home

What are your concerns?

close
Inaccurate
Hard to understand
Other

သို့မဟုတ် လင့်ခ်ကူးယူမည်

မိန်းမကိုယ် ရနံ့လေး သင်းစေဖို့ ရေမွှေးတွေ ဆွတ်ကြသတဲ့လား

မိန်းမကိုယ် ရနံ့လေး သင်းစေဖို့ ရေမွှေးတွေ ဆွတ်ကြသတဲ့လား

ဘာအကြောင်းမှ မပြောခင် အရင်ဆုံး မေးချင်တာလေး ရှိပါတယ်။ မိန်းမကိုယ်က ပန်းတစ်ပွင့်လို မွှေးကြိုင်နေစရာ လိုလို့လား။ မိန်းမကိုယ်မှာ သဘာဝ အနံ့ရှိပါတယ်။ ကျန်းမာတဲ့ မိန်းမကိုယ်ဖြစ်ဖို့အတွက် တကယ်တမ်းမှာ ဘာ Product မှ မလိုအပ်ပါဘူး။ ဒီလိုပြောဖို့အတွက် မိန်းမကိုယ်ရဲ့ သဘာဝကို အရင်ရှင်းပြဖို့ လိုအပ်လာပါပြီ။

ပြင်ပက ဝင်လာတဲ့ ပိုးမွှားတွေ၊ မှိုတွေရဲ့ ရန်ကို တိုက်ထုတ်ဖို့ မိန်းမကိုယ်ထဲမှာ ကောင်းတဲ့ ဘက်တီးရီးယားတွေ နဲ့ မှိုတွေ ရှိပါတယ်။ မိန်းမကိုယ်တွင်းက ထွက်တဲ့ အချွဲတွေ၊ အရပ်စကားပြောရရင် အဖြူတွေက မိန်းမကိုယ်ကို pH ပမဏ မျှတအောင်နဲ့ မိန်းမကိုယ် သန့်ရှင်းအောင် အလိုအလျောက် သန့်စင်ပေးပြီးသားပါ။ ဒီအရာတွေကြောင့် မိန်းမကိုယ်တိုင်းမှာ ပင်ကိုယ်သဘာဝ ရနံ့ရှိပါတယ်။

ကြော်ငြာတွေကတော့ မိန်းမကိုယ်တွေဟာ ကြာညိုနံ့ပဲ သင်းရမလိုလို ဆိုကြတာပေါ့။ ဒါပေမဲ့လို့ တကယ်ကို မလိုအပ်ပါဘူး။ မိန်းမကိုယ်က ထွက်တဲ့ သဘာဝ အနံ့ဟာ ကိုယ့် ခန္ဓာကိုယ်တွင်းက ကျန်းမာရေး အခြေအနေကို ဖော်ပြနေတာမို့လို့ ဒီအနံ့တွေကို မပျောက်ပျောက်အောင် ဖျောက်လိုက်ရင် အသိနောက်ကျသွားတတ်ပါတယ်။

ဥပမာအားဖြင့် ပုံမှန်အနံ့ မဟုတ်ဘဲ ဆိုးရွားတဲ့ အနံ့ ထွက်နေရင် ပိုးဝင်တာမျိုး၊ မှိုစွဲတာမျိုး ဖြစ်နေတတ်တယ် ဆိုတာမျိုးပေါ့။ ဒီအနံ့တွေကို သတိထားပြီး ကိုယ့်ကျန်းမာရေးကို မျက်ခြည်မပြတ် အကဲခတ်နေမှသာ ကိုယ်တွင်း ကျန်းမာရေးအခြေအနေတွေကို စောစော သတိပြုမိနိုင်မှာပါ။

ဒီအနံ့တွေကို အနှောင့်အယှက်ဖြစ်တာနဲ့ပဲ အနံ့မွှေးအောင် ပြုပြင်ဖန်တီးထားတဲ့ Pads (ဂွမ်းထုပ်) တွေ၊ ရေမွှေးတွေ သုံးလိုက်မယ်ဆိုရင် မိန်းမကိုယ်တွင်းက ကောင်းတဲ့ ဘက်တီးရီးယားတွေနဲ့ မကောင်းတဲ့ ဘက်တီးရီးယားတွေကြား မျှခြေကို ပျက်စီးစေသလို ပါဝင်တဲ့ ဓာတုပစ္စည်းတွေကလည်း မိန်းမကိုယ်ရဲ့ pH မျှခြေကို ပျက်စီးစေနိုင်ပါတယ်။

တည့်တည့်ပြောရရင်တော့ အနံ့ပါတဲ့ မိန်းမကိုယ်သုံးပစ္စည်းတွေကို အသုံးပြုတာက ခန္ဓာကိုယ်ရဲ့ သဘာဝဖြစ်စဉ်တွေကို တကူးတက သွားနှောင့်ယှက်လိုက်တာပါပဲ။

ဒါဖြင့် မိန်းမကိုယ်ကို သန့်ရှင်းအောင် ဘယ်လိုထားမလဲ။

အပေါ်မှာ ပြောခဲ့သလို မိန်းမကိုယ်ဟာ သူ့ဘာသာ သန့်ရှင်းနိုင်ပါတယ်။ မိန်းမကိုယ်က ထွက်တဲ့ အချွဲတွေက ပြင်ပကလာတဲ့ ပိုးမွှားတွေနဲ့ မှိုတွေကို ရှင်းထုတ်ပစ်ပြီး ဆဲလ်သစ်တွေနဲ့ microorganisms တွေ ပါဝင်ခြင်းက မိန်းမကိုယ်ရဲ့ pH မျှခြေကို ညီစေပါတယ်။

