home

သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

နားထဲတစ်ခုခုဝင်ခဲ့ရင်

နားထဲတစ်ခုခုဝင်ခဲ့ရင်

နေ့စဉ်လှုပ်ရှားမှုတွေတိုင်းအတွက်မြင်ဖို့၊ကြားဖို့ကမဖြစ်မနေလိုပါတယ်။ လူတစ်ယောက်အနေနဲ့ လုပ်ငန်းဆောင်တာတွေကိုကောင်းစွာလုပ်ကိုင်နိုင်ဖို့ဆိုရင် အမြင်အာရုံ၊ အကြားအာရုံနဲ့ အနံ့ခံအာရုံ ၃ ခုစလုံးကောင်းမှဖြစ်မှာပါ။ ဒီတော့ မျက်စိနား၊နှာခေါင်း တို့ကိုသေချာစွာဂရုစိုက်ဖို့လိုပါမယ်။ အမြင်အာရုံဆုံးရှုံးတဲ့အခါမြင်သင့်တာတွေနဲ့ လှပတဲ့မြင်ကွင်းတွေကို မမြင်တွေ့ရတော့တာမျိုးဖြစ်နိုင်သလို အကြားအာရုံဆုံးရှုံးတဲ့အခါမှာလည်း သာယာငြိမ့်ညောင်းတဲ့အသံတွေနဲ့ ကြားသင့်တဲ့ အသံတွေကိုကြားခွင့်မရမှာပဲဖြစ်ပါတယ်။

တစ်ခါတလေမှာ အခန့်မသင့်လို့ဖြစ်ဖြစ်၊ မတော်တဆဖြစ်ဖြစ် နား၊မျက်လုံးနဲ့ နှာခေါင်းထဲကိုပြင်ပအရာတွေဝင်ရောက်တတ်ပါတယ်။ အထူးသဖြင့် ကလေးလေးတွေမှာပိုအဖြစ်များပါတယ်။ဆော့ရင်းနဲ့ဖြစ်ဖြစ် စိတ်ထင်သလိုကောက်ထည့်လိုက်တာ၊ရှုရှိုက်လိုက်တာတွေကြောင့် နားနဲ့ နှာခေါင်းထဲကိုပြင်ပအရာတွေဝင်ရောက်နိုင်ပါတယ်။ ဒီလိုဖြစ်တဲ့အခါ မိဘတွေက စိုးရိမ်တကြီးနဲ့ထုတ်မိတတ်ကြပါတယ်။ အဆင်ပြေပြေမထုတ်နိုင်ရင် ထိခိုက်မှုကြီးသွားနိုင်ပါတယ်။ နားဆိုရင်လည်း အကြားအာရုံချို့ယွင်းသွားတာမျိုးတွေအထိတောင်ဖြစ်နိုင်ပါတယ်။

နားထဲကို တစ်ခုခုဝင်တဲ့အခါ

နားထဲကိုပြင်ပကအရာဝတ္ထုတွေ၊ပိုးကောင်လိုမျိုးအရာတွေ ဝင်တဲ့အခါ –

နားထဲတစ်ခုခုဝင်နေတဲ့အခါ ဒီလိုလက္ခဏာတွေတွေ့ရနိုင်ပါတယ်

လူကြီးတွေက သူတို့နားထဲတစ်ခုခုဝင်နေတဲ့အခါပြောပြနိုင်ပေမယ့် ကလေးငယ်လေးတွေကတော့ နားထဲတစ်ခုခုဝင်နေတဲ့အခါပြောမပြတတ်ကြပါဘူး။ နားဆိုတာကလည်း အထိခိုက်ခံနိုင်စွမ်းနည်းတဲ့ အစိတ်အပိုင်းဖြစ်တာကြောင့်သေသေချာချာဂရုစိုက်ဖို့ လိုမှာပါ။ ကလေးတွေကိုဆိုရင်တော့ လူကြီးတွေကသေချာစောင့်ကြည့်ဂရုစိုက်ပေးဖို့လိုပါလိမ့်မယ်။ နားထဲပစ္စည်းတစ်ခုခုဝင်တဲ့အခါပြသတတ်တဲ့လက္ခဏာတွေက နားထဲဝင်နေတဲ့ ပစ္စည်းရဲ့အရွယ်အစားပေါ်မူတည်ပြီး အမျိုးမျိုးကွဲပြားနိုင်ပါတယ်။

  • နားထဲကိုတစ်ခုခုဝင်နေတာကို သတိမထားမိဘဲ အချိန်ကြာမြင့်စွာဖြစ်နေမယ်ဆိုရင် နားက နာလာပြီးပြည်ထွက်လာတာ ပိုးဝင်ကူးစက်တာမျိုးဖြစ်နိုင်ပါတယ်
  • များသောအားဖြင့်ကတော့ နားထဲတစ်ခုခုဝင်တဲ့အခါ နားက နာကျင်သလိုခံစားရနိုင်ပါတယ်။ ကလေးလေးတွေဆို နားကို ပွတ်ရင်းခဏခဏငိုနေတာမျိုးဖြစ်နိုင်ပါတယ်
  • နားတွင်းပေါက်မှာ ဝင်နေတဲ့ ပစ္စည်းကပိတ်မိနေတဲ့အခါကောင်းကောင်းမကြားရတာမျိုးဖြစ်နိုင်ပါတယ်
  • နားထဲမှာဝင်နေတဲ့အရာကြောင့်ခေါင်းမူးတာ၊အော့အန်တာမျိုးဖြစ်နိုင်ပါတယ်
  • ချောင်းဆိုးတာ၊ချောင်းခဏခဏဟန့်တာမျိုးဖြစ်နိုင်ပါတယ်
  • အရမ်းပြင်းထန်ရင်တော့ နားထဲကနေသွေးထွက်လာတာမျိုးဖြစ်နိုင်ပါတယ်
  • နားထဲကို ပိုးကောင်တစ်ကောင်ကောင်ဝင်သွားတာဆိုရင်တော့ နားအတွင်းပိုင်းမှာ ပိုးကောင်လျှောက်သွားနေတာကို ခံစားမိနိုင်ပါတယ်။ နားထဲက ယားသလိုလို၊နာသလိုလိုခံစားရနိုင်သလို လည်ချောင်းထဲက ယားလာတာမျိုးလည်းခံစားရနိုင်ပါတယ်
  • နားထဲကို ပိုးကောင်ဝင်တဲ့အခါမှာတော့ နားတဝိုက်မှာ နီမြန်းတာ၊ပြည်တည်တာမျိုးတွေဖြစ်နိုင်ပါတယ်

