home

သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

လူကြီးတွေအတွက် အာဟာရနဲ့ဖြည့်စွက်စာ မျှတစွာကျွေးပါ

အသက်ကြီးလာပြီဆို အရင်ကနဲ့မတူတော့ဘူးတဲ့။ ဖိုးဖိုးဖွားဖွားတွေပြောလေ့ရှိကြတယ်။ အရင်ကလို သိပ်လည်းမစားနိုင်တော့ဘူး၊ အရင်လောက်လည်း မသန်မာတော့ဘူး၊ ဘယ်လောက်စားစားလည်း အားမရှိသလိုပဲ။ တကယ်လည်းဟုတ်ပါတယ်။သွားမကောင်းတာရယ်၊ အစားနည်းလာတာရယ်ကြောင့် ခန္ဓါကိုယ်အတွက်လိုအပ်တဲ့ အာဟာရဓါတ်တွေကို အပြည့်အဝရဖို့အခွင့်အရေးနည်းသလို အိုဟောင်းလာတဲ့အစာခြေစနစ်ကြောင့် အာဟာရဓါတ်စုပ်ယူနိုင်စွမ်းလည်းနည်းလာပါတယ်။

ဒီလိုလူကြီးမိဘတွေကို အာဟာရပြည့်ဝအောင် ဘယ်လိုကူညီပေးရမလဲဆိုတာမှာ စဉ်းစားရပါတော့တယ်။ အခုနေရွေးစရာရှိတာက အာဟာရကိုပဲ စားဝင်အောင် ကြိုးစားကျွေးမလား၊ ဖြည့်စွက်အားဆေးတိုက်မလား၊ ဖြည့်စွက်အာဟာရမှုန့်တွေ တိုက်ကျွေးမလားဆိုတာပါပဲ။ ဆက်တွေးကြည့်ရအောင်။

လူကြီးတွေအတွက် အရေးကြီးဆုံးအာဟာရဓါတ်တွေက –

Omega-3 Fatty Acids

ကင်ဆာ၊လေးဖက်နာ၊ အဆစ်အမြစ်ရောင်ရမ်းတာ၊နှလုံးရောဂါတွေမဖြစ်အောင်ကာကွယ်ပေးဖို့ အကျိုးပြုအဆီဓါတ် Omega -3 fatty acids တွေလိုအပ်ပါတယ်။။ တစ်ပတ်ကိုနှစ်ကြိမ်စားသုံးပေးသင့်ပါတယ်။ တူနာ၊ဆာဒင်း၊မက်ကာရယ်၊ဆော်လ်မွန်တို့လိုမျိုး ပင်လယ်ငါးတွေ၊သစ်ကြားသီး၊ပဲပိစပ်၊နှမ်းကြတ်စေ့ဆီတို့ကနေOmega-3 Fatty Acids ရရှိနိုင်ပါတယ်။

ကယ်လ်ဆီယမ်

အရိုးနဲ့သွားတွေကြံ့ခိုင်သန်စွမ်းစေဖို့အတွက်ကယ်လ်စီယမ်ကို လိုအပ်ပါတယ်။ ကယ်လ်စီယမ်က သွေးပေါင်ကျစေဖို့လည်း အထောက်အကူပေးပါတယ်။ တစ်နေ့ကို ကယ်လ်ဆီယမ် ၁၂၀၀ မီလီဂရမ်စားသုံးပေးသင့်ပါတယ်။ နို့၊ဒိန်ချဉ်၊ချိစ်၊ အစိမ်းရောင် ဟင်းသီးဟင်းရွက်တွေစားသုံးပေးလို့ရပါတယ်။

ဗီတာမင် D

အသက်ကြီးရင် အရိုးပွ၊ အရိုးပါးရောဂါက အဖြစ်များပါတယ်။ အဲဒီအတွက် ကယ်လ်ဆီယမ်စုပ်ယူနိုင်အောင်ထောက်ပံ့ပေးပြီး အရိုးအတွင်းကကယ်လ်ဆီယမ်ဓါတ်လျော့ပါးမှုကို ကာကွယ်ပေးဖို့ ဗီတာမင် D ကိုလိုအပ်ပါတယ်။ အရိုးသိပ်သည်းဆကို ထိန်းသိမ်းပေးပြီး အသက်ကြီးလို့ဖြစ်တဲ့ အရိုးပွတာနဲ့ အရိုးပါးတာမျိုးမဖြစ်အောင်ကာကွယ်ပေးနိုင်ပါတယ်။နေရောင်ခြည်ကနေရရှိနိုင်သလို အစားအစာတွေအနေနဲ့ ကြက်ဥအနှစ်၊ ဆယ်လ်မွန်နဲ့တူနာငါးတို့ကနေရရှိနိုင်ပါတယ်။

