home

သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

Williams syndrome (ဝီလီယမ် စင်ဒရုန်း )

အဓိပ္ပါယ်ဖွင့်ဆိုချက်|ရောဂါလက္ခဏာများ|ဖြစ်ပွားမှုအကြောင်းရင်းများ|ဖြစ်ပွားစေနိုင်ချေကို မြင့်စေသည့် အကြောင်းရင်းများ|ရောဂါအဖြေရှာခြင်းနှင့် ကုသခြင်း|လူနေမှုပုံစံပြောင်းလဲခြင်းနှင့် အိမ်သုံးကုထုံးများ

အဓိပ္ပါယ်ဖွင့်ဆိုချက်

ဝီလီယမ် စင်ဒရုန်း ဆိုတာဘာလဲ။

ဝီလီယမ် စင်ဒရုန်းကို ဝီလီယမ်ဗျူရန် စင်ဒရုန်းလို့လူသိများပြီး ရှားပါးမျိုးရိုးဗီဇရောဂါတစ်ဖြစ်ပါတယ်။ မမွေးခင်နဲ့ မွေးပြီးနောက်မှာ ကြီးထွားမှုနှေးကွေးခြင်း၊ အရပ်ပုခြင်း၊ ဉာဏ်ရည်ချို့တဲ့ခြင်းအမျိုးမျိုးနှင့် မျက်နှာသွင်ပြင်ထူးခြားခြင်းတို့ပါဝင်ကာ ထိုလက္ခဏာများဟာ အသက်ကြီးလာတာနဲ့အမျှ ပိုထင်ရှားလာပါတယ်။

ဝီလီယမ် စင်ဒရုန်းဟာ ဘယ်လောက်ထိ အဖြစ်များသလဲ။

ဝီလီယမ် စင်ဒရုန်းဆိုတာ ယောက်ျားမိန်းမမရွေး၊ လူမျိုးဘာသာမရွေး ဖြစ်တတ်တဲ့ ရှားပါးရောဂါတစ်မျိုးပါ။ အမေရိကန်မှာဆိုရင် မွေးတဲ့ကလေးပေါင်း ၁၀၀၀၀ – ၂၀၀၀၀ တွင် ၁ယောက်နှုန်းနဲ့ ဖြစ်ပွားလျက်ရှိပါတယ်။

အချက်အလက်များထပ်မံသိရှိဖို့အတွက် ဆရာဝန်နဲ့ တိုင်ပင်ဆွေးနွေးသင့်ပါတယ်။

ရောဂါလက္ခဏာများ

ဝီလီယမ် စင်ဒရုန်း ရဲ့ ရောဂါလက္ခဏာတွေက ဘာတွေလဲ။

ဝီလီယမ် စင်ဒရုန်းဆိုတာ ရောဂါလက္ခဏာအစုကြီးဖြစ်ပါတယ်။ တချို့အခြေအနေတွေမှာ မွေးမွေးပြီးချိန်ဆိုရင် မထင်ရှားပဲရှိတတ်ပါတယ်။ အသက်ကြီးလာတာနဲ့အမျှ ရောဂါလက္ခဏာတွေပိုထင်ရှားလာပြီး ဆရာဝန်ကလည်း ရှင်းရှင်းလင်းလင်းသိနိုင်ကာ ရောဂါအဖြေထုတ်နိုင်လာပါလိမ့်မယ်။ ဝီလီယမ် စင်ဒရုန်းရဲ့ ရောဂါလက္ခဏာတွေက ရောဂါသည်တို့ရဲ့ အလုံးစုံကျန်းမာရေးနဲ့ ဖွံ့ဖြိုးမှုတို့ကို ကြီးကြီးမားမားထိခိုက်စေပါတယ်။

