home

What are your concerns?

close
Inaccurate
Hard to understand
Other

သို့မဟုတ် လင့်ခ်ကူးယူမည်

လိင်ပညာပေး နဲ့ ပတ်သတ်ပြီး သင်သိထားတာတွေ မှန်ရဲ့လား။

လိင်ပညာပေး နဲ့ ပတ်သတ်ပြီး သင်သိထားတာတွေ မှန်ရဲ့လား။

လိင်ပညာပေး ကို သင်မယ်ဆိုရင် သင့်စိတ်ထဲမှာ ဘာကို အရင်တွေးမိကြလဲ။ ဟင် ကလေးတွေကို လိင်ဆက်ဆံနည်း သင်ပေးတော့မလို့လား။ သားဆက်ခြားနည်းတွေ သင်ပေးတော့မှာလား။ ကလေးတွေတော့ အတတ်ကောင်းတွေ တတ်တော့မှာပဲလို့ တွေးနေမိတယ်ဆိုရင် ဒါဟာ သင်တစ်ယောက်တည်း မဟုတ်ပါဘူး။ မြန်မာနိုင်ငံ အပါအဝင် တခြားနိုင်ငံတွေမှာ sex education အကြောင်းပြောရင် ဒီလိုပဲ စတွေးကြပါတယ်။ ဒါကြောင့်ပဲ လိင်ပညာပေးကို သင်ကြားတဲ့နေရာမှာ အခက်တွေ့နေကြတာပါ။ ဒီဆောင်းပါးမှာ လိင်ပညာပေးနဲ့ ပတ်သတ်ပြီး လူတွေ အထင်မှားတတ်တာကို ပညာရှင်တွေက ဘယ်လို ဖြေရှင်းထားလဲဆိုတာ ကြည့်ကြည့်ရအောင်။

  • လိင်ပညာပေးသင်လို့ ကလေးတွေ ငယ်ငယ်ရွယ်ရွယ်နဲ့ လိင်ဆက်ဆံတတ်ကုန်မယ်။

ဘာကြောင့်လည်း မသိ။ လိင်ပညာပေးလို့ ပြောရင် ဒါကိုပဲ ပြေးပြေးမြင်ကြတယ်။ တကယ် လက်တွေ့ကျကျ လေ့လာကြည့်လိုက်တဲ့အခါ ပြီးပြည့်စုံတဲ့ လိင်ပညာပေးကို သင်ကြားခံထားရတဲ့ ဆယ်ကျော်သက်လေးတွေဟာ အကျိုးအပြစ်ကို သိထားတဲ့အတွက် ထင်ထားတာထက် လိင်ဆက်ဆံချိန်နောက်ကျပါတယ်။ နောက်ပိုင်း လိင်ဆက်ဆံဖို့ အရွယ်ရောက်လာရင်တောင် သားဆက်ခြားနည်းတွေ၊ လိင်ကတစ်ဆင့် ကူးစက်တတ်တဲ့ ရောဂါကာကွယ်နည်းတွေကို ကောင်းကောင်းနားလည်သွားပါတယ်။

  • လိင်ပညာပေးဆိုတာ လိင်အကြောင်းပဲ သင်တာပါ။

Comprehensive sex education လို့ ခေါ်တဲ့ ပြီးပြည့်စုံတဲ့ လိင်ပညာပေးဟာ လိင်ကိစ္စသက်သက်ကိုသာ သင်ပေးတာထက် ပိုပါတယ်။ အရွယ်ရောက်လာလို့ ကိုယ်ခန္ဓာရဲ့ ပြောင်းလဲမှုတွေ၊ နောက်ပိုင်းကြုံတွေ့လာရမယ့် လိင်ကိစ္စတွေမှာ အန္တရာယ် ကင်းကင်း ဘယ်လို ဖြတ်သန်းကြမလဲဆိုတာတွေကစလို့ ကိုယ့်ရဲ့ လက်တွဲဖော်နဲ့ ကောင်းမွန်တဲ့ ဆက်ဆံရေးရှိဖို့၊ သူများကို လေးစားတတ်ဖို့၊ ကိုယ့်ကိုယ်ကို တန်ဖိုးထားတတ်ဖို့ စတဲ့ အကြောင်းအရာတွေထိ ပါဝင်ပါတယ်။ ဒီခေတ်စကားနဲ့ဆိုရင် EQကောင်းဖို့ သင်ပေးတာအထိ ပါဝင်ပါတယ်။ ဒါဟာ သူ့ဘဝတစ်သက်တာမှာ ပျော်ရွှင်ဖို့၊ ကောင်းမွန်တဲ့ ဆက်ဆံရေးတည်ဆောက်နိုင်ဖို့ အများကြီး အထောက်အကူပြုပါတယ်။

