home

What are your concerns?

close
Inaccurate
Hard to understand
Other

သို့မဟုတ် လင့်ခ်ကူးယူမည်

COVID ကာလ အိပ်မပျော်တာ ဟော်မုန်းတစ်ခုခုဖောက်ပြန်နေလို့များလား

COVID ကာလ အိပ်မပျော်တာ ဟော်မုန်းတစ်ခုခုဖောက်ပြန်နေလို့များလား

ကိုဗစ်ကာလမှာ ညစောစောအိပ်တဲ့သူရှိရင် လက်ညှိုးထောင်။ သေချာတာကတော့ စာရေးသူတော့ မပါဘူးဗျို့။ ကဲ ဘဝတူလေးတွေနဲ့ နည်းနည်းလောက် ရင်ဖွင့်လောက်အောင်။ ကိုဗစ်ကာလမှာ အိပ်ရေးမဝဘူး မဟုတ်တောင် အိပ်ချိန်တွေတော့ ကမောက်ကမဖြစ်လာတယ်ဟုတ်။ လူကသာ မြန်မာနိုင်ငံမှာ အိပ်ချိန်တွေက ဥရောပ ဖြစ်နေပြီ။ ဒါဟာ ဘာကြောင့်များပါလိမ့်။

အိပ်မပျော်ရခြင်း အကြောင်းရင်းကို အဖြေရှာကြည့်တဲ့အခါ

ညဘက်တွေ အိပ်မပျော်တာ ကိုဗစ်စကတည်းက ဆိုပါတော့။ ကိုယ်တစ်ယောက်တည်းလည်း မဟုတ်။ သူများတွေလည်း ဒီလိုပဲတဲ့။ ဘာကြောင့်များလဲလို့ အဖြေရှာကြည့်တဲ့အခါ

  • မနက်အလုပ်မသွားရလို့။ အလုပ်မသွားရတော့ စောစောထစရာမလို။ စောစောမထရတော့ စောစောအိပ်စရာမလိုလို့ ထင်တာ။
  • အိမ်ကနေပဲ အလုပ်လုပ်တာ။ အိမ်ကနေ အလုပ်လုပ်တော့ မနက်အလုပ်သွားဖို့ ပြင်တဲ့အချိန်တွေ၊ ကားစီးရတဲ့အချိန်တွေက အိပ်ချိန်အဖြစ်ပြောင်းသွားတယ်လေ။ ဒါကြောင့် ညဘက် စောစော မအိပ်တော့တာ။
  • စိုးရိမ်ပူပန်စိတ်တွေ များနေတာ။ တစ်နေ့ လူနာစာရင်း၊ သေဆုံးစာရင်းတွေကို ကြည့်ပြီး စိတ်မချမ်းသာဘူး။ စီးပွားရေးကိစ္စတွေ၊ ပညာရေးကိစ္စတွေအတွက် ပူပန်နေတယ်။ အိမ်နားမှာ လူနာခေါ်သွားရင် ကိုယ်ရောဘယ်နေ့ ကူးသွားမလဲဆိုပြီး ကြောက်နေရတယ် စတဲ့ စိုးရိမ်စိတ်တွေကြောင့် အိပ်မပျော်တာ။
  • ဖုန်းတွေ သုံးတာ။ အချိန်တော်တော်များများ အပိုထွက်လာတာကြောင့် ရုပ်ရှင်ကြည့်တာ၊ ဂိမ်းဆော့တာတွေလည်း ပိုများပါတယ်။ မနက်မှာ အလုပ်လုပ်နေတော့ အားတဲ့ ညပိုင်းလေးတွေမှာ အပန်းဖြေကြတာပေါ့။ ဒါပေမယ့် တစ်ပိုင်းဆိုပြီး တစ်seasonလုံး ပြီးသွားတာ၊ တစ်ပွဲဆိုပြီး မိုးလင်းသွားတာတွေလည်း မနည်းပါဘူး။
  • ကျန်းမာရေး အခြေအနေကြောင့်။ လူကြီးတွေကျတော့ ညဘက်မှာ ကိုက်တာ၊ ခဲတာ၊ ရင်ပူတာ၊ မောတာ စတဲ့ ပြဿနာတွေကြောင့် ညဘက်ဆို အိပ်မပျော်တတ်ပါဘူး။ မနက်ကျတော့လည်း အချိန်တန်ပြန်ထတာကြောင့် သူတို့တွေလည်း အိပ်ရေးပျက်ပါတယ်။

ဟော်မုန်းကြောင့်ရော မဖြစ်နိုင်ဘူးလား။

ဒါကလည်း ထည့်စဉ်းစားရမယ့် အချက်ပါပဲ။ ဟော်မုန်းဆိုတာမျိုးက အကောင်အထည်သာ မမြင်ရတာ။ ခန္ဓာကိုယ်ရဲ့ အလုပ်အတော်များများကို ချုပ်ကိုင်နေတဲ့ ဆရာကြီးကိုး။ သူရော အိပ်စက်ခြင်းမှာ တစ်နည်း တစ်ဖုံ မပါနိုင်ဘူးလားလို့ စဉ်းစားကြည့်လိုက်တဲ့အခါ . . .

အိပ်စက်ခြင်းကို ထိန်းချုပ်ထားတဲ့ ဟော်မုန်း

ဦးနှောက်ထဲမှာ pineal glandဆိုတဲ့ ဂလင်းတစ်မျိုးရှိပါတယ်။ သူကနေ အိပ်စက်ခြင်းကို ထိန်းချုပ်ထားတဲ့ မယ်လတိုနင်ဆိုတဲ့ ဟော်မုန်းထုတ်ပေးပါတယ်။ မနက်မိုးလင်းလို့ အလင်းရောင်ထွက်လာပြီဆိုရင် pineal glandကနေ မယ်လတိုနင်ထုတ်တာကို ရပ်လိုက်ပါတယ်။ နောက်ထပ် အိပ်စက်ခြင်းမှာ အရေးပါတဲ့ အဒီနိုဆင်းဆိုတဲ့ ဓာတ်ပစ္စည်းကတော့ နိုးနေတဲ့အချိန်မှာ ဖြည်းဖြည်းချင်း များနေပါတယ်။

ညရောက်လို့ မှောင်ပြီဆိုရင်တော့ မယ်လတိုနင်တွေ များလာပါတယ်။ အဒီနိုဆင်းတွေကလည်း တစ်နေကုန်ထွက်နေတာ တော်တော်လေး စုမိဆောင်းမိဖြစ်နေပါပြီ။ ဒါဆိုရင်တော့ အိပ်ငိုက်ပြီး အိပ်ဖို့ အဆင်သင့်ဖြစ်နေပါပြီ။

ညဘက်မှာ မီးဖွင့်ထားမယ်ဆိုရင်တော့ မယ်လတိုနင်မထွက်လို့ ကောင်းကောင်းအိပ်ပျော်မှာ မဟုတ်ပါဘူး။ ကဖင်းပါတာတွေ သောက်မယ်ဆိုရင်လည်း အဒီနိုဆင်းအလုပ်လုပ်ရမယ့်နေရာတွေကို သွားပိတ်ထားလို့ အိပ်လို့ရမှာ မဟုတ်ပါဘူး။ အိပ်ပျော်သွားပြီဆိုရင်တော့ အဒီနိုဆင်းက တဖြည်းဖြည်း ပြန်နည်းသွားပါတယ်။ ဒါကြောင့် မအိပ်ခင်မှာ မယ်လတိုနင်တို့ အဒီနိုဆင်းတို့ မထွက်စေတဲ့ အကြောင်းအရာတွေကို ရှောင်ကြဉ်ရပါမယ်။

ဒါကြောင့် တချို့က အိပ်ပျော်အောင်ဆိုပြီး မယ်လတိုနင် ဖြည့်စွက်ဆေးတွေ သောက်ကျပါတယ်။ ဒါက ဆေးပမာဏနဲ့ သောက်ရမယ့် အချိန်လွဲသွားရင် ပိုဆိုးနိုင်တဲ့အတွက် ဆရာဝန်နဲ့ အရင်တိုင်ပင်ဖို့ အကြံပေးလိုပါတယ်။

အိပ်ရေးပျက်ရင်ရော ဟော်မုန်းတွေ ကမောက်ကမဖြစ်မှာလား။

အိပ်စက်ခြင်းက အစာစားစေတဲ့ ဟော်မုန်းတွေ ဖြစ်တဲ့ ဂရီလင်နဲ့ လက်ပ်တင်ကို ထိန်းချုပ်ပေးပါတယ်။ အိပ်ရာဝင်တာနောက်ကျလေလေ၊ ဒီဟော်မုန်းတွေထွက်ပြီး စားမိလေလေပါပဲ။ ဒါကြောင့် အိပ်ရေးပျက်တဲ့သူတွေ ဝတယ်ဆိုတာ တကယ်ပါပဲ။

