ကိုယ်ဝန်ဆောင်တွေအတွက် အကောင်းဆုံးဖြည့်စွက်အာဟာရ ၁၀မျိုး

ကိုယ်ဝန်ဆောင်ကာလမှာ ကျန်းမာပြီး ညီညွတ်မျှတတဲ့အစာအာဟာရကို စားသုံးခြင်းက မိခင်လောင်းနဲ့ သန္ဓေသားကို ကျန်းမာစေနိုင်ပါတယ်။ ကိုယ်ဝန်ဆောင်ချိန်မှာ အားဆေးသောက်တယ်ဆိုပေမယ့်လည်း ကိုယ်ဝန်ဆောင်အမျိုးသမီးတွေမှာ လိုအပ်တဲ့ အာဟာရဓာတ်ပေါင်းစုံကို ရရှိစေဖို့ အစားအစာရွေးချယ်မှုမှန်ကန်ဖို့ကလည်း အရေးကြီးပါတယ်။ ဒီတစ်ခေါက်တော့ ကိုယ်ဝန်ဆောင်တွေအတွက် အကောင်းဆုံးဖြည့်စွက်အာဟာရ တွေအကြောင်း ပြောပြပေးချင်ပါတယ်။

အာဟာရဓာတ်မျှတအောင်စားသုံးခြင်းက လိုအပ်တဲ့ အာဟာရဓာတ်တွေရရှိနိုင်မယ့် အကောင်းဆုံးနည်းလမ်းပါတယ်။ ဗီတာမင်အားဆေးတွေသောက်နေပေမယ့် အားပြည့်ကျန်းမာစေတဲ့ အစာအာဟာရနေရာမှာ အားဆေးတွေနဲ့ အစားထိုးလို့မရဘူးဆိုတာကို မမေ့ပါနဲ့။ အားဆေးတွေက ကိုယ်ဝန်ဆောင်အမျိုးသမီးအတွက် လိုအပ်တဲ့ နေ့စဉ်အာဟာရဓာတ်တွေ လုံလောက်စေဖို့သာ အထောက်အကူပေးတာဖြစ်ပါတယ်။

ကိုယ်ဝန်ဆောင်အမျိုးသမီးတွေအနေနဲ့ ဗီတာမင်အားဆေးတွေကို ကျွမ်းကျင်ဆရာဝန်တွေရဲ့ အကြံပြုလမ်းညွှန်မှုနဲ့သာ သောက်သုံးသင့်တယ်ဆိုတဲ့အချက်ကလည်း အရေးကြီးပါတယ်။

ကိုယ်ဝန်ဆောင်တွေအတွက် အကောင်းဆုံးဖြည့်စွက်အာဟာရ ၁၀မျိုး

ကိုယ်ဝန်ဆောင်တွေအတွက် အကောင်းဆုံးဖြည့်စွက်အာဟာရ ၁၀မျိုး ကတော့

(၁) ကယ်လ်စီယမ်

မိခင်အတွက် အရိုးပွခြင်းကိုကာကွယ်ပေးပြီး ကလေးရဲ့ အရိုးနဲ့ သွားအတွက် ကောင်းမွန်စေပါတယ်။ ကိုယ်ဝန်ဆောင်ကာလအတွင်း သွေးဖိအားမြင့်တက်မှုကိုလည်း ကာကွယ်တားဆီးပေးနိုင်ပါတယ်။ သွေးလည်ပတ်မှုကောင်းစေနိုင်သလို ကြွက်သားနဲ့ အာရုံကြောစနစ်တွေကို ကျန်းမာစေနိုင်ပါတယ်။

နေ့စဉ်လိုအပ်တဲ့ ပမာဏ− ၁၂၀၀ မီလီဂရမ်

အရင်းအမြစ်များ – နို့နဲ့ နို့ထွက်ပစ္စည်း၊ ဒိန်ချဉ်၊ တို့ဟူး၊ ကယ်ဆီယမ် ဖြည့်စွက်ထားတဲ့ လိမ္မောရည်၊ အုတ်ဂျုံ