ဗီတာမင် B

ဗီတာမင် B အုပ်စုက သွေးနီဥဆဲလ်နဲ့ အာရုံကြောစနစ်တွေကျန်းမာရေးကို အားဖြည့်စောင့်ရှောက်ပေးနိုင်ပါတယ်။ ဗီတာမင် B6 ၊B12 အပါအဝင် ဗီတာမင်B အုပ်စု တွေက သွေးနီဥဆဲလ်တွေထုတ်လုပ်နိုင်အောင်လုပ်ဆောင်ပေးပါတယ်။ နို့၊ အနီရောင်အသား၊ ကြက်ရင်အုံသားတို့ကနေရရှိနိုင်ပါတယ်။

ပိုတက်ဆီယမ်

လူကြီးတွေဟာ တစ်နေ့တာကို ပိုတက်ဆီယမ် ပမာဏ ၄၇၀၀ မီလီဂရမ်အထိလိုအပ်နိုင်ပါတယ်။ ပိုတက်စီယမ်က ဆဲလ်တွေလုပ်ငန်းဆောင်တာတွေကိုကောင်းကောင်းလုပ်ဆောင်နိုင်အောင်ကူညီပေးပြီး သွေးပေါင်ချိန်ကိုထိန်းညှိပေးတယ်၊ ကျောက်ကပ်မှာကျောက်တည်နိုင်ခြေကိုလျှော့ချပေးတယ်၊ အရိုးတွေကိုလည်း သန်မာစေနိုင်ပါသေးတယ်။ သူ့ကိုတော့ ငှက်ပျောသီး၊ အာလူးနဲ့ ဇီးသီးခြောက်တွေကရရှိနိုင်ပါတယ်။

မဂ္ဂနီဆီယမ်

မဂ္ဂနီဆီယမ်က နှလုံးကျန်းမာစေနိုင်သလို ကိုယ်ခံအားစနစ်ကိုကောင်းမွန်စေနိုင်ပြီး အရိုးတွေကို သန်မာစေနိုင်ပါတယ်။ အခွံမာသီးတွေ၊ လတ်ဆတ်တဲ့သစ်သီးတွေနဲ့ဟင်းသီးဟင်းရွက်တွေကနေရရှိနိုင်ပါတယ်။

အမျှင်ဓါတ်

အသက်ကြီးလာလေအစာခြေစနစ်ရဲ့လုပ်ဆောင်မှုကနှေးသွားလေလေပါ။ အစာခြေစနစ်ရဲ့ အတွင်းပိုင်းနံရံတွေထူလာပြီး ကျုံ့ဆန့်နိုင်အားကျဆင်းသွားတာကြောင့် ဝမ်းချုပ်တာမျိုးခံစားရနိုင်ပါတယ်။ ဒီတော့ အစာခြေစနစ်ကျန်းမာဖို့ အမျှင်ဓါတ်ထောက်ပံ့ပေးဖို့လိုမှာပါ။ အမျှင်ဓါတ်ကြွယ်ဝမှုကအစာခြေစနစ်ကိုတင်ကျန်းမာစေတာမဟုတ်ပါဘူး။ နှလုံးရောဂါဖြစ်နိုင်ခြေကိုပါ ကျဆင်းစေနိုင်ပါတယ်။ အခွံမာသီးတွေ၊ ဂျုံကြမ်းပေါင်မုန့်၊ ပါစတာ၊ ဆန်လုံးညို၊ သစ်သီးတွေ ဟင်းသီးဟင်းရွက်တွေကနေ အမျှင်ဓါတ်ကိုရရှိနိုင်ပါတယ်။

