သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

ဂေါက်ရောဂါအန္တရာယ်အတွက် စားသောက်နည်းလမ်းညွှန်

ဂေါက်ရောဂါအန္တရာယ်အတွက် စားသောက်နည်းလမ်းညွှန်

ဂေါက်ရောဂါ (Gout ) ဆိုတာဘာလဲ

ဂေါက်ရောဂါဆိုတာသွေးတွင်း ယူရစ်အက်စစ်ပမာဏမြင့်မားမှုကြောင့် ခရစ္စတယ်အမှုန်တွေဖြစ်လာစေပြီး အဆစ်ရဲ့ပတ်လည်မှာ စုပုံလာတဲ့အခါ ခံစားရတဲ့အဆစ်ရောင် နာကျင်ကိုက်ခဲမှုတစ်မျိုးဖြစ်ပါတယ်။

ခန္ဓါကိုယ်ကpurine လို့ခေါ်တဲ့ ဓါတ်ပစ္စည်းတစ်မျိုးကိုပြိုကွဲစေတဲ့အခါ ယူရစ်အက်စစ်တွေ ထွက်ရှိလာပါတယ်။purine ဟာ ခန္ဓါကိုယ်ထဲမှာ သဘာဝအလျောက်ဖြစ်လာတတ်ပေမယ့် အစားအစာတွေမှာလည်းတွေ့ရှိရနိုင်ပါတယ်။ ယူရစ်အက်စစ်ကို ခန္ဓါကိုယ်ထဲကနေ ဆီးကတဆင့် စွန့်ထုတ်ပါတယ်။

ဂေါက်ရောဂါရဲ့ လက္ခဏာတွေကတော့ ရုတ်တရက်ပေါ်လာတတ်ပါတယ်။ တခါတရံ ညဘက်မှာ ချက်ချင်းကြီးဖြစ်လာတတ်ပါတယ်။ အဖြစ်များတဲ့ လက္ခဏာတွေထဲမှာ –

  • ပြင်းထန်တဲ့ အဆစ်နာကျင်ကိုက်ခဲမှု -ဂေါက်ရောဂါကခြေမအဆစ်မှာဖြစ်လေ့ရှိပေမယ့် ဒူး၊လက်နဲ့ လက်ကောက်ဝတ် အဆစ်တွေမှာလည်းဖြစ်လာနိုင်ပါတယ်။ လက္ခဏာ စဖြစ်လာပြီး ၄ နာရီကနေ ၁၂ နာရီအတွင်းမှာ နာကျင်မှုက အဆိုးရွားဆုံးဖြစ်လာနိုင် ပါတယ်။
  • ဝေဒနာက သက်ဆိုးရှည် -ပြင်းပြင်းထန်ထန် နာကျင်ကိုက်ခဲရပြီးနောက်မှာ ရက်အနည်းငယ်ကနေ ရက်သီတင်းပတ်ချီတဲ့အထိ လက္ခဏာတချို့က ကျန်ရစ်နေနိုင်ပါသေးတယ်။ ထပ်ဖြစ်လာတဲ့ ရုတ်တရက်ကိုက်ခဲမှုတွေဟာ ပိုကြာရှည်တတ်ပြီး နာကျင်ရတဲ့ အဆစ်တွေ တိုးလာစေနိုင်ပါတယ်။
  • နီရဲ ရောင်ရမ်းခြင်း – နာကျင်ကိုက်ခဲလာတဲ့ အဆစ်အမြစ်နေရာမှာရောင်ရမ်းလာ၊ အထိမခံနိုင်ဖြစ်လာပြီး ပူလောင် နီရဲလာပါတယ်။
  • လှုပ်ရှားလို့သိပ်မကောင်းတော့ခြင်းဂေါက်ရောဂါ အခြေအနေ ပိုဆိုးလာတာနဲ့အမျှ အဆစ်တွေလှုပ်ရှားနိုင်စွမ်း ကျဆင်းလာနိုင်ပါတယ်။

