အဝလွန် မှုရဲ့ နောက်ဆက်တွဲကင်ဆာအမျိုးအစားများ

ဝလို့ လှလို့ပဲ ရှိတယ်ဆိုပြီး ဂုဏ်ယူဝင့်ကြွားစွာ ပြောနေတုန်းလား။ ဒါဆိုရင်တော့ ဒီအယူအဆကို ပြင်ဆင်ဖို့ လိုပါပြီ။ အကြောင်းကတော့ ဝတိုင်း မလှပါဘူး။ ရှိသင့်တဲ့ ကိုယ်အလေးချိန်ထက် များနေမယ်ဆိုရင် အဝလွန် လာမယ်။ အဝလွန် တာရဲ့ နောက်ဆက်တွဲမှာ ကျန်းမာရေးပြဿနာတွေ ရှိလာမယ်။ ဒီလိုဖြစ်လာမယ့် အထဲမှာ ကင်ဆာလည်း ပါတယ်။ ဒီတော့ အဝလွန်ရင် ဘယ်လို ကင်ဆာတွေဖြစ်နိုင်လဲဆိုတာကို ဒီဆောင်းပါးလေးထဲမှာ ဖတ်ကြည့်လိုက်ပါ။

အဝလွန် တာနဲ့ ကင်ဆာ ဆက်စပ်မှုရှိလား ?

ကင်ဆာ အများစုက အဝလွန် ခြင်းကနေ အရင်းခံလာတာ များပါတယ်။ လေ့လာမှု အချက်အလက် အများစုအရ အဝလွန် တာဟာ နောက်ပိုင်းမှာ ကင်ဆာတွေကို ဖြစ်စေနိုင်တယ်လို့ တွေ့ရှိခဲ့ရပါတယ်။

အဝလွန် တဲ့ သူတွေဟာ ခန္ဓာကိုယ်ထဲမှာ အဆီများသလို ရောဂါဖြစ်နိုင်ခြေကလည်း ပိုများပါတယ်။

အဝလွန် မှုရဲ့ နောက်ဆက်တွဲကင်ဆာအမျိုးအစားများ

အဝလွန် မှုရဲ့ နောက်ဆက်တွဲကင်ဆာအမျိုးအစားများ အထဲမှာ အခုလို ကင်ဆာတွေလည်း ပါဝင်နေပါတယ်။

• သားအိမ်ကင်ဆာ (Endometrial cancer)

အဝလွန် တဲ့ အမျိုးသမီးတွေ၊ ရှိသင့်တဲ့ ကိုယ်အလေးချိန်ထက် ပိုများနေတဲ့ အမျိုးသမီးတွေဟာ ပုံမှန် ကိုယ်အလေးချိန် ရှိတဲ့ အမျိုးသမီးတွေထက် သားအိမ်အတွင်းနံရံမှာဖြစ်တဲ့ သားအိမ်ကင်ဆာ ခံစားရနိုင်ခြေက ပုံမှန်ထက် ၇ ဆလောက်ကို ပိုများနေတာပါ။

ဆယ်ကျော်သက်အရွယ်မှာ အဝလွန်နေတဲ့ လေဒီလေးတွေဟာ အသက်အရွယ်ရလာတဲ့အခါ သားအိမ်ကင်ဆာ ခံစားရနိုင်ခြေက ပုံမှန်ထက် ပိုများနေတတ်ပါတယ်။

• အစာရေမျို ကင်ဆာ

ရှိသင့်တဲ့ ကိုယ်အလေးချိန်ထက် ပိုများနေသူတွေမှာ ပုံမှန် ကိုယ်အလေးချိန်ရှိသူတွေထက် အစာရေမျိုကင်ဆာ ဖြစ်နိုင်ခြေ ၂ ဆကနေ ၄ ဆ အထိ ပိုများနေပါတယ်။ အစာရေမျိုနံရံကင်ဆာတွေကိုလည်း ခံစားရနိုင်ပါသေးတယ်။

• အစာအိမ် ကင်ဆာ

အဝလွန် တဲ့သူတွေ၊ ရှိသင့်တဲ့ ကိုယ်အလေးချိန်ထက် ပိုများနေသူတွေဟာ အစာအိမ်ကင်ဆာ ခံစားနိုင်ခြေက ပုံမှန်ထက် ၂ ဆ ပိုများနေပါတယ်။

• အသည်း ကင်ဆာ

အဝလွန်သူတွေဟာ ပုံမှန် ကိုယ်အလေးချိန် ရှိသူတွေထက် အသည်းကင်ဆာ ဖြစ်နိုင်ခြေ ၂ ဆလောက်ပိုများနေပါတယ်။ အဝလွန်ရင် အသည်းကင်ဆာဖြစ်နိုင်ခြေများတာက အမျိုးသားရော၊ အမျိုးသမီးမှာပါ အတူတူပါပဲ။

• ကျောက်ကပ် ကင်ဆာ

အဝလွန်တဲ့ အခါ သွေးတိုးက အလွယ်တကူ ဝင်လာပါမယ်။ သွေးတိုးတာရဲ့ နောက်ဆက်တွဲက ကျောက်ကပ် ပျက်စီးပါတယ်။ ဒီလိုကနေ အချိန်ကြာလာတဲ့အခါ ကျောက်ကပ် ကင်ဆာဖြစ်လာနိုင်ပါတယ်။

အဝလွန် နေသူတွေဟာ ပုံမှန် ကိုယ်အလေးချိန် ရှိသူတွေထက် ကျောက်ကပ်ကင်ဆာ ခံစားရနိုင်ခြေ ၂ ဆလောက် ပိုများနေတာကြောင့် သတိထားစေချင်ပါတယ်။

• ဦးနှောက် အကျိတ်

အဝလွန် တာဟာ ဦးနှောက် နဲ့ ပင်မအာရုံကြောမကြီးတွေမှာ ကင်ဆာကျိတ် ဖြစ်ပေါ်ခံစားရနိုင်ခြေ များစေပါတယ်။ အဝလွန်နေသူတွေမှာ ဦးနှောက် နဲ့ ပင်မ အာရုံကြောမှာ အကျိတ်ဖြစ်နိုင်ခြေက ၁.၅ ဆ လောက်ပိုများနေပါတယ်။

• ပန်ကရိယ ကင်ဆာ

ပုံမှန် ကိုယ်အလေးချိန် ရှိသူတွေထက် အဝလွန်နေသူတွေမှာ ပန်ကရိယ ကင်ဆာ ခံစားရနိုင်ခြေက ၁.၅ ဆ လောက်ပိုများနေပါတယ်။

• အူမကြီး ကင်ဆာ

အူမကြီးကင်ဆာက အမျိုးသားတွေမှာ ဖြစ်နိုင်ခြေ ပိုများတယ်ဆိုပေမယ့် ရှိသင့်တဲ့ ကိုယ်အလေးချိန်ထက် ပိုများနေမယ်၊ အဝလွန် နေမယ်ဆိုရင်တော့ အူမကြီး ကင်ဆာဖြစ်နိုင်ခြေက ပုံမှန်ထက် ၁.၃ဆလောက် ပိုများနေပါတယ်။

• သည်းခြေအိတ် ကင်ဆာ

သည်းခြေအိတ်ကင်ဆာက ရှိနေတဲ့ ကိုယ်အလေးချိန်ပေါ် လိုက်ပြီး ခံစားရနိုင်ခြေ ကွာခြားပါတယ်။ လူတစ်ယောက်က ရှိသင့်တဲ့ ကိုယ်အလေးချိန်ထက် ပိုနေမယ်ဆိုရင် သည်းခြေအိတ် ကင်ဆာ ခံစားရနိုင်ခြေက သာမန်ထက် ၁.၂ဆ၊ အဝလွန်နေမယ်ဆိုရင် သည်းခြေအိတ်ကင်ဆာ ဖြစ်နိုင်ခြေက ပုံမှန်ထက် ၁.၆ဆ ပိုများနေပါတယ်။

ဒီကင်ဆာတွေအပြင် အဝလွန်တာက ရင်သားကင်ဆာ၊ သားဥအိမ်ကင်ဆာ၊ သိုင်းရွိုက်ကင်ဆာ ခံစားရနိုင်ခြေတွေကိုလည်း တိုးစေပါတယ်။

[embed-health-tool-bmi]