Karyotype Test (ခရိုမိုဆုန်းစစ်ဆေးခြင်း)

အဓိပ္ပါယ်ဖွင့်ဆိုချက်

Karyotype Test (ခရိုမိုဆုန်းစစ်ဆေးခြင်း) ကဘာလဲ။

Karyotype test ဟာ ကိုယ်ခန္ဓါဆဲလ်တွေ အတွင်းမှာရှိတဲ့ ခရိုမိုဆုန်း တွေရဲ့ အရွယ်အစား၊ ပုံသဏ္ဍာန်နဲ့ အရေအတွက်ကို ရှာဖွေ စစ်ဆေးတဲ့ နည်းတစ်မျိုးဖြစ်ပါတယ်။ ခရိုမိုဆုန်းအရေအတွက် ပိုနေခြင်း၊ လိုနေခြင်း၊ ပုံမှန်မဟုတ်ခြင်းတွေဟာ လူတစ်ယောက်ရဲ့ ဖွံ့ဖြိုးကြီးထွားမှု၊ ကိုယ်ခန္ဓါလုပ်ငန်းဆောင်တာတွေမှာ ပြဿနာတွေ ဖြစ်စေနိုင်ပါတယ်။

Karyotype Test (ခရိုမိုဆုန်းစစ်ဆေးခြင်း)တွေကို ဘာကြောင့် လုပ်ကြတာလဲ။

ဒီစစ်ဆေးမှုကို
• ကလေးပျက်ကျပြီးတဲ့ စုံတွဲတွေမှာ
• ကလေးငယ် (သို့) မွေးကင်းစကလေးတွေမှာ ပုံမှန်မဟုတ်တဲ့ ရုပ်သွင် (သို့) ဖွံ့ဖြိုးမှု ကောင်းကောင်းမရှိဘူးဆိုရင် ပြုလုပ်ကြပါတယ်။
သွေးကင်ဆာ (CML) ရှိတဲ့ လူတွေရဲ့ ၈၅ ရာခိုင်နှုန်း လောက်မှာ တွေ့ရတတ်တဲ့ Philadelphia ခရိုမိုဆုန်း ကို သိရှိစေဖို့ ရိုးတွင်းခြင်ဆီ (သို့) သွေးစစ်ဆေးမှု ကို ပြုလုပ်နိုင်ပါတယ်။ ရေမြွှာရည်စစ်ဆေးမှု ပြုလုပ်ခြင်းဟာလည်း ကလေးမှာ ခရိုမိုဆုန်းပြဿနာ တွေ ရှိမရှိ စစ်ဆေးနိုင်ပါတယ်။

ပြင်ဆင်မှု

Karyotype test ကိုမလုပ်ခင် ဘာတွေ သိထားသင့်သလဲ။

ခရိုမိုဆုန်းစစ်ဆေးမှု မှာ ကလေးရဲ့ လိင် ခရိုမိုဆုန်း(XX or XY) ဟာ သိရှိနိုင်တာကြောင့် ဒီစစ်ဆေးမှုမှာ ကလေးရဲ့ လိင်ကိုလည်းသိရှိနိုင်ပါတယ်။ အချို့ ခရိုမိုဆုန်း ပြောင်းလဲခြင်းတွေဟာ Karyotype test နဲ့ သိရှိဖို့ သိပ်ညင်သာ လွန်းတတ်ပါတယ်။ ဒါကြောင့် အခြားနည်းတွေ ဖြစ်တဲ့ fluorescent in situ hybridization (FISH) သို့ microarray တွေကို ခရိုမိုဆုန်း မူမမှန်မှုတွေကို ပိုမိုသိစေဖို့ အသုံးပြုနိုင်ပါတယ်။
မတူညီတဲ့ မျိုးရိုးဗီဇ တွေ ကိုယ်ခန္ဓါအတွင်းက ဆဲလ်တွေမှာ ရှိနေဖို့ဆိုတာ ဖြစ်နိုင်ပါတယ်။ ဒါဟာ ကလေးစတင်ဖွံ့ဖြိုးစဉ်မှာ ပြောင်းလဲခြင်းတွေဟာ မတူညီတဲ့ ဆဲလ် ဖွံ့ဖြိုးမှုကို ဖြစ်စေပြီး ဒါကို mosaicism (မတူညီသော ဗီဇနှစ်ခု ရှိသော အခြေအနေ)လို့ ခေါ်ပါတယ်။ ဒီအခြေအနေရဲ့ ဥပမာကတော့ ဒေါင်းဆင်ဒရုန်း ပဲဖြစ်ပါတယ်။ ရောဂါဖြစ်တဲ့သူရဲ့ အချို့ဆဲလ်တွေမှာ ခရိုမိုဆုန်း အပိုပါနိုင်ပြီး (သို့) အချို့ဆဲလ်တွေမှာတော့ ပုံမှန် ခရိုမိုဆုန်းတစ်စုံ ရှိခြင်း တွေ ဖြစ်နိုင်ပါတယ်။

