ချောင်းဆိုးတာ ကာကွယ်လို့ ရလား

အခုတလော နားထဲမှာ အကြားမိဆုံးအသံက ဘာသံလဲ။ ပတ်ဝန်းကျင်ကို သတိထားပြီး နားထောင်ကြည့်လိုက်ပါ။ ခုတလော နားထဲမှာ အကြားရဆုံးအသံက ချောင်းဆိုးသံပါ။ ရာသီအကူးအပြောင်းကာလမှာ ချောင်းဆိုးတာက အဖြစ်များပါတယ်။ ဒါကြောင့် နေရာတစ်ခါမှာ ချောင်း တဟွပ်ဟွပ် အသံကို ကြားနေရတာပါ။

ချောင်းဆိုးတာက ပြောတော့သာ ဘာရယ်မဟုတ်သလို ရှိပေမယ့် တကယ်ကတော့ ချောင်းဆိုးတာက အတော်ပင်ပန်းစေပြီး နေ့စဉ် လုပ်ငန်းဆောင်တာတွေအပေါ် အာရုံစိုက်နိုင်စွမ်း ကျဆင်းစေပါတယ်။ ချောင်းဆိုးရတာကလည်း ကျန်းမာရေးပြဿနာ တစ်ခုပဲ ဆိုတော့ အခြားရောဂါတွေလိုပဲ ချောင်းဆိုးတာ ကာကွယ်လို့ ရလားဆိုတာကို သိချင်နေပြီလား။ ဒါဆိုရင်တော့ ဆောင်းပါးလေးမှာ သိချင်နေမယ့် မေးခွန်းလေးရဲ့ အဖြေကို ပြောပြပေးထားတာမို့ အတူတူ ကြည့်လိုက်ရအောင်နော်။

ချောင်းဆိုးတယ် ဆိုတာ ဘာလဲ

ချောင်းဆိုးတယ်ဆိုတာက အသက်ရှူလမ်းကြောင်းရဲ့ ခုခံအားစနစ်တစ်ရပ်ပါ။ အသက်ရှူလမ်းကြောင်းထဲကို ဝင်ရောက်လာတဲ့ ပြင်ပက ဓာတ်မတည့်တဲ့ အရာတွေနဲ့ လည်ချောင်းထဲက ချွဲတွေကို ဖယ်ရှားဖို့ ခန္ဓာကိုယ်က ခုခံနေတဲ့ တုံ့ပြန်မှုပါ။ လူအတော်များများကတော့ လည်ချောင်း ရှင်းတဲ့အနေနဲ့ ချောင်းဆိုးကြပါတယ်။ အမျိုးမျိုးသော အကြောင်းအရင်းတွေက မကြာခဏ ချောင်းဆိုးတာကို ဖြစ်စေပါတယ်။

ချောင်းဆိုးတာက ပုံမှန်အားဖြင့် ရက်သတ္တပတ် ၂ ပတ်လောက်အတွင်းမှာ သိသိသာသာ သက်သာသွားတတ်ကြပါတယ်။ ပြင်းထန်တဲ့ ချောင်းဆိုးတာမျိုးတွေကတော့ ရက်သတ္တပတ် ၃ ပတ်လောက်အထိ မသက်သာတာမျိုး ရှိနိုင်ပါတယ်။

ချောင်းဆိုးတာက ၃ ပတ် ကနေ ၈ ပတ်လောက်အထိ ဖြစ်နေမယ်ဆိုရင်တော့ နာတာရှည်ချောင်းဆိုးတာလို့ သတ်မှတ်ရပါတယ်။ ချောင်းဆိုးတာက သွေးစလေးတွေ ပါနေမယ်။ ချောင်းဆိုးသံက အရမ်းကျယ်ကျယ်လောင်လောင် ဖြစ်မယ်ဆိုရင်တော့ သေချာလေး စောင့်ရှောက်ကုသမှု ခံယူဖို့ လိုပါမယ်။

ချောင်းဆိုးရတဲ့ အကြောင်းအရင်း

ချောင်းဆိုးရတဲ့ အကြောင်းအရင်းတွေက အများကြီးပါ။ အချိန်ခဏတာပဲ ချောင်းဆိုးတာမျိုး ရှိသလို အမြဲလိုလို ချောင်းဆိုးနေတာမျိုးလည်း ရှိပါတယ်။

