သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

ask-doctor-icon

ဆရာဝန်အား အခမဲ့မေးမြန်းလိုက်ပါ။

Hello ဆရာဝန်မှာ သင့်အတွေးများကို အသိပေးနိုင်ပါတယ်။

ပိန်ပြီးညှက်နေတဲ့ ကလေးတွေအတွက် အလိုအပ်ဆုံးအာဟာရ

    ပိန်ပြီးညှက်နေတဲ့ ကလေးတွေအတွက် အလိုအပ်ဆုံးအာဟာရ

    တခြားကလေးတွေနဲ့ ယှဉ်လိုက်ရင် ကိုယ့်ရဲ့ကလေးက ဘာလို့ပိန်ပြီး အရပ်ပုပုလေးဖြစ်နေလဲဆိုတာ မေမေတို့ တွေးဖူးကြမှာပါ။ တကယ်တော့ ကလေးတစ်ယောက်က ကျန်းကျန်းမာမာ ပြည့်ပြည့်ဖြိုးဖြိုးနဲ့ ကြီးပြင်းလာဖို့ဆိုတဲ့နေရာမှာ နေ့စဉ်စားသုံးနေတဲ့ အစာအာဟာရသည် အလွန်အရေးကြီးတဲ့အရာတစ်ခုဖြစ်ပါတယ်။ ဗိုက်ဝရင်ပြီးရောဆိုပြီး ကလေးတွေကို သူတို့ကြိုက်တာတွေပဲ ကျွေးနေမိတဲ့အခါ ဗိုက်ကတော့ ပြည့်သွားပါရဲ့၊ လိုအပ်တဲ့အာဟာရဓါတ်တွေကို ကိုယ်ခန္ဓါက မရတော့တဲ့အခါ ကလေးက ပိန်ပြီးညှက်သွားတော့တာပေါ့။ ဒါတင်မကပါဘူး၊ အာဟာရဓါတ်တွေ ချို့တဲ့စွာနဲ့ ကြီးပြင်းလာတဲ့ကလေးတစ်ယောက်က ရုပ်ပိုင်းဆိုင်ရာမှာရော စိတ်ပိုင်းဆိုင်ရာမှာပါ ချို့ယွင်းမှုတွေ အများအပြားနဲ့ ရင်ဆိုင်ရနိုင်ပါတယ်။

    ကလေးတစ်ယောက် ကောင်းကောင်းကြီးထွားနိုင်ဖို့ ဘယ်လိုအာဟာရဓါတ်တွေ လိုအပ်လဲ။

    ကိုယ်ခန္ဓါကြီးထွားဖွံ့ဖြိုးစေဖို့နဲ့ အရပ်ရှည်ထွက်လာစေဖို့ ပရိုတင်းလို့ ခေါ်တဲ့ အသားဓါတ်၊ တစ်နေ့တာကုန်ဆုံးသွားတဲ့ စွမ်းအင်တွေကို ပြန်လည်ဖြည့်ပေးဖို့ ကာဗိုဟိုက်ဒြိတ်လို့ခေါ်တဲ့ ကစီဓါတ်၊ ဗီတာမင်နဲ့ သတ္တုဓါတ်တွေ၊ အရိုးနဲ့ သွားကို သန်စွမ်းစေတဲ့ ကယ်လ်စီယမ်ဓါတ်တွေ မဖြစ်မနေလိုအပ်ပါတယ်။ ဒီအာဟာရဓါတ်တွေကို တစ်နေ့တာလိုအပ်တဲ့ ပမာဏအတိုင်း ရရှိပါမှ ကလေးတွေလည်း ကျန်းမာပျော်ရွှင်စွာနဲ့ ကြီးပြင်းလာနိုင်မှာဖြစ်သလို အသက်ကြီးလာတဲ့အခါမှာလည်း လွယ်လွယ်နဲ့ ရောဂါတွေဖြစ်လာနိုင်တော့မှာ မဟုတ်ပါဘူး။ ဒါကြောင့် တစ်နေ့တာစားသုံးတဲ့ အစာအာဟာရကို ဂရုစိုက်ပေးဖို့ မေမေတို့မှာ တာဝန်ရှိတယ်ဆိုတာ သတိထားသင့်တယ်နော်။

