သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

ကလေးကိုလေ့လာသင်ယူချင်စိတ်တိုးလာအောင် ဘယ်လိုလုပ်ဆောင်ပေးမလဲ

ကလေးကိုလေ့လာသင်ယူချင်စိတ်တိုးလာအောင် ဘယ်လိုလုပ်ဆောင်ပေးမလဲ

ကလေးတစ်ယောက် အဆင်းရော အချင်းပါပြည့်စုံသူတစ်ဦးအဖြစ်ကြီးပြင်းလာစေဖို့ တာဝန်အရှိဆုံးသူတွေက မိဘတွေပါ။ မိဘတွေက သားသမီးတွေရဲ့ လက်ဦးဆရာတွေပေါ့။ ဒါကြောင့် ကလေးကို ငယ်စဉ်ကတည်းက လူမှုဆက်ဆံရေး၊ သင်ယူမှုစွမ်းရည် နဲ့ လိမ္မာရေးခြားရှိဖို့ သင်ပေးကြရပါတယ်။ ဒီတစ်ခေါက်တော့ ပညာရေးမှာ ထူးချွန်တဲ့ သားသားမီမီးတွေဖြစ်စေဖို့အတွက် ကလေးကို သင်ယူလိုစိတ်တွေဖြစ်ပေါ်လာအောင် ဘယ်လိုသင်ကြားပေးရမလဲဆိုတာကိုပြောပြပေးမယ်နော်။

ဒီအချက်လေးတွေက ကလေးကိုသင်ယူချင်စိတ်တိုးလာအောင် အထောက်အပံ့ဖြစ်စေမှာပါ

ကလေးတစ်ယောက်သင်ယူချင်စိတ်တွေဖြစ်လာစေဖို့ဆိုရင်ဖေဖေမေမေတို့ကလည်း ဒီနည်းလမ်းလေးတွေကို လိုက်လုပ်ကြည့်ပေးပါနော်။

ကလေးကို ယုံကြည်ပေးပါ

ယုံကြည်မှုကတစ်ခုခုကိုအောင်မြင်ဖို့အတွက်တော်တော်လေးအရေးပါပါတယ်။ ဒါကြောင့်ကလေးကို မကြာခဏ ကိုယ်တွေအနေနဲ့ သူ့အပေါ်မှာ ယုံကြည်မှုရှိတယ်ဆိုတဲ့အကြောင်းကို သူသိအောင်ပြောပြပေးတာဖြစ်ဖြစ် အမူအရာနဲ့ပြသပေးတာမျိုးဖြစ်ဖြစ်လုပ်ပေးပါ။ ဒီအလေ့အထကို ကလေးငယ်စဉ်ကတည်းက ပုံမှန်လုပ်ပေးပါ။

ကလေးနဲ့အတူ စကားပြောပါ၊ သီချင်းဆိုပါစာအုပ်ဖတ်ပါ

အမြဲတမ်းမဟုတ်ရင်တောင် တစ်ပတ်မှာ အနည်းဆုံး ၃ ကြိမ်လောက် ကလေးကို အချိန်ပေးပြီး စကားပြောပေးတာ၊ ကလေးနဲ့အတူတူသီချင်းဆိုပေးတာ၊ စာအုပ်တူတူဖတ်တာမျိုးလုပ်ပေးပါ။ ဒီလိုလုပ်ပေးတာက ကလေးကိုစိတ်ပျော်ရွှင်စေသလို သင်ယူနိုင်စွမ်းကို တိုးစေမှာ အသေအချာပါ။ ကလေးနဲ့အတူတူဒီလိုလုပ်ပေးတာက ကလေးရဲ့ ဘာသာစကားစွမ်းရည်တိုးလာစေဖို့လည်း အထောက်အကူဖြစ်စေပါတယ်။

