home

What are your concerns?

close
Inaccurate
Hard to understand
Other

သို့မဟုတ် လင့်ခ်ကူးယူမည်

ကြီးလာရင် နှလုံးရောဂါဖြစ်မလား သိစေနိုင်မယ့် နိမိတ်လက္ခဏာ ၂ ရပ်

ကြီးလာရင် နှလုံးရောဂါဖြစ်မလား သိစေနိုင်မယ့် နိမိတ်လက္ခဏာ ၂ ရပ်

နှလုံးရောဂါဟာ အဖြစ်များတဲ့ရောဂါတစ်ခုဖြစ်ပြီး အသက်အန္တရာယ်ကို ထိခိုက်နိုင်စေတဲ့ ရောဂါတစ်ခုလည်းဖြစ်ပါတယ်။ အမေရိကမှာဆိုရင် လူ ၇ ယောက်မှာ ၁ ယောက်နှုန်း နှလုံးရောဂါ ခံစားနေရပြီး တစ်နှစ်ကို လူ သုံးသိန်းခွဲလောက် နှလုံးနဲ့သက်ဆိုင်တဲ့ ရောဂါတွေကြောင့် အသက်ဆုံးရှုံးနေကြရပါတယ်။

စာရင်းဇယားတွေအရဆိုရင်လည်း Heart Attack ဖြစ်တဲ့လူတွေရဲ့ ၁၄% ဟာ အဆိုပါဝေဒနာကြောင့် အသက်ဆုံးရှုံးနေကြရတယ်လို့လည်း ဆိုထားပါတယ်။

အန္တရာယ်များတဲ့ အဆိုပါရောဂါဟာ မျိုးရိုးလိုက်ခြင်းကြောင့် ဖြစ်ပွားနိုင်သလို အစားအသောက်အနေထိုင် အပြုအမူတွေ မှားယွင်းနေတာကြောင့်လည်း ဖြစ်ပွားနိုင်ပါတယ်။

အထူးသဖြင့် ငယ်ရွယ်စဉ်မှာ အဝလွန်တာနဲ့ အမျိုးအစား ၂ ဆီးချိုဝေဒနာတွေ ရှိနေမယ်ဆိုရင် အရွယ်ရောက်လာချိန်မှာ နှလုံးရောဂါ စောလျင်စွာ စွဲကပ်နိုင်ပါတယ်။ ဒီအချက်ကို အမေရိကန်နှလုံးကျန်းမာရေးအဖွဲ့အစည်းက ၁၇ အရွယ်လူငယ်တွေကို ၅ နှစ်ကြာ သုတေသနပြုလုပ်ပြီး ၂၀၂၀ ခုနှစ် မေလတုန်းက ထုတ်ပြန်ကြေညာခဲ့တာပါ။

ဆီးချိုရော၊ အဝလွန်ခြင်းရော ၂ မျိုးလုံးဟာ သွေးကြောတွေကို ထိခိုက်စေနိုင်တာကြောင့် အရွယ်အတိုင်ခင် နှလုံးရောဂါဝေဒနာ ခံစားရတာမျိုးကို ဖြစ်စေတာပါ။
လေ့လာချက်တွေအရဆိုရင် အဆိုပါ ရောဂါ ၂ ခုကို ငယ်ရွယ်စဉ်မှာ ခံစားရမယ်ဆိုရင် နှလုံးရောဂါဖြစ်ပွားရုံသာမက ပိုမိုဆိုးရွားတဲ့ အခြေအနေတစ်ရပ်မှာ Heart Attack နဲ့ လေဖြတ်ရောဂါတွေ ဖြစ်နိုင်ခြေပါ အလွန်မြင့်တက်လာမှာ ဖြစ်ပါတယ်။

  • ငယ်ရွယ်စဉ်မှာ အဝလွန်ခြင်း – အလွန်ငယ်ရွယ်တဲ့ အရွယ်မှာကတည်းက ကိုယ်အလေးချိန်မြင့်မားနေတဲ့ ကလေးတွေဟာ ကြီးပြင်းလာချိန်မှာ နှလုံးရောဂါဖြစ်ပွားဖို့ သေချာသလောက် အခြေအနေမျိုးဖြစ်ပါတယ်။ ဒါကြောင့် လူငယ်တွေအနေနဲ့ အသက်ငယ်ရွယ်စဉ်မှာ နေထိုင်စားသောက်ပုံ သတိထားဖို့ လိုအပ်တာဖြစ်ပါတယ်။
  • လူငယ်ဘဝမှာ အမျိုးအစား ၂ ဆီးချိုရောဂါ – အဖြစ်များတဲ့ အမျိုးအစား ၂ ဆီးချိုဝေဒနာကြောင့်လည်း ခုလို နှလုံးရောဂါဖြစ်နိုင်ပါသေးတယ်။ ငယ်ရွယ်တဲ့အသက်အရွယ်မှာ ဆီးချိုဝေဒနာ ခံစားရတာက အရွယ်ရောက်ချိန်မှာ နှလုံးရောဂါဖြစ်လာစေနိုင်တဲ့ အကြောင်းအရင်းတစ်ခုဖြစ်ပါတယ်။

