သင့်ပတ်ဝန်းကျင်မှာ ယှဉ်ပြိုင်လိုစိတ် ပြင်းထန်သူတွေ၊ တော်တန်ရုံကို စိတ်မရှည်တတ်သူတွေကို တွေ့မိတဲ့အခါ အံ့သြကောင်း အံ့သြပါလိမ့်မယ်။ အများနဲ့ကွဲပြားနေတတ်တဲ့ ကိုယ်ရည်ကိုယ်သွေးကို သင်သတိထားကောင်းထားမိပါလိမ့်မယ်။ သူတို့ဟာ အမျိုးအစား A ကိုယ်ရည်ကိုယ်သွေး (Type A personality) ပိုင်ရှင်တွေ ဖြစ်နေနိုင်ပါတယ်။

သူတို့မှာဘယ်လိုအမူအကျင့်တွေရှိသလဲ ဆက်လက်လေ့လာကြည့်ရအောင်ပါ။

၁။ စိတ်ကြီးခြင်း

သူတို့ဟာ စိတ်ကြီးပါတယ်။ အောင်မြင်လိုစိတ်ကြီးမားပါတယ်။ မိမိကိုယ်ကိုရော ပတ်ဝန်းကျင်ကိုပါ မောင်းနှင်တတ်ပြီး မလိုမကျရင်လည်း ဆူပူကြိမ်းမောင်းဖို့ ဝန်မလေးပါဘူး။ ဒါပေမယ့် အဲဒီစိတ်ကြောင့်ပဲ အသီးအပွင့်တွေ ဖြစ်ထွန်းလာတတ်ပါတယ်။

၂။ ယှဉ်ပြိုင်တတ်ခြင်း

Type A ကိုယ်ရည်ကိုယ်သွေးပိုင်ရှင်များရဲ့ နေ့စဉ်ဘဝလမ်းညွှန်ချက်ဟာ ယှဉ်ပြိုင်နေဖို့ပါပဲ။ ဦးတည်ချက်တစ်ခုထားပြီး မရောက်ရောက်အောင် သွားတတ်ပါတယ်။ သူတပါးကို မယှဉ်ပြိုင်ရင်တောင် မိမိကိုယ်မိမိ တိုးတက်လာခြင်း ရှိ၊မရှိ ယှဉ်ပြိုင်နေတတ်သူတွေ ဖြစ်ပါတယ်။

၃။ ရည်မှန်းချက်ကြီးခြင်း

ဒီအချက်ဟာ သူတို့ကိုယ်ရည်ကိုယ်သွေးမှာ အခရာကျတဲ့ မောင်းနှင်အား ဖြစ်ပါတယ်။ သူတို့စိတ်မှာ ရည်မှန်းချက်တစ်ခုခုဝင်လာပြီးတာနဲ့ မရမနေ ကြိုးစားတတ်ပါတယ်။ မိမိဦးတည်ချက်ကိုပဲ အာရုံစိုက်လွန်းရင် နေ့စဉ်ဘဝမှာ ပျော်ရွှင်မှုတွေ ပျောက်ဆုံးနိုင်တာကို သတိချပ်ရပါမယ်။

၄။ စိတ်မရှည်ခြင်း

သူတို့ဟာ တစ်စုံတရာကို စောင့်ဆိုင်းနေဖို့ စိတ်မရှည်တတ်သူများ ဖြစ်ပါတယ်။ တက်ကြွပြီး ရှေ့ကိုသွားနေသူများပီပီ စောင့်ဆိုင်းနေမယ့်အစား ရှေ့ဆက်ဖို့သာ လောဆော်နေတတ်ပါတယ်။

၅။ အချိန်မလုံလောက်ခြင်း

တစ်နေ့မှာ ၂၄ နာရီရှိခြင်းဟာ သူတို့အတွက် မလုံလောက်ဘူးလို့ ခံယူထားသူများဖြစ်ပါတယ်။ လူတိုင်းကိုလည်း သူတို့လို ဖြစ်စေချင်ပါတယ်။ အချိန်ကို သူတို့စိတ်ကြိုက် မစီမံနိုင်တဲ့အခါ ရန်လိုခြင်း ဒေါသထွက်ခြင်းတွေ ဖြစ်လာနိုင်ပါတယ်။