ဒီဓါတ်တွေကို အစားအသောက်ကနေရနိုင်အောင် လူကြီးတွေခံတွင်းလိုက်လောက်တဲ့၊ စားနိုင်လောက်တဲ့အပြင်အဆင်၊အချက်အပြုတ်လေးတွေနဲ့ စီမံပေးလို့ရနိုင်သလို ဒါတွေအကုန်ပါတဲ့ဖြည့်စွက်အားဆေးတွေလည်း တိုက်ကျွေးလို့ရနိုင်ပါတယ်။ အသက် ၅၀ အထက် လူကြီးမိဘတွေအတွက် အားဆေးတွေက အမှတ်တံဆိပ်အမျိုးမျိုးနဲ့ရွေးစရာအများကြီးလေ။

နောက်ထပ်ရွေးစရာတစ်ခုက –ဖြည့်စွက်အာဟာရမှုန့်တွေပါပဲ။ နွားနို့ ဒါမှမဟုတ် Whey Protein လို့ခေါ်တဲ့နို့ထွက်ပစ္စည်းကရတဲ့ပရိုတင်းတစ်မျိုးကိုအခြေခံပြီး ထုတ်လုပ်တဲ့ဖြည့်စွက်အာဟာမှုန့်တွေက လူကြီးတွေရဲ့အာဟာရလိုအပ်ချက်အတွက် အမြန်ဆုံးနဲ့အလွယ်ကူဆုံးအားဖြည့်ပေးနိုင်မယ့်ထုတ်ကုန်တွေပါ။ အပေါ်မှာပြောခဲ့တဲ့ အာဟာရဓါတ်တွေအပြင် ကယ်လိုရီလိုအပ်ချက်ကိုပါဖြည့်ပေးတဲ့အတွက် အစားနည်းတဲ့လူကြီးတွေအတွက် အကောင်းဆုံးအားဖြည့်ထောက်ပံ့မှုပေးနိုင်ပါလိမ့်မယ်။ ဆီးချိုရှိတဲ့ လူကြီးတွေအတွက်လည်း သီးသန့်ထုတ်လုပ်တဲ့ဖြည့်စွက်အာဟာရတွေရှိတာမို့ ပိုအဆင်ပြေမှာပါ။

အရေးကြီးတဲ့အချက်

အရေးကြီးတဲ့အချက်တစ်ချက်ကတော့ လူကြီးမိဘတွေကို အားပြည့်ကျန်းမာစေဖို့အတွက် အားဆေးချည်းပဲ အားမကိုးသင့်သလို ဖြည့်စွက်အာဟာရကိုပဲအားထားတာမျိုးမလုပ်သင့်ပါဘူး။ အစားနည်းပေမယ့်လည်း အစားအသောက်တွေနဲ့ ပင်မအာဟာရတွေကို ရသလောက်စီမံကျွေးမွေးပြီးမှ အားဆေး သို့မဟုတ်ဖြည့်စွက်အာဟာရမှုန့်နဲ့ထောက်ကူပေးတာ အမှန်ကန်ဆုံးပါ။ ထမင်းစားမဝင်တဲ့လူကြီးတွေ၊ရောဂါကြောင့် အစားမစားနိုင်တဲ့လူနာတွေအတွက်ဖြည့်စွက်အာဟာရပဲတိုက်တာကတော့ခြွင်းချက်ပေါ့။ အဓိက အကြံပေးချင်တာကအစားလည်းကျွေးပါ၊ အားဆေး သို့မဟုတ်ဖြည့်စွက်အာဟာရလည်းတိုက်ပါ။ အကောင်းဆုံးကတော့ ဆေးချည်းအားမကိုးဘဲ အစားအသောက်ကနေ အလုံအလောက်မရဘဲ လိုအပ်နေတဲ့ဓါတ်တွေကို အားဆေး သို့မဟုတ်ဖြည့်စွက်အာဟာရနဲ့ ညီညွတ်မျှတအောင် ဖြည့်ပါလို့ ဆိုလိုတာပါ။

Hello Health Groupသည်ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့် ကုသမှုများမပြုလုပ်ပေးပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

စာရေးသူ ဓာတ်ပုံbadge
Yun Sandi Nan Mon မှ ရေးသားသည်။ 2 ပတ် အကြာက တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။