အကြောက်တရားနဲ့ ကင်းတဲ့ သူတော့ လောကမှာ ရှိမယ်မထင်ပါဘူး။ ကိုယ့်ပတ်ဝန်းကျင်က လူတချို့ကို သေချာကြည့်ကြည့်ပါ။ ဗလကြီးတွေနဲ့ ကြမ်းကြမ်းတမ်းတမ်း အားကိုးချင်စရာ တချို့အမျိုးသားတွေ ကြွက်တို့၊ ပိုးဟပ်တို့၊ ပိုးမွှားလေးတွေ မြင်ရင် ငယ်သံပါအောင် အော်ပြီး လန့်ပြေးတတ်ကြတာကို မြင်ဖူးကြမှာပါ။

ဒီနေ့ပြောပြပေးမယ့် အကြောင်းအရာကတော့ အရာဝတ္ထုတစ်ခုခုအပေါ် ပုံမှန်ထက်ပိုပြီး ကြောက်လန့်တဲ့ စိတ်လက္ခဏာ (Phobia) ပဲ ဖြစ်ပါတယ်။

Phobia ဆိုတာ ဘာလဲ။

တခြားသူတွေအမြင်မှာ အပိုလုပ်ပြီး ဟန်ဆောင်ကြောက်ပြတယ်လို့ ထင်ရပေမယ့် ကိုယ့်ရဲ့ အတွေးထဲမှာ တစ်ခုခုအပေါ် ပြင်းပြင်းထန်ထန် ထိတ်လန့်တဲ့ စိတ်၊ ကြောက်ရွံ့တဲ့ စိတ် ကြီးမိုးနေတဲ့ ပြဿနာကို Phobia လို့ ခေါ်ပါတယ်။ လူတချို့တွေးထင်ထားသလို ပုံမှန်ကြောက်တတ်တဲ့ စိတ်အခံရှိတာ တစ်ခုတည်းနဲ့ Phobia လို့ မသုံးနှုန်းသလို စိုးရိမ်စရာ စိတ်ရောဂါလို့ သတ်မှတ်ရတဲ့အထိလည်း မပြင်းထန်ပါဘူး။

Phobia လက္ခဏာတွေက ဘယ်လိုမျိုးလဲ။

ကိုယ်ထိတ်လန့်တဲ့ အရာတစ်ခုကို မြင်လိုက်ရတဲ့အခါမှသာ တွေ့ရတတ်တဲ့ လက္ခဏာတွေဖြစ်ပြီး ပုံမှန်အချိန်မှာ သာမန်လူကောင်းတစ်ယောက်လိုပဲ ဘဝကို အေးအေးချမ်းချမ်း ဖြတ်ကျော်တတ်ပါတယ်။ တစ်ခါတလေမှာ ကိုယ်ကြောက်တဲ့အရာကို အပြင်မှာ မြင်လိုက်ရတာမဟုတ်ဘဲ အတွေးထဲမှာ ပေါ်လာတာကြောင့်လည်း ဒီလို စိတ်အခြေအနေ လက္ခဏာကို တွေ့ကြုံရနိုင်ပါတယ်။

၁။ ကိုယ့်ကိုယ်ကို မထိန်းချုပ်နိုင်တော့တဲ့အထိ ထိတ်လန့်ကြောက်ရွံ့တဲ့ စိတ်ဖြစ်ပေါ်လာတာ

၂။ စိတ်ထဲမှာ ပြောမပြနိုင်တဲ့ ခံစားမှုမျိုးနဲ့ စိုးရိမ်ပူပန်လာတာ

၃။ ဒီလိုကြောက်လန့်နေတဲ့ ခံစားချက် သို့မဟုတ် ကိုယ်ကြောက်ရတဲ့အရာနဲ့ ရှောင်ဖို့ ကြိုးစားတတ်တာ

၄။ ကိုယ်ကြောက်တဲ့အရာတစ်ခုကို မြင်တွေ့ခံစားပြီးတဲ့နောက်မှာ ပုံမှန်အတိုင်း အလုပ်မလုပ်နိုင်တော့တာ၊ စိတ်ခံစားချက် ပုံမှန်မဟုတ်တော့တာ