ပုံမှန်အားဖြင့်တော့ ဂေါက်ရောဂါမျိုးရိုးရှိသူတွေ၊ အမျိုးသားတွေနဲ့ အဝလွန်သူတွေမှာဖြစ်နိုင်ခြေပိုများပါတယ်။ဂေါက်ရောဂါအတွက် ဓါတ်စာဟာ ကုသပျောက်ကင်းနိုင်တဲ့ဆေးမဟုတ်ပေမယ့် နာကျင်ရတဲ့ လက္ခဏာတွေပြန်ပေါ်လာနိုင်တဲ့အန္တရာယ်လျော့နည်းစေနိုင်ပြီး အဆစ်ထိခိုက်မှုကိုနှေးကွေးစေပါတယ်။ နာကျင်မှုဝေဒနာနဲ့ ယူရစ်အက်စစ်ပမာဏလျော့နည်းစေဖို့ဆေးဝါးနဲ့ထိန်းဖို့လိုအပ်ပါတယ်။

ဂေါက်ရောဂါအတွက်ကျန်းမာရေးနဲ့ညီညွတ်မယ့် ဆောင်ရန်ရှောင်ရန် စားသောက်နည်း အချက်အလက်တချို့ကိုဖော်ပြလိုက်ပါတယ် –

  • အရောအနှော ကာဗိုဟိုက်ဒရိတ် – complex carbohydratesတွေပါတဲ့ အသီးအနှံတွေ၊ဟင်းသီးဟင်းရွက်တွေနဲ့ပြောင်းနှံတွေပိုစားပေးပါ။ပေါင်မုန့်အဖြူ၊ ကိတ်မုန့်၊သကြားလုံး၊ အချိုရည်တွေလို အစားအသောက်တွေကိုရှောင်ပါ။
  • ရေ –ရေဓါတ်မချို့တဲ့ရအောင်နေပါ။ရေများများသောက်ရင်ဂေါက်ရောဂါ ထလာနိုင်တဲ့ အန္တရာယ်ကိုလျော့နည်းစေပါတယ်။
  • အဆီ –ပြည့်ဝအဆီတွေမရရှိအောင်လို့အနီရောင်ရှိတဲ့အသားတွေ၊ အဆီများတဲ့ အသားတွေနဲ့ အဆီများတဲ့နို့ထွက်ပစ္စည်းတွေကို လျှော့စားပါ။
  • ပရိုတင်း –အဆီမပါတဲ့အသားတွေ၊ ငါးတွေနဲ့ ကြက်ဘဲတွေဆီကနေ့စဉ် ပရိုတင်းစားသုံးမှုပမာဏကို ၄အောင်စ ကနေ ၆အောင်စအထိလျှော့ချပါ။ အဆီထုတ်ဒိန်ချဉ်/နွားနို့လို အဆီမပါတဲ့ နို့ထွက်ပစ္စည်းတွေကိုနေ့စဉ်စားသောက်မှုပုံစံထဲပေါင်းထည့်ပြီး ယူရစ်အက်စစ်ကိုလျှော့ချပါ။
  • အချိုရည်များ – ဆိုဒါ သို့မဟုတ် သစ်သီးအချိုရည်တွေလို အချိုများတဲ့ အချိုရည်တွေကို ရှောင်ပါ။ ဒါတွေကိုရှောင်တာက ဝိတ်ချဖို့အတွက်တင်မဟုတ်ပါဘူး။ ဒီအချိုတွေက ခန္ဓါကိုယ်ကို ယူရစ်အက်စစ်ပိုထွက်ရှိအောင် နှိုးဆွကြမှာဖြစ်လို့ပါ။
  • Purine ဓါတ်ကြွယ်ဝတဲ့ အသီးအရွက်များ –purine ဓါတ်မြင့်မားတဲ့ ဟင်းသီးဟင်းရွက်တွေဟာဂေါက်ရောဂါခံစားရနိုင်ခြေ ဒါမှမဟုတ် ထပ်ဖြစ်နိင်တဲ့အန္တရာယ်ကို မတိုးစေနိုင်ဘူးလို့ သုတေသနတွေကပြောပါတယ်။ ကညွှတ်၊ ဟင်းနုနယ်၊ ပဲ၊ ပန်းဂေါ်ဖီစိမ်း၊ နဲ့မှိုတွေက purine ဓါတ်များများပါဝင်တဲ့ အသီးအရွက်တွေဖြစ်ပြီး purine လည်းအတော်အသင့်များ၊ ပရိုတင်းလည်းများတဲ့ ပဲအမျိုးမျိုးနဲ့ ပဲနီလေးတို့ကို စားနိုင်ပါတယ်။
