IUD ဖယ်ပြီးတဲ့အခါ

IUD (သားအိမ်တွင်းထည့်ပစ္စည်းဆိုတာ ဘာလဲ)

ဘယ်လိုအလုပ်လုပ်တာလဲ

ကြေးနီပါဝင်တဲ့ သားအိမ်တွင်းထည့်ပစ္စည်းက သုက်ပိုးကို မမျိုးဥဆီမရောက်အောင်ခင် ရစ်ပတ်ထားတဲ့ ကြေးနီတွေကတားဆီးပေးခြင်းအားဖြင့် ကိုယ်ဝန်ကိုတားပေးပါတယ်။

IUD ရဲ့အားသာချက်တွေက …………..

• သားအိမ်တွင်းထည့်ပစ္စည်းက တစ်ခါထည့်ပြီးရင် နှစ်ရှည်ခံတယ်ဆိုတော့ အလုပ်များတဲ့အမျိုးသမီးတွေ သန္ဓေတားဖို့အတွက် စိတ်ချလက်ချယုံကြည်လို့ရပါတယ်။
• IUD ထည့်ထားရင် နေ့စဉ် ဂရုစိုက်နေစရာလည်း မလိုတဲ့အပြင် ကိုယ်ဝန်တားတဲ့နေရာမှာလည်း အင်မတန်ထိရောက်တာကြောင့် အမျိုးသမီးတိုင်းအတွက် သင့်လျော်တဲ့နည်းတွေထဲက တစ်ခုလို့ဆိုရမှာပါ။ IUD ကြိုးလေး နေရာတကျ ရှိ /မရှိ သာတစ်လတစ်ကြိမ် ကိုယ်တိုင်ဆန်းစစ်ဖို့ပဲလိုပါတယ်။
• IUD ဟာ ဟော်မုန်းမပါဝင်တာကြောင့် တခြားဟော်မုန်းပါ သန္ဓေတားနည်း တွေရဲ့ဘေးထွက်ဆိုးကျိုးတွေဖြစ်တဲ့ ဝလာတာ၊ ရာသီသွေးဆင်းမမူမမှန်ဖြစ်တာ၊ နာကျင်ကိုက်ခဲတာ အစရှိတာတွေကိုလည်း မခံစားရပါဘူး။
• ကိုယ်ဝန်ကို ၉၉ ရာခိုင်နှုန်းအထိ တားဆီးပေးနိုင်တာကြောင့် ထိရောက်တဲ့ သားဆက်ခြားနည်းလမ်းတစ်ခုပါ။
• တချို့ဟော်မုန်းပါသန္ဓေတားနည်းတွေ ကလေးယူချင်လို့ဆေးဖြတ်လိုက်ပေမယ့်လည်း သုံးခဲ့တဲ့အချိန် ကာလပေါ်မူတည်ပြီး ကလေးယူဖို့စောင့်ဆိုင်းရလေ့ရှိပါတယ်။ IUDတွေရဲ့ အကောင်းဆုံးအချက်ကတော့ ကလေးယူချင်လို့ ပစ္စည်းထုတ်လိုက်တာနဲ့ ချက်ချင်းကလေး ပြန်ရနိုင်တာပါပဲ။
• ကလေးမွေးဖွားထားတဲ့နို့တိုက်မိခင်တွေအတွက်လည်း သင့်တော်တဲ့ သားဆက်ခြားနည်းတစ်ခုပါ။

ဘယ်လိုအခြေအနေမှာထည့်လို့ရလဲ………..

ကိုယ်ဝန်မရှိတာသေချာရင် ဘယ်အချိန်မဆိုထည့်လို့ရပါတယ်။ အိမ်ထောင်ရှင်လေဒီ အသစ်စက်စက်လေးတွေအနေနဲ့လည်း IUD ကိုထည့်လို့ရပါတယ်။

ဘယ်လိုအခြေအနေမှာ IUD ကိုပြန်ထုတ်ဖို့လိုမလဲ……..