အကြောင်းတရားများ

လေ့လာချက်တွေအရဆိုရင် ငယ်ရွယ်စဉ်မှာ အထက်ပါရောဂါ ၂ မျိုးရှိနေမယ်ဆိုရင် နှလုံးသွေးကြောကို ပိုမိုကျဉ်းမြောင်းစေမှာဖြစ်ပြီးတော့ ဦးနှောက်ဆီ သွေးစီးဆင်းတဲ့ လည်ပင်းရိုးက သွေးကြောမတွေကိုလည်း ထိခိုက်စေမှာဖြစ်တယ်လို့ ဆိုထားပါတယ်။ ကိုယ်အလေးချိန်မြင့်မားနေတဲ့ ကလေးတွေရဲ့ သွေးကြောတွေဟာ သာမန်ကလေးတွေထက် ပိုပြီး ကျဉ်းမြောင်းနေတတ်ပါတယ်။

သွေးတိုးနဲ့ အဝလွန်ခြင်းတွေဟာ သွေးလည်ပတ်စီးဆင်းမှုနဲ့သွေးကြောတွေအပေါ် သက်ရောက်မှုရှိနေတာမို့ အရွယ်ရောက်လာချိန်မှာ ပြင်းထန်တဲ့နှလုံးရောဂါတွေဖြစ်စေဖို့ အကြောင်းတရားဖြစ်ကြောင်း University of Colorado School of Medicine က သုတေသနပညာရှင်တွေလည်း ဆိုထားပါတယ်။ သွေးတိုးနဲ့ အဝလွန်ခြင်းတွေဟာ သွေးလည်ပတ်မှုနဲ့ သွေးကြောပုံစံတွေကို ပုံမှန်အခြေအနေကနေပြီး တဖြေးဖြေးခြင်း ပြောင်းလဲသွားစေတာပါ။ ဒါကြောင့် ကြီးပြင်းလာချိန်မှာ နှလုံးကိုထိခိုက်စေတော့တာပါ။

ဘယ်လို ကာကွယ်ကြမလဲ

လူငယ်တစ်ယောက် အဝလွန်နေမနေဖို့ ဆီးချိုဝေဒနာ မခံစားရစေဖို့ဆိုရင် ကျန်းမာပြီး အာဟာရပြည့်ဝစွာ မှီဝဲစားသောက်နေဖို့ လိုအပ်ပါတယ်။ မြီးကောင်ပေါက်အရွယ်တွေဟာ အစားအသောက်ကို စနစ်မကျစွာ အစားဆုံးအရွယ်ဖြစ်တာမို့ သတိမထားရင် ဆိုးကျိုးတွေ ဆက်ပြီးဖြစ်နိုင်ပါတယ်။

ဒီလိုအရွယ်မှာ ကျန်းမာရေးပြဿနာတွေဖြစ်လာစေတဲ့ အဓိကအကျဆုံးပြဿနာကတော့ အစားအသောက်ကတော့ အဓိကပေါ့။ နောက်ကိုယ်လက်လှုပ်ရှားမှုနည်းတာလည်း ပါပါတယ်။ အဝလွန်ခြင်းမှာဆိုရင်တော့ မျိုးရိုးဗီဇနဲ့ ဟော်မုန်းတွေကလည်း သက်ဆိုင်နေတာကို မေ့ထားလို့တော့မရပါဘူး။

အကြမ်းဖျဉ်းအားဖြင့်တော့ အောက်ပါအချက်တွေကို ဂရုစိုက်လိုက်နာပေးရင် အဝလွန်တာနဲ့ ဆီးချိုပြဿနာတွေကို ကာကွယ်နိုင်မှာဖြစ်ပါတယ်။

  • ကယ်လိုရီများတဲ့ အစားအစာတွေ၊ အသင့်စားအစားအသောက်တွေ စားသောက်နေရင် လျှော့ခိုင်းတာ၊
  • အသက်အရွယ်နဲ့ ကိုက်ညီတဲ့ လေ့ကျင့်ခန်း တစ်မျိုးမျိုးပြုလုပ်ခိုင်းတာ၊
  • မိဘမျိုးရိုးမှာ ဒီလိုပြဿနာတွေ ရှိခဲ့ဖူးခြင်းရှိမရှိ စစ်ဆေးတာ၊
  • စိတ်ဖိစီးမှုမရှိအောင် ဂရုစိုက်တာ၊
  • သားသမီးရဲ့ ကျန်းမာရေး အခြေအနေကို မိဘတွေကိုယ်တိုင် ဂရုတစိုက်စောင့်ကြည့်နေတာမျိုးတွေပဲ ဖြစ်ပါတယ်။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

စာရေးသူ ဓာတ်ပုံbadge
Ye Zon Aung မှ ရေးသားသည်။ 22/06/2020 တွင် ပြန်လည်ပြင်ဆင်ခဲ့သည်။
Hello Sayarwon Panel မှ အချက်အလက် စစ်ဆေးထားပါသည်။