အမျိုးသားတွေဟာ အသက်ကြီးလာတာနဲ့အမျှ ဆီးကျိတ် နဲ့ ပတ်သက်တဲ့ ပြဿနာတွေ ဖြစ်နိုင်ခြေများလာလေ့ရှိပါတယ်။ ဆီးကျိတ်ရောင်တာက စလို့ ဆီးကျိတ်ကင်ဆာအထိ အမျိုးမျိုးဖြစ်နိုင်ပါတယ်။ ဆီးကျိတ်ရောဂါလက္ခဏာတွေကို သိရှိဖို့နဲ့ ဆီးကျိတ် ကျန်းမာရေး ကောင်းစေဖို့ နေထိုင်စားသောက်နည်းတွေကို သိထားသင့်ပါတယ်။
အဖြစ်များတဲ့ ဆီးကျိတ်ရောဂါများ
ဆီးကျိတ်ရောင်ရမ်းတာက ဘယ်အရွယ်မှာမဆို ဖြစ်နိုင်ပေမယ့် ငယ်ရွယ်တဲ့အမျိုးသားတွေ (၃၀-၅၀ကြား)တွေမှာ ပိုဖြစ်တတ်ပါတယ်။ ဆီးကျိတ်ရောင်ခြင်းမှာ
-ဘက်တီးရီးယားကြောင့် ရောင်ရမ်းခြင်းနဲ့
-ဘက်တီးရီးယားကြောင့် မဟုတ်ဘဲ တခြားအကြောင်းအရင်းကြောင့် ရောင်ရမ်းခြင်း ဆိုပြီး ၂မျိုးရှိပါတယ်။
လက္ခဏာအနေနဲ့
-ခဏခဏ ဆီးသွားချင်တာ
-ဆီးကျန်တာ
-ချမ်းတုန်ဖျားတာ
–ဆီးပူဆီးကျဉ်တာတွေ ဖြစ်တတ်ပါတယ်။
ကင်ဆာမဟုတ်တဲ့ ရိုးရိုးဆီးကျိတ်ကြီးခြင်းက အသက်ကြီးလေ ဖြစ်နိုင်ခြေ များလေလေပါ။ အသက် ၅၀ဝန်းကျင်ဆို အမျိုးသား၂ယောက်မှာ ၁ယောက် ဖြစ်နိုင်ခြေရှိပါတယ်။ အသက် ၆၀ကျော်လာရင်တော့ ဖြစ်နိုင်ခြေက ၇၅% ထိတက်လာပါတယ်။
လက္ခဏာအနေနဲ့
-ဆီးသွားရခက်တာ
-ဆီးညှစ်ပေါက်ရတာ
-ဆီးလုံးသေးတာ
–ဆီးမထိန်းနိုင်တာ
-ခဏခဏ ဆီးသွားချင်တာ
-ဆီးကျန်ပြီး တစ်စက်စက်နဲ့ ကျနေတာတွေ ဖြစ်နိုင်ပါတယ်။
အမျိုးသားတွေ အဖြစ်အများဆုံးကင်ဆာတွေထဲမှာ ဒုတိယနေရာမှာ ရှိနေပါတယ်။ ဆီးကျိတ် ကင်ဆာက အပြန့်နှေးတဲ့အတွက် စောစောသာသိမယ်ဆိုရင် ထိထိရောက်ရောက် ကုသနိုင်မှာပါ။ ဒါပေမယ့် အများစုက လက္ခဏာမပြတာကြောင့် အစောပိုင်း အဆင့်ကို လွတ်သွားတတ်ပါတယ်။ ဒါကြောင့် ပုံမှန်ဆေးစစ်ဖို့ လိုပါတယ်။
ဆီးကျိတ်ကင်ဆာရဲ့ လက္ခဏာတွေကတော့
-ဆီးစသွားဖို့ ခက်တာ
-ခဏခဏ ဆီးသွားချင်တာ (အထူးသဖြင့် ညဘက်တွေမှာ)
-ဆီးမသွားနိုင်တာ
-ဆီးလုံးသေးပြီး ဆီးအားပျော့တာ
–သုက်လွှတ်ရင် နာတာ
-ဆီး ဒါမှမဟုတ် သုက်ရည်မှာ သွေးပါလာတာ
-ခါးနဲ့ ပေါင်တွေ ကိုက်ခဲတာတွေ ဖြစ်တတ်ပါတယ်။
ဆီးကျိတ် ကျန်းမာရေး ကောင်းနေစေဖို့
အဝလွန်တာက ဆီးကျိတ်ကင်ဆာအပါအဝင် တခြားဆီးကျိတ်ရောဂါတွေကိုပါ ဖြစ်စေနိုင်ပါတယ်။ အစားအသောက်ထိန်းစားတာ၊ လေ့ကျင့်ခန်း လုပ်တာတွေနဲ့ ကိုယ်အလေးချိန် ထိန်းထားနိုင်ပါတယ်။