၆။ အပြောအဆိုမြန်ခြင်း

Type A ကိုယ်ရည်ကိုယ်သွေးသမားတွေရဲ့ ခေါင်းထဲမှာ စကားတစ်ခွန်းကို ပြောလို့မပြီးသေးခင် နောက်စကားတစ်ခွန်းကို စဉ်းစားနေတတ်ပါတယ်။ ပြောချင်တာတွေလည်း များနေပြီး လိုက်နားထောင်ပေးသူအတွက်တောင် မောစရာပါ။

၇။ ပြီးပြည့်စုံခြင်းကိုလိုလားခြင်း

အနာအဆာကင်းတဲ့ ပြီးပြည့်စုံခြင်းကိုသာ လိုလားတာကြောင့် တစ်ခါတရံ ဇီဇာကြောင်သူများသဖွယ် ဖြစ်နေတတ်ပါတယ်။ ရှုံးနိမ့်မှုကို ကြောက်တတ်တာကြောင့်လည်း စိတ်ဖိစီးမှု ဖြစ်လွယ်ပါတယ်။

၈။ ရန်လိုတတ်ခြင်း

ပြိုင်ဆိုင်လိုစိတ်ပြင်းထန်လွန်း၊ အနာအဆာကင်းတာကိုပဲ မျှော်လင့်လွန်းတာကြောင့် တစ်ခါတရံရန်လိုခြင်းပါ တွဲပါလာတတ်ပါတယ်။ မိမိကိုယ်ကိုပါ အလိုမကျ ဒေါသထွက်လာတတ်ပါတယ်။

၉။ နိုးကြားဖျတ်လတ်စွာလုပ်ကိုင်ခြင်း

အဆိုပါကိုယ်ရည်ကိုယ်သွေးပိုင်ရှင်များဟာ လုပ်ငန်းခွင်ရဲ့အဆင့်တိုင်းမှာ နိုးကြားဖျတ်လတ်စွာ လုပ်ကိုင်တတ်ပါတယ်။ အသေးအဖွဲကိစ္စဆိုပြီး ပေါ့ပေါ့ဆဆထားခြင်းမျိုး မရှိပါဘူး။ လုပ်ငန်းခွင်ရဲ့ ဖန်တီးထုတ်လုပ်နိုင်စွမ်းကို တိုးတက်စေတာတော့ အမှန်ပါပဲ။

၁၀။ စွမ်းအင်ပြည့်ဝခြင်း

စွမ်းအင်အပြည့်နဲ့ စိတ်ခေါ်မှုတိုင်းကို ရင်ဆိုင်လုပ်ကိုင်တတ်ခြင်းဟာ Type A ကိုယ်ရည်ကိုယ်သွေးသမားတွေရဲ့ လက္ခဏာဖြစ်ပါတယ်။ မိမိရဲ့ကိုယ်ပိုင်မောင်းနှင်အားနဲ့ မနားမနေ လုပ်ကိုင်တတ်လို့ သူတို့ကို တော်ရုံစိတ်ဓါတ်နဲ့ အမီလိုက်ဖို့ မလွယ်ပါဘူး။

ခြုံကြည့်ရရင် Type A ကိုယ်ရည်ကိုယ်သွေးသမားများဟာ လုပ်ငန်းခွင်တစ်ခုရဲ့ မောင်းနှင်အားအတွက် အခရာကျသူတွေပဲ ဖြစ်ပါတယ်။ အရာရာကို လွှမ်းမိုးဦးဆောင်လိုတဲ့၊ ယှဉ်ပြိုင်လိုစိတ်ပြင်းထန်တဲ့ ကိုယ်ရည်ကိုယ်သွေးပိုင်ရှင်များနဲ့ ပေါင်းသင်းဆက်ဆံရာမှာ သူတို့ရဲ့ အမူအကျင့်များကို နားလည်သိရှိထားရင် မိမိဟာ ဘယ်လိုကိုယ်ရည်ကိုယ်သွေးပိုင်ရှင်ဖြစ်စေ အဆင်ပြေချောမွေ့စွာ လက်တွဲလုပ်ကိုင်နိုင်မှာ ဖြစ်ပါတယ်။

Type A ကိုယ်ရည်ကိုယ်သွေးပိုင်ရှင်များအနေနဲ့လည်း မိမိရဲ့ အမူအကျင့်ဟာ ပတ်ဝန်းကျင်အပေါ် ဘယ်လိုသက်ရောက်သလဲ၊ မိမိရဲ့ စိတ်ပိုင်းရုပ်ပိုင်းကျန်းမာရေးကို ဘယ်လိုသက်ရောက်မှုရှိသလဲဆိုတာ သတိပြုသင့်ပါတယ်။

Hello Health Groupသည် ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။