ကလေးကို ၂ နှစ်ကျော်တဲ့အထိနို့ဗူးတိုက်နေလား

ကလေးကို ၂ နှစ်ကျော်တဲ့အထိနို့ဗူးတိုက်နေလား ….. ကလေးတွေက အရွယ်ရောက်လာတာနဲ့အမျှ အာဟာရလိုအပ်ချက်ကလည်း များလာပါတယ်။ ဒီအာဟာရလိုအပ်ချက်ကိုပြည့်မီအောင်ဖြည့်တင်းဖို့ မိခင်နို့အပြင် နို့ဗူးတိုက်တာကိုပါမေမေတို့ လုပ်ပေးလေ့ရှိကြပါတယ်။ ဒီကနေမှ ၆ လပြည့်ပြီဆိုရင် အစားစကျွေးပါပြီ။

ဒီအချိန်မှာလည်း အစာကို ကျင့်စမို့ နို့ဗူးလေးနဲ့ မေမေ့နို့တို့ကို လိုအပ်သလိုကူနေရဆဲပေါ့။ ဒီလိုကနေ အချိန်ကြာလာတော့ ကလေးကို သနားတာရော လိုအပ်တဲ့အာဟာရပြည့်စေချင်တဲ့စေတနာရောပေါင်းပြီး ကလေးကို အရွယ်တော်တော်ရောက်တဲ့အထိ နို့ဗူးကိုပါဖြည့်စွက်စာနဲ့ တွဲလို့တိုက်မိနေနိုင်ပါတယ်။

တကယ်တော့ ကလေးတစ်ယောက်ကို အသက် ၂ နှစ်အထိပဲ နို့ဗူးတိုက်သင့်တာပါ။ ဒီထက်ကျော်ပြီး နို့ဗူးတိုက်နေမယ်ဆိုရင် ကလေးက အာဟာရပြည့်ဖို့ထက် ကျန်းမာရေးအတွက် ထိခိုက်တာမျိုးဖြစ်လာနိုင်ပါတယ်။

ကလေးကို ၂ နှစ်ကျော်တဲ့အထိနို့ဗူးတိုက်နေလား

ကလေးကို ၂ နှစ်ကျော်တဲ့အထိနို့ဗူးတိုက်နေလား …… ကလေးကို အဆင်ပြေပါစေတော့ဆိုပြီး သူကြိုက်တဲ့အရာတစ်ခုဖြစ်တဲ့ နို့ဗူးတိုက်တာကို အသက်တော်တော်လေးရလာတဲ့အထိ ဆက်လုပ်ပေးမိနေမယ်ဆိုရင်ရေရှည်မှာ ကလေးအတွက် မကောင်းပါဘူး။

ကလေးလေးတွေက အသက် ၂ နှစ်လောက်ရောက်လာပြီဆိုရင် အစားအသောက်တွေကိုကောင်းကောင်းစားနိုင်ပြီဖြစ်တာကြောင့် လိုအပ်တဲ့အာဟာရတွေကိုနေ့စဉ်စားသုံးမှုကနေတဆင့်ရရှိနေမှာပါ။ ဒီအချိန်မှာ မိခင်နို့ကိုအနည်းအကျဉ်းလောက်တိုက်ပေးရင်တောင် အဆင်ပြေပြီမို့ နို့ဗူးတိုက်ဖို့ဆိုတာ တကယ်ကို မလိုတော့ပါဘူး။

အဝလွန်မယ်

လေ့လာမှုတွေအရ ကလေးတစ်ယောက်ကို အသက် ၂ နှစ်ကျော်တဲ့အထိ နို့ဗူးတိုက်နေဦးမယ်ဆိုရင် ကလေးက အသက် ၅ နှစ်လောက်ရောက်လာတဲ့အခါ အဝလွန် တာကိုခံစားရနိုင်ပါတယ်။

နို့ဗူးသောက်တာနဲ့ ကလေးအဝလွန်တာက တိုက်ရိုက် ဆက်စပ်နေတာတော့မဟုတ်ပေမယ့် နို့ဗူးသောက်တဲ့ကလေးတွေမှာ အဝလွန်ဖြစ်နိုင်ခြေက သာမန်ထက်ပိုများနေတယ်လို့တော့တွေ့ခဲ့ရပါတယ်။