Karyotype test တွေကို ဘယ်လိုပြင်ဆင်သင့်သလဲ။

စစ်ဆေးမှုမပြုခင် အထူးတလည် ပြင်ဆင်ဖို့မလိုအပ်ပါဘူး။
စစ်ဆေးမှုလိုအပ်ချက်တွေ၊ ဖြစ်နိုင်တဲ့ ဆိုးကျိုးတွေ၊ စစ်ဆေးမှု ဘယ်လိုလုပ်မလဲဆိုတာနဲ့ အဖြေတွေက ဘာကိုဆိုလိုတာလဲ ဆိုတာတွေနဲ့ပတ်သက်ပြီး သိချင်တာတွေ ရှိရင် ဆရာဝန်ကို မေးမြန်းသင့်ပါတယ်။
ဒီစစ်ဆေးမှုက ရရှိတဲ့ အချက်အလက်တွေဟာ သင့်ဘဝအတွက် အရေးကြီးတာကြောင့် မျိုးရိုးဗီဇ ပိုင်း ကျွမ်းကျင်တဲ့ ဆရာဝန် (သို့) မျိုးရိုးဗီဇ နှစ်သိမ့်ဆွေးနွေးပညာပေးသူ ကို တွေ့ဆုံမေးမြန်းသင့်ပါတယ်။ သူတို့ဟာ သင့်ကို ဒီစစ်ဆေးမှု အဖြေက ဘာကိုဆိုလိုတာလဲ၊ ဥပမာ မွေးရာပါ မျိုးရိုးဗီဇ ရောဂါ ဒေါင်းဆင်ဒရုန်း လိုမျိုး ဖြစ်နိုင်ချေ ရာခိုင်နှုန်းကို ရှင်းပြပေးနိုင်ပါတယ်။ မျိုးရိုးဗီဇ နှစ်သိမ့်ဆွေးနွေးပညာပေးသူ ဟာ သင့်ရဲ့ ဆုံးဖြတ်ချက်တွေအတွက် ဗဟုသုတ ပြည့်ဝပြီး တစ်စုံတစ်ခုကို ဆုံးဖြတ်နိုင်အောင်ကူညီပေးနိုင်ပါတယ်။ ထို့ကြောင့် ဒီစစ်ဆေးမှုနဲ့ ပတ်သက်ပြီး ဆုံးဖြတ်ချက်တစ်ခုခု မပြုလုပ်မီ ပညာရှင် နဲ့ အရင်တိုင်ပင်ဆွေးနွေးသင့်ပါတယ်။

စစ်ဆေးမှု

Karyotype test နဲ့ စစ်ဆေးနေချိန်မှာ ဘယ်လို ဖြစ်မှာလဲ။

သွေးပြန်ကြောမှ သွေးယူခြင်း
ကျန်းမာရေး စောင့်ရှောက်သူက သွေးထုတ်ယူမှာ ဖြစ်ပါတယ်။
• လက်မောင်းမှာ သွေးစီးဆင်းမှုကို ရပ်တန့်ဖို့ သားရေကြိုးတစ်ခုကို စည်းပေးမှာဖြစ်ပါတယ်။ ဒါဟာ သားရေကြိုးအောက်က သွေးပြန်ကြောတွေကို ဖောင်းတင်းလာစေပြီး အပ်ထိုးဖို့ လွယ်ကူစေမှာဖြစ်ပါတယ်။
• ဆေးထိုးမယ့်နေရာကို အရက်ပြန်နဲ့ သန့်ရှင်းရေးလုပ်မှာ ဖြစ်ပါတယ်။
• သွေးပြန်ကြောအတွင်းကို အပ်ထိုးလိုက်မှာဖြစ်ပါတယ်။ တစ်ကြိမ်ထက် မက လိုအပ်နိုင်ပါတယ်။
• သွေးထည့်တဲ့ ဖန်ချောင်းထဲကို သွေးဖြည့်လိုက်မှာဖြစ်ပါတယ်။
• သွေးအလုံအလောက်ရပြီဆိုရင်တော့ သားရေကြိုးကို ဖြည်လိုက်မှာဖြစ်ပါတယ်။
• အပ်ဖယ်လိုက်ပြီး ဂွမ်းလုံးကို အပ်ထိုးတဲ့နေရာပေါ်တင်လိုက်မှာဖြစ်ပါတယ်။
• သွေးယူတဲ့နေရာမှာ ဖိထားသင့်ပြီး ပလပ်စတာ ကပ်ပေးနိုင်ပါတယ်။

သန္ဓေသားထံမှ ဆဲလ် နမူနာ ယူခြင်း
ဒီစစ်ဆေးမှုအတွက် သန္ဓေသားထံမှ ဆဲလ် နမူနာ ကို ရေမြွှာရည် (သို့) အချင်းတစ်ရှူးနမူနာ မှရယူနိုင်ပါတယ်။