၅။ ကိုယ့်စိတ်ထဲမှာ ကြောက်နေတဲ့ ခံစားချက်ကို သိပေမယ့် ဘယ်လိုမှ ဖြေဖျောက်လို့ မရတာ

၆။ ကြောက်ရွံ့စိတ်ကြောင့် အသက်ရှူရခက်လာတာ၊ ချွေးစေးပြန်လာတာ

၇။ နှလုံးခုန်နှုန်း အလွန်မြန်လာတာ

၈။ တစ်ကိုယ်လုံး တုန်ပြီး ခြေဖျားလက်ဖျား အေးစက်လာတာ

၉။ ရင်ဘက်က အမောဖောက်လာတာ၊ အသက်ရှူမဝဖြစ်တာ

၁၀။ အသားထဲက ဆူးစူးနေသလို ခံစားရတာ

၁၁။ စိတ်ရှုပ်ထွေးမှုကြောင့် ဘယ်အရာကိုမှ အာရုံစိုက်ပြီး တွေးလို့ မရတော့တာ

၁၂။ ခေါင်းမူးခေါင်းကိုက်ြဖစ်တာ၊ ပျို့အန်ချင်လာတာ အစရှိတဲ့ လက္ခဏာတွေ တွေ့ရနိုင်ပါတယ်။

ဘယ်လိုအသက်အရွယ်မှာ အဖြစ်များလဲ။

အရွယ်ငယ်သေးတဲ့ ကလေးတွေ၊ ဆယ်ကျော်သက်တွေမှာ အဖြစ်များပြီး စိတ်တုန်လှုပ်ခြောက်ခြားစရာ ကိစ္စတစ်ခုခု၊ အသက်ဘေးအန္တရာယ် ကြုံတွေ့ရပြီးနောက်မှာ အကြောက်အလန့်လွန်တဲ့ စိတ်ဝေဒနာ ကျန်ခဲ့တာမျိုးတွေလည်း ရှိနိုင်ပါတယ်။

မိဘတွေမှာ အကြောက်အလန့်လွန်တဲ့ စိတ်ဝေဒနာရှိရင်လည်း ကလေးတွေဆီကို ဒီဝေဒနာ ကူးစက်နိုင်ပါတယ်။ အထူးသဖြင့် ကလေးရဲ့ စိတ်တွေဟာ အလွန်နူးညံ့သေးတာ ဖြစ်လို့ အကြောက်လွန်တဲ့ အရာကို မိဘတွေဘက်က သေချာမဖြေရှင်းပေးနိုင်ဘူးဆိုရင် ကြီးလာတဲ့အချိန်ထိ ဒီဝေဒနာကို သယ်ဆောင်သွားပြီး အခြေအနေပိုဆိုးသွားစေနိုင်ပါတယ်။

Phobia ကို ကုသလို့ ရနိုင်လား။

ကုသဖို့ လွယ်ကူတဲ့ စိတ်ကျန်းမာရေးအခြေအနေအဖြစ် သတ်မှတ်လို့ ရပါတယ်။ ကလေးအရွယ်မှာတော့ ကိုယ့်စိတ်ထဲက ကြောက်လန့်မှုကို အမူအရာတွေနဲ့သာ ဖော်ပြတတ်ပေမယ့် အသက်ကြီးလာတာနဲ့အမျှ ကြောက်လန့်တဲ့ လက္ခဏာတွေနဲ့ ဘာတွေကို ကြောက်လန့်တတ်လဲဆိုတာ အလွယ်တကူ သိမြင်နိုင်လို့ ကိုယ့်ရဲ့ ပြဿနာကို ဖြေရှင်းရပိုလွယ်ပါတယ်။ ပုံမှန်အားဖြင့် ဆေးသောက်ဖို့ မလိုအပ်ပဲ စိတ်ဆရာဝန် သို့မဟုတ် စိတ်ရောဂါကုထုံးပညာရှင်တွေနဲ့ တိုင်ပင်ပြီး Phobia စိတ်လက္ခဏာကို ကုသလို့ ရပါတယ်။

ဒီပြဿနာဟာ ရှောင်လွယ်ရုံနဲ့ ပြီးသွားမယ့် ကိစ္စမဟုတ်တဲ့အတွက် အကောင်းဆုံးကတော့ ကိုယ့်ရဲ့ ကြောက်ရွံ့မှုတွေကို ထိပ်တိုက်ရင်ဆိုင်ပြီး ဖြေရှင်းတာက ကိုယ့်ရဲ့ စိတ်ကျန်းမာရေးနဲ့ အနာဂတ်အတွက် အဆင်အပြေဆုံးပါပဲ။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပေးပါ။