အအေးမိဖျားနာခြင်းကြောင့် ဖြစ်နိုင်တဲ့ နောက်ဆက်တွဲဆိုးကျိုးများ

ရေးသားသူ ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

ချောင်းတွေဆိုးပြီး လည်ချောင်းကလည်းနာ နှာရည်တွေလည်းယိုတဲ့အခြေအနေမျိုးများဖြစ်နေပြီလား။ ဒါဆိုရင်တော့ ဖျားနေပြီလို့ပြောပါရစေ။ တစ်ပတ်လောက်ကြာတဲ့အထိ နှာလေးတရှုတ်ရှုတ်က မပျောက်ဘဲဖြစ်နေရင်တော့ အအေးမိဖျားနာတဲ့အခြေအနေက ပိုဆိုးလာတဲ့သဘောပါ။

သာမန် အအေးမိဖျားနာတာဆေးသောက်စရာမလို ၊ဆေးခန်းပြစရာမလိုဘဲ အိမ်တွင်းကုထုံးလေးတွေလုပ်ပေးရုံနဲ့သက်သာသွားနိုင်ပေမယ့် အခန့်မသင့်တဲ့အခါမျိုးမှာတော့ပြင်းထန်တဲ့နောက်ဆက်တွဲဝေဒနာတွေခံစားရတာမျိုးဖြစ်နိုင်ပါတယ်။ ကလေးငယ်လေးတွေ၊ သက်ကြီးရွယ်အိုတွေနဲ့ ကိုယ်ခံအားစနစ် အားနည်းတဲ့သူတွေမှာ အအေးမိဖျားနာတာကြောင့်နောက်ဆက်တွဲဝေဒနာတွေအဖြစ်များပါတယ်။

တကယ်လို့သင့်အနေနဲ့ အအေးမိဖျားနာဝေဒနာက ၁၀ ရက်ကျော်တဲ့အထိမသက်သာဘူးဆိုရင်တော့ အခြေအနေကပိုဆိုးလာဖို့ပဲရှိတယ်ဆိုတာ သိထားဖို့လိုပါမယ်။ ဒီအခြေအနေကနောက်ဆက်တွဲဝေဒနာတွေကိုဖြစ်စေနိုင်မယ့်အခြေအနေတစ်ရပ်ပါ။ ဆရာဝန်နဲ့ပြသပြီး သင့်တော်တဲ့ ကုသမှုခံယူသင့်ပါတယ်။

ဒီလက္ခဏာတွေရှိနေပြီဆိုရင် အအေးမိဖျားနာနေပါပြီ

အအေးမိဖျားနာတဲ့လက္ခဏာကိုတော့တော်ေ်တာ်များများကကောင်းကောင်းသိထားပြီးပါပြီ။ အအေးမိဖျားနာတဲ့လက္ခဏာဆိုတာက ခန္ဓါကိုယ်က အအေးမိတာကိုဖြစ်စေတဲ့ ဗိုင်းရပ်စ်ကိုတိုက်ထုတ်တာကြောင့်ဖြစ်လာတဲ့လက္ခဏာပါ။ အအေးမိဖျားနာရင် ဘာလက္ခဏာတွေဖြစ်နိုင်မလဲ –

  • လည်ပင်းထဲမှာခြောက်ကပ်ကပ်ဖြစ်မယ်
  • လည်ချောင်းနာမယ်
  • ချောင်းဆိုးမယ်
  • ကိုယ်အပူချိန်တက်မယ်
  • နှာစေးမယ်
  • အသံဝင်မယ်
  • နှာခေါင်းပိတ်မယ်
  • ခေါင်းကိုက်မယ်
  • ကြွက်သားတွေနာကျင်မယ်
  • မျက်လုံးတွေနီမယ်
  • အားအင်တွေမရှိသလိုဖြစ်ပြီးခြေကုန်လက်ပန်းကျမယ်
  • အစားစားချင်စိတ်နည်းလာမယ်

ကိုယ်ခံအားစနစ်က လူတစ်ယောက်နဲ့တစ်ယောက်နဲ့မှာမတူတာကြောင့် အအေးမိတာကိုဖြစ်စေတဲ့ ဗိုင်းရပ်စ်ကို တုံ့ပြန်ပုံခြင်းကလည်း မတူနိုင်ပါဘူး။

ဘယ်သူတွေမှာပိုဖြစ်နိုင်မလဲ။

လူတိုင်းဖျားနာတတ်တယ်ဆိုပေမယ့် အလွယ်တကူကို မကြာခဏ ဖျားနာတတ်တဲ့သူတွေလည်းရှိပါတယ်။

  • အသက် ၆ နှစ်အောက်ကလေးငယ်တွေ
  • သက်ကြီးရွယ်အိုတွေ
  • ကိုယ်ခံအားနည်းတဲ့သူတွေ
  • ဆေးလိပ်သောက်တတ်သူတွေပါ။

အအေးမိဖျားနာတာကြောင့်ဖြစ်လာနိုင်တဲ့နောက်ဆက်တွဲဝေဒနာတွေက

အအေးမိဖျားနာတာကြောင့်ရောဂါပိုးကူးစက်ခံရတဲ့အခါနောက်ဆက်တွဲဆိုးရွားတဲ့ရောဂါတွေဖြစ်လာနိုင်ပါတယ်။

အဆုတ်ရောင်ရောဂါ

အအေးမိတာရှည်လာတဲ့အခါ အဆုတ်တွေထဲကလေအိတ်လေးတွေထဲမှာ အရည်တွေပြည့်လာတာကြောင့်ရောင်ရမ်းတာတွေဖြစ်လာနိုင်ပါတယ်။ အဆုတ်ရောင်ရောဂါက ဘက်တီးရီးယားတွေ နဲ့ ဗိုင်းရပ်စ်တွေကြောင့်ဖြစ်တာပါ။ သာမန်အအေးမိဖျားနာဖြစ်စေနိုင်တဲ့ရောဂါပိုးက အဆုတ်ရောင်ရောဂါကိုမဖြစ်စေနိုင်ပါဘူး။

တကယ်လို့ အအေးမိဖျားနာတာရဲ့နောက်ဆက်တွဲဝေဒနာအနေနဲ့ အဆုတ်ရောင်ရောဂါဖြစ်လာပြီဆိုရင်တော့ ဘက်တီးရီးယားတွေကြောင့်ဖြစ်တာသေချာသလောက်ရှိတဲ့အတွက် ဆရာဝန်နဲ့ပြသပြီး ပဋိဇီဝဆေးတစ်ခုခုသောက်သုံးဖို့လိုအပ်ပါမယ်။ရောဂါလက္ခဏာတွေအနေနဲ့ကတော့ –

  • ရင်ဘတ်အောင့်တာ
  • ချောင်းဆိုးတာ
  • အဖျားတက်တာ နဲ့
  • အသက်ရှုရခက်တာတွေဖြစ်နိုင်ပါတယ်။

နားတွင်းပိုးဝင်ကူးစက်ခြင်း

အဖျားကြောင့် နားစည်အနောက်ဘက်ပိုင်းမှာ အရည်တွေစုတာနဲ့ နှာခေါင်းပိတ်တာတွေဖြစ်နိုင်ပါတယ်။ ဘက်တီးရီးယား ဒါမှမဟုတ် အအေးမိဖျားနာဝေဒနာကိုဖြစ်စေနိုင်တဲ့ ဗိုင်းရပ်စ်တွေက နားစည်နောက်ပိုင်းကနေရာထဲကို ဝင်ရောက်သွားတဲ့အခါမှာတော့ပြင်းထန်တဲ့ နားတွင်းပိုးဝင်ကူးစက်မှုကိုဖြစ်စေနိုင်ပါတယ်။ ဒီလိုဖြစ်တဲ့အခါ မခံမရပ်နိုင်အောင် နားကိုက်တာမျိုးဖြစ်နိုင်ပါတယ်။ ကလေးငယ်လေးတွေမှာတော့ အအေးမိဖျားနာမှုရဲ့နောက်ဆက်တွဲအနေနဲ့ နားတွင်းပိုးဝင်ကူးစက်တာကိုမကြာခဏခံစားရလေ့ရှိပါတယ်။

ပန်းနာရင်ကျပ်ဖြစ်စေနိုင်တယ်

အအေးမိတာက ပန်းနာရင်ကျပ်ဝေဒနာကိုအဖြစ်စေနိုင်ဆုံးသော အရင်းခံတွေထဲကတစ်ခုပါ။ များသောအားဖြင့်ကလေးငယ်တွေမှာ အအေးမိတဲ့အခါ ပန်းနာရင်ကျပ်ဖြစ်နိုင်ခြေက လူကြီးတွေထက်ပိုများပါတယ်။ ပန်းနာရင်ကျပ်ရှိသူတွေက အခြားသူတွေထက် အဖျားတာရှည်တတ်ပါတယ်။ ရာသီဥတုအေးတဲ့အခါတွေမှာ ပန်းနာရင်ကျပ်ဝေဒနာက ပိုဆိုးလာနိုင်ပါတယ်။ ပန်းနာရင်ကျပ်ဝေဒနာခံစားရတဲ့အခါကောင်းကောင်းအနားယူပြီးရေများများသောက်ဖို့လိုအပ်ပါမယ်။

လည်ချောင်းနာခြင်း

အအေးမိဖျားနာသူတွေမှာ လည်ချောင်းနာတာက အတူတွဲဖြစ်လေ့ရှိသလို နောက်ဆက်တွဲရောဂါတစ်ခုအနေနဲ့လည်း ဖြစ်လေ့ရှိပါတယ်။ လည်ချောင်းနာဝေဒနာက အသက် ၅နှစ်ကနေ ၁၅ နှစ်အရွယ်ကြားကလေးတွေမှာ အဖြစ်များသလို အရွယ်ရောက်ပြီးသူတွေမှာလည်းတော်တော်လေးဖြစ်တတ်ပါတယ်။

အအေးမိပြီးနောက်မှာဖြစ်တတ်တဲ့ လည်ချောင်းနာတာကstreptococcal ဘက်တီးရီးယားကြောင့်ဖြစ်တာပါ။ရောဂါပိုးရှိတဲ့သူနဲ့ရောပိုးတွေရှိနေတဲ့နေရာတွေကို ထိတွေ့မိတာကြောင့်ဖြစ်နိုင်သလိုရောဂါပိုးကူးစက်နေသူရဲ့ချောင်းဆိုးတာနဲ့နှာချေတာမှာပါလာတဲ့အမှုန်တွေနဲ့ထိတွေ့မိတာ၊ရောဂါပိုးကူးစက်ခံထားရသူနဲ့ အသုံးအဆောင်တွေအတူတူသုံးမိတာကြောင့်လည်းဖြစ်နိုင်ပါတယ်။

လေပြွန်ရောင်ရမ်းခြင်း

ဒီဝေဒနာက အဆုတ်အတွင်းကလေပြွန်လေးတွေရဲ့ အတွင်းပိုင်းအမြှေးပါးလေးတွေရောင်ရမ်းတာကြောင့်ဖြစ်ရတာပါ။ လက္ခဏာတွေအနေနဲ့ကတော့ –

  • ချောင်းဆိုးမယ် (ချွဲထွက်တဲ့အခါလည်းရှိမယ်)
  • ရင်ဘတ်ထဲမှာ ကျပ်နေမယ်
  • ခြေလက်တွေမသယ်ချင်ဖြစ်မယ်
  • အဖျားရှိနေမယ်

ဒီလိုလက္ခဏာတွေရှိနေရင်တော့လေပြွန်ရောင်ရမ်းတာဖြစ်နိုင်ပါတယ်။

ဘယ်လိုအခြေအနေမျိုးမှာ ဆရာဝန်နဲ့ပြသဖို့လိုမှာလဲ

အခုလိုလက္ခဏာတွေဖြစ်နေပြီဆိုရင်တော့ အအေးမိတာရဲ့နောက်ဆက်တွဲဆိုးကျိုးတွေဖြစ်နေပြီလို့ ယူဆနိုင်တဲ့အတွက် ဆေးကုသမှုခံယူဖို့လိုအပ်ပါမယ်။

  • နားကိုက်မယ်
  • တစ်ပတ်ကျော်တဲ့အထိ မျက်လုံးနဲ့နှာခေါင်းတဝိုက်က နာကျင်နေမယ်
  • အဖျားက ၃၈ ဒီဂရီဆဲစီးယက်စ်အထက်ဖြစ်နေမယ်
  • ချောင်းဆိုးတဲ့အခါသွေးပါနေမယ်
  • အသက်ရှုတာပြတ်တောင်းပြတ်တောင်းဖြစ်နေမယ်။ အသက်ရှူမဝဖြစ်နေမယ်။
  • လက်ရှိခံစားနေရတဲ့ဝေဒနာတွေပိုပြီးဆိုးလာမယ်။
  • ၃ ပတ်ကြာတဲ့အထိ မသက်သာ မပျောက်ကင်းဖြစ်နေမယ်။