မိန်းမကိုယ်မှန်ရင် သဘာဝအနံ့ ရှိတာ ပုံမှန်ပဲမို့ ဒီအနံ့ကို ပျောက်စေဖို့၊ အနံ့မွှေးဖို့ ရေမွှေးတွေ၊ အနံ့ပါတဲ့ ဆပ်ပြာတွေ မလိုပါဘူး။ ဒါတွေက မိန်းမကိုယ် ကျန်းမာရေးကို တကယ်ပဲ ထိခိုက်စေနိုင်ပါတယ်။

ဒါကြောင့် မိန်းမကိုယ်ကို သန့်ရှင်းရေးလုပ်မယ်ဆိုရင် ဆရာဝန်ရဲ့ ညွှန်ကြားမှု မရှိမချင်း ရိုးရိုးရေနဲ့သာ သန့်စင်ပေးနိုင်ပါတယ်။ ဆေးကြောတဲ့အခါမှာလည်း အတွင်းထဲထိ နှိုက်ဆေးစရာ မလိုအပ်ဘဲ မိန်းမကိုယ်နှုတ်ခမ်းသား နဲ့ ပြင်ပ နေရာတွေကိုသာ ဆေးကြောပေးရင် လုံလောက်ပါပြီ။ မိန်းမကိုယ်ကို အတွင်းထဲထိ သန့်စင်ဖို့ဆိုတဲ့ ပစ္စည်းတွေကို ဝယ်ယူသုံးစွဲဖို့လည်း မလိုအပ်ပါဘူး။

အဲဒီလို အထဲထိ ဆေးတာက ကောင်းတဲ့ ဘက်တီးရီးယားတွေ၊ မှိုတွေကို ဖယ်ရှားပစ်သလို ဖြစ်စေတာမို့ ပိုးဝင်တာတွေ ဖြစ်တတ်ပါတယ်။ ပြီးတော့ အတွင်းသား နုနုထဲကို ဘာမှန်းမသိတဲ့ ဆေးတွေ ထည့်တာမျိုးလည်း မလုပ်သင့်ပါဘူးနော်။

ရာသီလာနေချိန်မှာလည်း အထူးတလည် ဆပ်ပြာတွေသုံးပြီး ဆေးတာမျိုး မလုပ်ပါနဲ့။ ရေနဲ့ပဲ လုံလောက်ပါတယ်။

အတွင်းခံတွေကို သေချာ လျှော်ဖွပ်ပြီး နေရောင်အောက်မှာ လှမ်းပါ။ အရှက်တရားတွေ ကြီးပြီး အရိပ်ထဲ လှမ်းတာ၊ ထဘီ (သို့) အခြား အဝတ်တစ်ခုခု အုပ်ပြီး လှမ်းတာမျိုးတွေ မလုပ်ပါနဲ့။

ပိုးတွေ ပေါက်ဖွားပြီး မိန်းမကိုယ်ကို ထိခိုက်စေနိုင်ပါတယ်။ နေရောင်ထဲမှာ ခြောက်အောင်လှမ်း၊ မီးပူသေချာ တိုက်ပြီးမှ ဝတ်ပါ။

ခြုံပြောရမယ်ဆိုရင် မိန်းမကိုယ်နဲ့ ပတ်သက်တဲ့ ပစ္စည်းတွေ ဝယ်ယူတဲ့အခါ

  • ဓာတုပစ္စည်းတွေ ပါဝင်တာကို ရှောင်ပါ။
  • အနံ့ပါတဲ့ ဆပ်ပြာတွေနဲ့ ဆေးကြောတာမျိုး မလုပ်ပါနဲ့။
  • မိန်းမကိုယ် အတွင်းထဲထိ နှိုက်မဆေးပါနဲ့။
  • Tampon နဲ့ Pad တွေ သုံးတဲ့အခါ အနံ့ပါတာတွေကို ရှောင်ပြီး စုပ်ယူမှုအား အနည်းဆုံး Tampon ကိုသာ ရွေးချယ်ပါ။ (အကြာကြီး အထဲမှာ ထည့်ထားရင်လည်း ပါဝင်တဲ့ ဂွမ်းတွေနဲ့ မိန်းမကိုယ် အသားနုတွေ ပွတ်တိုက်ပြီး ဒဏ်ဖြစ်စေနိုင်ပါတယ်။)
  • ညအိပ်တဲ့အခါ Tampons တွေထက် Pad ကို သုံးပါ။
  • Tampon တစ်ခုကို ၈ နာရီထက် ပိုမထားပါနဲ့။
  • ဖြစ်နိုင်ရင် Menstrual Cups တွေ သုံးကြည့်ပါ။

Wathun Myet Chal

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

စာရေးသူ ဓာတ်ပုံbadge
Dr. Thiha Phyo Myint မှ ရေးသားသည်။ 26/11/2020 တွင် ပြန်လည်ပြင်ဆင်ခဲ့သည်။
Dr. Phyo Wai Lynn မှ အချက်အလက် စစ်ဆေးထားပါသည်။