  • လိင်ပညာပေးသင်တာဟာ ဘာသာရေးနဲ့ မကိုက်ညီဘူး။

လိင်ပညာပေး သင်တာဟာ သူများသားမယားကို ဖျက်ဆီးဖို့ သင်ပေးတာ မဟုတ်ပါဘူး။ ခန္ဓာကိုယ်ရဲ့ ရုပ်ပိုင်းဆိုင်ရာ၊ စိတ်ပိုင်းဆိုင်ရာ ပြောင်းလဲမှု၊ သူများနဲ့ ကောင်းမွန်တဲ့ ဆက်ဆံရေးတည်ဆောက်တတ်ဖို့၊ သူများကို လေးစားတတ်ဖို့ သင်ပေးတာ ဖြစ်တဲ့အတွက် ဘာသာရေးကို ထိခိုက်စေမှာ မဟုတ်ပါဘူး။ ဘယ်ဘာသာမဆို သင်သင့်တဲ့ အကြောင်းအရာ တစ်ခုလည်း ဖြစ်ပါတယ်။ အကျိုးအပြစ်ကို မသိတဲ့သူသာ ဆင်ကန်းတောတိုးလို အမှားမျိုးကို ကျုးလွန်တာပါ။ သေချာနားလည်တဲ့သူက ဝေးဝေးကရှောင်နိုင်ပါတယ်။

  • လိင်ပညာပေးမှာ LGBTတွေ အကြောင်းပါနေလို့ ကလေးတွေနဲ့ မသင့်တော်ဘူး။

လိင်ပညာပေးကို သင်ကတည်းက လူတိုင်းနဲ့ကိုက်ညီအောင် ရေးဆွဲထားတာပါ။ လိင်ပညာပေးမှာ LGBTတွေ အကြောင်းပါနေတာကြောင့် ကလေးတွေကို LGBT ဖြစ်မသွားစေပါဘူး။ နဂိုတည်းက လိင်စိတ်ပြောင်းလဲချင်သူက ပြောင်းလဲတာပါပဲ။ အဓိကက လိင်စိတ်ပြောင်းလဲတာဟာ ပြစ်ချက်မဟုတ်ကြောင်း၊ LGBTဖြစ်နေလည်းပဲ ဘဝကို သူများနည်းတူ ပျော်ပျော်နေနိုင်ကြောင်း၊ အောင်မြင်နိုင်ကြောင်း သင်ပေးတာ ဖြစ်ပါတယ်။ တစ်ဆက်တည်းမှာပဲ LGBTတွေကို ရှုံ့ချစရာ မလိုကြောင်း၊ ဒါဟာ စနောက်ရမယ့် လူတွေ မဟုတ်ကြောင်း၊ တခြားသူတွေလိုပဲ လေးစားတဲ့စိတ်နဲ့ ဆက်ဆံရမှာဖြစ်ကြောင်း၊ သူတို့က တခြားသူတွေနဲ့ တူတူပဲ ဖြစ်ကြောင်း နားလည်အောင် သင်ပေးတာပဲ ဖြစ်ပါတယ်။

ကြုံလို့ ပြောရရင် လူတွေက LGBTတွေကို HIV ပိုး သယ်ဆောင်ထားသူတွေလို့ နှိမ့်ချဆက်ဆံတတ်ပါတယ်။ တကယ်တော့ LGBTမှ မဟုတ်ပါဘူး။ အန္တရာယ်ကင်းတဲ့ လိင်ဆက်ဆံခြင်းကို နားမလည်တဲ့ ဘယ်သူမဆို HIV အပါအဝင် တခြား လိင်ကတစ်ဆင့် ကူးစက်တတ်တဲ့ ရောဂါတွေ ရလာနိုင်တယ်ဆိုတာကို သတိပြုပါ။