  • အိမ်သာခဏခဏထသွားတယ်။

ပုံမှန်လူတစ်ယောက် ညအိပ်ရင် ၈နာရီလုံးလုံး တချိုးတည်းအိပ်တာ ဘာကြောင့်လည်းဆိုရင် အိပ်ချိန်မှာ ဆီးမသွားစေတဲ့ ဟော်မုန်း (ADH)ကို ထုတ်ပေးလို့ပါ။ မအိပ်ရင် ဒီဟော်မုန်းမထွက်တာကြောင့် ညဘက်ဆို ရှူးထထပေါက်နေရပါတယ်။ စားလိုက် သောက်လိုက် ပေါက်လိုက်ပေါ့။

  • ကြီးထွားဟော်မုန်းတွေ မထွက်တော့ဘူး။

အိပ်နေတဲ့အချိန်ဆို ကြီးထွားဟော်မုန်းတွေထွက်လာပြီး ခန္ဓာကိုယ် ကြီးထွားဖို့ရော၊ ပျက်စီးနေတဲ့ ဆဲလ်တွေကို ပြုပြင်ဖို့ရောလုပ်ပေးပါတယ်။ ဒီအချက်တွေက ကလေးတွေမှာ ပိုအရေးကြီးပါတယ်။ အရပ်တက်ရမယ့်အရွယ်၊ ကိုယ်အလေးချိန်တက်ရမယ့်အရွယ် ကလေးတွေက အိပ်ရေးပျက်ရင် ညပ်ပြီး ကျန်ခဲ့တတ်ပါတယ်။

  • သွေးတွင်းသကြားဓာတ်ကို မထိန်းနိုင်တော့ဘူး။

အိပ်တဲ့အချိန်မှာ ကော်တီစောနဲ့ အင်ဆူလင်တွေထွက်ပြီး သွေးတွင်းသကြားဓာတ်ကို ချပေးပါတယ်။ ဒါကြောင့် မနက်မိုးလင်းရင် ဗိုက်ဆာတာပေါ့။ အိပ်ရေးပျက်တဲ့သူတွေကတော့ အင်ဆူလင် မထွက်လို့ သွေးတွင်းသကြားဓာတ်တွေ တက်နေမှာပါ။ ဆီးချိုသမားတွေဆို ဒီအချက်ကို သတိထားရပါမယ်။ ဆေးတွေ သောက်နေပေမယ့် မနက်ပိုင်းမှာ ဆီးချိုမကျဘူးဆိုရင် အိပ်ရေးပျက်သလားဆိုတာ စဉ်းစားရပါမယ်။

  • အမျိုးသားတွေမှာ လိင်စိတ်လျော့နည်းစေတယ်။

အိပ်နေတဲ့အချိန်ဆိုရင် တက်စတိုစတီရုန်းတွေ စထွက်လာပြီး ၃နာရီလောက်နေရင် အမြင့်ဆုံးကို ရောက်ပါတယ်။ အမျိုးသားတွေ မနက်အိပ်ရာထစမှာ လိင်စိတ်တက်ကြွတာ ဒါကြောင့်ပါ။ အပြန်အလှန်အားဖြင့် အိပ်ရေးပျက်ရင်တော့ လိင်စိတ်နည်းသွားမှာ ဖြစ်ပါတယ်။

ဒါကြောင့် ကိုဗစ်ကာလမှာ အိပ်ရေးပျက်တာက ကျန်းမာရေးကို ထိခိုက်စေနိုင်ပါတယ်။ ဟော်မုန်းတွေ ကမောက်ကမဖြစ်ရုံသာမက ခုခံအားကျတာ၊ မနက်နိုးလာရင် စိတ်မကြည်တာ၊ ယုတ်စွအဆုံး အသားအရေထိခိုက်တာတွေအထိ ဖြစ်တတ်လို့ အိပ်ချိန်ကို ဂရုစိုက်ပေးဖို့ အကြံပြုလိုပါတယ်။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

စာရေးသူ ဓာတ်ပုံbadge
Dr. Htet Htet Zaw Win မှ ရေးသားသည်။ 16/10/2020 တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။