ကျန်းကျန်းမာမာ ကိုယ်အလေးချိန် လျှော့ချနိုင်ဖို့

ကိုယ်အလေးချိန်ကျဖို့ဆိုတာက Dietတွေလုပ်၊ Programတွေ ဝင်ရုံနဲ့ ရမှာ မဟုတ်ပါဘူး။ စားသောက်မှုပုံစံကို ပြောင်းတာ၊ လေ့ကျင့်ခန်း ပုံမှန်လုပ်တာ၊ စိတ်ဖိစီးမှု ဖြေလျှော့တာ စတာတွေကိုပါ လိုက်နာရမှာ ဖြစ်ပါတယ်။

ကိုယ်အလေးချိန်ချတဲ့အခါ မြန်မြန်ကျချင်ကြတာ လူတိုင်းပါပဲ။ ဒါပေမယ့် ကိုယ်အလေးချိန်ကို ဖြည်းဖြည်းမှန်မှန် ချသူတွေက ကိုယ်အလေးချိန်ကို ပိုပြီးကြာကြာထိန်းထားနိုင်တာကို တွေ့ရပါတယ်။ ကိုယ်လိုချင်တဲ့ ကိုယ်အလေးချိန်ရပြီဆိုရင် ကျန်းကျန်းမာမာ စားသောက်ပြီး လေ့ကျင့်ခန်း ဆက်လုပ်တာက ကိုယ်အလေးချိန်ကို ကြာကြာထိန်းထားနိုင်မှာဖြစ်ပါတယ်။

ကိုယ်အလေးချိန်မချခင်မှာ ကိုယ့်ရဲ့ ခန္ဓာကိုယ်ထုထည်ညွှန်းကိန်း BMIကို သိထားဖို့ လိုပါတယ်။ ဒါမှ ဘယ်လောက်ချရမလဲဆိုတာကို သိမှာပါ။ BMIကို ဒီကနေ ဒီကနေ တွက်ချက်နိုင်ပါတယ်။

ကျန်းကျန်းမာမာ ကိုယ်အလေးချိန်ချဖို့ဆိုရင် အောက်က ၁၂ချက်ကို လိုက်နာရုံပါပဲ။

(၁) အသီးအရွက်နဲ့ အသီးအနှံတွေ များများစားပါ။

ဒါတွေစားလိုက်တာနဲ့ ဗိုက်ပြည့်ပြီး သိပ်မစားနိုင်တော့တာ မဟုတ်ပါဘူး။ နေ့စဉ်စားနေကျ ကယ်လိုရီများတဲ့ အစားအစာတွေကို ဒီအသီးအရွက်တွေ၊ အသီးအနှံတွေနဲ့ အစားထိုးလိုက်တဲ့ သဘောပါ။ အသီးအရွက်နဲ့ အသီးအနှံတွေကို စားပေးတာက နာတာရှည်ရောဂါဖြစ်နိုင်ခြေကို နည်းစေပါတယ်။

(၂) ရေများများသောက်ပါ။

တစ်နေ့လုံး ခဏခဏ ရေသောက်ပါ။ ကိုယ်အလေးချိန်ကို အောင်စနဲ့ တွက်ပြီး တစ်ဝက်လောက်ရအောင် သောက်ပေးပါ။

(၃) ပမာဏလျှော့စားပါ။

ဇီဝဖြစ်စဉ်တွေ မှန်ကန်စေဖို့ တစ်နေ့ကို ၃နပ်၊ သွားရေစာ ၂−၃ကြိမ် ဒါမှမဟုတ် ၃−၄နာရီခြားပြီး ၅−၆ကြိမ် ခွဲစားပါ။ ဒါက သွေးတွင်းသကြားဓာတ်ကိုလည်း ထိန်းညှိရာရောက်ပါတယ်။

(၄) အချိန်ပိုင်း အဆာခံတာမျိုး လုပ်ပေးပါ။

လေ့လာချက်တွေအရ ၂၄ပတ်ကြာ အချိန်တို အစာငတ်ခံတာက အဝလွန်သူတွေမှာ ဝိတ်ကျစေတယ်လို့ ဆိုပါတယ်။

(၅) စားတဲ့အခါ ဗိုက်ဆာတာမခံစားရတဲ့အထိပဲ စားပါ။ ဗိုက်ပြည့်တဲ့အထိ မစားပါနဲ့။

ဗိုက်ဆာသလားဆိုတာကို စောင့်ကြည့်ပြီး ဆာတဲ့အခါ စားပါ။ ဆာတာကို မခံစားရတော့ရင် စားတာကို ရပ်လိုက်ပါ။ မနက်စာကို များများစားပြီး ညနေစာကို လျှော့စားပါ။