  • လိင်ပညာပေးကို မိဘတွေ သင်တာ ပိုမကောင်းဘူးလား။

ဒါက နည်းနည်းပြောရခက်ပါတယ်။ တွေးကြတာကတော့ အိမ်မှာပဲ သမီးကို အမေက၊ သားကို အဖေက တိုးတိုးတိတ်တိတ် သင်ကြရင် မကောင်းဘူးလားပေါ့။ ဒါပေမယ့် တကယ့် လက်တွေ့မှာ သင်ပေးတဲ့သူက ရှားပါတယ်။ နောက်ပြီး သင်ပေးမယ့် အဖေအမေကိုယ်တိုင်ကလည်း တိတိကျကျ တတ်မြောက်နေဖို့ လိုပါတယ်။ ဒါမှ သတင်းအမှားတွေ မသင်ပေးမိမှာပါ။ နောက်တစ်ခုက မိဘနဲ့ သားသမီးကြားမှာ ချစ်ကြောက်ရိုသေဆိုတာကြီး ရှိနေတဲ့အတွက် ပြောရဆိုရ နည်းနည်း အခက်တွေ့နိုင်ပါတယ်။

လေ့လာကြည့်လိုက်တဲ့အခါမှာလည်း မိဘတွေက လိင်ပညာပေးကို ကျောင်းမှာ သင်တာ ပိုကောင်းတယ်လို့ ယူဆကြပါတယ်။ ကျောင်းသားတွေကလည်း ကျောင်းမှာ တကယ်တတ်ကျွမ်းတဲ့သူတွေနဲ့ သင်ကြားတာက ပိုသဘောကျကြပါတယ်။ တကယ်တော့ လိင်ပညာပေးကို ကျောင်းမှာရော အိမ်မှာပါ နည်းစနစ်ကျကျ သင်ပေးနိုင်ရင် ပိုကောင်းတာပေါ့။

  • လိင်ပညာပေးကို ကလေးတွေကို သင်ပေးဖို့ မလိုအပ်ဘူး။

တကယ်တော့ မဟုတ်ပါဘူး။ ကလေးတွေကိုလည်း သူတို့အရွယ်အလိုက် သင့်တော်တဲ့ လိင်ပညာပေး သင်ပေးဖို့ လိုပါတယ်။ အနည်းဆုံးတော့ သူတို့လေးတွေရဲ့ ဘယ်နေရာကို လူအထိမခံသင့်ဘူး၊ မကြိုက်ရင် မကြိုက်ဘူးလို့ ငြင်းရမယ်၊ တစ်ယောက်ယောက်က ကလေးမကြိုက်တာကို လုပ်ရင် အိမ်က လူကြီးတွေကို ပြန်ပြောရမယ် စသဖြင့် သင်ထားပေးရမှာပါ။ သက်ငယ်မုဒိန်းမှုတွေကို ကြည့်မယ်ဆိုရင် ကလေးတွေက သူတို့ကို ဘာလုပ်သွားမှန်းလည်း မသိပါဘူး။ လူကြီးတွေကို ပြန်ပြောရမှန်းလည်း မသိပါဘူး။ တကယ်ဆို အနည်းဆုံးတော့ သူတို့မကြိုက်တာကို လုပ်သွားတယ်လို့ အိမ်ကလူကြီးတွေကို ပြန်တိုင်တတ်ရမှာပါ။ ဒါမှ လူကြီးတွေက စောစောစီးစီး သိပြီး တစ်ခုခုလုပ်လို့ရမှာပါ။

တစ်ဖက်က ပြန်ကြည့်မယ်ဆိုရင် တစ်ခါတစ်လေ တရားခံက ကလေးငယ်လေးတွေ ဖြစ်နေတာကို တွေ့ဖူးမှာပါ။ တကယ်ဆို သူတို့ကို သူများရဲ့ ဒီခန္ဓာကိုယ် အစိတ်အပိုင်းတွေကို မကိုင်ရဘူး။ ဒါမျိုးမလုပ်ရဘူး။ ဒါက ကလေးတွေ မလုပ်ရဘူး စသဖြင့် သင်ထားပေးရင်၊ အသိပေးထားရင် ကလေးတွေက သူတို့နဲ့ ဆိုင်တဲ့ ကိစ္စမဟုတ်ဘူးဆိုပြီး စမ်းကြည့်မှာ မဟုတ်ပါဘူး။ သူတို့လေးတွေက ဒီလိင်ကိစ္စကို လိင်ကိစ္စမှန်း မသိဘဲ တစ်ယောက်ယောက်လုပ်တာကို မြင်လို့ လိုက်လုပ်တာလည်း ဖြစ်နိုင်ပါတယ်။ ဒါကြောင့် အရွယ်အလိုက်ထိုက်သင့်တဲ့ ပညာပေးရှိဖို့ လိုပါတယ်။