အသီးအရွက်များများစားပါ။ အထူးသဖြင့် အစိမ်းရောင် အရွက်ဖားဖားတွေက ဆီးကျိတ် ကျန်းမာရေး အတွက် သင့်တော်ပါတယ်။ အသီးအရွက်တွေမှာပါတဲ့ ဗီတာမင်နဲ့ ဓာတ်တိုးဆန့်ကျင်သတ္တိတွေက ဆီးကျိတ်ကို ကျန်းမာစေပါတယ်။
အနီရောင် အသား (အထူးသဖြင့် ကင်စားတာ) အစားများတဲ့အခါ PhIP ဆိုတဲ့ ဓာတ်ပစ္စည်း ထွက်လာပါတယ်။ ဒါက ဆီးကျိတ်ကင်ဆာဖြစ်နိုင်ခြေကို များစေပါတယ်။
အထူးသဖြင့် ဆီးကျိတ်ကင်ဆာကို ပုံမှန်စစ်ဆေးသင့်ပါတယ်။ သာမန် အမျိုးသားတွေဆိုရင်တော့ အသက် ၄၀ကျော်တာနဲ့ တစ်နှစ်တစ်ခါလောက် ဆီးကျိတ်ကင်ဆာ ရှိမရှိကို စစ်ဆေးသင့်ပါတယ်။ မိသားစုထဲမှာ ဆီးကျိတ်ကင်ဆာမျိုးရိုးရှိရင်တော့ အသက် ၃၅နှစ်လောက်တည်းက စပြီး စစ်ဆေးသင့်ပါတယ်။
ကိုယ်လက်လှုပ်ရှားမှုတွေက ဆီးကျိတ်အပါအဝင် ခန္ဓာကိုယ်တစ်ခုလုံးကို ကျန်းမာစေပါတယ်။ တစ်နေ့ကို မိနစ်၃၀လောက် ခပ်မြန်မြန်လမ်းလျှောက်ပေးတာကတောင် အကျိုးရှိစေပါတယ်။
ရေများများသောက် ရှူးများများပေါက်တာကလည်း ဆီးကျိတ် ကို ကျန်းမာစေပါတယ်။ တစ်နေ့ကို အနည်းဆုံး ၈ဖန်ခွက် ဝင်အောင်သောက်ပါ။
စိတ်ဖိစီးမှုက ဆိးကျိတ်ကို တိုက်ရိုက်ထိခိုက်စေတာတော့ မဟုတ်ပေမယ့် ရေရှည်မှာ ကိုယ်ခံအားကျတာ၊ ဟော်မုန်းအပြောင်းအလဲဖြစ်တာ၊ ရောဂါပိုးတွေ ဝင်လွယ်တာကို ဖြစ်စေပါတယ်။ အသက်ရှူလေ့ကျင့်ခန်းတွေ၊ တရားထိုင်တာတွေက စိတ်ဖိစီးမှုကို လျှော့ချဖို့ အကောင်းဆုံး နည်းလမ်းတွေပဲ ဖြစ်ပါတယ်။
ဆေးလိပ်က အမျိုးသားတွေကို သေစေနိုင်လောက်တဲ့ ရောဂါတွေကို ဖြစ်စေပါတယ်။ ဆေးလိပ်ကထွက်တဲ့ ကာဗွန်မိုနောက်ဆိုဒ်က သွေးနီဥကို တွယ်ကပ်ပြီး ခန္ဓာကိုယ်တစ်ခုလုံးကို ရောက်သွားပါတယ်။ ရောက်တဲ့နေရာက ဆဲလ်တွေကို သေစေပါတယ်။ ဒီလိုနဲ့ ဆီးကျိတ်ကင်ဆာဖြစ်နိုင်ခြေကို မြင့်စေပါတယ်။
Takeaways
ဆီးကျိတ်ရောဂါတွေက ဆီးလမ်းကြောင်း လက္ခဏာတွေပြပြီး လာတတ်ပါတယ်။ အဖြစ်များတဲ့ ဆီးကျိတ်ရောဂါ ၃ခုရှိပြီး ၃ခုကလည်း လက္ခဏာလေးတွေ ဆင်တူပါတယ်။ ဆီးကျိတ်က အမျိုးသားတွေမှာ တစ်ချိန်မဟုတ် တစ်ချိန် ဒုက္ခပေးနိုင်တာကြောင့် ဆီးကျိတ် ကျန်းမာရေး ကောင်းနေဖို့ ဆောင်ရန် ရှောင်ရန်တွေကို လိုက်နာသင့်ပါတယ်။
