ရာသီလာစဉ် ရှောင်ရမည့် အချက်များ

အမျိုးသမီးတွေဟာ သူတို့ရဲ့ ဓမ္မတာလာစဉ်မှာ ဆီးစပ်ကိုက်ခဲခြင်း၊ ဗိုက်အောင့်ခြင်းနဲ့ စိတ်ခံစားမှုပိုင်းဆိုင်ရာ ပြောင်းလဲခြင်း စတဲ့ လက္ခဏာတွေကို များသောအားဖြင့် ခံစားရလေ့ရှိပါတယ်။ ဓမ္မတာ လာနေစဉ်ရက်တွေမှာ အမျိုးသမီးတွေကို ပင်ပန်းမှု အနည်းဆုံးနဲ့ အကျန်းမာဆုံးဖြစ်အောင် ကူညီဖို့အတွက် သားဖွားမီးယပ်ဆရာဝန်များက ညွှန်ပြထားတဲ့ ရာသီလာစဉ် ရှောင်ရမည့် အချက်များ အကြောင်းကို ယခုဆောင်းပါးကနေ ဖော်ပြပေးလိုက်ပါတယ်။

ရာသီလာစဉ် ရှောင်ရမည့် အချက်များ

ရာသီလာစဉ် ရှောင်ရမည့် အချက်များ ကတော့

• အငန်ဓာတ်များသော အစားအသောက်များ စားခြင်းကို ရှောင်ကြဉ်ပါ

ရာသီလာနေစဉ် အတောအတွင်းမှာ အမျိုးသမီးများတွေက ဟော်မုန်းအပြောင်းအလဲကြောင့် ခန္ဓာကိုယ်အတွင်း အရည်များစုပုံခြင်းကို ခံစားရလေ့ရှိပါတယ်။ ဒါ့အပြင် ဆားပမာဏ များတဲ့ အစားအသောက်တွေကို စားမိတဲ့ အခါမှာ ခန္ဓာကိုယ်မှာ ရေဓာတ်စုပုံလာပါတယ်။

ဒါကြောင့် ရာသီလာချိန်မှာ ငန်တာတွေကို စားမိရင် ဗိုက်ကယ်၊ ဗိုက်ဖောပြီး၊ ဗိုက်အောင့်ခြင်းတွေ ဖြစ်တတ်ပါတယ်။ ဒါတွေ မဖြစ်အောင် ရာသီလာချိန်မှာ ဆားပမာဏ များပြားစွာ စားသောက်တာ၊ အသင့်စားအစားအစာတွေ စားတာကို လျှော့ချသင့်ပါတယ်။

တကယ်လို့ သင်ဟာ ဆားပမာဏ များတဲ့ အစားအသောက်တွေကို အလွန်အကျွံ စားသောက်မိနေပြီဆိုရင် ပိုလျှံလာတဲ့ ဆိုဒီယမ် ဆားပမာဏကို သင့်ခန္ဓာကိုယ်မှ စွန့်ထုတ်နိုင်အောင် ရေများများပြန်သောက်ပေးသင့်ပါတယ်။

• ကဖင်းဓာတ်ပါဝင်သော အစားအသောက်များကို စားသုံးခြင်းမှ ရှောင်ကြဉ်ပါ

ကဖင်းဓာတ်ပါသော အဖျော်ယမကာများကို ဓမ္မတာလာစဉ် မှာ သောက်သုံးမယ်ဆိုရင် ရင်သားတင်းပြီး နာကျင်ခြင်းကို ပိုပြီးဆိုးစေတယ်လို့ ကျွမ်းကျင်သူတွေက ဆိုကြပါတယ်။ ဒါ့အပြင် ကဖင်းဓာတ်က ဦးနှောက်ထဲရှိ GABA ဓာတ်ကို တားဆီးပေးတာကြောင့် စိတ်ဖိစီးတာ၊ နှလုံးခုန်မြန်တာနဲ့ ရာသီအကြို ဝေဒနာတွေကို ပိုပြီး ခံစားရစေနိုင်တယ်လို့ သိပ္ပံနည်းကျ လေ့လာတွေ့ရှိထားပါတယ်။