ဝီလီယမ် စင်ဒရုန်းရဲ့ ရောဂါလက္ခဏာအချို့က အောက်ပါတို့ပဲဖြစ်ပါတယ်။

  • နှာခေါင်းအပေါ်လန်ခြင်း၊ နှုတ်ခမ်းကြီးခြင်း၊ သွားကြဲခြင်းနဲ့ ပါးစပ်ကျယ်ခြင်းလိုမျိုး ထူးခြားတဲ့မျက်နှာသွင်ပြင်များ
  • မွေးကင်းစကလေးကိုယ်အလေးချိန်မပြည့်ခြင်း၊ ကြွက်သားအားနည်းခြင်းနှင့် အဆစ်လျော့ရဲခြင်း
  • အရပ်ပုခြင်း
  • ရင်ဘတ်ချိုင့်ခြင်း
  • လက်သန်းအတွင်းဘက်သလို့ကွေးခြင်း
  • အစာကျွေးခြင်းပြဿနာများ၊ ကလေးလေထိုးလေအောင့်ပြဿနာများ
  • ကျောက်ကပ်ပြဿနာများ
  • သွားပြဿနာများ
  • အူကျွံခြင်းများ
  • အသံကျယ်ကျယ်ကိုမခံစားနိုင်ခြင်း
  • စကားပြောနှေးခြင်း
  • ADHD ရောဂါရှိခြင်း
  • ပညာသင်ကြားရန်ပြဿနာရှိခြင်း
  • အနီးမှုန်ခြင်း
  • အကြောက်လွန်ရောဂါရှိခြင်း
  • ဉာဏ်ရည်မပြည့်မှီမှုအမျိုးမျိုးရှိခြင်း

ဝီလီယမ် စင်ဒရုန်းရောဂါသည်တွေဟာ အခင်မင်လွန်ခြင်း၊ အသံကျယ်တဲ့သီချင်းသံများကို မခံနိုင်ခြင်း၊ သီချင်းကြိုက်ခြင်းနဲ့ အသားချင်းထိတွေ့မှုကို မနှစ်မြို့ခြင်းလိုမျိုး ထူးခြားတဲ့ ကိုယ်ရည်ကိုယ်သွေးရှိကြပါတယ်။

အထက်မှာဖော်ပြထားတဲ့အထဲမှာမပါဝင်တဲ့ အခြားသောလက္ခဏာတွေလည်းရှိနိုင်ပါသေးတယ်။ တကယ်လို့ကိုယ့်ဆီမှာ ရောဂါလက္ခဏာတစ်ခုခုများရှိနေမလားဆိုပြီး စိုးရိမ်နေမယ်ဆိုရင် ဆရာဝန်နဲ့ ဆွေးနွေးတိုင်ပင်သင့်ပါတယ်။

ဘယ်အချိန်မှာ ဆရာဝန်နဲ့ သွားရောက်ပြသသင့်ပါသလဲ။

သင့်ဆီမှာ သို့မဟုတ် သင်ချစ်ရသူတစ်ဦးဦးထံမှာ အထက်ဖော်ပြပါ ရောဂါလက္ခဏာတွေထဲက တစ်ခုခုများရှိနေမယ်ဆိုရင် ဒါမှမဟုတ် မေးခွန်းတစ်ခုခုရှိနေမယ်ဆိုရင် ဆရာဝန်နဲ့ တိုင်ပင်ဆွေးနွေးပါ။ လူတိုင်းရဲ့ခန္ဓါကိုယ်တုံ့ပြန်မှုဟာ မတူညီနိုင်ပါဘူး။ သင့်အခြေအနေအတွက် ဘာအကောင်းဆုံးလဲဆိုတာကို သင့်ဆရာဝန်နဲ့ တိုင်ပင်တာက အကောင်းဆုံးပါပဲ။

ဖြစ်ပွားမှုအကြောင်းရင်းများ

ဘာတွေက ဝီလီယမ် စင်ဒရုန်း ဖြစ်ပွားစေသလဲ။

ဝီလီယမ် စင်ဒရုန်းရောဂါလက္ခဏာတွေဟာ ဘာအကြောင်းကြောင်းမှန်းမသိဘဲ ပေါ်လာပါတယ်။

ဒါပေမယ့်လည်း မျိုးရိုးလိုက်တာမျိုးလည်း တွေ့ရတတ်ပါတယ်။ ယခုပြုလုပ်လျက်ရှိတဲ့ သုတေသနတွေအရ ထိုအမျိုးအစားတွေဟာ ခရိုမိုဆုန်း နံပါတ်၇ q လက်တံရှည် (7q11.23) မှာရှိသော မျိုးရိုးဗီဇတွေ ပျောက်ကွယ်သွားခြင်းကြောင့် ဖြစ်ပေါ်လာရတာလို့ ဆိုပါတယ်။ ထိုခရိုမိုဆုန်းနေရာကို ဝီလီယမ်ဗျူရန် စင်ဒရုန်း နေရာ ၁ (WBSCR1) လို့သတ်မှတ်လိုက်ပါတယ်။

