ကျောရိုးထိခိုက်ခြင်းအတွက် သင်ဘာတွေသိထားသလဲ

ခါးနာနေတယ်၊ လှုပ်ရှားလို့မကောင်းဘူး။ ကြာကြာမထိုင်နိုင်ဘူးဆိုတဲ့ ညည်းသံက ခဏခဏကြားရတတ်ပါတယ်။ ခါးနာတယ်ပဲ သိကြတာ။ကျောရိုးမှာ ဘာပြဿနာရှိနေလဲ၊ ခါးနာရတဲ့အကြောင်းရင်းကဘာလဲဆိုတာကရောဂါရှာဖွေစစ်ဆေးမှသာ သိနိုင်ကြမှာပါ။

ဘယ်လိုနည်းနဲ့ စစ်ဆေးမလဲ

ခါးနာခြင်းအတွက် ရောဂါရှာဖွေစစ်ဆေးတဲ့အခါ အဓိကနည်းလမ်းသုံးမျိုးရှိနိုင်ပါတယ် –

• ဓါတ်မှန်ရိုက်မယ်။ကျောရိုးမကြီးနဲ့ အရိုးအဆစ်တည်ဆောက်ပုံအခြေအနေ၊ ခါးဆစ်ရိုးပုံမှန်ရှိ၊ မရှိ၊ အကျိတ်ရှိ၊ မရှိ၊ ကျိုးအက်နေတာရှိ၊ မရှိ အသေးစိတ်သိနိုင်ဖို့ ဓါတ်မှန်ရိုက်စစ်ဆေးရပါတယ်။
• CT scan စစ်ဆေးမယ်။ခါးဆစ်ရိုးကျွံခြင်းလား ဒါမှမဟုတ် ခါးရိုးဆစ်ကျဉ်းခြင်းလား စသည်ဖြင့်ရောဂါအခြေအနေကို အတိအကျသိနိုင်ဖို့ CT Scan စစ်ဆေးရပါတယ်။
• MRI ပုံရိပ်ဖော်စစ်ဆေးမှုခံယူမယ်။MRI နဲ့ဆို ခါးရိုးဆစ်တွေနဲ့ အာရုံကြောတွေအတွက် အသေးစိတ်သိရှိနိုင်မယ်။ အများအားဖြင့်တော့ MRI scan ကို ခွဲစိတ်မှုမတိုင်ခင် စစ်ဆေးကြပါတယ်။
• ခါးရိုးဆစ်၊ကျောရိုးပြဿနာတွေအတွက်ရောဂါရှာဖွေအတည်ပြုနိုင်ဖို့ တခြားခေတ်မီစစ်ဆေးမှုနည်းလမ်းတွေလည်း ရှိပါသေးတယ်။

ဘယ်လိုကုသမလဲ

(၁) ဆေးဝါးများ

ခါးနာ၊ကျောရိုးနာတဲ့အခြေအနေပေါ်မူတည်ပြီး နာကျင်မှုသက်သာဖို့ သောက်သုံးနိုင်တဲ့ဆေးဝါးတွေကို ဆရာဝန်က ညွှန်ကြားပါလိမ့်မယ်။

• လတ်တလောခါးနာပျောက်စေမယ့် အကိုက်အခဲ ပျောက်ဆေးများ(acetaminophen, ibuprofen or naproxen)
• ကြွက်သားပြေလျော့ဆေးများ
• အကိုက်အခဲသက်သာစေမယ့် လိမ်းဆေးများ
• အခြားအနာသက်သာစေသောဆေးဝါးများ (codeine or hydrocodone နှင့် tricyclic antidepressants) ဒီဆေးတွေကိုတော့ ဆရာဝန်ညွှန်ကြားမှုရှိမှ သောက်သင့်ပါတယ်။
• သောက်ဆေးတွေနဲ့ မသက်သာရင် ထိုးဆေး(cortisone)ကိုအသုံးပြုနိုင်ပါတယ်။