• လည်ချောင်းရှင်းတာ
• ဗိုင်းရပ်စ် နဲ့ ဘက်တီးရီးယားတွေကြောင့် ချောင်းဆိုးတာ
• ဆေးလိပ်သောက်တာကြောင့် ချောင်းဆိုးတာ
• ပန်းနာရင်ကြပ်ကြောင့် ချောင်းဆိုးတာ
• ဆေးဝါးတွေကြောင့် ချောင်းဆိုးတာ
• အသံအိုး ထိခိုက်တာကြောင့် ချောင်းဆိုးတာ
• အဆုတ်ရောင်တာကြောင့် ချောင်းဆိုးတာ
• နှလုံးစွမ်းဆောင်ရည် ကျဆင်းမှုကြောင့် ချောင်းဆိုးတာ
• ကြက်ညှာချောင်းဆိုးကြောင့် ချောင်းဆိုးတာတွေပါ။

ချောင်းဆိုးတာ ကာကွယ်လို့ ရလား

• ကိုယ်ခံအား ကောင်းအောင် ဂရုစိုက်ပါ

• လက်ဆေးပါ

လက်ချောင်းလေးတွေက ရောဂါပိုးတွေ အများဆုံး ရှိနေနိုင်တဲ့ နေရာတွေပါ။ ဒါကြောင့် ချောင်းဆိုးတာကို ဖြစ်စေတဲ့ ရောဂါပိုးတွေလည်း ကပ်ငြိနေနိုင်ပါတယ်။ ဒါကြောင့် တစ်ခုခုကို ကိုင်တွယ်ပြီးတိုင်း လက်ကို ရေနဲ့ ဆပ်ပြာအသုံးပြုပြီး စက္ကန့် ၂၀ ကြာ သေချာလေး ဆေးကြောပေးပါ။

• ဆေးလိပ်ဖြတ်ပါ

ဆေးလိပ်သောက်တာက ကိုယ်ခံအားကို ထိခိုက်စေသလို အသက်ရှူလမ်းကြောင်း ကျန်းမာရေးကိုလည်း ထိခိုက်စေနိုင်ပါတယ်။ ဒါကြောင့် ချောင်းဆိုးတာကို ကာကွယ်ချင်တယ်ဆိုရင် ဆေးလိပ် ဖြတ်ပါ။

• ချောင်းဆိုးနေသူနဲ့ အနီးကပ် မနေပါနဲ့

ချောင်းဆိုးတာက ဗိုင်းရပ်စ်ကြောင့် ဖြစ်တာဆိုရင် တစ်ဦးကနေ တစ်ဦးကို ကူးစက်နိုင်ပါတယ်။ ဒါကြောင့် ချောင်းဆိုးနေတဲ့သူနဲ့ အနီးကပ်နေထိုင်ခြင်းက ချောင်းဆိုးတာကို ခံစားရနိုင်ခြေ များစေပါတယ်။ ဒါကြောင့် ချောင်းဆိုးနေသူနဲ့ အနီးကပ် မနေပါနဲ့။

• ပါးစပ်နဲ့ နှာခေါင်းစည်း တပ်ဆင်ပါ

ချောင်းဆိုးနေရင် ဖြစ်ဖြစ် ချောင်းဆိုးတာကို ကာကွယ်ဖို့ ဖြစ်ဖြစ် ပါးစပ်နဲ့ နှာခေါင်းစည်းကို တပ်ဆင်ဖို့ လိုပါမယ်။ ဒါမှ ကိုယ့်ဆီကနေ သူများ ကူးစက်တာမျိုး မဖြစ်စေမှာ ဖြစ်သလို သူများဆီကနေ ရောဂါပိုးတွေလည်း ကိုယ့်ဆီကို မကူးစက်မှာပါ။

• မျက်နှာကို လက်နဲ့ မထိပါနဲ့

မျက်နှာကို လက်နဲ့ထိတွေ့ကိုင်တွယ်တာက အသက်ရှူလမ်းကြောင်းကနေတဆင့် ရောဂါပိုးတွေ ဝင်ရောက်နိုင်ခြေကို များစေပါတယ်။ ဒါကြောင့် ချောင်းဆိုးတာကို ကာကွယ်ချင်တယ်ဆိုရင် မျက်နှာကို လက်နဲ့ ကိုင်တွယ်ထိတွေ့တာမျိုး မလုပ်ပါနဲ့။

ဒီအချက်တွေကို သေချာ ဂရုစိုက်ပေးမယ်ဆိုရင် ချောင်းဆိုးတာကို ကိုယ့်ဆီကနေ သူများဆီ မကူးစက်အောင်ရော သူများဆီကနေ ကိုယ့်ဆီကို မကူးစက်အောင်ပါ ကာကွယ်နိုင်မှာပါ။