နို့လို့ ပြောလိုက်တယ်ဆိုရင် လူတော်တော်များများ ပြေးမြင်ကြတာက နွားနို့ကိုပါ။ ဒါပေမယ့် သောက်လို့ရတာက နွားနို့တစ်ခုတည်း မဟုတ်ပါဘူး။ ဆိတ်နို့ ၊ ကျွဲနို့နဲ့ မြင်းနို့တို့ကလည်း သောက်လို့ရပါတယ်။ ဆိတ်နို့ဆိုရင် နွားနို့ထက် ပိုမွှေးသလို ပိုလည်းဆိမ့်ပါတယ်။ ဒီတစ်ခေါက်တော့ သောက်ရတာဆိမ့်ပြီး အရသာရှိလှတဲ့ ဆိတ်နို့အကြောင်းလေး နည်းနည်းလောက်ပြောပြပါရစေ။

ဆိတ်နို့ အကြောင်း တစ်စေ့တစောင်း

ဆိတ်နို့ က အရသာရှိသလို ကျန်းမာရေးအကျိုးကျေးဇူးတွေလည်း တော်တော်လေးများပါတယ်။ ခန္ဓာကိုယ်အတွက်လိုအပ်တဲ့ ဗီတာမင်၊ သတ္တုဓာတ်နဲ့ အာဟာရဓာတ်တွေ စုံလင်စွာ ပါဝင်နေတဲ့အတွက် သောက်သုံးဖို့ သင့်တော်တဲ့ နို့တစ်မျိုးပါ။ ဆိတ်နို့မှာ ကာဗိုဟိုက်ဒရိတ်၊ ပရိုတင်း၊ သကြားဓာတ်၊ ဆိုဒီယမ်တို့ ပါဝင်နေသလို ကယ်လ်ဆီယမ်၊ မဂ္ဂနီဆီယမ်၊ ပိုတက်ဆီယမ်နဲ့ ဇင့်တို့လိုမျိုး သတ္တုဓာတ်တွေလည်း ကြွယ်ဝစွာပါဝင်ပါတယ်။ ဗီတာမင်တွေအနေနဲ့ကတော့ ဗီတာမင် A၊ ဗီတာမင် B နဲ့ ဗီတာမင် C တို့ပါဝင်နေပါတယ်။

ဆိတ်နို့ကနေရရှိမယ့် ကျန်းမာရေးအကျိုးကျေးဇူးတွေက

• အရိုးတွေသန်မာစေနိုင်တယ်

ကယ်လ်ဆီယမ်ပါဝင်နေတာကြောင့် အရိုးတွေကို သန်မာစေနိုင်သလို အရိုးပွရောဂါမဖြစ်အောင် ကာကွယ်ပေးနိုင်ပါတယ်။ ဆိတ်နို့က နွားနို့ထက် ကယ်လ်ဆီယမ်ပါဝင်မှုများပြီး ဘေးထွက်ဆိုးကျိုးလုံးဝမရှိတဲ့ အာဟာရပြည့်သောက်စရာပါ။

• နာကျင်ရောင်ရမ်းမှုကို လျော့ပါးသက်သာစေနိုင်တယ်

ဆိတ်နို့ က နာကျင်ရောင်ရမ်းမှုကို လျော့ပါးသက်သာစေနိုင်သလို အစာမကြေတာမျိုးဖြစ်မှာကိုလည်း မစိုးရိမ်ရပါဘူး။ အစာအိမ်ဝေဒနာရှိသူတွေအတွက်လည်း သောက်သုံးပေးလို့ရပါတယ်။

• အာဟာရပြည့်ဝစေနိုင်တယ်

ဆိတ်နို့ရဲ့ အားသာချက်တစ်ခုက နွားနို့ထက် အာဟာရပါဝင်မှုများတာပါ။ အစာမကြေတာမျိုးမရှိဘဲ ခန္ဓာကိုယ်အတွက် လိုအပ်တဲ့ အာဟာရတွေကို အကောင်းဆုံးဖြည့်တင်းပေးနိုင်မှာပဲဖြစ်ပါတယ်။