  • လိင်ပညာပေးက တခြားဘာသာရပ်တွေလောက် အရေးမကြီးပါဘူး။

ခုဆယ်တန်းမှာ သင်မယ်ဆိုတော့ တခြားဘာသာရပ်တွေလောက် အရေးမကြီးဘူးလို့ ထင်မှာ စိုးပါတယ်။ တခြားဘာသာရပ်တွေထက်မပိုရင်တော့ အရေးကြီးတာက မလျှော့ပါဘူး။ တစ်ဘဝလုံးသုံးလို့ရတဲ့ ပညာရပ်ပါ။ ဒါကို မတတ်လို့ အရွယ်မတိုင်ခင် မလိုချင်ဘဲ ကိုယ်ဝန်ရတာ၊ လိင်ကတစ်ဆင့် ကူးစက်တတ်တဲ့ ရောဂါတွေ ဖြစ်တာ၊ အိမ်တွင်းအကြမ်းဖက်တာ စတဲ့ ပြဿနာတွေ ဖြစ်နေတာပါ။

  • ဒါက သင်စရာမလိုပါဘူး။ မသင်လည်း တတ်ပါတယ်။

မသင်လည်း အချိန်တန်ရင် တတ်တာမှန်ပေမယ့် တကယ်တမ်း သင်ပြီးလို့ သေသေချာချာ သိသွားတဲ့အခါ ကိုယ်သိထားတာတွေ ဘယ်လောက်မှားနေလဲဆိုတာ သိရမှာပါ။ ဒီလို သိထားတာတွေ မှားနေတာကြောင့်ပဲ လက်တွဲဖော်နဲ့ ဆက်ဆံရေးမှာ ပြဿနာတက်တာတွေ၊ အတူနေပြီးမှ ကိုယ်ဝန်ရမှာလား မရဘူးလား၊ ရသွားခဲ့ရင် ဆိုတဲ့ ပြဿနာတွေ၊ မလိုချင်ဘဲ ကလေးရလာလို့ ဖျက်ချတဲ့ ပြဿနာတွေ ကြုံရတာပါ။ တကယ်သိချင်လို့ လေ့လာတဲ့သူကို ကျတော့လည်း လိင်စိတ်ပြင်းထန်တဲ့သူလို့ လှောင်ပြောင်တာတွေ လုပ်တာကြောင့် ဒီကိစ္စကို ရှက်စရာလို့ ထင်ပြီး ပွင့်ပွင့်လင်းလင်း မတိုင်ပင်ရဲတာတွေ ဖြစ်လာတာပါ။

လိင်ပညာပေးဆိုတာ လိင်ကိစ္စသက်သက်ကိုပဲ သင်တာ မဟုတ်ပါဘူး။ ဒါဟာလည်း ပညာရပ်ဆိုင်ရာ ဘာသာရပ်တစ်ခုပါပဲ။ ကလေးတွေကို အရွယ်မတိုင်ခင် လိင်မဆက်ဆံဖို့၊ အတူနေရင်လည်း အကာအကွယ်ကို စနစ်တကျ သုံးတတ်ဖို့၊ မိမိလက်တွဲဖော်ကို လေးစားဖို့၊ ကိုယ့်ကိုယ်ကို တန်ဖိုးထားဖို့ သင်ပေးတဲ့ ဘာသာရပ်ဆိုတာ သိစေချင်ပါတယ်။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

စာရေးသူ ဓာတ်ပုံbadge
Dr. Htet Htet Zaw Win မှ ရေးသားသည်။ တစ်ပတ် အကြာက တွင် ပြန်လည်ပြင်ဆင်ခဲ့သည်။
Dr. Thurein Hlaing Win မှ အချက်အလက် စစ်ဆေးထားပါသည်။