    အာဟာရဓါတ်တွေက ကိုယ်ခန္ဓါပေါ် ဘယ်လိုသက်ရောက်မှုဖြစ်စေလဲ။

    ၁။ ကယ်လ်စီယမ်ဓါတ်

    မြန်မာနိုင်ငံက ကလေးတွေ တော်တော်များများ ပိန်ပြီးညှက်နေတယ်ဆိုတာ ကယ်လ်စီယမ်ချို့တဲ့လို့ပါပဲ။ ကယ်လ်စီယမ်ဓါတ်ကို အများဆုံးပေးနိုင်တဲ့ အစားအစာက နွားနို့နဲ့ နို့ထွက်ပစ္စည်းတွေပါပဲ။ ဒါကို လုံလောက်အောင် မကျွေးဘဲ ထမင်းချည်း သီးသန့်ကျွေးနေတဲ့အခါ အာဟာရက ရသင့်သလောက်မရတော့ဘဲ ချို့တဲ့သွားတာပေါ့။ ကယ်လ်စီယမ်ဓါတ်ဟာ ကြွက်သားနဲ့ အရိုးအဆစ်တွေကို သန်မာစေလို့ ကြီးထွားဖွံ့ဖြိုးမှုကို အထောက်အကူပေးတယ်။ ဦးနှောက်နဲ့ အာရုံကြောစနစ်ကို ကောင်းမွန်စေလို့ ကလေးတွေ ငယ်ငယ်ရွယ်ရွယ်နဲ့ မျက်စိမှုန်တာ၊ အာရုံကြောအားနည်းတာတွေ မရှိဘဲ အတန်းထဲမှာ စာကောင်းကောင်းလိုက်နိုင်စေတယ်။ ဒါကြောင့်ကျောင်းနေအရွယ်ကနေ အသက်ကြီးလာတဲ့အထိ ကယ်လ်စီယမ်ဓါတ်ကို နေ့စဉ်ပြည့်ဝစွာ စားသုံးပေးဖို့ အရမ်းအရေးကြီးပါတယ်။ ကယ်လ်စီယမ်ဓါတ်ကို နွားနို့နဲ့ နို့ထွက်ပစ္စည်းအပြင် အစိမ်းရောင်ရှိတဲ့ ဟင်းသီးဟင်းရွက်တွေ၊ ပဲပိစပ်အပြင် တခြားပဲအမျိုးမျိုး၊ အခွံမာသီး၊ အရိုးပါဝါးစားလို့ရတဲ့ ငါးတွေဆီကနေ ရနိုင်ပါတယ်။

    ၂။ အသားဓါတ်၊ ပရိုတင်းဓါတ်

    ကလေးကြီးထွားဖွံ့ဖြိုးမှုကို အထောက်အပံ့ပေးတဲ့ နောက်ထပ် အာဟာရဓါတ်တစ်မျိုးကတော့ ပရိုတင်းဓါတ်ပါပဲ။ ပရိုတင်းဓါတ်ဟာ ကြွက်သားတွေကို ကြီးထွားစေပြီး အရိုးအဆစ်တွေကို သန်မာစေတယ်။ တစ်နေ့တာအတွက် လိုအပ်တဲ့ အားအင်တွေကို ဖြည့်စွမ်းပေးနိုင်လို့ ကလေးကို လန်းဆန်းတက်ကြွစေကာ မှတ်ဉာဏ်ကောင်းစေတယ်။ ကိုယ်ခံအားစနစ်ကို မြှင့်တင်ပေးလို့ ကိုယ်ခန္ဓါထဲ ဝင်လာတဲ့ရောဂါပိုးတွေကို တိုက်ထုတ်ပေးနိုင်ပြီး ဖျားနာတွေမဖြစ်စေဖို့ ကာကွယ်ပေးနိုင်ပါတယ်။ မြန်မာနိုင်ငံက ကလေးတွေ ပိန်နေရတဲ့အကြောင်းရင်းထဲမှာ ပရိုတင်းဓါတ်ချို့တဲ့တာလည်း တစ်ခုအပါအဝင်ပါပဲ။ ဒါကြောင့် ကြီးထွားဖွံ့ဖြိုးဆဲအရွယ် ကလေးတွေအတွက် ပရိုတင်းဓါတ် လုံလောက်စွာရဖို့ အသား၊ ငါး၊ ပဲအမျိုးမျိုး၊ နွားနို့နဲ့ နို့ထွက်ပစ္စည်း၊ ဥအမျိုးမျိုး၊ ပဲအမျိုးမျိုးကို နေ့တိုင်း ကျွေးပေးဖို့လိုအပ်ပါတယ်။