(၂) ကိုလင်းဓာတ်

မိခင်အတွက် အရိုးသန်မာစေပြီး သွေးဖိအားကို ထိန်းပေးပါတယ်။ ကလေးအတွက်တော့ ကျောရိုးမကြီးနဲ့ ဦးနှောက်အတွင်းက ပြဿနာတွေကို ကြိုတင်ကာကွယ်ပေးပြီး ဦးနှောက်ဖွံ့ဖြိုးမှုကို မြှင့်တင်ပေးပါတယ်။

နေ့စဉ်လိုအပ်တဲ့ ပမာဏ− ၄၅၀ မီလီဂရမ်

အရင်းအမြစ်များ – ကြက်ဥ၊ ဝက်မိုးခိုသား၊ ကြိတ်ထားတဲ့ အမဲသား၊ ဆော်လမွန်ငါး၊ ကြက်သား၊ ပန်းဂေါ်ဖီစိမ်း သို့မဟုတ် ပန်းဂေါ်ဖီအဖြူ။

(၃) Docosahexaenoic Acid (DHA)

DHA omega-3 fatty acids အမျိုးအစားဝင်တစ်ခုဖြစ်ပါတယ်။ ကလေးအတွက် ဦးနှောက်ဖွံ့ဖြိုးမှုနဲ့ အမြင်အာရုံအတွက် ကောင်းသလို မိခင်အတွက် နောက်ပိုင်းမှာ နှလုံးရောဂါဖြစ်လာနိုင်ခြေ လျော့နည်းစေပါတယ်။

နေ့စဉ်လိုအပ်တဲ့ ပမာဏ− ၂၀၀ မီလီဂရမ်

အရင်းအမြစ်များ – ငါးကြီးဆီ

(၄) ဖောလစ်အက်စစ်

ဖောလစ်အက်စစ်က ကလေးမှာ မွေးရာပါ ချို့ယွင်းချက်တွေ ဖြစ်တဲ့ နှုတ်ခမ်းကွဲ၊ အာခေါင်ကွဲ၊ အာရုံကြောမကြီး ပြဿနာတွေကို ကြိုတင်ကာကွယ်ပေးတဲ့အပြင် မိခင်မှာ သွေးအားနည်းရောဂါမဖြစ်အောင်ကာကွယ်ပေးပါတယ်။

နေ့စဉ်လိုအပ်တဲ့ ပမာဏ− ၄၀၀ မိုက်ခရိုဂရမ်

အရင်းအမြစ်များ -ဟင်းနုနွယ်၊ ပန်းမုန်လာစိမ်း၊ အမဲသား၊ ပန်းဂေါ်ဖီ၊ စတော်ဘယ်ရီ၊ အစိမ်းရောင်ဟင်းသီးဟင်းရွက်များ

(၅) အိုင်အိုဒင်း

ကလေးရဲ့ သိုင်းရွိုက်ဂလင်းဖြိုးမှုအတွက် လိုအပ်ပါတယ်။ သိုင်းရွိုက်ဟော်မုန်းချို့တဲ့တဲ့အခါ ကလေးတွေမှာ ဉာဏ်ရည်မဖွံ့ဖြိုးတာ၊ ဖွံ့ဖြိုးမှု နောက်ကျတာ၊ အကြားအာရုံ ချို့ယွင်းတာနဲ့ တခြားကျန်းမာရေး ပြဿနာတွေ ကြုံရတတ်ပါတယ်။

နေ့စဉ်လိုအပ်တဲ့ ပမာဏ− ၂၂၀ မီလီဂရမ်

အရင်းအမြစ်များ – ဒိန်ချဉ်၊ ပုစွန်၊ ဥ၊ အိုင်အိုဒင်းဆား

(၆) သံဓာတ်

သံဓာတ်က သွေးအားနည်းရောဂါမဖြစ်အောင် ကာကွယ်ပေးနိုင်ပါတယ်။ Hemoglobin တွေဖြစ်ပေါ်စေဖို့ အားဖြည့်ပေးပါတယ်။ ကိုယ်ဝန်ဆောင်ချိန်မှာ သံဓာတ်မပြည့်ဝဘူးဆိုရင် သံဓာတ်ချို့တဲ့ပြီး သွေးအားနည်းရောဂါဖြစ်စေနိုင်သလို မအီမသာဖြစ်တာ၊ ပင်ပန်းနွမ်းနယ်တာမျိုး ခံစားရနိုင်ပါတယ်။

အရင်းအမြစ်များ – အမဲသား၊ ဝက်သား၊ ဟင်းနုနွယ်၊ အစိမ်းရင့်ရောင် ဟင်းသီးဟင်းရွက်

(၇) ဗီတာမင် ဒီ

ဘေဘီလေးရဲ့ အရိုး နဲ့ သွားတွေ ကြံ့ခိုင်သန်မာစေဖို့အတွက် ကယ်လ်ဆီယမ်ကို စုပ်ယူနိုင်ဖို့ အကောင်းဆုံးထောက်ပံ့ပေးနိုင်ပါတယ်။ အရေပြားနဲ့မျက်လုံးကျန်းမာစေဖို့လည်း အကောင်းဆုံးထောက်ပံ့ပေးနိုင်ပါတယ်။

အရင်းအမြစ်များ – နို့၊ အဆီပါတဲ့ငါး၊ နေရောင်ခြည်

(၈) ဇင့်

ဇင့်က အင်ဆူလင်ကို ထုတ်လုပ်ပေးပြီး ကိုယ်တွင်းက ဇီဝကမ္မဖြစ်စဉ်တွေ ကောင်းကောင်းလည်ပတ်နိုင်ဖို့ လိုအပ်တဲ့ အင်ဇိုင်းတွေကို ထုတ်ပေးပါတယ်။ မိခင်ရဲ့ ခန္ဓာကိုယ်မှာ ဆဲလ်တွေကြီးထွားမှုနဲ့ ပြန်လည်ပြုပြင်မှုမှာလည်း ဇင့်ကိုလိုအပ်ပါတယ်။

နေ့စဉ်လိုအပ်တဲ့ ပမာဏ− ၁၁ မီလီဂရမ်

အရင်းအမြစ်များ – အနီရောင်အသား၊ ပဲ၊ နို့ထွက်ပစ္စည်း၊ ကမာ

(၉) ဗီတာမင် B1

ခွန်အားတိုးစေပြီး အာရုံကြောစနစ်ကို ကျန်းမာစေပါတယ်။

နေ့စဉ်လိုအပ်တဲ့ ပမာဏ− ၁.၄ မီလီဂရမ်

အရင်းအမြစ်များ – ကလီစာ၊ ကောက်နှံကြမ်း၊ ဥ၊ အစေ့အဆန်

(၁၀) ဗီတာမင် B6

သွေးနီဥတွေ ထုတ်လုပ်တာကို ကူညီပေးပြီး ကိုယ်ဝန်ဆောင်ချိန်မှာ ပျို့အန်တာကိုလည်း သက်သာစေပါတယ်။

နေ့စဉ်လိုအပ်တဲ့ ပမာဏ− ၁.၉ မီလီဂရမ်

အရင်းအမြစ်များ – ကြက်သား၊ ဝက်သား၊ ငါး၊ အသည်း၊ မုန်လာဥနီ၊ ဂေါ်ဖီ၊ အစေ့အဆန်

ဒါတွေအပြင် တခြားလိုအပ်တဲ့ အာဟာရတွေလည်း ရှိပါသေးတယ်။ ဒါကြောင့် ကိုယ်ဝန်ဆောင်ချိန်မှာ တတ်နိုင်သမျှ အစားမရှောင်ဘဲ အစုံစားပါ။ လိုအပ်တဲ့ ဗီတာမင်နဲ့ သတ္တုဓာတ်တွေ ရစေဖို့ တစ်ရက်ကို ချက်ပြီးသား အသီးအရွက် တရုတ်ပန်းကန်လုံးနဲ့ ၂−၃လုံး၊ အသီးအနှံ တရုတ်ပန်းကန်လုံးနဲ့ ၁−၂လုံး စားပေးပါ။ တစ်မျိုးတည်းကို အများကြီး စားတာထက် အရောင်စုံ၊ အမျိုးစုံအောင် စားဖို့ အကြံပြုလိုပါတယ်။

[embed-health-tool-due-date]