ဖြစ်ပွားစေနိုင်ချေကို မြင့်စေသည့် အကြောင်းရင်းများ

ဘယ်အရာတွေက ဝီလီယမ် စင်ဒရုန်း ဖြစ်ပွားနိုင်ချေကိုမြင့်စေပါသလဲ။

မျိုးရိုးလိုက်တဲ့အမျိုးအစားမှာ ဝီလီယမ် စင်ဒရုန်းက လွှမ်းမိုးမျိုးရိုးဗီဇဖြစ်သွားပါတယ်။ ကလေးက ယောက်ျားလားမိန်းမလားဆိုတာ မမူတည်ဘဲ မိဘဆီမှ လက်ခံရရှိနိုင်ခြေ ၅၀ရာခိုင်နှုန်းရှိပါတယ်။ နောက်ထပ်သိလိုသည်များအတွက် ဆရာဝန်ဖြင့် ဆွေးနွေးတိုင်ပင်ပေးပါ။

ရောဂါအဖြေရှာခြင်းနှင့် ကုသခြင်း

ယခုဖော်ပြထားသည့် အချက်အလက်များမှာ ဆေးပညာဆိုင်ရာကျွမ်းကျင်သူ၏ အကြံပေးချက်များနေရာတွင် အစားထိုးရန် မသင့်တော်ပါ။ ဆက်လက်သိရှိလိုသောအချက်အလက်များအတွက် သင့်ရဲ့ဆရာဝန်နဲံ အမြဲတိုင်ပင်ဆွေးနွေးပါ။

ဝီလီယမ် စင်ဒရုန်း ဟုတ်မဟုတ်ကို ဘယ်လိုအဖြေရှာအတည်ပြုသလဲ။

ဝီလီယမ် စင်ဒရုန်းရောဂါအဖြေရှာခြင်းကို လူနာ့ဆေးမှတ်အသေးစိတ်နဲ့ သွေးတွင်းကယ်စီယမ်စစ်ဆေးခြင်းလိုမျိုး သွေးစစ်ဆေးမှုတွေနဲ့ ပြုလုပ်မှာပါ။

ခရိုမိုဆုန်း ၇ပေါ်မှာ အီလက်စတင်မျိုးရိုးဗီဇချို့ယွင်းမှုရှိလား၊မရှိဘူးလားဆိုတာကို FISH ဆိုတဲ့ စစ်ဆေးမှုဖြင့် သိရှိနိုင်ပါတယ်။ ဝီလီယမ် စင်ဒရုန်းလူနာအများစုမှာ မျိုးရိုးဗီဇပျောက်ကွယ်သွားမှု တွေ့ရတတ်ပါတယ်။

ဝီလီယမ် စင်ဒရုန်းကို ဘယ်လိုကုသလဲ။

သွေးတွင်းကယ်စီယမ်များနေတဲ့ ဝီလီယမ် စင်ဒရုန်းလူနာတွေမှာ ဗီတာမင်D နည်းသော စားသောက်ပုံစနစ် ကျင့်သုံးစေပါလိမ့်မယ်။ ကယ်စီယမ်စားသုံးမှုကိုလည်း လျော့ချစေပါလိမ့်မယ်။ ကယ်စီယမ်အရမ်းများနေတဲ့ ကလေးတွေမှာဆိုရင် ပရက်နီဆိုလုန်းလိုမျိုး ကော်တီကိုစတီးရွိုက်တွေကို ယာယီကုသနည်းအဖြစ် အသုံးပြုနိုင်ပါတယ်။ အသက်၁၂နှစ်ပြီးရင်တော့ ကယ်စီယမ်ပမာဏဟာ မကုသရင်တောင်မှ ပုံမှန်ပြန်ဖြစ်သွားပါတယ်။ ဝီလီယမ် စင်ဒရုန်း ကလေးတွေကို ဟော်မုန်းဆရာဝန်ဖြင့် ပြသင့်တယ်လို့ အကြံပြုထားပါတယ်။