    ၃။ ကာဗိုဟိုက်ဒြိတ်၊ ကစီဓါတ်

    ကလေးဆိုတာ အမြဲလှုပ်ရှားကစားနေတာဖြစ်တဲ့အတွက် အားအင်ကုန်ခမ်းပြီး ပင်ပန်းတတ်တာ သဘာဝပါပဲ။ ကစီဓါတ်တွေကို လိုအပ်တဲ့ ပမာဏအတိုင်း စားသုံးတဲ့အခါ တစ်နေ့တာလုံး ကုန်ဆုံးသွားတဲ့အားအင်တွေကို ပြန်လည်ဖြည့်တင်းပေးတယ်။ ဦးနှောက်၊ ကျောက်ကပ်၊ နှလုံးကြွက်သားနဲ့ အာရုံကြောစနစ်ကို အားကောင်းစေတယ်။ ကြီးထွားဖွံ့ဖြိုးနေဆဲအရွယ်ဖြစ်တဲ့ ကလေးတွေအတွက်လည်း ကြွက်သားထုတည်ဆောက်ခြင်းကို ကူညီအားဖြည့်ပေးလို့ အရပ်ရှည်ပြီး လျင်မြန်စွာ ကြီးထွားလာနိုင်ပါတယ်။ ကစီဓါတ်ကို ဆန်လုံးညို၊ ကန်စွန်းဥ၊ ပြောင်းဖူး၊ ပဲ၊ မုန်လာဥနီ၊ ငှက်ပျောသီး၊ ဘယ်ရီသီး၊ သစ်တော်သီး၊ ကီဝီသီး အစရှိတဲ့အသီးအနှံ၊ ပဲအမျိုးမျိုး၊ နွားနို့နဲ့ နို့ထွက်ပစ္စည်းတွေ၊ ဟင်းသီးဟင်းရွက်၊ အစေ့အဆန်တွေကနေ ရရှိနိုင်ပါတယ်။

    ၄။ ဗီတာမင် နဲ့ သတ္တုဓါတ်တွေ

    ဒီအာဟာရဓါတ်တွေက ကလေးတွေကို ကျန်းမာပြီး ဦးနှောက်ဉာဏ်ရည်ထက်မြက်စေတယ်။ ကိုယ်တွင်းအင်္ဂါတွေရဲ့ လုပ်ဆောင်ချက်ကို မြှင့်တင်ပေးပြီး ကိုယ်ခံအားကိုကောင်းစေတယ်။ ခန္ဓါကိုယ်ရဲ့ ကိုယ်အလေးချိန်ကိုလည်း ထိန်းညှိပေးပြီး အလွယ်တကူဖျားနာခြင်း၊ ရောဂါတွေကို ကာကွယ်ပေးတဲ့နေရာမှာလည်း အထောက်အကူပေးပါတယ်။ ဒါ့အပြင် ကိုယ်ခန္ဓါရဲ့ တခြားသော အာဟာရဓါတ်တွေ စုပ်ယူနိုင်စွမ်းကို မြှင့်တင်ပေးလို့ မဖြစ်မနေ စားပေးဖို့လိုအပ်ပါတယ်။ ဗီတာမင်နဲ့ သတ္တုဓါတ်တွေကို နေ့စဉ်စားသုံးနေတဲ့ အစားအစာတွေဖြစ်တဲ့ အသား၊ ငါး၊ နွားနို့၊ နို့ထွက်ပစ္စည်း၊ ဥ၊ ပဲ၊ အစေ့အဆန်၊ ဟင်းသီးဟင်းရွက်၊ အသီးအနှံအားလုံးကနေ ရရှိနိုင်ပါတယ်။

    ဒါကြောင့် ကိုယ့်ရဲ့ကလေးကို ကျန်းကျန်းမာမာနဲ့ ပြည့်ပြည့်ဖြိုးဖြိုး ကြီးပြင်းလာစေချင်တယ်ဆိုတဲ့ မေမေတွေလည်း ဒီနေ့ကစလို့ ကိုယ့်ကလေးရဲ့ တစ်နေ့တာစားသုံးတဲ့ အစာအာဟာရကို သေချာဂရုစိုက်ဖို့တော့ လိုမယ်နော်။

    health-tool-icon

    ကလေးကာကွယ်ဆေးထိုး အချိန်ဇယား

    ကာကွယ်ဆေးထိုးအချိန်ဇယားကို အသုံးပြုပြီး သင့်ကလေး ဘယ်ကာကွယ်ဆေးကို ဘယ်အရွယ်မှာ ထိုးသင့်တယ်ဆိုတာကို လေ့လာလိုက်ပါ။

    ကလေးက ယောက်ျားလေးလား၊ မိန်းကလေးလား

    အမျိုးသား

    အမျိုးသမီး

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

    စာရေးသူ ဓာတ်ပုံbadge
    Aye Thi Mon မှ ရေးသားသည်။ 18/07/2022 တွင် ပြန်လည်ပြင်ဆင်ခဲ့သည်။
    Hello Sayarwon Panel မှ အချက်အလက် စစ်ဆေးထားပါသည်။
    Next article: