ကလေးနို့ဖြတ်ချိန်မှာ သတိထားသင့်တဲ့အချက်များ

ဒါပေမယ့် နို့ချိုအာဟာရနဲ့ပဲ အမြဲအားဖြည့်လာခဲ့တဲ့ ကလေးကို နို့ဖြတ်ဖို့ဆိုတာ လွယ်ပါ့မလား။ မိခင်အတော်များများက အတွေ့အကြုံရှိသူတွေအကြံပေးတဲ့အတိုင်း ရင်သားထိပ်မှာ ဆားခါးသုတ်ထားတာ၊ ခါးတဲ့အရာတစ်ခုခုသုတ်လိမ်းထားတာ စတဲ့နည်းတွေကိုသုံးတတ်ကြပါတယ်။နောက်ဆုံးတော့ နို့ပြတ်သွားတယ်ဆိုပေမယ့် ကလေးက နို့မစို့ရလို့ ငိုယို၊ လျှာမှာခါးသွားတဲ့အရသာကြောင့် ဒုက္ခရောက်နေရတာတွေကိုမြင်ရတဲ့အခါ အမေဖြစ်သူရင်ထဲမှာလည်း စိတ်မသက်မသာဖြစ်ရ၊ သနားရ နဲ့ ပင်ပန်းရပါတယ်။

ကလေးကိုဘယ်အချိန်မှာ နို့ဖြတ်မလဲ

နို့ဖြတ်သင့်တဲ့အချိန်ကိုရောက်လာပြီဆိုရင် ရုတ်တရက် ချက်ချင်းဖြတ်တာထက် တဖြည်းဖြည်းချင်း နို့ဖြတ်တာ ပိုကောင်းပါတယ်။ ကလေးကိုယ်တိုင်က နို့မစို့ချင်တော့ဘဲ အစာအာဟာရဘက်ကို ဦးစားပေးလာအောင် ကျင့်ယူပေးရမှာဖြစ်ပါတယ်။ ဒီအနေအထားမှာ စိတ်မလောဘဲ ကလေးရဲ့ကျန်းမာစွာကြီးထွားဖွံ့ဖြိုးမှုကို အားပေးနိုင်တဲ့ အစာအာဟာရကိုဖြည့်တင်းပေးဖို့လိုပါတယ်။ ဒါ့ကြောင့် ကလေးနို့ဖြတ်တဲ့အခါမှာ နည်းလမ်းမှန်ကန်စေဖို့၊ အဆင်ပြေစေဖို့ သိထားသင့်၊ သတိထားသင့်တဲ့အချက်လေးတွေကိုဖော်ပြလိုက်ပါတယ်။

အစောကြီး နို့မဖြတ်ပါနဲ့

ကလေးကို သိပ်အစောကြီး နို့ဖြတ်ပြီး အစာစကျွေးဖို့ မကြိုးစားပါနဲ့။ ကလေးဆိုတာခြောက်လမပြည့်မချင်း မိခင်နို့ သို့မဟုတ် နို့မှုန့် အာဟာရသောက်သုံးဖို့ လိုအပ်ပါတယ်။စောစောစီးစီး နို့ဖြတ်ခြင်းက တကယ်တော့ မကောင်းတဲ့အကျိုးရလဒ်တွေရှိစေနိုင်ပါတယ်။ ဥပမာ -ကလေးအသက် ၃လ – ၅လ အတွင်းမှာ နို့ဖြတ်လိုက်တယ်ဆိုရင် အဲဒီကလေးက ဓါတ်မတည့်မှုနဲ့ရောဂါပိုးဝင်နိုင်ခြေ ပိုများတာကြောင့် မကြာခဏ နာမကျန်းဖြစ်လွယ်တတ်ပါတယ်။

နေ့ချင်းညချင်း နို့ပြတ်သွားဖို့ စိတ်မလောပါနဲ့

မိခင်နို့ရည်ဟာ ကလေးကစို့လေ ပိုထွက်လေဖြစ်တာကြောင့် နို့ဖြတ်ဖို့စဉ်းစားတဲ့အခါ ချက်ချင်းကြီးအဆင်ပြေသွားဖို့မကြိုးစားပါနဲ့။ ချက်ချင်းကြီးနို့ဖြတ်လိုက်ရင် နို့ကြောင်းပိတ်တာ၊နာကျင်ရတာ၊ရောဂါပိုးဝင်တာ၊ နို့နာဖြစ်တာတွေလည်း ခံစားရနိုင်ခြေများပါတယ်။ ဒါ့ကြောင့် နို့ရည်အစား အစားထိုးအာဟာရကို တွဲဖက်ကျွေးပေးရင်း ကလေးရဲ့စားသောက်ပုံကို ဖြည်းဖြည်းချင်းပြောင်းလဲပေးသင့်ပါတယ်။