ရိုးတွင်းခြင်ဆီမှ ဆဲလ် နမူနာ ယူခြင်း
ရိုးတွင်းခြင်ဆီ စုပ်ထုတ်ခြင်းကိုလည်း ဒီစစ်ဆေးမှု အတွက် ပြုလုပ်နိုင်ပါတယ်။

စစ်ဆေးပြီးနောက်

Karyotype test လုပ်ပြီးသွားချိန် ဘာဖြစ်မှာလဲ။

သားရေကြိုးနဲ့ လက်မောင်းကို ပတ်ထားမှာမို့ တင်းကျပ်မှုကို ခံစားရနိုင်ပါတယ်။ အပ်ထိုးထားတဲ့နေရာက ဘာမှ မခံစားရခြင်း (သို့) အနည်းငယ်စူးရှနာကျင်ခြင်းတွေ ဖြစ်နိုင်ပါတယ်။
ဂွမ်းစနဲ့ ပလပ်စတာကို မိနစ် ၂၀-၃၀ ကြာပြီးရင် ဖယ်ရှားနိုင်ပါတယ်။ အဖြေကို ရရှိဖို့ ရက်ချိန်းပေးမှာ ဖြစ်ပါတယ်။ သင့်ဆရာဝန်က သွေးအဖြေက ဘာကို ဆိုလိုတယ်ဆိုတာ ရှင်းပြမှာ ဖြစ်ပြီး ဆရာဝန် ညွှန်ကြားချက်တွေကို လိုက်နာသင့်ပါတယ်။
ဓါတ်ခွဲခန်းနဲ့ ဆေးရုံတွေပေါ်မူတည်ပြီး Karyotype test ရဲ့ အဖြေတွေဟာ ကွဲပြားနိုင်ပါတယ်။ စစ်ဆေးမှုနဲ့ပတ်သက်ပြီး ပိုမိုသိလိုတယ်ဆိုရင် ဆရာဝန်ကို တိုင်ပင်ဆွေးနွေးသင့်ပါတယ်။
Karyotype test နဲ့ပတ်သက်ပြီး မေးခွန်းတွေရှိတယ်ဆိုရင် ညွှန်ကြားချက်တွေကို ပိုမိုနားလည်စေဖို့ ဆရာဝန်နဲ့ တိုင်ပင်သင့်ပါတယ်။

ရလဒ်

ယခုဖော်ပြထားသော အချက်အလက်များကို ဆေးပညာအကြံပေးမှုနေရာတွင် အစားထိုးရန်မသင့်တော်ပါ။ ပိုမိုသောအချက်အလက်များရရှိရန်အတွက် ဆရာဝန်နှင့် အမြဲတမ်းတိုင်ပင်ပါ.

Karyotype Test (ခရိုမိုဆုန်းစစ်ဆေးခြင်း) အဖြေက ဘာကို ဆိုလိုသလဲ။

Karyotype test ရဲ့ အဖြေကို များသောအားဖြင့် တစ်ပတ်ကနေ နှစ်ပတ်အတွင်းမှာ ရရှိနိုင်ပါတယ်။

ပုံမှန်
• ခရိုမိုဆုန်း ၄၆ ခုမှာ အတွဲ ၂၂ စုံနဲ့ လိင်ကိုဆုံးဖြတ်တဲ့ ခရိုမိုဆုန်း တစ်စုံ ပါဝင်ပါတယ် (ကလေးဟာ မိန်းကလေးဆို XX နဲ့ ယောက်ျားလေးဆို XY)။
• ခရိုမိုဆုန်း တစ်ခုစီရဲ့ အရွယ်အစား၊ ပုံသဏ္ဍာန်နဲ့ တည်ဆောက်ပုံတွေဟာ ပုံမှန် ဖြစ်ပါတယ်။

ပုံမှန်မဟုတ်

• ခရိုမိုဆုန်း ၄၆ ခုထက် ပိုများနိုင်ပါတယ်။
• တစ်ခု (သို့) တစ်ခုထက်ပိုတဲ့ ပုံမှန်မဟုတ်ပါသော ခရိုမိုဆုန်းများရှိခြင်း။
• ခရိုမိုဆုန်း အတွဲတွေဟာ ပျက်နေခြင်း (သို့) ပုံမှန်မဟုတ်ပဲ ကွဲနေခြင်းတွေ ဖြစ်နိုင်ပါတယ်။

Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ

Karyotype Test http://www.webmd.com/baby/karyotype-test?print=true. Accessed July 4, 2016.

Karyotyping https://www.nlm.nih.gov/medlineplus/ency/article/003935.htm. Accessed July 4, 2016.

စာရေးသူ ဓာတ်ပုံbadge
Dr . Phyu Mon Latt မှ ရေးသားသည်။ 12/05/2020 တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။