ကလေးလေးက ရင်ခွင်ပိုက် ချီပိုးထားတဲ့ အရွယ်ကနေ ကိုယ်ခြေထောက်ပေါ် ကိုယ်ရပ်ပြီး လောကကြီးကို စူးစမ်းဖို့ အသင့်ဖြစ်နေတဲ့ ကျောင်းနေအရွယ် ကိုတောင် ရောက်လာခဲ့ပါပြီ။ ဒီအချိန်မှာ အရင်တုန်းကလို မေမေ လုပ်စေချင်တဲ့အတိုင်း တသွေမသိမ်း လိုက်နာတယ်ဆိုတာ ရှားလာပါပြီ။ ကလေးကြီးတွေလိုပဲ သူတို့ရဲ့ ကိုယ်ပိုင်ဆုံးဖြတ်ချက်ချတာတွေကို လုပ်ဆောင်စပြုလာပါပြီ။
ဒီကာလမှာ ကလေးကို စည်းကမ်းတွေ တင်းကျပ်မယ့်အစား ညှိညှိနှိုင်းနှိုင်းနဲ့ နွေးနွေးထွေးထွေး ဆက်ဆံပေးတာက နည်းလမ်းကောင်းပါ။ ကျောင်းနေအရွယ်ရောက်လာပြီဖြစ်တဲ့ ကလေးတွေဟာ ရုပ်ပိုင်းဆိုင်ရာရော စိတ်ခံစားမှုပိုင်းဆိုင်ရာပါ ဖွံ့ဖြိုးလာပါပြီ။ ကျောင်းနေအရွယ် သားသားမီးမီးတို့ရဲ့ ကြီးထွားဖွံ့ဖြိုးမှု ကို အထောက်အကူဖြစ်စေဖို့ ဖေဖေမေမေတို့ ဘာလုပ်ပေးနိုင်မလဲဆိုတာ လေ့လာလိုက်ရအောင်နော်။
ကျောင်းနေအရွယ် သားသားမီးမီးတို့ရဲ့ ကြီးထွားဖွံ့ဖြိုးမှု
ကလေးလေးလည်း မဟုတ်တော့သလို လူကြီးလေးလည်း မဖြစ်သေးတဲ့ လူကြီးပေါက်စလေးတွေ ဖြစ်လာကြတဲ့ ကျောင်းနေအရွယ် သားသားမီးမီးလေးတွေမှာ အပြောင်းအလဲတွေ အများကြီး ရှိလာနိုင်ပါတယ်။ မြင်သာတဲ့ ပြောင်းလဲတိုးတက်မှုအနေနဲ့ ဘောလုံးတွေကို ကောင်းကောင်းပစ်တတ် ဖမ်းတတ်လာပါပြီ။ လက်ချောင်းလေးတွေ သန်မာလာပါပြီ။
ကိုယ်တိုင် ဖိနပ်စီးနိုင်ပြီ။ လွယ်အိတ်လွယ်နိုင်ပြီ။ လိုအပ်တာတွေကို ကိုယ်တိုင် ပြင်ဆင်ပြီး ထည့်ပိုးသယ်ဆောင်တတ်လာပါပြီ။ သူငယ်ချင်းတွေနဲ့ မိတ်တွေဖွဲ့ရတာကို နှစ်သက်လာပါပြီ။ အရင်က မေမေဖေဖေနဲ့ မွေးချင်းမောင်နှမတွေ ဦးဦး၊ တီတီ၊ ဖွားဖွားတို့ကို သူငယ်ချင်းလုပ်နေရင်းကနေ ရွယ်တူလေးတွေကို သူငယ်ချင်းလုပ်တတ်စ ပြုလာပါပြီ။ သူငယ်ချင်းတွေက သူတို့အတွက် အတော်လေး အရေးပါတဲ့ အခန်းကဏ္ဍကနေ ပါဝင်လာပါပြီ။
ဒီအချိန်မှာ ရုပ်ပိုင်းဆိုင်ရာ၊ လူမှုဆက်ဆံရေးပိုင်းဆိုင်ရာ၊ စိတ်ပိုင်းဆိုင်ရာတွေက လျင်လျင်မြန်မြန် ဖွံ့ဖြိုးလာပါပြီ။ ဘဝအောင်မြင်မှုတွေ ရစေဖို့အတွက် ကိုယ့်ကိုယ်ကို ယုံကြည်မှု တည်ဆောက်ရာမှာ အရေးအပါဆုံး ကာလအပိုင်းအခြားဆိုလည်း မမှားပါဘူး။ သူငယ်ချင်းတွေ၊ ကျောင်းပညာရေးနဲ့ အားကစားကဏ္ဍတွေမှာ သူတို့အနေနနဲ့ ပါဝင်လုပ်ဆောင်နိုင်တယ်လို့ ကိုယ့်ကိုယ်ကို ယုံကြည်မှု တည်ဆောက်နေတဲ့ အသက်အပိုင်းအခြားပါ။
ဒီကာလမှာ ပိုပြီး လွတ်လွတ်လပ်လပ်နေချင်မယ်။ ကြီးလာရင် ဘာလုပ်မယ်ဆိုပြီး စဉ်းစားတတ်ပြီ။ သူတို့နေထိုင်ရာ ပတ်ဝန်းကျင်အကြောင်းကို ပိုမို သိရှိလာပြီ။ သူငယ်ချင်းတွေနဲ့ စုစုစည်းစည်းနေရတာကို အတော်သလောကျလာပြီ။ မိတ်ဖွဲ့ချင်တယ်ဆိုတဲ့ ဆန္ဒလေးတွေ ရှိလာပြီ။