ကော်ဖီ သို့မဟုတ် အခြားကဖင်းဓာတ်ပါသော အစားအသောက်များကို စားမဲ့အစား ရေများများသောက်တာ၊ အသီးဖျော်ရည် လတ်လတ်ဆတ်ဆတ်သောက်တာ၊ ဓာတ်ဆားဖြည့်အချိုရည်သောက်တာတွေကို လုပ်ပေးသင့်ပါတယ်။

• နို့ထွက်ပစ္စည်းများကို စားသုံးခြင်းမှ ရှောင်ကြဉ်ပါ

ရာသီလာချိန်မှာ ကယ်ဆီယမ်ဓာတ်ပြည့်ဝဖို့လိုတယ်ဆိုပေမယ့် နို့ထွက်ပစ္စည်းကနေ ရယူဖို့ မသင့်ပါဘူး။ နို့ထွက်ပစ္စည်းတွေမှာ ပါဝင်တဲ့ Arachidonic acid က ဗိုက်အောင့်ခြင်းကို ပိုဆိုးစေနိုင်ပါတယ်။ ဒါကြောင့် ဓမ္မတာလာစဉ်မှာ နို့ထွက်ပစ္စည်းတွေကို တတ်နိုင်သမျှ အနည်းဆုံး စားသုံးပေးဖို့ ကျွမ်းကျင်သူတွေက အကြံပြုပါတယ်။

ကယ်ဆီယမ်ကို နို့ထွက်ပစ္စည်းတွေက မရနိုင်ဘူးဆိုရင် တို့ဖူး၊ အစိမ်းရောင်အရွက်နဲ့ အစေ့အဆန်တွေကနေ ရနိုင်ပါသေးတယ်။

• အမွေးရိတ်ခြင်း သို့မဟုတ် အမွေးချွတ်ခြင်း မပြုလုပ်ပါနဲ့

ဓမ္မတာလာနေစဉ်မှာ အမွေးချွတ်ခြင်း၊ အမွေးရိတ်ခြင်းတွေက အလွန်အမင်းနာကျင်မှုကို ခံစားရပါစေလိမ့်မယ်။ ဒါဟာ ဘာကြောင့်လဲ ဆိုတော့ ဒီရက်တွေမှာ သင့်ခန္ဓာကိုယ်ထဲမှ အီစထရိုဂျင်ဆိုတဲ့ မဟော်မုန်းဟာ ရုတ်တရက် ကျဆင်းလာတာကြောင့်ပါ။ ဒါကြောင့် သင့်ခန္ဓာကိုယ်က သာမန်ထက် အထိမခံဘဲ နာကျင်လွယ်ပါလိမ့်မယ်။ ဓမ္မတာလာတဲ့ ရက်တွေမှာ တွေ့ကြုံ ခံစားရတဲ့ ရုပ်ပိုင်းဆိုင်ရာ နာကျင်မှုတွေအားလုံးဟာ အရင်ထက်ပိုပြီး နာကျင်လွယ်နေပါလိမ့်မယ်။

• ဓမ္မတာလာစဉ် ရက်တွေမှာ ကိုယ်လက်လှုပ်ရှားမှု မလုပ်ဘဲ မနေပါနဲ့

ရာသီလာချိန်မှာ နာကျင်ကိုက်ခဲတာ မှန်ပေမယ့် ၁−၂ရက်လောက်နေရင် နာတာ သက်သာလာပါပြီ။ ဒါဆို အပေါ့စားလေ့ကျင့်ခန်းတွေကို စလုပ်လို့ ရပါပြီ။ကိုယ်လက်လှုပ်ရှားမှု ပြုခြင်းက endorphins ကို ထွက်လာစေပြီး ဆီးစပ်ကိုက်တာနဲ့ ဗိုက်အောင့်ခြင်းတွေကို သက်သာအောင် ကူညီပေးနိုင်ပါတယ်။ ဒါ့အပြင် စိတ်ခံစားမှု အလွယ်ဆုံးဖြစ်တဲ့ ဒီလိုရက်တွေမှာ ဖြစ်တတ်တဲ့ စိတ်ဖိစီးမှုတွေ၊ စိတ်ပိုင်းဆိုင်ရာ ခံစားမှုပြောင်းလဲခြင်းတွေကိုလည်း သက်သာစေပါတယ်။