ကလေးကို တစ်ချိန်လုံးတီဗွီပေးမကြည့်ပါနဲ့

ကလေးကိုတစ်ချိန်လုံးငြိမ်နေရင်ပြီးရောဆိုပြီး တီဗွီပေးကြည့်ထားတာမျိုးမလုပ်ပါနဲ့။ ဒီလိုလုပ်တာက ကလေးကို အမြင်အာရုံထိခိုက်စေနိုင်သလို အဝလွန်တာမျိုးထိတောင်ဖြစ်စေနိုင်ပါတယ်။ ကလေးကို တီဗွီပေးကြည့်မယ့်အစား ကိုယ်လက်လှုပ်ရှားမှုဖြစ်အောင် ရွယ်တူကလေးငယ်တွေနဲ့ပေးကစားတာမျိုးလုပ်ပေးပါ။ ဒီလိုလုပ်ပေးတာက ကလေးကို သင်ယူနိုင်စွမ်းတိုးတက်စေမှာပါ။

ကလေးရဲ့ သင်ယူမှုအပေါ်မှာ အကောင်းမြင်စိတ်လေးထားပေးပါ

ကလေးရဲ့ကျောင်းစာတွေလုပ်ဆောင်မှုနဲ့ သင်ယူမှုတွေမှာ အနည်းငယ်အတိမ်းအစောင်းဖြစ်ခဲ့ရင်တောင် ဆူတာမျိုးမလုပ်ပါနဲ့။ ကလေးကသူ့ရဲ့ အိမ်စာတွေကျောင်းကသင်လိုက်တဲ့စာတွေနဲ့ ပတ်သက်လို့ လာမေးတဲ့အခါမှာလည်းအော်ငေါက်တာမျိုးမလုပ်ပါနဲ့သေချာနားလည်အောင်ရှင်းပြပေးပါ။ ကလေးနားလည်လွယ်မယ့်နည်းလမ်းလေးတွေရှာပြီးသေချာပြောပြပေးပါ။ သင်ယူမှုကောင်းမွန်ဖို့က အရေးပါတယ်ဆိုတာကို ကလေးနားလည်အောင်ပြောပြပေးပါ။

ကလေးအိမ်စာတွေလုပ်ရဲ့လားစစ်ဆေးပါ

ကျောင်းနေပျော်မှစာတော်မယ်ဆိုတဲ့စကားအတိုင်းပါပဲ။ ကလေးကျောင်းနေပျော်ဖို့ဆိုတာကနေ့စဉ်ကျောင်းကပေးလိုက်တဲ့ အိမ်စာတွြေပီးအောင်လုပ်ဖို့လည်းလိုပါမယ်။ ဒါကြောင့် ကလေးကိုကျောင်းနေပျော်ပြီး စာတော်တဲ့ကလေးဖြစ်အောင် အိမ်စာတွေပုံမှန်လုပ်ရဲ့လားဆိုတာကိုသေချာလေးဂရုစိုက်ပေးပါနော်။ ကလေးကို တိတ်တိတ်ဆိတ်ဆိတ်နဲ့ အိမ်စာလုပ်နိုင်မယ့်နေရာလေးတစ်ခု ဖန်တီးပေးပါ။ ကိုယ်ပိုင်စာကြည့်စားပွဲလေးဖြစ်ဖြစ်ပေါ့။

ကလေးဝါသနာပါတာကိုလုပ်ခွင့်ပေးပါ

ကလေးတွေက သူတို့ဝါသနာပါတာကိုလုပ်ရတဲ့အခါ ဉာဏ်ပိုကောင်းတတ်ကြပါတယ်။ သင့်အနေနဲ့ ကလေးကို သင်ယူမှုကောင်းတဲ့သူတစ်ဦးဖြစ်စေချင်တယ်ဆိုရင်တော့ ကလေးကို သူဝါသနာပါတဲ့အလုပ်တွေကိုလုပ်ဆောင်နိုင်အောင်ကူညီပေးလိုက်ပါ။ သူတို့ဝါသနာပါတဲ့အကြောင်းကို တိုင်ပင်ဆွေးနွေးပေးပါ။ ဥပမာ ကလေးကစာအုပ်ဖတ်ရတာကြိုက်တယ်ဆိုရင် ဘယ်လိုစာအုပ်မျိုးကိုပိုကြိုက်လဲဆိုတာနဲ့ ဘာကြောင့် အဲ့လိုစာအုပ်မျိုးကိုကြိုက်ရတာလဲဆိုတာကိုပြောပြခိုင်းပါ။

