတိုင်ခင် အိုမင်းရင့်ရော်တာမျိုး မဖြစ်အောင် ကာကွယ်ဖို့ စတဲ့ အသားအရေကျန်းမာရေးကို အားပေးဖို့အတွက် နေလောင်ကာခရင်မ်လိမ်းသင့်ပါတယ်။
ဘယ်လိုရွေးမလဲ……… နေလောင်ကာခရင်မ်
နေလောင်ကာခရင်မ်ဆိုတိုင်း အသားအရေကို ကာကွယ်မှုပေးနိုင်ပြီ မဆိုသာပါဘူး။ သေချာလေးရွေးချယ်ဖို့လိုပါမယ်။ အကြောင်းက အသားအရေအမျိုးအစားမတူညီမှုကလည်း နေလောင်ကာခရင်မ်ရဲ့ ထိရောက်မှုအပေါ်မှာ သက်ရောက်နေတာကြောင့်ပါ။
- နေလောင်ကာခရင်မ်ကိုရွေးတော့မယ်ဆိုရင် UV-A ရော UV-B ကိုပါ ကာကွယ်ပေးနိုင်တာကို ရွေးချယ်ပါ။ ဒါမှ အသားအရေ ထိခိုက်မှုမရှိမှာပါ။
- အနည်းဆုံး SPF 15 ပါတာကို ရွေးချယ်ပါ။ ဒါမှ နေရောင်ဒဏ်ကနေ ကာကွယ်ဖို့ လုံလောက်မှာပါ။
- ရေကူးတဲ့အခါ၊ လေ့ကျင့်ခန်းလုပ်တဲ့အခါမျိုးမှာ သုံးမယ်၊ ကိုယ်က ချွေးထွက်သန်မယ်ဆိုရင် ရေစိုခံအမျိုးအစားမျိုးကို အသုံးပြုပေးပါ။
- မျက်နှာအတွက် အသုံးပြုလို့ရလားဆိုတာ ကြည့်ပါ။ နေလောင်ကာခရင်မ်က ခန္ဓာကိုယ်အတွက် သီးသန့်ထုတ်ထားတာကို မျက်နှာမှာ အသုံးပြုမိရင် အဆင်မပြေနိုင်ပါဘူး။
- အသားအရေက ထိခိုက်တုံ့ပြန်လွယ် အသားအရေမျိုးဆိုရင် para-aminobenzoic acid (PABA) ပါတာမျိုးက အဆင်မပြေပါဘူး။
- နေလောင်ကာခရင်မ်မှာပါတဲ့ ဓာတုပစ္စည်းတွေကို သေချာလေး ကြည့်ရှု့ပါ။ အကြောင်း က ကိုယ်နဲ့ ဓာတ်မတည့်တာမျိုး ပါနေခဲ့ရင် အသားအရေကို ထိခိုက်စေနိုင်တာကြောင့်ပါ။
- ဝက်ခြံဖြစ်လွယ်တဲ့ အသားအရေမျိုးဖြစ်မယ်ဆိုရင် ချွေးပေါက်ပိတ်ဆို့မှု ကင်းစေဖို့အတွက် water-based နေလောင်ကာခရင်မ်ကို အသုံးပြုပေးပါ။
- အဆီပြန်တတ်တဲ့သူတွေအနေနဲ့လည်း အဆီပြန်တာကို ပိုဆိုးမသွားစေဖို့ အဆီပါတာထက် water-based နေလောင်ကာခရင်မ်ကို အသုံးပြုတာက အဆင်အပြေဆုံးဖြစ်မှာပါ။
- ဈေးနှုန်းကို မကြည့်ပါနဲ့။ အဆင်အပြေဆုံးဖြစ်မယ့် နေလောင်ကာခရင်မ်ကိုပဲ ရွေးပါ။ ဈေးကြီးတိုင်း နေလောင်ကာခရင်မ်က ကောင်းမယ်လို့ မဆိုသာပါဘူး။
- ကုန်ဆုံးရက်ကို သေချာလေးကြည့်ပါ။ နေလောင်ကာခရင်မ်မှာပါတဲ့ အချို့သော ပါဝင်ပစ္စည်းတွေက သက်တမ်းကျော်သွားတဲ့ အခါ ထိရောက်မှု အားနည်းသွားတတ်ပါတယ်။
- နေရောင်ထဲမထွက်ခင်မှာ နေလောင်ကာခရင်မ်လိမ်းပေးပါ။ နေလောင်ကာခရင်မ်ကို အသားအရေက စုပ်ယူဖို့ အချိန်ပေးရပါတယ်။ အနည်းဆုံး ၁၅ မိနစ် ကနေ မိနစ် ၂၀ လောက်ကြာမှ အသားအရေက နေလောင်ကာခရင်မ်ကို စုပ်ယူနိုင်တာပါ။ ဒါကြောင့် နေရောင်ထဲမထွက်ခင် အနည်းဆုံး ၁၅ မိနစ် အလိုလောက်မှာ နေလောင်ကာခရင်မ်လိမ်းပေးပါ။
- နေလောင်ကာခရင်မ်ကို နေ့တိုင်းလိမ်းပေးပါ။ နေရောင်ထဲထွက်မှ မဟုတ်ပါဘူး။ နေရောင်ဝင်နိုင်တဲ့ နေရာမှာ နေရင်လည်း လိမ်းဖို့လိုပါတယ်။
- နေလောင်ကာခရင်မ်ကို တစ်ကြိမ်တည်း လိမ်းရုံနဲ့ တစ်နေ့တာအတွက် မလုံလောက်ပါဘူး။ နေလောင်ကာခရင်မ် လိမ်းပြီး မိနစ် ၉၀ ကြာတိုင်း ထပ်လိမ်းပေးပါ။ ဒါက အသားအရေကို နေလောင်ဒဏ်ကနေ အထိရောက်ဆုံး ကာကွယ်နိုင်မှာပါ။
နေရောင်ဒဏ်ကနေ ကာကွယ်ဖို့ အသင့်တော်ဆုံး နေလောင်ကာခရင်မ်ကို ရွေးချယ်လို့ အသားအရေကို ဒီနေ့ပဲ စောင့်ရှောက်လိုက်ရအောင်လား……….
[embed-health-tool-bmi]