အခုလိုအခြေအနေမျိုးတွေမှာ IUD ကိုဖယ်ထုတ်ဖို့လိုပါမယ်။

• သက်တမ်းကုန်သွားတဲ့အခါ
• ကလေးလိုချင်တဲ့အခါ
• သွေးအများကြီးဆင်းတဲ့အခါ
• ခေါင်းအရမ်းကိုက်လာတဲ့အခါ
• ပြင်းထန်တဲ့ နာကျင်မှုကို ခံစားရတဲ့အခါ
• လိင်ကတဆင့်ကူးစက်တဲ့ရောဂါတစ်မျိုးမျိုးကို ခံစားနေရတဲ့အခါ
• သားအိမ်ထဲမှာ IUD ကျိုးသွားတဲ့အခါ
• IUD ထွက်ကျလာတဲ့အခါ
• IUD ထည့်ထားရက်နဲ့ ကိုယ်ဝန်ရရှိသွားတဲ့အခါမျိုးမှာ IUD ကိုဖယ်ရှားဖို့လိုပါမယ်။

IUD ထုတ်ခြင်းနဲ့ လိင်ဆက်ဆံခြင်း

IUD က ဖယ်ဖယ်ပြီးချင်းမှာ သန္ဓေအောင်နိုင်တာကြောင့် ကိုယ်ဝန်ချက်ချင်းဆောင်ဖို့ အစီအစဉ်မရှိသေးဘူးဆိုရင် IUD မထုတ်ခင် ၇ ရက်အလိုမှာ လိင်ဆက်ဆံခြင်းမပြုသင့်ပါဘူး။ အခန့်မသင့်ရင် ကိုယ်ဝန်ရရှိသွားနိုင်တာကြောင့်ပါ။ IUD ကိုထုတ်ပြီးပြီးဆိုရင်လည်း ချက်ချင်းကလေးမယူသေးဘူးဆိုရင် အခြား သားဆက်ခြားနည်းတစ်ခုခုကို အသုံးပြုဖို့လိုမှာဖြစ်ပြီး ၇ ရက်ကြာမှ အတူနေသင့်ပါတယ်။ ဒီလိုပြောရတဲ့အကြောင်းက

IUD ဖယ်လိုက်တဲ့အခါလေဒီတွေအနေနဲ့ ပုံမှန်အတိုင်း ရာသီသွေးြပန်ပေါ်နိုင်ပြီး အကယ်လို့များ IUD မဖယ်ခင်မှာ အတူနေမိမယ်ဆိုရင် သုက်ပိုးတွေက အမျိုးသမီးမျိုးပွားလမ်းကြောင်းထဲမှာ ဆက်ဆံပြီးချိန်ကနေစလို့ ၅ ရက်အထိ ဆက်လက်ရှင်သန်နေနိုင်တာကြောင့် ကိုယ်ဝန်ရရှိသွားနိုင်ပါတယ်။ ဒါကြောင့် IUD မထုတ်ခင် ၇ ရက် ထုတ်ပြီး ၇ ရက်အတွင်းမှာ လိင်ဆက်ဆံတာမျိုးမလုပ်မိဖို့လိုပါမယ်။

IUD ထုတ်ရင် နာမှာလား……

IUD ထုတ်တာက ထည့်တာလောက်တော့ မနာပါဘူး။ ဆရာဝန်က IUD ကိုဖယ်နေတဲ့အချိန်မှာ ရာသီလာစဉ်နာကျင်ကိုက်ခဲသလိုမျိုးနည်းနည်းတော့ ခံစားရနိုင်ပါတယ်။

ဘာတွေပြင်ဆင်ဖို့လိုမလဲ…….

IUD ထုတ်ဖို့အတွက် ကြိုတင်ပြင်ဆင်ဖို့ မလိုပါဘူး။