အောင်မြင်မှုသေးသေးလေးဖြစ်ပါစေ၊ ချီးမွမ်းပေးပါ

လူတိုင်းချီးမွမ်းတာကိုကြိုက်ပါတယ်။ ကလေးတွေဆိုပိုလို့တောင်ကြိုက်ပါတယ်။ ကလေးဆိုတဲ့အမျိုးက အချော့ကြိုက်တဲ့အမျိုးပါ။ ဒါကြောင့် ကလေးက စာတွေလုပ်လို့ပြီးသွားတဲ့အခါဖြစ်ဖြစ် သင်္ချာပုစ္ဆာတွေကို မှန်အောင်တွက်နိုင်တဲ့ အခါမှာဖြစ်ဖြစ် ကလေးကိုတော်လိုက်တာလို့ ချီးမွမ်းဖို့မမေ့ပါနဲ့။

နေ့ရက်တိုင်းမှာကလေးကို သင်ယူနိုင်ခွင့်ဖန်တီးပေးပါ

ကလေးကို သူနေ့စဉ်ကြုံတွေ့နေရတဲ့အရာတွေ၊ ထိတွေ့နေကျဖြစ်တဲ့ ပတ်ဝန်းကျင်အခြေအနေတွေကိုရှင်းပြပေးပြီး သင်ယူနိုင်စွမ်းတိုးအောင်လုပ်ပေးပါ။ အသစ်အဆန်းတွေကိုဖော်ထုတ်သိရှိနိုင်အောင်ကူညီပေးပြီးတွေ့ကြုံလိုက်ရတဲ့ အဖြစ်အပျက်ပေါ်မှာ ကလေးရဲ့ သဘောထားကိုမေးမြန်းခြင်းဖြင့် ကလေးကို သင်ယူလိုစိတ်တိုးလာအောင် လှုံ့ဆော်ပေးလိုက်ပါ။

အခုပြောခဲ့တဲ့နည်းလမ်းလေးတွေအပြင် ကလေးကို အာဟာရပြည့်ဝအောင်ကျွေးမွေးတာကလည်း ကလေးရဲ့ သင်ယူနိုင်စွမ်းကိုတိုးစေနိုင်ပါတယ်။ ကလေးရဲ့နေ့စဉ်စားသုံးတဲ့အစားအစာတွေထဲမှာ ဦးနှောက်နဲ့အမြင်အာရုံကိုဖွံ့ဖြိုးစေတဲ့ DHA, Omega 3 နဲ့ Omega 6 တို့ပါဝင်အောင် ဂရုစိုက်ကျွေးမွေးပေးပါ။ ကလေးကို အသား၊ငါး၊ အသီးအရွက်နဲ့ အခြားအာဟာရဖြစ်စေမယ့် အစားအသောက်တွေကို အရသာရှိရှိလေးပြင်ဆင်ပေးပြီး လက်ဦးဆရာတွေရဲ့ တာဝန်ကိုကျေပွန်လိုက်ပါနော်ဖေဖေမေမေတို့ရေ…….

Hello Health Groupသည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ

6 Ways to Motivate Your Kidshttps://www.parents.com/kids/development/behavioral/6-ways-to-motivate-your-kids/ Accessed Date 31 October 2018

10 Ways to Motivate Your Child to Learnhttps://www.scholastic.com/parents/school-success/10-ways-to-motivate-your-child-to-learn.html Accessed Date 31 October 2018

Simple Ways to Encourage Learninghttp://www.readingrockets.org/article/simple-ways-encourage-learning Accessed Date 31 October 2018

12 Strategies to Motivate Your Child to Learnhttps://www.educationcorner.com/motivating-your-child-to-learn.html Accessed Date 31 October 2018

စာရေးသူ ဓာတ်ပုံbadge
Aye Thi Mon မှ ရေးသားသည်။ 06/04/2022 တွင် ပြန်လည်ပြင်ဆင်ခဲ့သည်။
Dr. Thurein Hlaing Win မှ အချက်အလက် စစ်ဆေးထားပါသည်။