(၂)ကျန်းမာရေးအသိပညာပေးခြင်း

ကျောရိုးနာသောအခြေအနေကိုထိရောက်စွာဖြေရှင်းနိုင်ဖို့ ကျန်းမာရေးအသိပညာလိုအပ်ပါတယ်။ လှုပ်လှုပ်ရှားရှားနေဖို့၊ စိတ်ဖိစီးမှုနဲ့ စိုးရိမ်ပူပန်မှုနည်းအောင်နေထိုင်ဖို့၊ နောက်ပိုင်းမှာ ထပ်မထိခိုက်မိအောင် သတိထားဖို့ စတာတွေကို အသိပညာပေးသင့်ပါတယ်။

(၃) အရိုးအဆစ်များပြန်လည်သန်စွမ်းရေးလေ့ကျင့်ခန်းနဲ့ကုသခြင်း

ကိုယ်ကာယလေ့ကျင့်ခန်းတွေက ခါးနဲ့ကျောရိုးနာခြင်းကိုကုသရာမှာ သိပ်အရေးကြီးပါတယ်။ ပြန်လည်သန်စွမ်းရေးကျွမ်းကျင် ပညာရှင်များက အနာသက်သာစေရန်ကုသမှုအမျိုးမျိုး ပေးပါလိမ့်မယ်။ အနာသက်သာပြီဆိုရင် ကျောရိုးနဲ့ ဗိုက်မှာရှိတဲ့ ကြွက်သားများပြန်လည်သန်စွမ်းလာစေမယ့် လေ့ကျင့်ခန်းတွေသင်ကြားပေးပါလိမ့်မယ်။

(၄) ခွဲစိတ်ကုသခြင်း

သိပ်အဖြစ်မများပေမယ့် တစ်ခါတလေ ခွဲစိတ်ကုသဖို့လိုအပ်လာနိုင်ပါတယ်။ ကျောရိုးနာပြီးခြေထောက်တစ်လျှောက်နာကျင်နေတဲ့ အခါ သို့ ကြွက်သားအားနည်းလာတဲ့အခါတွေမှာ ခွဲစိတ်ကုသပါက သက်သာနိုင်ပါတယ်။ ကျောရိုးနဲ့ အာရုံကြောမ ဖွဲ့စည်းပုံမမှန်တဲ့အခြေအနေတွေဆိုရင် ခွဲစိတ်ကုသသင့်ပါတယ်။

(၅) အခြားနည်းလမ်းများ

(၆) ဘယ်အချိန်မှာ ဆရာဝန်ပြသသင့်လဲ

• ခါး သို့မဟုတ် ကျောရိုးအရမ်းနာကျင်လို့ မလှုပ်ရှားနိုင်တဲ့အခါ
• ခြေထောက်ထုံကျင်ပြီး အားနည်းတဲ့အခါ ဒါမှမဟုတ် လမ်းလျှောက်ရာမှာ အခက်အခဲရှိလာတဲ့အခါ
• ဆီးနှင့် ဝမ်းမထိန်းနိုင်တော့တဲ့အခါ
• နာကျင်မှုကြောင့် ပုံမှန်လှုပ်ရှားမှုတွေကို မလုပ်နိုင်တော့တဲ့အခြေအနေဖြစ်လာတဲ့အခါ
• ခါးရိုး သို့မဟုတ်ကျောရိုးပုံသဏ္ဍာန် အချိုးအစားပျက်ယွင်းလာတဲ့အခါ

အာရုံကြောထိခိုက်ခြင်း သို့မဟုတ် တခြားရောဂါတစ်ခုခု၊ နောက်ဆက်တွဲဆိုးကျိုးတွေဖြစ်လာပြီလို့ ညွှန်ပြနေတာဖြစ်လို့ အမြန်ဆုံးကုသဖို့ လိုအပ်ပါတယ်။

Hello Health Groupသည် ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့်ကုသမှုများမပြုလုပ်ပေး ပါ။