နှလုံးရောဂါရှိတဲ့ ဝီလီယမ် စင်ဒရုန်းလူနာတွေက ထိုရောဂါမျိုးတွေနဲ့ အကျွမ်းတဝင်ရှိတဲ့ ဆေးရုံတွေမှာ ကုသမှုခံယူသင့်ပါတယ်။ မွေးရာပါနှလုံးမကောင်းခြင်းရဲ့ ပြင်းထန်မှုအတိုင်းအတာနဲ့ နေရာအတိအကျကို သိရှိဖို့ အထူးစစ်ဆေးမှုတွေ ပြုလုပ်မှာပါ။ ဥပမာ အီးကေဂျီ၊ အက်ခိုးရိုက်ခြင်း၊ နှလုံးသို့ပြွန်ထိုးစမ်းသပ်ခြင်းတို့ဖြစ်ပါတယ်။ တချို့ကတော့ ခွဲစိတ်ကုသမှုလိုအပ်နိုင်ပါတယ်။

ဝီလီယမ် စင်ဒရုန်းတွေအတွက် မသန်မစွမ်းကျောင်းတွေ၊ အထူးသီးသန့်ကျောင်းတွေက သူတို့ကိုယ်ရေကိုယ်သွေး ကောင်းစေဖို့ရာ အကျိုးရှိနိုင်ပါတယ်။ စကားပြောနဲ့ဘာသာစကားကုထုံး၊ အလုပ်အကိုင်ကုထုံး၊ ဗဟိဒ္ဓကုထုံး၊ လူမှုဆက်ဆံရေးဆိုင်ရာကုထုံးတို့လိုမျိုး နယ်ပယ်တွေနဲ့ ပူပေါင်းလုပ်ဆောင်ဖို့ လိုနိုင်ပါတယ်။ ဂီတကုထုံးကို သက်သေမပြရသေးသော်လည်း သုံးသင့်တယ်လို့ ထောက်ခံထားပါတယ်။ ဘာကြောင့်လဲဆိုတော့ လေ့လာသင်ယူမှုကို အားကောင်းစေခြင်း၊ စိတ်လှုပ်ရှားမှုတွေကို သက်သာစေခြင်းတို့ကြောင့်ဖြစ်ပါတယ်။

ဝီလီယမ် စင်ဒရုန်းလူနာနဲ့ သူ၏မိသားစုတွေအတွက် မျိုးရိုးဗီဇအကြံပေးမှုတွေက အကျိုးရှိစေမှာပါ။ အခြားကုသမှုတွေက ရောဂါလက္ခဏာတွေ သက်သာစေနိုင်ပြီး အထောက်အကူပြုနိုင်ပါတယ်။

လူနေမှုပုံစံပြောင်းလဲခြင်းနှင့် အိမ်သုံးကုထုံးများ

လူနေမှုပုံစံပြောင်းလဲခြင်းနဲ့ အိမ်သုံးကုထုံးတွေအသုံးပြုခြင်းက ဝီလီယမ် စင်ဒရုန်းကို ကုသရာမှာ ဘယ်လိုအထောက်အကူပြုနိုင်မလဲ။

အကယ်၍သင့်မှာ မေးခွန်းတွေရှိမယ်ဆိုရင် သင့်အတွက်သင့်တော်တဲ့ အဖြေရှာဖွေနိုင်ဖို့ ဆရာဝန်နဲ့ ဆွေးနွေးတိုင်ပင်သင့်ပါတယ်။

Hello Health Group ဆေးပညာအကြံပြုချက်များ၊ ရောဂါစစ်ဆေးအတည်ပြုချက်များနှင့် ကုသမှုများမပြုလုပ်ပေးပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ

Williams Syndrome

https://rarediseases.org/rare-diseases/williams-syndrome/

Accessed February 7, 2018

WHAT IS WILLIAMS SYNDROME?

https://williams-syndrome.org/what-is-williams-syndrome

Accessed February 7, 2018

What is Williams Syndrome: Symptoms, Diagnosis, Treatment, Complications

https://www.epainassist.com/genetic-disorders/what-is-williams-syndrome

Accessed February 7, 2018

စာရေးသူ ဓာတ်ပုံbadge
Phyo Wai Yan မှ ရေးသားသည်။ 11/05/2020 တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။