-သွေးတွင်းအောက်ဆီဂျင်ကို လက်ထိပ်ကနေတိုင်းပါ။
-၉၀ ပတ်ချာလည်လောက် ရှိတယ်ဆိုပါစို့။
-ဒါဆိုရင် နှာခေါင်းပိုက်ကနေ တစ်မိနစ် တစ်လီတာနှုန်းနဲ့ စပေးကြည့်ပါ။
-၅မိနစ်လောက်နေရင် ပြန်တိုင်းပါ။ ၉၂ ရာခိုင်နှုန်းအောက်ဆို ၂လီတာ တိုးပေးပါ။
-ဒီလိုနဲ့ ဖြည်းဖြည်းချင်း တိုးပေးပြီး လိုချင်တဲ့ပမာဏရောက်အောင် ချိန်ညှိလို့ရပါတယ်။
အောက်ဆီဂျင် ပမာဏနဲ့ သုံးရမယ့် ပစ္စည်းများ
ပစ္စည်းများဆိုတာ အောက်ဆီဂျင်ပေးရင် သုံးတဲ့ကိရိယာကို ပြောတာပါ။ နှာခေါင်းပိုက်တို့၊ maskတို့ပေါ့။
အောက်ဆီဂျင် ၁-၄လီတာထိပေးမယ်ဆိုရင် နှာခေါင်းပိုက်ကို သုံးပါ။ ဒီထက် လီတာများရင်တော့ နောက်တစ်မျိုး ပြောင်းရပါမယ်။ လေအားပြင်းရင် နှာခေါင်းအမြှေးပါးတွေ ထိနိုင်လို့ပါ။ နှာခေါင်းပိုက်နဲ့ ပေးမယ်ဆိုရင် အောက်ဆီဂျင် ပါဝင်နှုန်းက ၃၀ ရာခိုင်နှုန်းအထိ ရနိုင်ပါတယ်။
အောက်ဆီဂျင် ၅-၁၀ လီတာအထိ ပေးမယ်ဆိုရင် ဒီ maskကို သုံးပါ။ အောက်ဆီဂျင် ပါဝင်နှုန်း ၄၀ ရာခိုင်နှုန်းအထိ ရနိုင်ပါတယ်။

Venturi ဆိုတာ လေစီးဆင်းမှုကို ထိန်းထားပေးတဲ့ ဇကာပါ။ ဒီ maskနဲ့ဆို အောာက်ဆီဂျင် ပါဝင်နှုန်းကို ၂၄၊ ၂၈၊ ၃၅၊ ၄၀၊ ၆၀ ဆိုပြီး ရာခိုင်နှုန်း အတိအကျ ပေးလို့ရပါတယ်။ ဇကာကို အရောင်လေးတွေနဲ့ ၅မျိုး ခွဲထားပါတယ်။ ဥပမာ အစိမ်းရောင် Venturi ဇကာနဲ့ ၁၅လီတာပေးရင် လူနာရှူတဲ့ လေထဲမှာ အောက်ဆီဂျင် ၆၀ရာခိုင်နှုန်းလောက်ထိ ပါပါတယ်။
၁၀လီတာကနေ ၁၅လီတာလောက်ထိ ပေးရမယ်ဆို ဒီmaskကို သုံးသင့်ပါတယ်။ အိတ်တွဲလောင်းနဲ့ maskလို့ လူသိများပါတယ်။ ဒါနဲ့ ပေးရင် လူနာရှူတဲ့ လေထဲမှာ အောက်ဆီဂျင် ၈၅-၁၀၀ ရာခိုင်နှုန်းထိ ရနိုင်ပါတယ်။ အိတ်ဖောင်းအောင် အရင်လုပ်ပြီးမှ လူနာကို ပေးရှူရမှာပါ။
Venturi maskကတော့ ဝယ်ရခက်နိုင်လို့ လူနာရှင်တွေအနေနဲ့ နှာခေါင်းပိုက်ရယ်၊ သာမန် maskရယ်၊ အိတ်နဲ့ maskရယ် ၃မျိုးလောက် ဆောင်ထားရင် ရပါပြီ။
ဒါကြောင့် အောက်ဆီဂျင် ဘယ်လောက်များများရနိုင်လဲဆိုတာ အချက် ၂ချက်ပေါ်မူတည်ပါတယ်။
-ဘယ်လို maskနဲ့ ပေးလဲဆိုတာရယ်
-ဘယ်လောက်လီတာပေးသလဲ ဆိုတာရယ်ပါ။
တခြား သတိထားသင့်တဲ့ အချက်များ
ဒါတွေကတော့
- စလင်ဒါကပဲ ပေးပေး၊ စက်ကပဲ ပေးပေး ရေပုလင်းကို ဖြတ်ပြီး လာတဲ့ လေပဲ ဖြစ်ပါစေ။ လေခြောက်ရင် ရှူရခက်ပြီး နှာခေါင်း အမြှေးပါးတွေ ပွန်းနိုင်ပါတယ်။ ဒီလိုဆို ရောဂါဝင်ဖို့ လွယ်ပါတယ်။
- လူနာမှာ ပိုက်မတပ်ခင် စက်ကိုဖွင့်ပြီး လေထွက်မထွက် စစ်ဆေးပါ။ လေထွက်မှာ လူနာကို ပေးတပ်ပါ။ တချို့စလင်ဒါတွေမှာ အောက်ဆီဂျင် ကုန်နေမှန်း မသိဘဲ လူနာကို ပေးထားတတ်ပါတယ်။
- အောက်ဆီဂျင် စစ်ပါစေ။ အထူးသဖြင့် စလင်ဒါတွေ ဝယ်တဲ့အခါ တခြားဓာတ်ငွေ့တွေ မပါအောင် သတိပြုပါ။
- စက်ဝယ်ပြီး ရှူမယ်ဆိုရင်လည်း စိတ်ချရတာပဲ ဝယ်ပါ။ တချို့စက်တွေက လီတာများများ ပေးတဲ့အခါ အောက်ဆီဂျင် ပါဝင်မှုနှုန်း သိသိသာသာ ကျသွားတတ်ပါတယ်။ ဒါကြောင့် လူနာအနေနဲ့ လီတာအများကြီး ရှူနေသည့်တိုင် အောက်ဆီဂျင် မတက်တာမျိုး ဖြစ်တတ်ပါတယ်။
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။