ဒီလိုဝေဒနာတွေမခံစားရချင်ဘူးဆိုရင်တော့ အအေးမိဖျားနာဖြစ်တဲ့အချိန်မှာ လိုအပ်တဲ့ဆေးဝါးသောက်သုံးမှုတွေ၊ ကုသမှုတွေနဲ့ အနားယူမှုတွေလုပ်ဖို့လိုမှာပါ။ အအေးမိဖျားနာတာက လူတိုင်းလိုလိုဖြစ်နိုင်တဲ့ဝေဒနာဖြစ်တာကြောင့် အိမ်တိုင်းမှာ သာမန်ဖျားနာတာကို သက်သာစေဖို့အတွက် အသုံးပြုလို့ရတဲ့ဆေးဝါးတွေကိုဆောင်ထားသင့်ပါတယ်။ သာမန်ဖျားနာတာကနေနောက်ဆက်တွဲဝေဒနာတွေမဖြစ်စေဖို့အတွက်ဆိုရင် Betadine COLD DEFENCE Nasal Spray ကိုလည်းအသုံးပြုလို့ရပါတယ်။ ဒီဆေးက အအေးမိတာနဲ့တုပ်ကွေးဝေဒနာတွေကိုဖြစ်စေနိုင်တဲ့ ဗိုင်းရပ်တွေကို ၉၉ ရာခိုင်နှုန်းအထိတိုက်ဖျက်ပေးနိုင်ပြီး အအေးမိတာကို အမြန်ဆုံးသက်သာစေနိုင်တာကြောင့် အအေးမိဖျားနာတာကြောင့်ဖြစ်တဲ့ နောက်ဆက်တွဲဝေဒနာတွေကို ကာကွယ်ပြီးသားဖြစ်စေမှာပါ။

အအေးမိဖျားနာတာနဲ့နောက်ဆက်တွဲဝေဒနာတွေကို ကာကွယ်ပါ

အအေးမိဖျားနာကင်းချင်ရင်လိုက်နာရမယ့်အချက်တွေက –

  • လက်ဆေးပါ။ အအေးမိတာကိုဖြစ်စေနိုင်တဲ့ရောဂါပိုးတွေပြန့်နှံ့မှုကို နည်းစေပါတယ်၊
  • ဖျားနေတဲ့သူနဲ့ နီးနီးကပ်ကပ်နေတာမျိုးမလုပ်ပါနဲ့၊ပွေ့ဖက်တာ၊ လက်ဆွဲနှုတ်ဆက်တာမျိုးပါ၊
  • ဗီတာမင် C ပါတဲ့ အသီးအနှံတွေနဲ့ သစ်သီးတွေများများစားသုံးပေးပါ၊
  • ချောင်းဆိုး၊နှာချေတဲ့အခါ လက်ကိုင်ပဝါနဲ့ အုပ်ထားပါ၊
  • နေအိမ်ပတ်ဝန်းကျင်ကို သန့်ရှင်းအောင်ထားပါ၊
  • မျက်နှာ၊နှာခေါင်း၊ပါးစပ်တွေကို လက်နဲ့ ခဏခဏမကိုင်ပါနဲ့၊
  • ရေများများသောက်ပါ၊
  • ဇင့်ဓါတ်ပါတဲ့ အစားအစာတွေစားသုံးပါ၊
  • တစ်ကိုယ်ရေသန့်ရှင်းမှုကို ဂရုစိုက်ပါ။

တကယ်လို့ ဖြစ်လာတဲ့အချိန်မှာလည်း အအေးမိဖျားနာကြောင့်နောက်ဆက်တွဲဝေဒနာတွေမဖြစ်စေဖို့အတွက် ပရမ်းပတာနေထိုင်ပြီး အဖျားမမွေးဘဲ ထိရောက်တဲ့ ကုသစောင့်ရှောက်မှုတွေကို ခံယူကြဖို့တိုက်တွန်းလိုက်ပါရစေ။

Hello Health Group သည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။

Share now :

တည်းဖြတ်သည့်နေ့ ဧပြီ 20, 2018 | နောက်ဆုံးတည်းဖြတ်ခြင်း နိုဝင်ဘာ 14, 2019

သင်ဒါလည်း နှစ်သက်နိုင်ပါတယ်။