ကလေးက တစ်နှစ်လောက်ရောက်လာပြီဆိုရင် နို့ဗူးတိုက်တာကိုဖြတ်ဖို့ စလုပ်သင့်ပါပြီ။ ဒီလိုမှပဲ ကလေးက မူကြိုတက်တဲ့အရွယ်မှာ အဝလွန်တာမျိုးတွေဖြစ်တာကနေ ကာကွယ်နိုင်မှာပါ။

သုတေသနပြုတဲ့ရလဒ်အရ အသက် ၂ နှစ်ရောက်တဲ့အထိ နို့ဗူးစို့တဲ့ကလေးလေးတွေ ၅ယောက်မှာ ၁ယောက်က အသက် ၅ နှစ်လောက်ရောက်လာတဲ့အခါ အဝလွန်တတ်ကြတယ်၊လို့တွေ့ရှိခဲ့ရပါတယ်။

ကာလရှည်ကြာနို့ဗူးစို့တဲ့ကလေးလေးတွေက အခြားကလေးလေးတွေထက်စာရင် အဝလွန်ပြဿနာကို ခံစားရနိုင်ခြေ ၃၃ ရာခိုင်နှုန်းပိုများနေတယ်၊လို့တွေ့ရှိခဲ့ရပါတယ်။

သွားတွေထိခိုက်ပျက်စီးမယ်

ကာလရှည်ကြာနို့ဗူးတိုက်တာက ကလေးရဲ့ သွားနဲ့ခံတွင်းကျန်းမာရေးကို တော်တော်လေးထိခိုက်စေနိုင်ပါတယ်။ ကလေးကအိပ်နေရင်းနဲ့နို့ဗူးသောက်တဲ့အခါ နို့မှုန့်မှာပါတဲ့ အချိုဓါတ်တွေနဲ့သွားတွေက ကာလရှည်ကြာထိတွေ့မှုကြောင့် သွားပိုးစားတာမျိုးတွေဖြစ်လာနိုင်ပါတယ်။ သွားပိုးစားတာက ကလေးတွေမှာတွေ့ရတတ်တယ်ဆိုပေမယ့် ငယ်စဉ်ကတည်းကသွားတွေကိုသေချာဂရုစိုက်ပေးဖို့တော့လိုပါမယ်။ သွားပိုးစားတာကြောင့် ကလေးရဲ့ စားသုံးမှုမှာ အဟန့်အတားဖြစ်တာမျိုးတွေကြုံရနိုင်ပါတယ်။

ကြီးထွားမှုမှာထိခိုက်လာနိုင်တယ်

ကလေးက အစားစားရမယ့် အစား နို့ဗူးပဲ သောက်နေမယ် ဆိုရင် ကာလရှည်ကြာလာတဲ့အခါ ကြီးထွားမှုပိုင်းမှာ ထိခိုက်တာတွေ ဖြစ်လာနိုင်ပါတယ်။ နို့မှုန့်က အာဟာရတွေ ပါဝင်နေတယ် ဆိုပေမယ့် အစားစားရမယ့် အရွယ်မှာ လိုအပ်တဲ့ အာဟာရတွေ အကုန်လုံးကိုတော့ မဖြည့်တင်းပေးနိုင်ပါဘူး။

ဒီတော့ ကလေးက တစ်ချိန်လုံး နို့ဗူးပဲ စို့မယ် အာဟာရ ပြည့်စေမယ့် Solid foodတွေကို မစားဘူးဆိုရင် ရေရှည်မှာ အာဟာရချို့တဲ့ပြီး ကြီးထွားမှု နှေးလာမှာပါ။

နို့ဗူ းတိုက်တာက ကလေးတွေအတွက်လုံးဝ မလိုအပ်ဘူးလို့ မဆိုနိုင်ပေမယ့် အရွယ်တော်တော်ရောက်တဲ့အထိ ကလေးကို အလိုလိုက်ပြီး တိုက်မိနေမယ်ဆိုရင်တော့ ကလေးမှာ ကောင်းကျိုးမရှိဘဲ ကျန်းမာရေးပြဿနာတွေပဲ ဖြစ်လာနိုင်ပါတယ်။

ဒါကြောင့် အကောင်းဆုံး ကတော့ ကလေး အသက်တစ်နှစ်လောက် ရောက်လာပြီဆိုရင် နို့ဗူးဖြတ်ပါ။