ကိုယ်ဝန်ဆိပ်တက် တယ်ဆိုတာက ကိုယ်ဝန်ဆောင်တိုင်း ကြောက်ကြတဲ့ အခြေအနေပါ။ အခန့်မသင့်ရင် အမေရော၊ ကလေးကိုပါ လက်လွှတ်ရနိုင်တယ်လေ။ ကိုယ်ဝန်ဆိပ်တက်တယ်ဆိုတာက ကိုယ်ဝန်ဆောင်ချိန်မှာသာမက မီးဖွားပြီးချိန်မှာပါ ဖြစ်တတ်ပါတယ်။ အများစုက ကိုယ်ဝန်ဆောင်ချိန်မှာ ဖြစ်တတ်တယ်လို့ပဲ သိထားတဲ့ အခါကျတော့ မွေးပြီးတဲ့အခါ ကိုယ်ဝန်ဆိပ်တက်တဲ့ လက္ခဏာတွေကို လျစ်လျူရှုမိတတ်ပါတယ်။ ဒါက အင်မတန်မှ အန္တရာယ်များပါတယ်။
မီးတွင်းမှာ ကိုယ်ဝန်ဆိပ်တက် တယ်ဆိုတာ
ဒါက ရှားပါးတဲ့ အခြေအနေဆိုပေမယ့် အန္တရာယ်များလို့ ကိုယ်ဝန်ဆောင်မေမေတိုင်း သိထားသင့်ပါတယ်။ မွေးပြီး ၄၈နာရီအတွင်းမှာ အဖြစ်အများဆုံး ဆိုပေမယ့် မီးတွင်း ၄၅ရက်အထိ ဖြစ်ကြတာမျိုးလည်း ရှိပါတယ်။ ကိုယ်ဝန်ဆောင်ချိန်မှာ ဖြစ်သလိုမျိုးပဲ သွေးတက်တာ၊ ဆီးထဲမှာ ပရိုတင်း များတာတွေ ဖြစ်တတ်ပါတယ်။
မီးတွင်းမှာ ဘာကြောင့် ကိုယ်ဝန်ဆိပ်တက်ရသလဲဆိုတာတော့ မသိသေးပါဘူး။ ဒါပေမယ့် ပြောခဲ့သလိုပဲ ဒါက အန္တရာယ်များတဲ့ အခြေအနေဖြစ်ပြီး လေဖြတ်တာ၊ တက်တာစတဲ့ နောက်ဆက်တွဲ ပြဿနာတွေ ဖြစ်တတ်ပါတယ်။
ဘယ်သူတွေ မီးတွင်းမှာ ကိုယ်ဝန်ဆိပ်ပိုတက်တတ်သလဲ။
ကလေးမွေးပြီးတဲ့ မိခင်တိုင်းက ကိုယ်ဝန်ဆိပ်တက်နိုင်ခြေ ရှိတဲ့အတွက် ဂရုစိုက်ရမှာပါ။ ဒါပေမယ့်
- အဝလွန်တဲ့ မိခင်တွေ
- ကိုယ်ဝန်ဆောင်ချိန်မှာ သွေးတိုးတတ်တဲ့ မိခင်တွေ
- မိသားစုထဲမှာ မီးတွင်း ကိုယ်ဝန်ဆိပ်ဖူးတဲ့ ရာဇဝင်ရှိနေရင်
- အသက် ၂၀အောက် မေမေ ကိုယ်ဝန်ဆောင်ရင်
- အသက် ၄၀အထက် မေမေ ကိုယ်ဝန်ဆောင်ရင်
- အမြွာကလေးကို ကိုယ်ဝန်ဆောင်ထားရင် ဖြစ်နိုင်ခြေများတဲ့အတွက် ပိုပြီး ဂရုစိုက်သင့်ပါတယ်။
မီးဖွားပြီး ကိုယ်ဝန်ဆိပ်တက် ရင် ဘယ်လိုတွေ ခံစားရနိုင်လဲ။
လက္ခဏာတွေကတော့ ကိုယ်ဝန်ဆောင်ချိန် ကိုယ်ဝန်ဆိပ်တက်တာနဲ့ အတူတူပါပဲ။
- သွေးတက်မယ် (အများအားဖြင့် ၁၄၀/၉၀ အထက်)
- ဆီးထဲမှာ အသားဓာတ်တွေ များမယ် (ဒါကတော့ ဆီးစစ်မှ သိနိုင်တာပါ။ အမြင်အရ ဆီးအရောင် နောက်နေပြီဆိုရင်လည်း အသားဓာတ်ပါတာဖြစ်နိုင်ပါတယ်)
- ခေါင်းကိုက်မယ် (သာမန်ထက်ပိုပြီး ပြင်းပြင်းထန်ထန် ခေါင်းကိုက်တာမျိုးပါ)
- အမြင်တွေဝါးပြီး နှစ်ထပ်မြင်လာတာ
- မျက်နှာ၊ ခြေ၊ လက်တွေ ဖောလာတာ
- ပျို့တာ
- အန်တာ
- ညာဘက် အပေါ်ပိုင်း နံကြားအောင့်တာ (အဲ့တာ အသည်းရှိတဲ့ နေရာပါ)
- ဆီးနည်းသွားတာ
- ဖောတဲ့အတွက် ကိုယ်အလေးချိန်တက်လာတာ စတာတွေ ဖြစ်တတ်ပါတယ်။
ကလေးမွေးပြီး ၂ရက်ကနေ ၆ပတ်လောက်ထိ ဒီလက္ခဏာတွေကို စောင့်ကြည့်ပါ။ ဒီလက္ခဏာတွေ ခံစားနေရရင် ဆေးရုံပြန်သွားပါ။ အချိန်မီ မကုသနိုင်ရင် အသက်အန္တရာယ်ထိခိုက်နိုင်ပါတယ်။
ကလေးမွေးပြီး ကိုယ်ဝန်ဆိပ်တက်တာကို ကုသလို့ ရပါ့မလား။
ကိုယ်ဝန်ဆောင်ချိန်မှာ ကိုယ်ဝန်ဆိပ်တက် တယ်ဆိုရင်တော့ ကလေးကို မွေးထုတ်လိုက်တာက အကောင်းဆုံးနည်းလမ်းပါပဲ။ မွေးပြီးမှဆိုရင်တော့
- သွေးတက်နေရင် သွေးကျဆေးတွေ ပေးတာ
- တက်လာရင် အတက်ကျဆေးတွေ ပေးတာ
- သွေးခဲမှာစိုးလို့ သွေးခဲပျော်ဆေးတွေပေးတာ စတာတွေနဲ့ စောင့်ကြည့်ကုသရပါတယ်။
ဆေးတွေ သောက်ရမယ်ဆိုရင် ကလေးကို မိခင်နို့တိုက်နေရင် တိုက်နေတဲ့အကြောင်းလေး ဆရာဝန်ကို ပြောပြပါ။ တချို့ဆေးတွေက မိခင်နို့ကနေတဆင့် ကလေးဆီ ရောက်နိုင်တဲ့အတွက် ရှောင်ပြီး ပေးနိုင်အောင်ပါ။
မကုဘဲထားရင် ဘာဖြစ်နိုင်မလဲ။
လက္ခဏာတွေ သတိမထားမိလို့ ဆေးကုသမှု ခံယူတာနောက်ကျသွားမယ်ဆိုရင်
- ဦးနှောက်၊ အသည်းနဲ့ ကျောက်ကပ် ပျက်စီးတာ
- အဆုတ်ထဲ ရေဝင်တာ
- လေဖြတ်တာ
- သွေးခဲပိတ်တာ
- HELLP syndromeလို့ ခေါ်တဲ့ သွေးနီဥတွေ ပျက်စီး၊ အသည်းအင်ဇိုင်းတွေတက်၊ သွေးဥမွှားတွေ နည်းတဲ့ ရောဂါစု ဖြစ်တတ်ပါတယ်။ ဒါကတော့ အဆိုးဆုံး အခြေအနေပါပဲ။
- နောက်ဆုံး အသက်ဆုံးရှုံးတဲ့အထိ ဖြစ်နိုင်ပါတယ်။
မီးတွင်းမှာ ကိုယ်ဝန်ဆိပ်တက် တယ်ဆိုတာက ရှားပါးပေမယ့် ဖြစ်လာရင် အန္တရာယ်ရှိတဲ့ အခြေအနေပါ။ မေမေအများစုက မီးတွင်းမှာ ကိုယ်ဝန်ဆိပ်တက်နိုင်မှန်း မသိလို့ ကုသမှု ခံယူတာ နောက်ကျတတ်ပါတယ်။ အချိန်မီကုသမှု ခံယူမယ်ဆိုရင် အသက်ရှင်နိုင်နှုန်း များပါတယ်။
[embed-health-tool-ovulation]