  • အတွင်းကလီစာများ – purineပမာဏကို မြင့်တက်စေပြီး သွေးတွင်း ယူရစ်အက်စစ်ပမာဏကို တိုးစေနိုင်တာကြောင့် အသည်း၊ကျောက်ကပ် စတဲ့ ကိုယ်တွင်းကလီစာများ စားသုံးခြင်းကိုရှောင်ပါ။
  • ပင်လယ်စာတချို့– တခြားအစားအစာတွေထက် purine ဓါတ်ပိုများတဲ့ ငါးသလောက်၊ ငါးသေတ္တာငါး၊ ယောက်သွား၊ခုံး၊ မက်ခရယ်ငါး၊ တူနာငါးတို့ လို ပင်လယ်စာတချို့ကိုရှောင်သင့်ပါတယ်။
  • အရက်၊ဘီယာ – ခန္ဓါကိုယ်ထဲမှာ အယ်ကိုဟောရဲ့ဇီဝဖြစ်စဉ်က ယူရစ်အက်စစ်ထုတ်လုပ်မှုကိုတိုးမြင့်စေနိုင်ပြီး အရက်ကြောင့်ရေဓါတ်ဆုံးရှုံးရစေနိုင်ပါတယ်။
  • ဗီတာမင် စီ -ဗီတာမင် စီက ယူရစ်အက်စစ်ပမာဏကိုလျော့ကျစေနိုင်တာကြောင့် ဆရာဝန်နဲ့တိုင်ပင်ပြီး ဗီတာမင် စီဆေးပြားကိုနေ့စဉ်သောက်ပါ။
  • ကော်ဖီ – အတန်အသင့် ပမာဏအထိကော်ဖီသောက်သုံးခြင်းကဂေါက်ရောဂါဖြစ်နိုင်ခြေကိုလျော့နည်းစေနိုင်ပါတယ်။ တခြားရောဂါရှိနေသူတွေအတွက်တော့ကော်ဖီက မသင့်လျော်နိုင်လောက်ပါဘူး။
  • ချယ်ရီသီး –ချယ်ရီသီးစားပေးရင်လည်းဂေါက်ရောဂါအန္တရာယ်ကိုလျော့နည်းစေတယ်လို့ အထောက်အထားတွေတွေ့ရှိခဲ့ကြပါတယ်။

ကိုယ်အလေးချိန်များနေရင်ဂေါက်ရောဂါဖြစ်လာနိုင်တဲ့အန္တရာယ် ပိုများပြီး ကိုယ်အလေးချိန်ကျရင် အန္တရာယ် ပိုနည်းပါတယ်။ ဓါတ်စာပုံစံ ကန့်သတ်၊ အစားရှောင်တာတွေမလုပ်လည်း ကယ်လိုရီပမာဏနဲ့ ကိုယ်အလေးချိန်ကိုလျှော့ချရင်ပဲ ယူရစ်အက်စစ်ပမာဏနဲ့ဂေါက်ရောဂါအန္တရာယ်ကို နည်းပါးစေနိုင်တယ်လို့ သုတေသီတွေကပြောလာကြပါတယ်။ ကိုယ်အလေးချိန်နည်းတဲ့အခါ အရိုးအဆစ်တွေပေါ် ဖိအားလျော့နည်းစေလို့လည်း ပါပါတယ်။

Hello Health Group သည်ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့် ကုသမှုများမပြုလုပ်ပေးပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

စာရေးသူ ဓာတ်ပုံbadge
Yun Sandi Nan Mon မှ ရေးသားသည်။ 05/07/2022 တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။