ဆယ်ကျော်သက်အရွယ် ဝက်ခြံတွေကို တိုက်ထုတ်ဖို့ အဆင့်၆ဆင့်

    ဆယ်ကျော်သက်အရွယ် ဝက်ခြံတွေကို တိုက်ထုတ်ဖို့ အဆင့်၆ဆင့်

    ဆယ်ကျော်သက်အရွယ် ဝက်ခြံတွေကို တိုက်ထုတ်ဖို့ အဆင့်၆ဆင့်

    အောက်မှာဖော်ပြထားတဲ့ အဆင့်တွေက သင်အပါအဝင် ဆယ်ကျော်သက်တွေအားလုံး သိထားသင့်တဲ့ အသားအရေကို ဖြူစင်ကြည်လင်စေတဲ့ နည်းတွေဖြစ်ပါတယ်။ သင်ထင်ထားတာထက် အများကြီး လွယ်ကူ အဆင်ပြေတာကို တွေ့ရ ပါလိမ့်မယ်။

    အဆင့် ၁။ ။ အရမ်းကြီး မပြင်းတဲ့.မျက်နှာသစ်ဆေးတွေကိုပဲ အသုံးပြုပါ။
    နီရဲရောင်ရမ်းတာတွေကို လျှော့ချပေးပြီး အသားအရေကို ပြန်လည်ကောင်းမွန်စေဖို့နဲ့ အဆီပြန်တာကို ထိန်းသိမ်းထားဖို့အတွက်ဆိုရင် မျက်နှာကို မျက်နှာသစ်ဆေး အပျော့စားနဲ့ တနေ့ကို နှစ်ကြိမ် သစ်ပေးပါ။ ကိုယ်တိုက်ဆပ်ပြာတွေ၊ မျက်နှာသစ် ဆပ်ပြာတုံးတွေဟာ အသားအရေကို အလွန်အမင်း ခြောက်သွေ့စေရုံသာမက ချွေးပေါက်တွေကိုလည်း ပိတ်စေတာမို့ သူတို့ကို မျက်နှာသစ်ဖို့အတွက် မသုံးသင့်ပါဘူး။ ခပ်ပြင်းပြင်း မျက်နှာသစ် ဆေးတွေကိုလည်း ရှောင်ကျဉ်သင့်ပါတယ်။ ဝက်ခြံဆိုတာ ကြမ်းကြမ်း ပွတ်တိုက်ပစ်ရုံနဲ့ ပျောက်သွား တတ်တာမျိုး မဟုတ်ပါဘူး။

    အဆင့် ၂.။ ။ မျက်နှာဂျီးချွတ်ပါ။
    ဝက်ခြံဖြစ်စေတဲ့ အကြောင်းခြင်းရာတွေထဲမှာ အရေပြားဆဲလ်အသေတွေ စုဝေးလာတာကတဆင့် ချွေးပေါက်တွေကို လာပိတ်တာဟာလည်း တခုအပါအဝင်ဖြစ်ပါတယ်။ အရေပြားဆဲလ်တွေ အကြောင်းအမျိုးမျိုးကြောင့် များပြားလာပြီး ချွေးပေါက်တွေရဲ့ နံရံတွေထူလာကာလည်း အပေါက်ကို ပိတ်စေပြန်ပါတယ်။ ဒီအချက် နှစ်ချက်လုံးဟာ အဆီတွေကို အပေါက်တွေထဲ ပြန်ဝင်သွားစေပြီး ဝက်ခြံဖြစ်ဖို့ အစပျိုးစေပါတယ်။ Salycylic acid (BHA)ပါတဲ့ ပစ္စည်းတွေကို သုံးပြီး မျက်နှာဂျီးချွတ်တာဟာ အကောင်းဆုံးနဲ့ အထိရောက်ဆုံးဖြစ်ပါတယ်။ BHAဟာ အရေပြားအပေါ်ယံလွှာကို ညင်သာ၊ ထိရောက်စွာ ဂျီးချွတ်ပေးနိုင်ရုံသာမက ချွေးပေါက်တွေရဲ့ အတွင်းပိုင်းကိုပါ စိမ့်ဝင်ပြီးအစွမ်းပြနိုင်ပါတယ်။ ဒါတင်မကသေးပါဘူး။ ဘက်တီးရီးယားပိုးတွေကို သတ်ပစ်နိုင်တဲ့ အပြင် အရေပြားနီရဲရောင်ရမ်းတာကိုလည်း ကာကွယ်ပေးနိုင်ပါတယ်။ ဒါ့ကြောင့် BHAပါဝင်တဲ့ မျက်နှာဂျီးချွတ်ဆေးတွေကို အသုံးပြုကြဖို့ တိုက်တွန်း အကြံပေးချင်ပါတယ်။ သုံးကြည့်ပါ၊ ရလာဒ်က အံ့ဩစရာ ကောင်းမွန်ပါလိမ့်မယ်။

