ကိုယ်ခံအား မြှင့်တင်ပေးမယ့် အာဟာရများ
အသားဓာတ်က အနာကျက်စေဖို့နဲ့ ပြန်ပြီးနာလန်ထဖို့ အထောက်အကူပြုပါတယ်။ ဒါကြောင့် အသားဓာတ်ပါဝင်မှုများတဲ့ အနီရောင် အသား၊ အဖြူရောင်အသား၊ ပင်လယ်စာ၊ ပဲအမျိုးမျိုးကို စားပေးရပါမယ်။
ဗီတာမင်အေက အရေပြား၊ အစာအိမ်နဲ့ အူလမ်းကြောင်း၊ အသက်ရှူလမ်းကြောင်းမှာ ရှိတဲ့ ခုခံအားကို တက်စေတာကြောင့် အပြင်က ရောဂါပိုးတွေ အလွယ်တကူ ဝင်မလာအောင် တားပြီးသားဖြစ်သွားပါတယ်။ ဗီတာမင်အေ ကြွယ်ဝတဲ့ အစားအစာတွေကတော့ ကန်စွန်းဥ၊ မုန်လာဥနီ၊ ဟင်းနုနွယ်၊ ဗီတာမင်အေ ဖြည့်စွက်ထားတဲ့ အာဟာရမှုန့်တွေ၊ cerealတွေပဲ ဖြစ်ပါတယ်။
ဗီတာမင်စီက ပဋိဇီဝပစ္စည်းတွေကို ထွက်စေတာကြောင့် ရောဂါဝင်လာတာနဲ့ တိုက်ဖို့ အဆင်သင့် ဖြစ်နေအောင် ပြင်ဆင်ထားပြီးသား ဖြစ်တာပေါ့။ ဒါ့ပြင် နာမည်ကြီး ဓာတ်တိုးဆန့်ကျင်ပစ္စည်းလည်း ဖြစ်ပါသေးတယ်။ ရနိုင်တဲ့ အစားအစာတွေကတော့ လိမ္မော်သီး၊ စပျစ်သီး၊ ခရမ်းချဉ်သီးနဲ့ ဗီတာမင်စီ ထည့်သွင်းထားတဲ့ အစားအစာ (ဥပမာ cereal)တွေကနေ ရနိုင်ပါတယ်။
ဓာတ်တိုးဆန့်ကျင်သတ္တိရှိတဲ့ ဗီတာမင်အီးဟာ ခုခံအားဆဲလ်တွေ မပျက်စီးအောင် ကာကွယ်ပေးနိုင်ပါတယ်။ ခုခံအားဆဲလ်တွေ ကောင်းနေမှ ရောဂါကို တိုက်ထုတ်နိုင်မှာပါ။ ဗီတာမင်အီးကို နေကြာဆီ၊ ဗာဒံစေ့၊ မြေပဲထောပတ်တွေကနေ ရနိုင်ပါတယ်။
ဇင့်က ခုခံအားစနစ် ကောင်းကောင်းအလုပ်လုပ်နိုင်ဖို့နဲ့ အနာကျက်မြန်စေဖို့ ကူညီပေးပါတယ်။ ဇင့်ဓာတ်ကို အသား၊ ပင်လယ်စာ၊ ပဲတွေ၊ အစေ့အဆန်တွေကနေ ရနိုင်ပါတယ်။
တခြားလိုအပ်တဲ့ အာဟာရတွေကတော့
ဗီတာမင် B6၊ B12၊ အဖောလိတ်၊ ဆီလီနီယမ်နဲ့ သံဓာတ်တို့ပဲ ဖြစ်ပါတယ်။ သူတို့တွေက ခုခံအားကို ထက်စေနိုင်တဲ့ အာဟာရတွေပါပဲ။
အစားအစာ တစ်မျိုးထဲကနေ ပြီးပြည့်စုံတဲ့ အာဟာရကို မရနိုင်ပါဘူး။ မျှတစုံလင်အောင် စားပေးရမှာပါ။ ကျန်းမာရေး အခြေအနေကြောင့်ဖြစ်ဖြစ်၊ အသက်ကြီးလို့ဖြစ်ဖြစ် စားဖို့ အခက်အခဲ ရှိတယ်ဆိုရင် ဆရာဝန်နဲ့ တိုင်ပင်ပြီး ဖြည့်စွက်အာဟာရတွေ စားတာ၊ အားဆေးတွေ သောက်တာမျိုး လုပ်လို့ရပါတယ်။
ကိုယ်ခံအားတက်စေဖို့ အာဟာရပြည့်အောင် စားတာအပြင် အိပ်ရေးဝဝအိပ်တာ၊ ကိုယ်လက်လှုပ်ရှားမှုလုပ်တာ၊ ဆေးလိပ်ရှောင်တာ၊ လူထူတဲ့ နေရာမသွားတာ၊ မကြာခဏ လက်ဆေးတာတွေနဲ့လည်း ရောဂါပိုးကို ကာကွယ်နိုင်ပါတယ်။
Hello Health Group သည် ဆေးပညာ အကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။