ကလေးရဲ့ကိုယ်အလေးချိန်ကိုစောင့်ကြည့်ပါ

အသက်ခြောက်လကနေ ၁၈ လအတွင်း ကလေးငယ်တွေရဲ့ကိုယ်အလေးချိန်က တက်လွယ်ကျလွယ်ပြီး အာဟာရချို့တဲ့မှုမဖြစ်အောင်လည်း ဂရုစိုက်ရပါတယ်။ ကလေးကို နို့ဖြတ်တဲ့အစီအစဉ်ကလည်း စနေပြီး ထမင်းစကျွေးကာစ အကူးအပြောင်းကာလမှာ ကလေးရဲ့ကိုယ်အလေးချိန်ကိုစောင့်ကြည့်နေသင့်ပါတယ်။ ကလေးရဲ့ကိုယ်အလေးချိန်နဲ့ တခြားဖွံ့ဖြိုးမှုအခြေအနေတွေ မဆုတ်ယုတ်သွားဖို့ကို သတိထားရပါမယ်။

ဘူးနဲ့မဟုတ်ဘဲ ခွက်နဲ့တိုက်တဲ့အကျင့်လုပ်ပေးပါ

ကလေးကို နို့တိုက်တာပဲဖြစ်ဖြစ်ရေတိုက်တာဖြစ်ဖြစ် ဘူးအစား ပန်းကန်လုံး၊ရေခွက်တို့ကိုသုံးပေးတာက ကလေးကိုကျင့်သားရစေပါတယ်။ ခွက်နဲ့သောက်တတ်လာပြီဆိုရင် တဖြည်းဖြည်းနဲ့ ထမင်းစားဖို့၊ မုန့်စားဖို့ ပိုကျင့်သားရလာမှာပါ။ နို့စို့ဖို့ပဲ အားသန်နေတော့မှာမဟုတ်တဲ့အတွက် နို့ဖြတ်ရတာပိုလွယ်စေပါတယ်။

ကလေးကို အစားအစာအသစ်တွေစကျွေးတဲ့အခါ အာဟာရပြည့်ပြီး ဗီတာမင်ဓါတ်တွေအချိုးအဆမျှတစွာပါဝင်ဖို့ လိုအပ်ပါတယ်။ ခြောက်လကနေ ၈ လ အတွင်း ကလေးတွေကို အစားထိုးအာဟာရ(ကြိတ်ချေထားတဲ့ထမင်း)ကို တစ်နေ့နှစ်ကြိမ်ကနေသုံးကြိမ်ကျွေးပေးဖို့ ကမ္ဘာ့ကျန်းမာရေးအဖွဲ့က အကြံပြုထားပါတယ်။ ကိုးလလောက်ဆို တစ်နေ့ သုံးကြိမ်၊လေးကြိမ်အထိ တိုးကျွေးပြီး တစ်နှစ်ကျော်ရင်တော့ ထမင်းကျွေးချိန်တွေကြားမှာ သရေစာအနည်းငယ်ကျွေးပေးလို့ရပါတယ်။

ကိုယ်နဲ့ကလေးအတွက် အသင့်တော်ဆုံးကိုဆုံးဖြတ်ပါ

တကယ်တော့ အရေးကြီးဆုံးက ကလေးရဲ့ဖွံ့ဖြိုးမှုနဲ့ကျန်းမာရေးကို အမြဲမပြတ်စောင့်ကြည့်နေဖို့ပါပဲ။ နို့မဖြတ်သေးဘဲ ထမင်းပါတွဲကျွေးတာက ကလေးရဲ့ကျန်းမာရေးနဲ့ဖွံ့ဖြိုးမှုအတွက်ပိုကောင်းတယ်ဆိုရင် ကလေးအသက် နှစ်နှစ်ကျော်တဲ့အထိ နို့ဆက်တိုက်လို့ရပါတယ်။ ဒါပေမယ့် အများစုက ကလေးအသက်တစ်နှစ်ကျော်တာနဲ့ နို့ဖြတ်ဖို့စဉ်းစားကြပါတယ်။ အစားထိုးကျွေးမယ့်အာဟာရကို ကလေးကလက်ခံရင်ပြဿနာမရှိပေမယ့် နို့မစို့ရချိန်မှာ တခြားအစာလည်းဟုတ်တိပတ်တိလက်မခံတဲ့ကလေးတွေဆိုရင်တော့ အာဟာရချို့တဲ့မှုမရှိအောင် ဂရုစိုက်ရပါမယ်။ အပေါ်မှာပြောခဲ့သလို နို့လည်းတိုက်ရင်း အစားလည်းကျွေးရင်း တဖြည်းဖြည်းချင်းဖြတ်ပါ။ ကလေးကိုယ်တိုင် လိုလိုလားလားနဲ့ နို့ဖြတ်နိုင်ဖို့ ကြိုးစားတာအကောင်းဆုံးပါ။