အခုတလော ကမ္ဘာ့နိုင်ငံတွေမှာ BA.5 လို့ခေါ်တဲ့ ကူးစက်မြန် အိုမီခရွန် ကိုဗစ်မျိုးကွဲ တစ်ရပ် ကူးစက်မှုတွေ ပြန်လည်မြင့်တက်လာပါပြီ။ မြန်မာနိုင်ငံမှာရော အာရှဒေသတွင်း နိုင်ငံတွေမှာပါ ဖြစ်ပွားကူးစက်မှုတွေ ရှိနေတာပါ။ ဒီတော့ အားလုံး စိတ်ပူနေမယ့် Omicron မျိုးကွဲ BA.5 ရဲ့ လက္ခဏာတွေ နဲ့ သိထားသင့်တဲ့ အချက်အချို့ကို ပြောပြပေးချင်ပါတယ်။
ကူးစက်မြန် အိုမီခရွန် ကိုဗစ်မျိုးကွဲ BA.5 နဲ့ ပတ်သက်လို့ ဘာတွေ သိထားသင့်သလဲ
ဇူလိုင်လ ၂ ရက်နေ့ကအထိ ကောက်ယူခဲ့တဲ့ စစ်တမ်းတွေအရ အမေရိကန်မှာ စစ်ဆေးတွေ့ရှိခဲ့ရတဲ့ ကိုဗစ်ဗိုင်းရပ်စ် ကူးစက်မှုရဲ့ ၅၄ ရာခိုင်နှုန်းက BA.5 မျိုးစိတ်ကူးစက်ခံရတာ ဖြစ်ပြီး ၁၇ ရာခိုင်နှုန်း ကျော်ကျော်လောက်ကပဲ BA.4 မျိုးစိတ် ကူးစက်ခံရတာပါ။
အခုနောက်ပိုင်းမှာ အိုမီခရွန်ကို တကျော့ပြန် ဖြစ်ပွားစေခဲ့တဲ့ BA.4 နဲ့ BA.5 မျိုးကွဲတွေဟာ လက်ရှိ ကိုဗစ်ကာကွယ်ဆေးတွေမှာပါတဲ့ ပဋိပစ္စည်းတွေကို BA.1 အိုမီခရွန် မျိုးကွဲထက် ကောင်းကောင်းကျော်ဖြတ်နိုင်ပါတယ်။ နောက်တစ်ချက်ကတော့ ဒီမျိုးစိတ် ၂ ခုက BA.2 ထက် ကာကွယ်ဆေးကို ခုခံနိုင်စွမ်း ၄ ဆကျော် ပိုများတာကို ကနဦး လေ့လာချက်တွေမှာ တွေ့ရတယ်လို့ Duke University Medical Center, Human Vaccine Institute က ပါမောက္ခ David Montefiori က ဆိုပါတယ်။
လက်ရှိမှာ Omicron မျိုးကွဲ BA.4 နဲ့ BA.5 တို့က အရင်ကာလတွေက ကူးစက်ဖြစ်ပွားခဲ့တဲ့ အိုမီခရွန် မျိုးကွဲနေတွေနေရာကို ဇူလိုင်လ အကုန်ပိုင်းလောက်မှာ လုံးဝ အစားထိုးရယူသွားဖွယ်ရှိနေတယ်လို့ ဥရောပဆေးဝါးအေဂျင်စီက တာဝန်ရှိသူ တစ်ဦးက ဆိုပါတယ်။
အခုထိတော့ ဒီအိုမီခရွန် မျိုးစိတ်တွေက အရင်က ဗိုင်းရပ်စ်တွေထက် ပိုမိုဖျားနာစေနိုင်တယ် လို့ အထောက်အထား မတွေ့ရပါသေးပါဘူး။ အသက်အရွယ်ကြီးရင့်သူတွေမှာ ကူးစက်မှု များပြားနေတာကြောင့် သူတို့တွေမှာ ရောဂါပြင်းထန်နိုင်သလားလို့ စဉ်းစားစရာ ဖြစ်လာပါပြီ။
သိထားသင့်တဲ့ Omicron မျိုးကွဲ BA.4 နဲ့ BA.5 ရဲ့ လက္ခဏာတွေ
အခုချိန်ထိ စစ်ဆေးသိရှိရတဲ့ BA.4 နဲ့ BA.5 ကူးစက်ခံရတဲ့သူတွေမှာ အများဆုံး တွေ့ရှိရတဲ့ လက္ခဏာတွေကတော့
- နှာစေးတာ
- လည်ချောင်းနာတာ
- ခေါင်းကိုက်
- အဆက်မပြတ် ချောင်းဆိုးနေတာ
- အဖျားရှိတာ [လူတိုင်းမှာတော့ မဟုတ်ပါဘူး]
- ကြွက်သားတွေ နာကျင်တာ
- ခြေကုန်လက်ပမ်းကျတာတွေပါ။
