လှုပ်မယ်ကြံတိုင်း အဆစ်အမြစ်တွေ တောင့်တင်းနာကျင်နေတာ ဘာကြောင့်လဲ

လေးဘက်နာအဆစ်ရောင်ေကြာင့်

လက်ကောက်ဝတ်နဲ့လက်ချောင်းအဆစ်တွေမှာ အများဆုံးသိသာတတ်ပေမယ့် တခြားအဆစ်တွေမှာလည်း နာကျင်ကိုက်ခဲရတဲ့လေးဘက်နာအဆစ်ရောင်ရောဂါကလည်း အကြောင်းရင်းဖြစ်နိုင်ပါတယ်။ လေးဘက်နာဖြစ်ရင် အဆစ်တွေအမြဲတမ်း နာကျင်၊တောင့်တင်းနေစေနိုင်ပါတယ်။ တစ်ခါတလေတော့ရောဂါကငြိမ်နေပြီး မကြာမကြာမှ လက္ခဏာပေါ်လာတတ်ပါတယ်။

အရွတ်ကြောနာကြောင့်

နာတာရှည်ဖြစ်တတ်တဲ့ ဒီရောဂါကြောင့် အရိုးအဆစ်နဲ့ကြွက်သားတွေနာကျင်ကိုက်ခဲစေနိုင်တဲ့အပြင် အိပ်စက်ခြင်း၊ စိတ်ပိုင်းဆိုင်ရာနဲ့ မှတ်ဉာဏ်ပိုင်းပြဿနာတွေပါရှိတတ်ပါတယ်။ရောဂါတစ်ခုခု၊ ခွဲစိတ်မှု၊ စိတ်ဖိစီးမှုပြင်းထန်တာတွေနောက်ပိုင်းမှာဒီဝေဒနာပိုဆိုးစေတတ်ပါတယ်။

အရိုးအဆစ်ထိခိုက်မှုကြောင့်

အရိုးအဆစ်ကို ထိခိုက်မှုတခုခုရှိထားတယ်ဆိုရင်ရောင်ရမ်းခြင်းနဲ့တောင့်တင်းနာကျင်ခြင်းတွေဖြစ်နေမှာပါပဲ။ အရိုးအဆစ်တွေကို အသုံးပြုရများလွန်းရင်၊ လှုပ်ရှားမှုပုံစံမမှန်ရင်လည်း အရွတ်ပါထိခိုက်ပြီး ဒီလိုတွေဖြစ်စေနိုင်ပါတယ်။

ဘယ်လိုသက်သာအောင်လုပ်မလဲ

လှုပ်ရှားမှုရှိပါစေ

အရိုးအဆစ်တွေကိုလှုပ်ရှားတာများလေ၊တောင့်တင်းနာကျင်နေဖို့အခွင့်အလမ်းနည်းလေပါပဲ။ အိမ်ရှေ့ခဏလောက်လမ်းထွက်လျှောက်တာ၊ အပင်လေးတွေစိုက်တာလောက်နဲ့လည်း ကိုယ်လက်လှုပ်ရှားမှုဖြစ်ပါတယ်။ အထိုင်များတဲ့အလုပ်ဆိုလည်း ဟိုဟိုဒီဒီနည်းနည်းလမ်းလျှောက်ပေးတာ၊ခြေဆန့်လက်ဆန့်အကြောလျှော့တာတွေ လုပ်ပေးပါ။ ပိတ်ရက်တွေမှာဖြစ်ဖြစ်၊ မနက်အစောပိုင်းဖြစ်ဖြစ်လေ့ကျင့်ခန်းအနည်းငယ်လုပ်ပေးရင် အရိုးအဆစ်တွေကိုထောက်ပံ့ပေးတဲ့ကြွက်သားတွေကိုသန်မာစေပြီး အရိုးတွေလည်းသန်မာစေမယ်၊ ဟန်ချက်ထိန်းနိုင်စွမ်းပိုကောင်းစေမယ်၊ ကယ်လိုရီလောင်ကျွမ်းစေတယ်။ လှုပ်ရှားလေပိုဆိုးလေဖြစ်ရင်တော့ ချက်ချင်းရပ်ပြီးဆရာဝန်ပြပါ။

အအေးကုထုံး

နာကျင်နေတဲ့အဆစ်ကိုရေခဲကပ်လို့ရပါတယ်။သွေးကြောတွေကိုကျဉ်းစေပြီး နာကျင်နေတဲ့ဧရိယာမှာသွေးလည်ပတ်မှုနှေးစေတဲ့အတွက်ရောင်ရမ်းမှုကိုလျော့စေပါတယ်။ ရေခဲကိုပုဝါတစ်ခုနဲ့ပတ်ပြီး နာတဲ့နေရာမှာ ကပ်ပေးပါ။ ဒါပေမယ့် တစ်ကြိမ်မှာ မိနစ် ၂၀ ထက်မပိုပါစေနဲ့။