စိတ်ခံစားမှုပိုင်းမှာလည်း လျင်လျင်မြန်မြန်ကို ဖွံ့ဖြိုးလာပါပြီ။ အတွေ့အကြုံတွေ၊ ခံစားမှုတွေ၊ အတွေးတွေကို မျှဝေတတ်ပါပြီ။ ကိုယ်တိုင်အတွက်ထက် အခြားသူတွေအတွက် စဉ်းစားတတ်ပါပြီ။ ကိုယ်ချင်းစာတတ်ပြီလို့ ဆိုလိုချင်တာပါ။
ဖေဖေမေမေ လိုက်နာစရာ
ကျောင်းနေအရွယ် ကလေးတွေကို ပျိုးထောင်ပေးနေတဲ့ ဖေဖေမေမေတို့အနေနဲ့
- ကလေးရဲ့ အောင်မြင်တိုးတက်မှုတွေကို အသိအမှတ်ပြုပါ
- ကလေးကို သူတို့ တတ်နိုင်တဲ့ အိမ်မှုကိစ္စတွေကို ဝိုင်းကူခိုင်းပါ
- ကလေးနဲ့ ကျောင်းက အကြောင်းတွေ၊ သူငယ်ချင်းတွေ အကြောင်းနဲ့ သူစိတ်ဝင်စားတဲ့ အကြောင်းအရာလေးတွေကို ပြောဆိုတွေးနွေးပါ
- ကလေးကို အခြားသူတွေကို လေးစားတတ်ဖို့ သင်ပေးပါ
- ကူညီတတ်အောင် သင်ပေးပါ
- ကလေးကို စိတ်ရှည်သည်းခံတတ်အောင် လေ့ကျင့်ပေးပါ။ ဒီ အိမ်စာတွေ ပြီးအောင် လုပ်ပြီးမှ သွားကစားပါ ဆိုတာမျိုးပေါ့
- ကလေးကို သူတို့ရဲ့ ပန်းတိုင်တွေကို ကိုယ်တိုင် သတ်မှတ်ခွင့်ပေးပြီး အောင်မြင်မှုကို အသိအမှတ် ပြုပေးပါ
- ဘယ်အချိန် အိပ်ရာဝင်ရမယ်။ Screen Time က တစ်နေ့ကို ဘယ်လောက်ပဲဆိုတာကို စည်းကမ်း သတ်မှတ်ပေးပါ
- ကလေးကို မိသားစုနဲ့အတူ စာဖတ်ရင်း ဖြစ်ဖြစ် ကစားရင်းဖြစ်ဖြစ် အချိန်ကုန်ဆုံးစေပါ
- ကလေးကို စာဖတ်ပြပါ
- ကလေးရဲ့ ကောင်းမွန်တဲ့ အမူအကျင့်တွေအတွက် အသိအမှတ်ပြုပေးဖို့ မမေ့ပါနဲ့
- ကလေးကို ပြဿနာ အခက်အခဲတွေကို ရင်ဆိုင်ဖြေရှင်းတတ်အောင် လေ့ကျင့်ပျိုးထောင်ပေးပါ။
ဒီအရွယ်မှာ ကလေးက ချော်ကျတာမျိုး မတော်တဆ ထိခိုက်တာမျိုး ဖြစ်နိုင်ခြေ များပါတယ်။ ဒါကြောင့် အန္တရာယ်ဖြစ်စေနိုင်တဲ့ အခြေအနေတွေကို သေချာ ပြောပြထားပြီး ကလေးကို ဂရုစိုက်ပါ။
- ကားလမ်းကို ဘယ်လို သေချာ ကူးရမယ်
- မီးပူ၊ မီးဖို၊ ရေနွေးအိုးတွေကို သွားမထိရဘူး
- လျှပ်စစ်ပစ္စည်းတွေကို မကိုင်ရဘူး
- တစ်ခုခု ထိခိုက်မိရင် ဘာတွေ လုပ်ရမယ်
- ရေကူးကန်၊ ရေကန်တွေနား သွားရင် ဘာတွေဂရုစိုက်ရမယ် စသဖြင့် ထိခိုက်နိုင်တဲ့ အခြေအနေတွေကို ပြောပြပေးထားရပါမယ်။
ကျန်းမာစေဖို့
ကျောင်းနေအရွယ် သားသားမီးမီးတို့ ကျန်းမာစေဖို့အတွက် မိဘတွေအနေနဲ့
- ကလေးကို ကျန်းမာတဲ့ စားသောက်မှုပုံစံပိုင်ဆိုင်အောင် ပျိုးထောင်ပေးပါ။ ကလေးရဲ့ စားသောက်မှုပုံစံကို ကန့်သတ်ပါ။ အချိုများတာတွေ မစားမိအောင် ဂရုစိုက်ပါ။ အပြင်စာတွေ မစားမိအောင် ဂရုစိုက်ပါ
- ကလေးကို တစ်နေ့ကို ၁ နာရီ ကိုယ်လက်လှုပ်ရှားမှု လုပ်ဖြစ်အောင် ဂရုစိုက်ပါ
- ကလေး အိပ်ခန်းထဲမှာ တီဗွီ ထားတာမျိုး မလုပ်ပါနဲ့။ ညနက်အထိ ရုပ်ရှင်ကြည့်တာမျိုး ဂိမ်းဆော့တာမျိုး မဖြစ်အောင် ဂရုစိုက်ပါ
- လှုပ်လှုပ်ရှားရှား နေဖြစ်အောင် ဂရုစိုက်ပါ
- အိပ်ချိန်ကို အသက် ၆ နှစ်ကနေ ၁၂ နှစ်အရွယ် ကလေးတစ်ယောက်မှာ ရှိသင့်တဲ့ ၉ နာရီ ကနေ ၁၂ ရှိအောင် ဂရုစိုက်ပါ။
[embed-health-tool-vaccination-tool]