အရင်က ကိုဗစ်ဖြစ်ဖူးသူတွေ BA.5 ကို ဘယ်လိုကာကွယ်ကြမလဲ
အိုမီခရွန် မျိုးကွဲတွေထဲမှာ BA.1 နဲ့ BA.2 တို့က တော်တော်လေး ကွာခြားပေမယ့် BA.2၊ BA.4 နဲ့ BA.5 တို့ရဲ့ ကိုယ်ခံအားဆဲလ်တွေထဲကို ဝင်ရောက်ကူးစက်ပုံက သိပ်ကွာခြားတာမျိုး မရှိတာကြောင့် BA.2 ကူးစက်ခံရဖူးသူတွေက အခုလက်တလောမှာ ဖြစ်ပွားနေတဲ့ BA.4 နဲ့ BA.5ကို အနည်းငယ်လောက်တော့ ကာကွယ်နိုင်စွမ်း ရှိမှာပါ။
လက်ရှိအခြေအနေ အထိမှာ BA.4 နဲ့ BA.5 ရဲ့ ကူးစက်နှုန်းက အရင် အိုမီခရွန် မျိုးကွဲတွေထက် ကူးစက်နှုန်း မြန်တယ်ဆိုတာကို တွေ့ရှိပေမယ့် ရောဂါအနေအထား ပိုမိုပြင်းထန်တယ်လို့တော့ မတွေ့ရှိရသေးပါဘူး။
အခုလက်ရှိမှာ ကူးစက်ဖြစ်ပွားနေတဲ့ BA.5 ဟာ ကိုဗစ်ဗိုင်းရပ်စ်ရဲ့ တိုးတက်မှုဖြစ်စဉ် တစ်ရပ်သာဖြစ်ပါတယ်။ Delta က ကိုဗစ်ရဲ့ နောက်ဆုံး မျိုးစိတ် မဟုတ်ခဲ့သလို Omicron ကလည်း ကိုဗစ်ရဲ့ နောက်ဆုံးမျိုးစိတ် ဖြစ်မှာ မဟုတ်ပါဘူး။ သူ့ရဲ့နောက်မှာလည်း အသစ်အသစ်သော ကိုဗစ်မျိုးစိတ်တွေ ထွက်ပေါ်လာနိုင်ခြေ ရှိနေပါသေးတယ်။
အိုမီခရွန် BA.5 အန္တရာယ်ကနေ ဘယ်လို ကာကွယ်ကြမလဲ
အိုမီခရွန် BA.5 ဟာလည်း ကိုဗစ်ဗိုင်းရပ်စ်ပဲ ဖြစ်တာကြောင့် အရင်ကိုဗစ် ဗိုင်းရပ်စ်တွေကို ကာကွယ်ခဲ့တဲ့ နည်းလမ်းတွေအတိုင်း
- ပါးစပ်နဲ့ နှာခေါင်းစည်း [မတ်ခ်] တပ်ပါ
- လက်ဆေးပါ
- တစ်ကိုယ်ရေ သန့်ရှင်းရေး ဂရုစိုက်ပါ
- အိပ်ရေးဝဝ အိပ်ပါ
- အာဟာပြည့်ဝအောင် စားပါ
- ကာကွယ်ဆေး ထိုးပါ
- ထပ်ဆောင်း ကာကွယ်ဆေး ထိုးပါ
- သံသယရှိရင် သီးသန့်ခွဲနေပါ
- တစ်ဦးနဲ့ တစ်ဦး ခပ်ခွာခွာနေပါ။
အထူးသဖြင့် အသက် ၆၀ အထက် လူကြီးတွေကို ထပ်ဆောင်း ကာကွယ်ဆေးတွေ ထိုးနှံပေးပါ။ လူထူတဲ့နေရာတွေကို မဖြစ်မနေ သွားရမယ်ဆိုရင် ဘိုးဘိုးဘွားဘွားတို့ကို N95၊ KN95 နဲ့ KF94 တို့လိုမျိုး လုံခြုံစိတ်ချရတဲ့ မတ်ခ်တွေကို တပ်ပေးပါ။
သတိထားစောင့်ကြည့်ရမယ့် BA2.75
ဒီအိုမီခရွန် မျိုးစိတ်သစ်က လက်ရှိမှာ ဖြစ်ပွားနေတဲ့ ဗိုင်းရပ်စ်မျိုးစိတ်တွေထက် ပိုပြီး ကူးစက်မြန်နိုင်တယ်လို့ ယူဆထားကြပါတယ်။ အခြား အိုမီခရွန် မျိုးစိတ်တွေထက် ပြင်းထန်နိုင်မလားဆိုတာကိုတော့ တိတိကျကျ မသိရသေးပါဘူး။ ကောက်ချက်ချဖို့ကတော့ စောပါသေးတယ်။ မျိုးဗီဇ အဆင့်ဆင့်ပြောင်းလဲထားတာကြောင့် ကိုယ်ခံအားဆဲလ်တွေကို အလွယ်တကူရှောင်တိမ်းနိုင်မှာကိုတော့ စိုးရိမ်စရာပါ။
[embed-health-tool-bmi]