(၆) လေ့ကျင့်ခန်း ပုံမှန်လုပ်ပါ။

ဝိတ်ကျဖို့ဆို အစားချည်းပဲ လျှော့လို့ မရပါဘူး။ လေ့ကျင့်ခန်းပါ တွဲလုပ်ပေးဖို့ လိုပါတယ်။ ကိုယ်အလေးချိန်ကျစေမယ့် လေ့ကျင့်ခန်းတွေကို ဒီမှာဒီမှာ လေ့လာပါ။ လေ့ကျင့်ခန်းကို ပုံမှန်လုပ်ပါ။ ဒါပေမယ့် မနိုင်တဲ့လေ့ကျင့်ခန်းတွေကို ဖိအားပေးပြီး မလုပ်ပါနဲ့။ စိတ်ဖိစီးပြီး သွေးတွင်းသကြားဓာတ်တက်လာနိုင်ပါတယ်။ အပေါ့စားလေ့ကျင့်ခန်းတွေကို ပုံမှန်လုပ်သွားတာက ကြွက်သားတက်စေပြီး ဇီဝဖြစ်စဉ်ကို မြန်စေပါတယ်။ ကိုယ်အလေးချိန်လည်း ကျစေပါတယ်။

(၇) သတိကပ်ပြီး စားပါ။

ဘယ်မှာစားလဲ။ ဘယ်လိုစားလဲဆိုတာကို အာရုံစိုက်ထားပါ။ ဒါမှ အစာစားရတာကို ပျော်လာပြီး ကိုယ်အလေးချိန် ထိန်းနိုင်ပါလိမ့်မယ်။ ဒီနေ့ခေတ်မှာ အလုပ်လွန်းတာကြောင့် အလုပ်တန်းလန်းနဲ့ ထမင်းစားတာ၊ ကားပေါ်မှာ စားတာ၊ TVကြည့်ရင်း စားတာတွေ ဖြစ်လာပါပြီ။

ထမင်းစားတဲ့အခါ စားပွဲတစ်ခုခုမှာ သေချာထိုင်စားပါ။ ဖုန်းတွေ၊TVတွေ မကြည့်ဘဲ စားပါ။ ကြေညက်အောင် ဝါးပါ။ အာဟာရရှိတာတွေကို ရွေးချယ်စားပါ။ ဒါမှ နာရီအတော်ကြာ ဗိုက်ထဲမှာ တင်းတိမ်နေမှာ ဖြစ်ပါတယ်။

(၈) မနက်စာ စားဖြစ်အောင် စားပါ။

မနက်စာစားတဲ့အခါ ပရိုတင်းပါအောင်စားပါ။ ဒါက ဗိုက်ဆာစေတဲ့ ဟော်မုန်းကို ထိန်းညှိပေးတာကြောင့် ဗိုက်ပြည့်သလို ခံစားရပါလိမ့်မယ်။ မနက်စာကို အာဟာရပြည့်အောင် စားတာက တစ်နေ့တာလုံးမှာ အားပြည့်စေပါတယ်။

မနက်စာကို သေချာမစားရင် အားမရှိသလို ခံစားရပြီး နေ့လယ်ပိုင်းနဲ့ ညဘက်တွေမှာ သွားရေစာတွေ မကြာခဏ စားမိပါလိမ့်မယ်။ ဘာကြောင့်လဲဆိုတော့ ခန္ဓာကိုယ်က အစာမရှိ၊ အားမရှိဘူး တွေးနေတာကြောင့်ပါ။ ဒါကြောင့် တစ်ခုခုကို စားချင်စိတ်တွေ ပေါ်လာပါလိမ့်မယ်။

(၉) အမျှင်ဓာတ်များများစားပါ။

အမျှင်ဓာတ်တွေက ဗိုက်ပြည့်စေတာကြောင့် ကိုယ်အလေးချိန်ကိုလည်း လျော့ကျစေပါတယ်။ ဘာကြောင့်လဲဆိုတော့ အမျှင်ဓာတ်တွေက ချေရခက်တော့ အဆာပိုခံလို့ပါ။ အမျှင်ဓာတ်ကိုကောက်နှံတွေ၊ အသီးအရွက်နဲ့ အသီးအနှံတွေကနေ ရနိုင်ပါတယ်။