• ဇီဝကမ္မဖြစ်စဉ်ကို တိုးတက်ကောင်းမွန်စေနိုင်တယ်

အာဟာရပြည့်ဝတဲ့ ဆိတ်နို့က ခန္ဓာကိုယ်မှာ နေ့စဉ်လိုအပ်တဲ့ ဗီတာမင် B နဲ့ ကယ်လ်ဆီယမ်တို့ကို ၄၀ ရာခိုင်နှုန်းအထိ ဖြည့်တင်းပေးပါတယ်။ သံဓာတ်ဖြည့်တင်းပေးတာကြောင့်သွေးအားနည်းရောဂါနဲ့ သံဓာတ်ချို့တဲ့တာမျိုး မဖြစ်အောင်လည်း ကာကွယ်ပေးနိုင်ပါတယ်။

• နှလုံးကျန်းမာစေနိုင်တယ်

ဆိတ်နို့မှာပါတဲ့ Fatty Acids က ခန္ဓာကိုယ်အတွက် အကျိုးပြုပြီး သွေးတွင်းကိုလက်စထရောပမာဏတိုးတာမျိုးလည်း မဖြစ်စေနိုင်ပါဘူး။ လေဖြတ်တာ၊ ရုတ်တရက်နှလုံးရပ်တာနဲ့ အခြားသော နှလုံးသွေးကြောဆိုင်ရာရောဂါတွေ မခံစားရအောင် ကာကွယ်ပေးပါတယ်။ သွေးကြောတွေကို ပြေလျော့စေပြီး သွေးတိုးကျစေနိုင်ပါတယ်။

• ကိုယ်ခံအားကောင်းစေတယ်

ဆိတ်နို့ မှာ နွားနို့ထက် ဆီလီနီယမ်ပါဝင်မှု ပိုများပါတယ်။ ဒီဓာတ်က ကိုယ်ခံအားကောင်းစေဖို့အတွက် အရေးပါတဲ့ ဓာတ်တစ်ခုပါ။ ခန္ဓာကိုယ်ကို ဖျားနာမှုတွေ ကင်းဝေးအောင် လုပ်ဆောင်ပေးပြီး ကူးစက်ရောဂါပိုးတွေကနေ ကာကွယ်ပေးပါတယ်။

• ကြီးထွားသန်မာစေနိုင်တယ်

ပရိုတင်းကြွယ်ဝတာကြောင့် ဆိတ်နို့က ခန္ဓာကိုယ်ရဲ့ ဆဲလ်တွေ၊ တစ်သျှူးတွေ၊ ကြွက်သားတွေနဲ့ အရိုးတွေ ကြီးထွားဖွံ့ဖြိုးဖို့အထောက်အပံ့ပေးပါတယ်။ ကျန်းမာပြီး ခန္ဓာကိုယ်ကြီးထွားသန်မာစေဖို့ သောက်သုံးပေးသင့်ပါတယ်။

• သွေးတွင်းကိုလက်စထရော ကျဆင်းစေနိုင်တယ်

ဆိတ်နို့က သွေးတွင်းမှာရှိနေတဲ့ အကျိုးမပြုတဲ့ ကိုလက်စထရောတွေကို ကျဆင်းစေနိုင်ပြီး အကျိုးပြုကိုလက်စထရောပမာဏကို တိုးစေနိုင်ပါတယ်။

• အစာခြေစနစ် ကျန်းမာစေနိုင်တယ်

ဇီဝကမ္မဖြစ်စဉ်တွေကို အကောင်းဆုံးလည်ပတ်နိုင်အောင် လုပ်ဆောင်ပေးပါတယ်။ အစာခြေစနစ်ကို ကျန်းမာစေပြီး ဝမ်းချုပ်တာ၊ လေပွတာလိုမျိုး အစာခြေစနစ်ပြဿနာတွေ ကင်းဝေးစေနိုင်ပါတယ်။

• အရေပြားအစိုဓာတ်ထိန်းပေးတယ်

ဆိတ်နို့ မှာပါတဲ့ အကျိုးပြု ကိုလက်စထရောတွေနဲ့ fatty Acid တို့က အသားအရေကို စိုပြည်လှပစေဖို့ အထောက်အပံ့ပေးပါတယ်။ ဗီတာမင် A ကြွယ်ဝစွာ ပါဝင်နေတာကြောင့် ဝက်ခြံတွေကို သက်သာစေနိုင်ပြီး အသားအရေကို စိုပြည်လှပစေမှာ အသေအချာပါ။ ဆိတ်နို့မှာပါတဲ့ Latic အက်ဆစ်က အရေပြားပေါ်က ဆဲလ်သေတွေကို ဖယ်ရှားပေးပြီး အသားအရေကို ဝင်းလက်တောက်ပစေနိုင်ပါတယ်။