• အကာအကွယ်မဲ့ လိင်ဆက်ဆံခြင်းကိုလည်း မပြုလုပ်သင့်ပါဘူး။

သင်ဟာ ဓမ္မတာလာနေစဉ် အတောအတွင်းမှာ လိင်ဆက်ဆံလို့ ရပါတယ်။ ဒါပေမယ့် လေ့လာတွေ့ရှိမှုများအရ ရာသီလာနေစဉ် အကာအကွယ်မဲ့ လိင်ဆက်ဆံခြင်းဟာ လိင်မှတစ်ဆင့် ကူးစက်တဲ့သောရောဂါများကို ဖြစ်နိုင်ခြေ ပိုပြီးမြင့်စေတယ်လို့ တွေ့ရှိရပါတယ်။ ဒီအတောအတွင်းမှာ လိင်ဆက်ဆံတဲ့အခါမှာ သွေးမှတစ်ဆင့် ကူးစက်သော ရောဂါများ ဖြစ်နိုင်ခြေပိုများပါတယ်။ ဒါကြောင့် ဓမ္မတာလာနေစဉ်မှာ အကာအကွယ်သုံးပြီး လိင်ဆက်ဆံခြင်းကို ပြုလုပ်ဖို့ ပိုပြီးအကြံပေးပါတယ်။

• အမျိုးသမီး လစဉ်သုံးပစ္စည်း တစ်ခုတည်းကို အချိန်အကြာကြီး သုံးစွဲခြင်းမျိုး မပြုပါနဲ့

တကယ်လို့ သင်ဟာ အမျိုးသမီးလစဉ်သုံး ပစ္စည်းတစ်ခုတည်းကို နာရီပေါင်းများစွာ အချိန်အကြာကြီး မဖယ်ရှားဘဲ သုံးစွဲခဲ့မယ်ဆိုရင် toxic shock syndrome ဖြစ်နိုင်ပါတယ်။ အထူးသဖြင့် Tampon အသုံးပြုတဲ့အခါမှာပါ။ TSSက ပြင်းထန်တဲ့ ပိုးဝင်ခြင်းဖြစ်ပြီး အသက်အန္တရာယ်ဖြစ်စေနိုင်ပါတယ်။

ဒါ့ကြောင့် ဓမ္မတာလာစဉ်အတောအတွင်းမှာ တစ်ကိုယ်ရည် သန့်ရှင်းမှုကို အထူးဂရုစိုက်သင့်ပါတယ်။ လစဉ်သုံးပစ္စည်းတွေကို အချိန်မှန်လဲသင့်ပါတယ်။ မိန်းမကိုယ်ထဲ ထည့်သုံးရတဲ့ tampon လို့ခေါ်တဲ့ လစဉ်သုံး ပစ္စည်းကိုတော့ ၄ နာရီနဲ့ ၆ နာရီကြားတစ်ခါ အမြဲတမ်းလဲလှယ်ပေးဖို့ လိုအပ်ပါတယ်။ Menstrual cup ကိုတော့ ၁၂ နာရီခြားတစ်ခါ လဲပေးဖို့ လိုအပ်ပါတယ်။ ဒါ့အပြင် အမျိုးသမီးလစဉ်သုံး ဂွမ်းထုပ်ကိုတော့ ၄နာရီကနေ ၈နာရီကြား တစ်ခါလဲပေးသင့်ပါတယ်။