ရုံးစားပွဲမှာတင် ပြုလုပ်နိုင်တဲ့ လေ့ကျင့်ခန်း ၅ မျိုး

သင့်ကျန်းမာရေးအတွက်  အလုပ်လုပ်ချိန်တန်လုပ်၊ နားချိန်တန်နားဖို့ လိုပါတယ်။ နားချိန်မရှိဘဲ ကွန်ပျူတာရှေ့ စားပွဲမှာ အချိန်ကြာကြာ ထိုင်နေတာမျိုးက သင့်ကျန်းမာရေးကို ထိခိုက်စေနိုင်ပါတယ်။ ဒီတော့ လေ့ကျင့်ခန်း လုပ်တာမျိုး လုပ်ပေးဖို့ လိုပါမယ်။

လေ့လာချက်တွေအရ တစ်ပတ်ကို ၅ကြိမ် တစ်ကြိမ်ကို မိနစ်၃၀လောက် လေ့ကျင့်ခန်း ပြုလုပ်တာက သင့်ကျန်းမာရေးအန္တရာယ်ကို လျှော့ချပေးနိုင်ပါတယ်။ ဘယ်လိုမျိုး ကျန်းမာရေးပြဿနာတွေကို ရှောင်နိုင်တယ်။ ဘယ်လေ့ကျင့်ခန်းမျိုးကိုတော့ လုပ်နိုင်တယ်ဆိုတာကို သိထားခြင်းဖြင့် ကျန်းမာတဲ့ဘဝတစ်ခုကို ဖန်တီးနိုင်ပါတယ်။

ရုံးသမားများအတွက် တွေ့ရများတဲ့ ကျန်းမာရေးပြဿနာများ

ရုံးအလုပ်က အချိန်အကြာကြီးထိုင်နေရပြီး ရေရှည်မှာ ကျန်းမာရေးပြဿနာတွေကို ဖြစ်စေပါတယ်။ တစ်နေရာတည်းမှာ အချိန်အတော်ကြာထိုင်နေခြင်းက သင့်ကိုယ်ရဲ့ ဇီဝရုပ်ဖြစ်စဉ်ကို နှေးစေပါတယ်။ သွေးတွင်းသကြားပမာဏ၊ သွေးပေါင်ချိန်နဲ့ အဆီချေဖျက်ခြင်းနည်းလမ်းတွေလည်း ပြောင်းလဲသွားနိုင်ပါတယ်။

ရုံးချိန်အတွင်းလှုပ်ရှားမှုမရှိခြင်းက ကျန်းမာရေးရဲ့ အကြီးဆုံးစိန်ခေါ်မှုများထဲက တစ်ခုဖြစ်ပါတယ်။ နှလုံးရောဂါ၊ အမျိုးအစား၂ ဆီးချိုရောဂါနဲ့ စိတ်ကျန်းမာရေးချို့တဲ့တာတွေက လှုပ်ရှားမှုမရှိခြင်းကြောင့် ရလာနိုင်ပါတယ်။ အလုပ်ကို စက်ဘီးစီးသွားခြင်း၊ ဓာတ်လှေကားအစား လှေကားကိုအသုံးပြုခြင်းစတဲ့ လှုပ်ရှားမှုတွေရှိနေရင်တောင် ရုံးချိန်အတွင်း အထိုင်များတာက သင့်ကျန်းမာရေးကို ထိခိုက်လာနိုင်ပါတယ်။

ရုံးစားပွဲမှာတင် ပြုလုပ်နိုင်တဲ့ လေ့ကျင့်ခန်း ၅ မျိုး

သင့် ရုံးစားပွဲမှာတင် ပြုလုပ်နိုင်တဲ့ လေ့ကျင့်ခန်း ၅ ခုကို ပြုလုပ်ခြင်းဖြင့် ပိုမိုသွက်လက်လာပြီး ကယ်လိုရီအပိုတွေကို ချေဖျက်နိုင်တာကြောင့် ကျန်းမာပျော်ရွင်တဲ့အလုပ်ခွင်ကို ရရှိနိုင်ပါတယ်။

• နံရံမှီထိုင်ခြင်း

နံရံကို ကျောမှီပြီး ရပ်ပါ။ ဒူးကို ကွေးပြီး ကြမ်းပြင်နဲ့ ပေါင်တွေ အပြိုင်ဖြစ်သွားတဲ့အထိ ကျောကို လျှောချပါ။ ထိုင်ပြီး စက္ကန့်၃၀ကနေ ၆၀အထိ ရေပါ။ ထမင်းစားပြီး အားလပ်တဲ့အချိန်ကို အသုံးပြုနိုင်ပါတယ်။ သင့်ကယ်လိုရီတွေ ပိုမိုလောင်ကျွမ်းဖို့ဆိုရင် ဘယ်ဒူးပေါ်မှာ ညာခြေချင်းဝတ်ကို ကန့်လန့်ဖြတ်ထားပြီး ၁၅စက္ကန့်နေပါ။ ပြီးရင် ဘက်ပြောင်းပါ။

• ခြေထောက်လေ့ကျင့်ခန်း

ဒ်ီလေ့ကျင့်ခန်းက သင့်ကို အကြောပြေစေပါတယ်။ ထိုင်ခုံပေါ် ထိုင်နေစဉ်အတွင်း သင့်ခြေထောက်များကို ယှက်ပြီး မြှောက်တင်ပါ။ သင့်လက်တွေက ထိုင်ခုံလက်ရန်းပေါ်တင်ထားပြီး ခန္ဓာကိုယ်ကိုမတင်ဖို့ အပေါ်ကို တွန်းပါ။ အဲ့ဒီအနေအထားအတိုင်း ၁၀ကနေ ၂၀စက္ကန့်အထိနေပြီးနောက် ထိုင်ခုံပေါ်ကို ပြန်ဖြေလျော့ချလိုက်ပါ။ မိနစ်အနည်းငယ်အနားယူပြီး နောက်တစ်ကြိမ်ထပ်လုပ်ပါ။

• ပခုံးတွန့်ခြင်း

ဒီလေ့ကျင့်ခန်းက အလွန်ရိုးရှင်းပါတယ်။ သင့်အနေနဲ့ သင့်ပခုံးနှစ်ဖက်လုံးကို နားအထိ မြှင့်တက်အောင် ပုခုံးတွန့်ပြီး ၅စက္ကန့်နေကာ ပြန်ဖြေလျော့ပါ။ ၁၅ကြိမ်ပြန်လုပ်ပါ။ ခက်ခဲတာကို ပြုလုပ်ချင်တယ်ဆိုရင် မတ်တပ်ရပ်ရင်း လက်တစ်ဖက်စီမှာ စက္ကူအထပ်လိုက် ကိုင်ထားပြီး လုပ်နိုင်ပါတယ်။

• ခြေသလုံးလေ့ကျင့်ခန်း

ခြေထောက်ကို ကွေးရပ်ခြင်းဖြင့် ခြေသလုံးနောက်ကြွက်သားတွေကို သန်မာစေပါလိမ့်မယ်။ ထိုင်ခုံနောက်မှာ မတ်တပ်ရပ်ပြီး အမှီအတွက် တစ်ခုခုကို ကိုင်ထားပါ။ ပေါင်ဖျားလောက်ထိ ခြေဖဝါးကို နောက်ကို ကန်လိုက်ပါ။ ခြေထောက်ကို ပြန်ချလိုက်ပြီး နောက်ခြေထောက်တစ်ဖက်နဲ့ တစ်ဖန်ပြန်လုပ်ပါ။ ၁၀ခါပြုလုပ်သင့်ပါတယ်။ နေ့လည်စာနည်းနည်းပါးပါးစားပြီး ၁၀ကြိမ်ထက်မကလုပ်နိုင်ပါတယ်။

• ထိုင်ထလေ့ကျင့်ခန်း

ပထမဦးစွာ ခြေထောက်နှစ်ချောင်းပူး မတ်မတ်ရပ်ပြီး သင့်ထိုင်ခုံကို ရွှေ့လိုက်ပါ။ ပေါင်တွေနဲ့ ကြမ်းပြင်အပြိုင်ဖြစ်လုနီးပါးထိ ဒူးခေါင်းတွေကို ကွေးလိုက်ပါ။ ကွေးလိုက်တဲ့အခါမှာ ဒူးခေါင်းကွေးထာနဲ့အပြိုင် လက်မောင်းတွေကို ရှေ့ကို ဆန့်တန်းထားပါ။ ၁၅စက္ကန့်လောက် ထိန်းထားပြီး လွှတ်လိုက်ပါ။ ၄-၆ခါ ပြန်ပြုလုပ်ပါ။

လေ့ကျင့်ခန်း၅ခုက ရုံးသမားတစ်ယောက်အတွက် ကိုယ့်အလုပ်စားပွဲမှာတင်လုပ်ဖို့ လွယ်ကူပြီး သင့်တော်ပါတယ်။ သင့်မှာ အချိန်မရှိလို့ဆိုပြီး ဆင်ခြေတက်စရာမရှိတော့ပါဘူး။ သင့်အလုပ်ချိန်အတွင်းမှာတင် လုပ်နိုင်ပါတယ်။ ကြိုးစားလေ့ကျင့်ခြင်းဖြင့် ပိုမိုကျန်းမာတဲ့ဘဝကို ပိုင်ဆိုင်နိုင်ပါတယ်။ လှုပ်ရှားမှုမရှိခြင်းကို နည်းစေပြီး သင့်ခန္ဓာကိုယ်ကိုသန်မာစေပါတယ်။ အလုပ်မှာတင်  စွမ်းဆောင်နိုင်ရုံမက သင့်ဘဝအတွက်ပါ အသုံးဝင်ပါတယ်။