    အဆင့် ၃။ ။ ဝက်ခြံဖြစ်စေတဲ့ ဘက်တီးရီးယားတွေကို အပြတ်ရှင်းပါ။
    Benzoyl peroxide ဟာ ဝက်ခြံဖြစ်စေတဲ့ ဘက်တီးရီးယားတွေကို အပြီးအပိုင် ချေမှုန်းပစ်နိုင်တဲ့အပြင် ဆရာဝန်ညွှန်ကြားစာမပါဘဲ အလွယ်တကူကျယ်ကျယ်ပြန့်ပြန့် ဝယ်ယူရရှိနိုင်တဲ့ ဝက်ခြံပျောက်ဆေးတွေထဲမှာတော့ အကောင်းဆုံးနဲ့ အစွမ်းအထက်ဆုံးလို့ ပြောလို့ရပါတယ်။ ဝယ်ယူတဲ့ အခါမှာ အရေပြားကို ထိခိုက်စေမယ့် ပစ္စည်းတွေ မပါဝင်ဘဲ ခပ်ပါးပါးလိမ်းနိုင်တဲ့ တံဆိပ်အမျိုးအစားကို ရွေးဝယ်ပါ။

    အဆင့်၄။ ။ နေလောင်ဒါဏ်မှ ကာကွယ်ပါ။
    နေ့တိုင်းနေလောင်ခံနေရရင် ဝက်ခြံကဘယ်နည်းနဲ့မှ ပျောက်နိုင်မှာမဟုတ်ပါဘူး။SPF ၂၅ဒါမှမဟုတ် အဲ့ထက်ကျော်တဲ့ အရည်အသွေးပြည့်ဝစွာ ထုတ်လုပ်ထားတဲ့ နေလောင်ခံခရင်မ်တွေကို အသုံးပြုမယ်ဆိုရင် ဝက်ခြံအပျောက်မြန်စေတဲ့ အပြင် နောက်ထပ်ဖြစ်လာမှာတွေကိုလည်း ကာကွယ်ပေးပါတယ်။ မိန်းကလေးတွေအတွက်ဆိုရင်တော့ ဖောင်ဒေးရှင်းခရင်မ် ဒါမှမဟုတ် ပေါင်ဒါ ဒါမှမဟုတ် နှစ်ခုလုံးကို နေလောင်ခံခရင်မ်နဲ့ တွဲသုံးနိုင်ပါတယ်။

    အဆင့် ၅။ ။ မျက်နှာပေါ်က အဆီတွေကို ရှင်းပစ်ပါ။
    ဟော်မုန်းလှုံ့ဆော်မှုကြောင့် ထွက်လာတာဖြစ်တဲ့ အဆီတွေကို တခုခုလိမ်းလိုက်ရုံနဲ့ ပျောက်ကွယ်သွားအောင် လုပ်ဖို့တော့ မဖြစ်နိုင်ပါဘူး။ ဒါပေမဲ့ အဆီဓါတ်အများအပြားပါတဲ့ အလှကုန်တွေကို မသုံးဘဲ ၊ အဆီပြန်ရင်သုတ်တဲ့ တစ်ရှူးလေးနဲ့ မကြာခဏဆိုသလို သုတ်ပေးမယ်ဆိုရင်တော့ အဆီပြန်တာကို အနည်းနဲ့ အများ ကာကွယ်ထိန်းချုပ်နိုင်မှာ ဖြစ်ပါတယ်။ နူးညံ့တဲ့ ရွှံ့စေးနဲ့မျက်နှာကို အုပ်ပြီး မှန်မှန်ပေါင်းတင်တာ ဒါမှမဟုတ် အဆီထိန်းတဲ့ တစ်ရှူးစက္ကူလေးတွေနဲ့ တနေကုန် သုတ်သုတ်ပေးတာဟာ အကောင်းဆုံးဖြစ်ပါတယ်။ ဘယ်လို တံဆိပ်အမျိုးအစားကိုပဲ သုံးသုံး အရေပြားကို ထိခိုက်စေတဲ့ menthol,camphor, alcohol တို့မပါဝင်ဖို့ သတိပြုပါ။

    အဆင့်၆။ ။ သတိကြီးစွာထားပြီး ညှစ်ပါ။
    အင်မတန် စိတ်အနှောင့်အယှက်ပေးတဲ့ ဝက်ခြံကို ဒီအတိုင်းထိုင်ကြည့်နေဖို့ဆိုတာ မဖြစ်နိုင်သလောက်ပါပဲ။ ဒါပေမဲ့ မတရားညှစ်တာ၊ ဆိတ်ဆွနေတာမျိုးတွေဟာလည်း အမာရွတ်ထင်စေတဲ့ အပြင် ဝက်ခြံကို ပိုလို့တောင်ဆိုးလာစေမှာပါ။ ဘယ်လိုပဲဖြစ်ဖြစ် ဝက်ခြံကို မှန်မှန်ကန်ကန် ညှစ်ထုတ်တတ်မယ်ဆိုရင် ပိုးဝင်ပြီး ရောင်ရမ်းတာတွေလည်း သိပ်မဖြစ်နိုင် တော့သလို အနာကိုလည်း မြန်မြန်ကျက်စေမှာဖြစ်ပါတယ်။

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

    စာရေးသူ ဓာတ်ပုံ
    Dr. Thiha Phyo Myint မှ ရေးသားသည်။ 13/09/2019 တွင် ပြန်လည်ပြင်ဆင်ခဲ့သည်။
    Dr. K Zin Thwe မှ ကျွမ်းကျင်စွာ စစ်ဆေးထားပါသည်။