(၁၀) အိပ်ရေးဝဝအိပ်ပါ။

လေ့လာချက်တွေက တစ်ညကို ၅−၆နာရီထက် လျှော့ပြီး အိပ်မယ်ဆိုရင် အဝလွန်နိုင်ပါတယ်တဲ့။ ဘာကြောင့်လဲဆိုတော့ ကယ်လိုရီကနေ စွမ်းအင်အဖြစ် သိုလှောင်သိမ်းဆည်းတဲ့ အချိန်တွေ န ည်းသွားလို့ပါတဲ့။ ဒီအခါမှာ ပိုလျှံနေတဲ့ကယ်လိုရီတွေကို အဆီအဖြစ်သိမ်းလိုက်တော့ ဝလာတာ ဖြစ်ပါတယ်။

တချို့တွေက ညဘက်ဆို ဗိုက်ဆာလို့ အိပ်မပျော်ကြပါဘူး။ အစာစားချင်စိတ်ဆိုတာ တကယ်တော့ ဦးနှောက်က ဓာတ်ပစ္စည်းလေးတွေက ထိန်းချုပ်ထားတာပါ။ ဒီဓာတ်ပစ္စည်းတွေထဲမှာ gherlinလို့ခေါ်တဲ့ ဗိုက်ဆာစေတဲ့ ဓာတ်ပစ္စည်းတွေပါသလို leptinလို့ခေါ်တဲ့ တင်းတိမ်စေတဲ့ ပစ္စည်းတွေလည်း ပါပါတယ်။

အိပ်ရေးပျက်တဲ့အခါ ဒီဓာတ်ပစ္စည်းတွေ ကမောက်ကမဖြစ်သွားပြီး ညသန်းခေါင်လောက်ဆို ဗိုက်ဆာတတ်ပါတယ်။ ဒါကြောင့် ဝိတ်ချဖို့ဆို အိပ်ရေးဝအောင် အိပ်ဖို့ လိုပါတယ်။

(၁၁) စိတ်ဖိစီးမှု ထိန်းပါ။

စိတ်ညစ်တိုင်း၊ စိတ်ဖိစီးတိုင်း စားနေတာက ကိုယ်အလေးချိန်ချတာကို အနှောင့်အယှက်ဖြစ်စေပါတယ်။ စိတ်ဖိစီးတာကြာလာတဲ့အခါ သွေးထဲမှာ ကော်တီစောဟော်မုန်းတွေက အချိန်ကြာကြာရှိနေတာကြောင့် အစာစားချင်စိတ်ဖြစ်လာပြီး ပိုစားမိပါတယ်။

ဒီလို ဖြစ်နေပြီဆိုရင်တော့ စိတ်ဖိစီးမှုသက်သာအောင် ယောဂကျင့်ပါ။ တရားထိုင်ပါ။ အသက်ရှူလေ့ကျင့်ခန်းတွေ လုပ်ပါ။ ကိုယ်ဝါသနာပါတာတွေ လုပ်ပေးပါ။

ဒါက ကိုယ်အလေးချိန်ကို တိုက်ရိုက်ကျစေတာ မဟုတ်ပေမယ့် စားတဲ့သောက်တဲ့ပုံစံ မှန်အောင် ထိန်းပေးနိုင်ပါတယ်။

(၁၂) ပျော်ပျော်ရွှင်ရွှင် ဝိတ်ချပါ။

ရက်သတ္တပတ် အနည်းငယ်လောက် dietလုပ်တာ၊ လေ့ကျင့်ခန်း လုပ်လိုက်ရုံနဲ့ ကိုယ်လိုချင်တဲ့ ကိုယ်အလေးချိန် ရချင်မှ ရမှာပါ။ ဒီကောင်းမွန်တဲ့ အလေ့အကျင့်တွေကို ပုံမှန်လုပ်သွားဖို့၊ စိတ်ရှည်ဖို့ လိုပါတယ်။

လွယ်လွယ်ကူကူ လက်လျှော့လိုက်တာထက် နောက်နေ့တွေမှာ ထပ်ကြိုးစားဖို့ တိုက်တွန်းချင်ပါတယ်။ ကျန်းမာရေးနဲ့ ညီညွတ်အောင် စားသောက်နေထိုင်တာက ရေတိုအတွက်သာမက ရေရှည်အတွက်လည်း ကောင်းပါတယ်။