နားထဲတစ်ခုခုဝင်တဲ့အခါ ဒီအချက်တွေသတိထားပေးပါ

နားထဲကို တစ်ခုခုနဲ့ ထိုးကလော်တာမျိုးမလုပ်ပါနဲ့ – နားထဲတစ်ခုခုဝင်သွားရင် ကြောက်လန့်တကြားနဲ့ အများဆုံးလုပ်တတ်ကြတာက နားထဲကအရာကိုဖယ်ဖို့ဆိုပြီး နားကြပ်တဲ့ ဂွမ်းတံ၊နားဖာကလော်လိုမျိုးအရာတွေနဲ့ ထိုးကော်ကြတာပါ။ ဒီလိုလုပ်တာက နားထဲကအရာဝတ္ထုကို နားအတွင်းပိုင်းထဲအထိရောက်သွားစေနိုင်ပါတယ်။ အကြားအာရုံထိခိုက်တဲ့အထိဖြစ်စေနိုင်ပါတယ်။

မြန်နိုင်သမျှမြန်မြန်ဖယ်ဖို့လုပ်ပါ -ခုနကတော့ ဘာနဲ့မှ ထိုးကလော်တာမလုပ်ဖို့ပြောတယ်၊ ခုတော့မြန်မြန်ဖယ်ပါ၊လို့ပြောပြန်တယ်လို့တွေးနေလား။ နားထဲက အရာဝတ္ထုကိုဖယ်ရှားတယ်ဆိုတဲ့နေရာမှာမြင်သာအောင်ကြီးမားတဲ့အရာ နားတွင်းဝမှာဖြစ်နေတဲ့အရာတွေကို ဇာဂနာလိုအရာသုံးပြီးဖြည်ညင်းသေချာစွာဖယ်ရှားပေးပါ။

မြေဆွဲအားကို အသုံးချပါ – လူတွေမြေကြီးပေါ်မှာ မတ်မတ်ရပ်နိုင်တာက ကမ္ဘာမြေရဲ့ ဆွဲအားကြောင့်ဆိုတာပြောစရာမလိုအောင် သိပြီးဖြစ်မှာပါ။ ဒီတော့နားထဲကို တစ်ခုခုဝင်သွားတဲ့အခါခေါင်းကိုစောင်းချပြီး နားထဲဝင်နေတဲ့အရာကိုထွက်အောင်လုပ်ပါ။

ပိုးကောင်ဝင်နေတာဆိုရင်တော့ ဆီကိုအသုံးပြုပေးပါ – နားထဲကို ပိုးကောင်တစ်ကောင်ကောင်ဝင်သွားတဲ့အခါ နားထဲကို အုန်းဆီသံလွင်ဆီလိုမျိုး အဆီတစ်ခုခုကိုလောင်းထည့်လိုက်ပါ။ နားကိုလက်နဲ့ခဏအုပ်ထားပြီးပြီးရင်စောင်းချပေးလိုက်ပါ။ ဆီကခပ်နွေးနွေးလေးဖြစ်ရင် ပိုအဆင်ပြေမှာပါ။

ဆေးခန်းသွားပြပါနားကိုထိခိုက်မှာစိုးရိမ်ရင်ဖြစ်ဖြစ် ကိုယ်တိုင်က မကျွမ်းကျင်ဘူးလို့ခံစားမိရင် ကျွမ်းကျင်တဲ့ ဆရာဝန်နဲ့ပြသပြီး နားထဲက အရာဝတ္ထုကိုဖယ်ရှားပေးပါ။

နားထဲတစ်ခုခုဝင်တဲ့အခါ ဒီနည်လမ်းလေးတွေကို အသုံးပြုပြီး အကြားအာရုံမထိခိုက်အောင်ကာကွယ်လို့ရပါတယ်။

Hello Health Groupသည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ရင်းမြစ်များ
Foreign object in the ear: First aidhttps://www.mayoclinic.org/first-aid/first-aid/basics/art-20056709 Accessed Date 6 September 2018

Foreign Body in Ear https://www.emedicinehealth.com/foreign_body_ear/article_em.htm#how_do_you_remove_an_object_stuck_in_your_ear Accessed Date 6 September 2018

How Do I Remove a Bug from My Ear?https://www.healthline.com/health/bug-in-ear Accessed Date 6 September 2018

စာရေးသူ ဓာတ်ပုံbadge
Aye Thi Mon မှ ရေးသားသည်။ 7 ရက် အကြာက တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။